馬沙筆記 Char Blogger

大廚出馬

2011-12-22T17:24:00.001+08:00

今日冬至,好多家庭主婦要準備大茶飯!

馬沙雖然已成家立室8年,不過做節都係返老家,所以準備個肚返老家就得!

太座公司今日開聖誕 party, 每人要負責一樣食物,今年我就『認頭』整沙律! 你地無睇錯,我亦都無寫錯, 『太座公司開聖誕 party, 我『認頭』整沙律!」! 點解會咁,因為馬沙由細到大都鐘意整嘢食! 每年太座公司開聖誕 party, 對馬沙嚟講, 都係一次表演嘅機會嚟!

今朝專登比平時早一小時起床, 整咗呢盤嘢比太座帶返公司。

各位觀衆......... 大廚出馬...........

Char's Salad With Smoked Salmon & Parma Ham (Italian Dressing)

維園白痴仔

2011-11-14T19:10:00.000+08:00

[林偉基人肉錄音機......林偉基人肉錄音機......林偉基人肉錄音機......]

先此聲明,貼呢條片嘅目的唔係想講林偉基, 反而係想講下最後得3XX幾票嘅維園白痴仔!

呢個選區,如果無陳婉嫻,上面兩個二揀一, 維園白痴仔都唔駛旨意蠃, 點睇條維園白痴仔都唔似真心為該區市民做嘢啦! 啲行為仲衰過啲小學雞嘈交,唉........!

身為人父,帶住小朋友係街上遇到呢條維園白痴仔,真係要即刻運路走! 小朋友只要學咗佢一成以上行為,包保即刻「輸在起跑線」!

改圖真不該!

2011-11-12T04:07:00.000+08:00

呢幾張好值得save起佢!

人不早抖枉英年!

香港版 The Good Wife

2011-10-04T19:33:00.000+08:00

早幾日嗰隻好似低低地嘅唐狗先走出嚟,對住大庭廣衆,大大聲咁吠:『在選舉中難免有不同的傳聞及緋聞,版本很多,甚具娛樂性,但不會評論有關報道。』

果然,呢隻唐狗處事方式又真係好鬼富娛樂性! 明明辭職唔守政務司官邸門口,原因係想轉守特首官邸嘅門口,就係都唔認,吠曰:『要諗多幾日!』。諗諗諗......諗乜Q?

今日仲攪鬼, 發表聲明:『承認過去在個人感情上曾經有過缺失，但獲得太太的諒解，並且得到太太原諒。多謝大家關心。而唐太就在聲明說在私人感情上早已決心不再往後看，相信大家會諒解。』

首先,究竟乜嘢叫『感情缺失』? 究竟唐狗曾經包二奶、婚外情、嫖妓定攪基呢? 唐狗你一日唔講清楚, 嚟緊買花生都買窮我!

其次,唔知唐狗太太係咪因為自9歲就識隻唐狗,且跟得隻唐狗太耐,攪到講嘢都好似隻唐狗一樣低低地。妳老公有負於妳,獲得妳諒解佢就得! 但關我地差事咩! 做乜又要大家諒解?

頭先睇電視見到唐狗拖住唐狗太太出嚟,以為佢會解釋比大家知乜嘢叫做『感情缺失』。點知佢又吠曰:『份聲名乜Q都講哂啦! 無嘢再補充!』咁........。之後仲好開心咁拖住唐狗太太返狗屋! 嗰一刻真係好似美劇『The Good Wife』開場一幕! 唔知唐狗太太返入狗屋有無好似Alicia 咁, 一大巴車落唐狗塊面到!

話時話,有傳聞話唐狗仲有隻『私生犬』跟尾! 明天放假,今晚都係要去買多幾包花生返屋企等睇戲 !

報應

2011-09-12T15:12:00.000+08:00

財演,

你地怕唔怕有報應 ........

X JAPAN 2011 World Tour Live in Hong Kong

2011-09-01T01:55:00.009+08:00

今次唔睇,唔知仲有無機會! 有買快手! We are X.......

今次應該有新歌聽.....

*******************************************************************
*******************************************************************

演出名稱 : X JAPAN 2011 World Tour Live in Hong Kong

演出日期 : 2011年11月4日

演出地點 : 亞洲國際博覽館 Asia World-Arena

演出時間 : 晚上8時正

票價 : $1,480 (企位) / $1,480 (坐位) / $880 (坐位) / $480 (坐位)
(HK$1,480企位: 年齡只限12歲或以上人士購買)

優先訂購日期由 2011年9月1日至 9月5日
數量有限，售完即止！

小家佬

2011-08-12T15:10:00.002+08:00

前日幾隻恒指藍色大隻佬食完午飯,無啦啦比條小家佬叫停賽,攪到午市亂哂大龍。點解咁亂,就係當時無人知發生緊乜嘢事!

呢件事嘅前因後果,條小家佬昨天已經一次過用英文、港府話及普通話交代咗。好彩件事唔係今日發生,否則條小家佬明天(七月十四)可能要用地府話用班地府大佬交代一次。

小家佬仲話佢當日嘅決定,完全係為咗一班小投資者利益。因為小投資者無得係嗰個『披露易」睇上市公司發放嘅資料,會做成不公平。老實講,你試下走去問100個有買股票嘅人,當中有幾多個曾經去過睇嗰個『披露易」。馬沙敢講,3個都未必有! 更枉論即巿時上去嗰個『披露易」睇業績公告。問下啲小投資者,有邊個唔係透過股票機、大利市機、電台、電視、網上財經新聞等等去獲得上市公司最新資訊?

再講,資料上唔到嗰個『披露易」,要求相關公司收市後先公佈啲資料就得,相關公司唔肯先要佢地停賽。如果相關公司有得揀, 段估都唔會揀停賽吧!

由此可見,一件小小事故就足以証明呢條小家佬智力遠低於猿猴! 『至於你信不信,反正我信了!』

天喬一號

2011-08-01T03:09:00.000+08:00

呢段片雖然假嘢,但馬沙就覺得條片好正,拍得好有味道,尤其嘆紅酒一節,幾鬼有意境!

比起嗰啲一味用靚鬼佬/鬼妹扮高級嘅真樓盤廣告,呢個『天喬一號』直情要攞廣告大獎!

天喬一號 Overpass Bottom No,1
位處交通樞紐正中．享盡大都會生活節拍

無憂生活值得擁有

貨幣之王

2011-07-14T02:01:00.002+08:00

美國聯儲局主席「白藍黑」係咪同香港啲高官一樣咁白痴我唔知,但係公開咁答以下問題就真真係.......唉.......同我地“屌屌fing”嘅唐司長將昂坪360英文講成“Ngong Ping 三碌拎”一樣咁攪笑.....

Federal Reserve Chair Ben Bernanke presented to the committee the Federal Reserve Board's semiannual report on monetary policy. July 13 2011

Ron Paul: "Do you think Gold is Money ?"
Ben Bernanke: "No....it's a precious metal"
.
.
.
Ron Paul: "Why do central banks hold it ?"
Ben Bernanke: ".........reserve....!"
Ron Paul : "Why don't Central Banks hold diamonds ?"
Ben Bernanke: "Well...TRADITION!."
Ron Paul : 阿Paul 即時忍唔住笑咗出聲.......

貨幣之王『黃金』為咗向美國聯儲局主席「白藍黑」宣示其貨幣主權,金價今晚即時升破歷史高位, 執筆時最高每盎司美元1,588.1 @_@!!

狂人

2011-04-28T19:06:00.003+08:00

卡達菲係咪狂人我唔知，但由佢執政40幾年嘅利比亞，人民就享有以下好多西方國家人民一直追求嘅政府福利：

1）擁有世界一級醫療設備並提供全民免費醫療服務；
2）免費教育，有能力出國求學由政府付全部費用；
3）結婚政府會比US$50,000;
4）國民享有政府免息貸款；
5）由於政府對汽車作出補貼，每個家庭輕易擁有汽車；
6）汽油及麵包平到好似唔使錢；
7）農民免稅。

如果卡達菲真係如近日西方主流傳媒報導講到咁邪惡,點解美國、法國、意大利等國,40幾年嚟都唔去攻打利比亞及驅逐卡達菲? 多國元首早幾年仲經常親自拜訪卡達菲,跟卡達菲還狀甚老友!

如今美國及北約聯軍攻打利比亞，驅逐卡達菲，究竟真係為咗解救利比亞國民，定係為咗自身利益？

好多嘢唔好淨係睇主流傳媒報導,睇下啲非主流報導。用其它角度去睇同一件事,都會有好多值得大家反思嘅地方同啟發！

身處係香港亦一樣，淨係睇主流傳媒及毒果，逢中必反、仇富，亦好容易跌入西方利益集團嘅圈套。

拆利是

2011-03-01T03:18:00.000+08:00

今年兩兄弟一齊去逗利是, 細佬唔識嘢,大佬就等拆利是等到頸都長......終於可以拆利是啦........

大佬今年嘅所有利是:

細佬都唔少嘢:

拆呀.......

總結:
大佬一共逗咗81封, 總數HK$6,310
細佬一共逗咗82封, 總數HK$6,330
細佬今年價、量同樣險勝!

給兒子的信 (六)

2011-02-28T23:24:00.002+08:00

親愛的德信:

很久已沒有寫信給你,記得上次寫信給你時,已經是2010年1月的事了!

時間過得真快,轉眼間一年已經過去,今年你已經升讀K2了。過去一年, 除了讀書(特別係英文方面)要多加努力外,其它方面的表現,為父相當滿意。為父今天特別為你記下你的生活點滴, 作為你日後的回憶。

在自我照顧方面, 你已學懂早晚自己刷牙和洗面。每朝早上吃完早餐, 你亦能夠自行換上校服,穿好鞋子,背上書包等為父送你到學校。午餐及晚餐,你亦懂得自己用筷子食飯,不過你用餐速度着實太慢,如每餐能吃快一點點就更好。自己沖涼、上床睡覺等小事,亦早已難不到你了。

除了讀書之外, 去年復活節後, 為父為你選了你人生中第一項課外活動, 就係學習游泳。雖然短短9個, 你已學識自由式, 現正學習背泳。希望你知道, 為父視游泳為一種求生技能,學識就好了。至於你有否潛質成為游泳健將, 對為父來說其實不太重要, 只要你學得開心就是了。

另外,由於你太好動及沒耐性, 為父及媽媽在你滿4歲後, 安排你去學習鋼琴。我倆目的亦好簡單,希望透過學習鋼琴, 段練你多一點兒耐性。

德信你大可以放心,除正常上學及上述兩項課外活動外, 短期內為父及媽媽都不會為你多選其它課外活動或學習班, 為的不是什麼, 僅是希望你能有一個快樂童年。

父 - 馬沙字

2011年2月28日深夜

政府創新聖誕短片

2010-12-20T16:48:00.001+08:00

今日好多人討論呢條片,不知你認為這個政府創新聖誕短片如何呢？

個人認為,意念幾創新,但如果能夠冊咗“起錨”呢句硬銷口號會更好!

我好欣賞MC Jin, 兩隻CD 我都有買,但係我個人認為政府聖誕短片無理由搵MC Jin,因為Jin 本身係“美國人(美藉華人)”! 香港本地有好多出名出色Rapper!

另外,好多唔識MC Jin嘅人,話佢真係好似 "數白欖" 就唔好叫做 rapper 囉~...唉........佢係正宗ABC, 中文識聽識講但係唔識睇,中文本身唔得,點可能rap得好? 所以我都話唔應該搵佢,尤其佢都唔係香港人!

MC Jin 係美國成名,其成名作係連續7次Rap贏黑人,成為美國某著名Freestyle rap battle節目7屆台主!

Obama選總統時,其中一首競選歌由佢作同Rap!

香港本地有好多出名出色Rapper, 比較出名有幫鄭秀文首“信者得愛"rap嘅"MC 仁"及"罪與罰"嘅"24Herbs"!

最後...不得不提, 政府係無可能搵MC仁或廿四味(24Herbs)幫手,就算政府夠膽,MC仁或 24Herbs一定唔會做!

點解? MC仁同24Herbs中阿傑同阿Phat 都係來自老董最怕嘅組合LMF!

LMF 嘅 "WTF"

好大喜功運動會

2010-12-17T14:33:00.001+08:00

睇緊有線直播申亞會議,有點不吐不快!

先講我自己立場,我反對申辦2023年亞運會!

用咁多錢申辦2023年亞運會,倒不如先興建多啲體育設施,加大對年青運動員(入選港隊前)培訓,以及加大專業運動員(入選港隊後)直接資助。

衆所周知,世界級運動員一定要自細培養。目前香港小朋友要成為運動員,係入選港隊前,家長要自資請一級教練去教,即使其後入選港隊,出外作賽大部分費用及比賽佩備係由運動員自費。結果,窮家子弟即使有天份,都無乜機會接受有系統培訓。單係呢方面,政府資助明顯不足。

中產及富家子弟呢? 有資源請一級教練去培訓,但只限幼兒級至初中。一到高中,多數要子女專心學業! 理由好簡單,啲父母睇唔到子女做運動員,代表完香港出去比賽退役後有乜出路,點會比自己仔女行呢條路?

早排同香港著名球星山度士食飯,山Sir話佢間足球學校,有好多父母帶小朋友去佢間足球學校,主要目的都係叫佢幫手寫推廌信入名校。遇過幾位好有潛質嘅小球員,佢地父母不但沒有支持,有啲更即時以專心學業為由,要個仔即時退學,免得個仔踼得好發球星夢。

香港根本無人睇得起運動員,港隊運動員服役時政府資助不足,退役後更加死路一條!

以上問題未攪好,學乜嘢人攪亞運會!

債仔:「我要做債主!」

2010-11-02T00:42:00.001+08:00

從前,有條友仔洗腳唔抹腳,結果欠落唔同嘅人好多錢!

為咗繼續洗腳唔抹腳,呢條友仔不但唔去搵錢還錢比債主,仲想出妙計(QE1),逼啲債主再借多啲錢比佢駛!

1年過去,條友仔欠落嘅錢比1年前以倍數增加! 第一及第二大債主好奇,自己無能力再惜錢比條友仔,究竟邊個借比條友仔呢?

早幾日,條友仔話比一眾債主聽,有一個新債主已經榮升第二大債主! 而呢位新任第二大債主,不是別人,竟然是條友仔自己!

條友仔仲衰到話為咗還債,星期三將會公佈QE2, 自己再借錢比自己! 咁....自己成為自己最大超級債主,指日可待..........

如果你係原來第一及第二大債主,有咩感想?

樓價痴線系列 (六)

2010-08-10T18:54:00.000+08:00

上文講過大角咀皇宮嘅車位問題,不妨再深入講下呢個盤嘅問題。老實講,呢個盤馬沙由佢平整地盤開始,一直睇住佢起,直到今年起名大角咀皇宮。所以上月去開奧海城飲茶,當然順道去參觀一下呢個吹到幾乎天上有地下無嘅皇宮示範單位。

當日馬沙接過樓書後,打開睇睇項目基本資料,見到住客車位得136個,覺得好鬼奇怪。一來大角咀皇宮唔似得最近熱賣嘅北角單幢樓項目「楂爬」咁,根本無乜位起停車場。二來大角咀皇宮話哂都係有6座樓嘅大型項目,其基座望落去無6層都應該有5層,無理由得咁少車位。

要了解多啲,當然又要睇吓本樓書。翻閱本樓書,初步確認基座共有6層(無4樓及唔計地下嗰層),詳情足本寫比大家睇下:-

6/F     會所
5/F     住宅大堂/會所
3/F     停車場/政府設施
2/F     停車場/政府設施
1/F     停車場
UG/F 商業用途/住宅穿梭電梯大堂
G/F     商業用途/住宅穿梭電梯大堂

認真啲睇,原來超過100個車位設於1樓。2及3樓主要係商用車位共約40多個。你又可能會好似馬沙咁好奇,想知私人皇宮基座2及3樓嘅規劃中,究竟可以有乜政府設施。咁就要揭開本樓書第11項有關「公共設施」一欄睇睇。

喺講大角咀皇宮嘅「公共設施」之前,馬沙有必要先強烈建議各新樓準買家,喺作出買樓決定前,必須認真細閱樓書有關「公共設施」一欄,因為好多時「魔鬼細節」盡在此欄中。

又講返大角咀皇宮嘅「公共設施」,究竟係乜嘢呢?

登登登.....答案係發展商及地產經紀都必定隻字不提嘅......「安老院舍」! 即係話,大角咀皇宮屋苑基座嘅 2及3樓,每層之中有約1/4樓面必須根據賣地條件興建一座安老院舍,並在2010年9月30日或之前完成及入伙。相信呢個都算第一個「據5大港鐵站、西九龍核心黃金圈」嘅後宮式老人院。難到發展商係方便班新業主,入伙時能夠安排家中老人順道遷入「後宮」安享天年?

仲有一樣,就係屋苑高層地下(UG/F),要24小時開放一條公眾免費行人通道,以方便公眾人士步行通過兩條(分別接駁現有行人天橋及接駁奧海城)全天候行人天橋。以後呢條行人通道必定24小時都人來人往,果然係「據5大港鐵站、西九龍核心黃金圈」嘅西九黃金圈地標皇宮。

樓價痴線系列 (五)

2010-08-09T15:10:00.000+08:00

講到假豪宅,馬沙相信普天之下,真係香港獨有。發展商由最初市區的屋苑式物業,求其冠以乜乜「豪園」、「豪庭」、「灣」、「半島」,到市區單幢式所謂精品豪宅,繼而深入不毛,依家遠至上水鄉郊,新開售嘅物業都會叫做豪宅。

個人認為,叫得豪宅,地點好一定係首要條件。例如港島半山、南區,九龍加多利山、何文田山、窩山,新界九肚山之類。而呢啲所謂傳統豪宅區都有一個共通點,就係唔會有港鐵直達,出入主要依賴私家車、專線小巴或的士。亦由於呢個原因,呢啲地方正常來講,除咗住客之外好少外人出入。相對地,呢啲地方私穩度就比較高,環境亦異常清靜。特別係零辰時份,專線小巴停駛後,馬路連車都唔多架,條街呢? 真係鬼影都唔多隻。

除咗地點要好之外,真正豪宅其中一個特色就係地方要夠大。傳統嘅豪宅,面積至小1,000至1,500呎,即室內可用空間850至1,300呎。以現今超級縮水嘅新樓計算,即建築面積至小1,300至2,000呎。真係有啲錢嘅人,即使1個人住,絕對唔會屈居於一個建築面績600呎,實用用面積400呎,扣除環保露台、超大窗台後可用面積可能唔夠300呎嘅假豪宅。

再講,一個真正豪宅,必須配備嘅唔係一個超豪會所,而係足夠比例嘅車位數目。住屋仔嘅固然之有自己車房,住屋苑式呢? 個人認為單位對車位數目比例最好達到1:1,即每戶至少能配備一個車位,就算無1:1, 至低限度都要1:0.8。試諗下買完間所謂豪宅,搬入去先發覺有錢都無車位泊車,真係人都癲。

就以早前馬沙睇過嘅大角咀皇宮為例,該皇宮一共有964單位,但車位只有136個,即單位對車位數目比例1:0.14。換句話說,平均每7戶才分配到一個車位。如果同時有幾架靚車嘅車主,住係嗰到都咪話唔煩。

或者你會話,我個豪宅位於乜乜港鐵站上蓋或甚麼黃金圈,交通四通八達,出入方便,駛乜揸車? 如果係咁就真係夏蟲不可語冰。

樓價痴線系列 (四)

2010-08-03T12:24:00.002+08:00

先唔講馬沙班老友嘅決定是否有錯,因為樓市好似股市一樣,高處未算高,呎價破完可以再破。加上香港人羊群心態極重,往往喜歡你買我又買,見人人炒樓又想加入炒樓,總之就唔好執輸。呢一點從2002年至2006年,樓價非常平穩,好多地方都有平樓,但唔係太多人肯入市就可見一班。

對於香港政府的房屋策略,由政府宣佈停建居屋,取消定期賣地一刻,已經知道香港政府在刻意限制土地供應,試途行回以前的高地價政策。其實政府當日咁做,都係想穩定樓價,因為當時好多發展商為求推盤散貨 ,不惜大幅劈價,樓花呎價常以低於同區2手樓推售。

今次樓市泡沫之所以形成,其中一個主要原因係各大發展商大約在05年起,開始捉摸到一班70後貪靚要面嘅心理。當時呢班70後正值結婚置業高峰期,亦係物業市場嘅最大一批新力軍,而呢班人買樓大致有一些基本要求。

首先,佢地好抗拒舊樓。即使一些傳統大型屋苑,上至太古城、杏花村,下至美孚、匯景花園及麗港城等等,佢地都會認為好舊,更枉論單幢樓。要佢地睇得上眼,先決條件係新樓。

其次,佢地一般要求屋苑有一個美輪美奐嘅住客會所。只要能在朋輩面前威威,就覺得付出貴一點兒都係值得。至於室內可用空間,反而奇怪地變得次要。

而以上呢兩種要求,多年來經朋輩互相感染,傳媒放大,發展商誇大式的廣告攻勢下,現在已經變為大部分香港人嘅置業需要。正所謂有求自必有供,發展商當然樂於配合。於是乎,各大發展商05年後紛紛落力興建所謂「假豪宅」去配合市場需要。而馬沙經常講嘅「假豪宅」亦開始在港九各區相繼出現。

「假豪宅」點假法? 另文再談。

樓價痴線系列 (三)

2010-07-29T00:00:00.013+08:00

馬沙老友最近就先後做出以下動作:

老友A本來跟家人同住,其實暫時無乜實際住屋需要。早3、4年樓市起步之初,馬沙及其他老友都曾經勸老友A先買入一個市區小型單位,租出等租客幫佢供住先,到有需要結婚時收回自住或賣出另購新婚居所。老友A一直不為所動,直到今年初,眼見樓價日日係咁升,而本來可買入一個市區小型單位的價錢,現時只能買入一個市區500呎居屋單位。老友A生怕遲啲連市區500呎居屋單位都買唔到,即時買入一個市區17年樓齡500呎居屋單位自住。

老友B於2003年結婚,婚後一直於青衣區租樓住。當年馬沙問佢既然有能力,青衣區樓價尚算合理,點解唔買? 老友B當時答曰:「見過97樓價係咁跌,都唔知跌完未,真係怕伯!」。老友B於06年生咗第一個小朋友,馬沙再問佢老哥會唔會買樓,佢話要再睇定啲先,如是者一租就7年。早兩個月,老友B終於出手,係青衣區買入一個11年樓齡近千呎單位自住。

老友C同女友拍拖多年,都係時候結婚。雖然資金不多,不過考慮到在低息環境下,計掂條數,供樓同租樓差不多,加上怕依家唔買,以後都買唔到。早幾個月在深水埗區以150萬以下買入一個近20年樓齡的小型單位自住。

老友D眼見將軍澳某大私人屋苑自住物業升咗成100萬,上月走去銀行加按,吐現80萬。上周以近250萬買入一個800幾呎將軍澳居屋單位作自住。而本來自住的私人屋苑物業將以約1萬元租出。經過悉心安排,往後扣除租金收入後,每月供樓淨支出降至3千多元。

老友E手持百萬元現金,近日聯同兄弟姊妹合資買入一個市區物業,準備放租3幾年後賣出,期望到時能財租兼收。

老友F一家四口連工人現住一個已供完的物業。由於現居根本不夠地方用,想換一個過千呎單位改善生活質數。睇樓數月,計算過風險後,已放棄睇那些過千萬假豪宅。取而代之,努力於何文田及窩打老道山一帶尋找實用率極高的過千呎近40年樓齡舊樓。上星期本已睇中一個盤,惟於落定時遭賣家反價而交易告吹。現仍努力睇樓中。

老友G夫婦最為進取,上月本準備以300萬作半自用及半投資方式買入何文田上車盤俊文苑細單位。佢地準備先租出物業,直到遲啲有小朋友後收回自住或在同區換樓,享受該區名校校網。不過早兩日聽朋友講開,老友G夫婦近日越睇越豪,早兩日已經睇緊廣播道近千呎單位。如果真係成事,風險都咪話唔高。

以上老友們在交易前,除非直接開口問馬沙個人意見,否則馬沙都唔會主動開口比意見,費事阻人發達。再講,買樓唔同買股票,買股票比錯意見輸極都有限。買樓睇錯市分分鐘輸身家,萬劫不復,97年真係見唔少。況且大多數嘅人,你比啱意見絕對唔會感謝你,因為係佢地自己好眼光。相反,比錯意見呢,分分鐘講足你一世及怨足你一世,仿彿自己完全無責任。

樓價痴線系列 (二)

2010-07-28T21:49:00.002+08:00

上文提到,馬沙對最近火熱嘅樓市越來越檐心。理由係政府早前已經試圖利用口術,再加所謂行政手段「九招十ニ式」去撲火,但樓市不但未有因此而降溫,在高價賣地後更如火上加油,多區呎價再下一城,更已有多個大型屋苑如太古城呎價超越97。

有人話好多地區跟97價仍有距離,所以未算泡沫。但問題係97距今已經13年,若計入13年物業折舊及將要面對的維修成本,其實好多比較高齡嘅大型屋苑,例如太古城、美孚、德福及淘大等等,個人認為現呎價以經超越97價。試問13年前(97時)已經30年的物業高峰賣$7,000一呎,今日43年樓仲值$7,000一呎嗎? 位處傳統豪宅區及極具發展商收購價值的物業可能可以除外。

另外,馬沙近月亦留意到越來越多「本來無想過要置業」、「本來未準備好置業」、「從未試過炒樓」及「本來無想過買樓收租」人士,突然四出睇樓,仲越睇越貴,好似啲樓唔駛錢咁。佢地突然趕住買樓,心態不外乎兩個。第一係啲樓越升越有,依家唔買,遲啲驚買唔到。第ニ係趁樓價仲未見頂,反正啲錢放係銀行又無息收,倒不如加入炒樓,或是買樓收租,一兩年後樓價升三兩成,再放出財息兼收。

實際例子,另文再講!

樓價痴線系列 (一)

2010-07-27T12:17:00.002+08:00

好耐無寫過關於香港樓市嘅睇法,對於目前嘅樓市,馬沙只能用一個「貴」字去形容。

記得對上一次寫樓市時,馬沙仲夠膽大大聲叫有實際住屋需要嘅準買家,只要認真計掂供樓條數,唔買所謂假豪宅,不妨入市。始終200幾萬6-700呎自住樓,進可攻、退可守。不過近呢幾個月,樓價越升越有,馬沙就開始有啲擔心。

首先,現時開賣的新盤,不論坐落何處,都話係豪宅,叫價無1萬都8,000蚊一呎。嘩,計一計,一個一家四口小家庭,若要加一個菲傭,建築面積700呎,實用面積得4xx呎,已經算係必須。但市區一個咁嘅新建成單位,叫價竟超過500萬。

現今香港夫婦合共月入6萬肯定唔算少,但要儲30%首期連雜費200萬(計及150物業首期、厘印費、律師費、裝修及家俬電器等等),談何容易? 即使攪掂份首期,上會350萬,在如此低息環境,月供2萬餘,已經不是輕鬆。若然他日不幸加息3、4厘,情況著實令人擔心。

坊間有專家話年底或明年前無加息空間,就算加息,升幅都只會好輕微。但世事難料,事問97年以息率10厘以上供樓嘅業主們,又可曾想到今時今日,供樓息率竟然可以低過1厘?

所以,在當前市況,買樓作投資用途及作自住用途要分得好清楚。買樓投資者,即係炒家,既然做得出呢種超高孖展玩意,後果自負。自住用家,尤其第一次置業者,緊記要計好條數,特別要做好壓力測試,例如先假設將來收入下調2成,供樓利息上調至5厘。要記住,香港好多97高位入市自住用家,能夠經歷樓價跌去一半以上,直到今日見到家鄉都未死,全因佢地過去10幾年,在數次股災樓劫,SARS及經濟低迷的環境下,仲持續有能力一直供樓。

最後,對於真係有住屋需要嘅首次置業者,究竟應否現在高追,則有時間再另文再談。

好文共賞

2010-07-26T17:36:00.000+08:00

非常值得港童父母深思的一篇文章.....

Cantonese, Please
By VERNA YU
Published: July 22, 2010

HONG KONG — I had always presumed that speaking to your child in your native tongue was the most natural thing in the world. Apparently not everyone thinks so.

When we held a birthday party for our two-year-old daughter several months ago, I had a bit of a shock.

The first sign came when a four-year-old Chinese boy looked annoyed and frustrated when I asked in Cantonese what snacks he would like from the table.

“No, no, no!” he yelled in English. His mother promptly translated what I said into English.

This baffled me. The boy was born and bred here in Hong Kong, and his parents are both native speakers of the dominant Cantonese dialect, but they speak to their children only in their less-than-perfect English.

It turned out they have a simple reason: They want their children to get into a prestigious international school.

They worry that if their children speak Cantonese at home they will not learn enough English to pass the interview.

The mother is delighted with her achievement. Her son has been accepted by an international kindergarten and her younger girl’s first words were all in English.

I quickly realized that she wasn’t the only one who thought like this. I noticed that several other parents at the birthday party were also speaking broken English to their children.

“I will show you how does it work,” said one father in heavily-accented English, showing a toy train to his 19-month-old son.

He admitted with slight embarrassment that his English pronunciation and grammar were not great, and trying to communicate with his toddler in a language he himself is struggling with has led to problems.

“One day I was trying to tell him this is how you button your shirt,” he said, switching into Cantonese. “But then I couldn’t say it in English, so I had to ring up a friend and ask.”

I asked: Doesn’t he think it is better to talk to his toddler in the language he is most at ease in?

“I think you’ve lived abroad for too long — you don’t understand what parents here have to think about,” the boy’s mother said. “Competition for international schools is fierce. If we don’t make sure he speaks English now, he won’t pass the interview.”

I looked at her very cute toddler, who was busy chasing a ball on the floor, and felt a bit sad.

The boy is not yet two, and he was still babbling away in baby words. Yet in this competitive world, it is considered better for him to be exposed only to English, a language that his parents are not confident speaking but one they believe is more valuable than their native tongue.

More and more, ambitious parents in Hong Kong are giving their children a head-start in English by putting them into English-speaking play groups, kindergartens and international schools. At these elite institutions, Mandarin Chinese is sometimes taught as a second language.

As for the local Cantonese dialect, who cares?

I am saddened. What will happen to those age-old nursery rhymes our grandmothers taught us, the songs we sang at kindergarten, those Tang-dynasty poems that every preschool child was taught to recite?

And surely the classic tales of the “Twenty-four pious sons” — the stories that the Chinese have used to teach their children about the Confucian virtue of filial piety since the 14th century — can’t have the same cultural resonance when translated into English.

Besides, Cantonese carries echoes of ancient Chinese that no longer exist in the official Mandarin. It is a lively language full of colorful expressions.

It is our heritage, and if we don’t pass it on, who will?

When these children are not taught to speak the language of their ancestors, a connection with their native culture is bound to be lost.

And when they grow up, how will they see themselves? Will they still have a sense of belonging to Chinese culture? Will this society’s future elites be international in outlook, yet somehow rootless in culture?

Perhaps I’m being alarmist, but I wonder whether there will be a day when we in Hong Kong come to regret the decline of our language. By that time, it may be too late.

Verna Yu is a freelance writer.

美元的崩盤 (Meltup)

2010-07-06T17:29:00.001+08:00

美國不斷狂印鈔票,美元最終會否崩盤呢個問題,馬沙想了一整年也未能找到一個比較好嘅結論,去說服自己怎樣面對即將到來的通貨膨脹問題。今天在網上巧遇以下由美國國家通膨協會（NIA）發表的一輯名為Meltup嘅影片,實在值得大家静心細味!

真係一個好有意思嘅節目!

Part 1

Part 2

Part 3

Part 4

Part 5

Part 6

連中三元

2010-06-21T19:56:00.000+08:00

我講緊嘅唔係世界杯大演帽子戲法,而係今個月發生嘅以下三件小事:

小事一:
月初某個假日冇嘢做,就揸隻愛驅去清潔扮靚,攪掂後本來開開心心回家,點知一出洗車屋轉入大馬路,突如其來一聲“砰!”.........愛驅大銀幕就多咗一條永遠不能癒合的疤痕....唉....

咁就冇咗HK$4,500......好彩老婆記起年初新轉份車保包換大銀幕 (上限仲要HK$5,000), 算做避咗一劫........

小事二:

早兩星期週六,一家四口準備出街,大大細細上哂車......“坐好....開車!”.......掛住吹水.....突如其來細細聲“砰!”.........犯了不能容忍的錯.......輕輕碰咗隔離隻馬仔一下....唉....雖然冇乜明顯傷痕,但無理由Hit & Run, 落車寫下電話留比隔離馬仔嘅馬主。上星期隔離馬仔嘅馬主終於打嚟問我乜事,睇嚟佢呢個星期日日揸隻馬仔出街都無發覺自己隻馬仔受咗小小皮外傷。

同佢交代完成件事,佢話有時間去睇下隻馬仔先覆我,但已經成個禮拜,仲未打比我!

小事三:

換完大銀幕唔夠一個星期,朝朝早着車車頭好鬼大聲,原來風油軚喉裂咗,咁又無咗HK$2,500.....唉.....

成個老襯，從此被困

2010-04-09T02:43:00.004+08:00

呢件事發生喺2010年1月16日.....

各位觀眾,呢招就係已經失傳已久嘅......佛山無影手....

只可惜,無論我嘅佛山無影手幾快,都快唔過妳嘅........無錫擒拿手......

唉......我之前都係拖過妳隻手仔兩次咁多,唔通我咁快就....成個老襯，從此被困?

嘩...好彩......原來又係做花仔......

睇嚟拖完呢次,都咪再拖佢,唔係下次真係嚟真.....

依.....嚟緊星期六好似又要「做好呢份工」喎!
喂....爸B....拖第二個囡囡得唔得呀?

成村人等緊你

2010-03-23T13:07:00.003+08:00

有揸開車嘅朋友,相信都曾經在停車場遇過以下情況。
當你需要停車等候前車用好長好長時間泊車時,你通常有乜反應呢?
如果本身唔係好趕時間,等下又有乜所謂?
其實泊車嗰位司機都好大壓力.........

好多年前,我就試過一次出席某會計師公會活動,遇到一位幾出名嘅女會計師,睇住佢用咗成15分鐘都泊唔到架車。我本來諗住落車幫佢睇下位,點知佢同我講佢平時揸開另一架細車,呢架大車係佢老公揸開,所以唔係好識泊。

最後..........我請咗佢落車........親自幫佢將架車泊好.......

昨晚睇呢段短片幾次忍唔住笑咗出聲,幾乎笑到連眼淚水都標.......
好笑之處並唔唔係泊車嗰位女士,而係停車等候嗰位馬拉人兄........

Wa pian a, you driving Lexus RX300, you dunno how to reverse meh.....

The whole kampong (鄉村) waiting for you already = 成村人等緊你

If dunno how to drive a Lexus, don't drive, you use bicycle better ring k easier to find carpark auntie...

Ah dui, this auntie really.....
My tahi want to come out already....
Shit want to come out already...

Reverse x 無限次.....

給兒子的信 (五)

2010-01-17T03:02:00.002+08:00

親愛的德信:

很久已沒有寫信給你,記得上次寫信給你時,已經是07年9月的事了!

今天晚上,為父決定要再寫信給你,目的是記下一件對你嚟講,是前所未有的事!

自從媽媽於1月4日零晨時份被為父送進醫院之後,這10多天以嚟,你只能與媽媽2次作很短暫會面。為父留意到你日間表面上跟平日沒有多大分別,但每天到晚飯時間,你都非常渴望媽媽能跟以往一樣,放工回家跟你一同耍樂、唱歌及看著你上床睡覺。

沒有媽媽在身邊的你,近日已將視線轉移到為父身上。記得早兩天為父因有工作在身,在與你晚飯後跟你說當天不能帶你回家,要你獨自留在嫲嫲家裡過夜。之後當我進房取衣服準備離開,一踏出房門,你竟自行穿好鞋子,笑說想去我公司「睇吓」時,你小臉上的表情已經出賣了你! 雖然你當時在笑,但你的眼晴卻準備掉下淚來...........雖然你在努力強忍,但我已看在心裏,並默默記下。希望你知道,我走後一直想念你當時的表情......

(Part 1)

寫到依到,都係時候向你講解呢件對你嚟講,所謂前所未有的事。媽媽今次入醫院嘅原因,並不是生病。所以,你不但止不會失去媽媽。相反,由1月5日開始,你已經「升呢」,進身成為大佬級別!即係話,你啲玩具,以後要分比弟弟玩,幾年後,你有責任教導呢位叫「弟弟」或「細佬」嘅小朋友踏單車及遊水等等。無論如何,你呢一生注定要盡力去保護呢一位比你細3年的弟弟!

另外,媽媽因為要坐月調養身體及專心照顧初生的弟弟,所以要暫住婆婆家中。媽媽其實每天都想念著你,因為你每天要上學,嚟繁呢個多月,每晚就由為父與你共眠。每天清早,就由為父替你打點,換上校服。跟以往不變的,就是每天為父會親自揸車送你上學,並會站在校門外,睇你同其他小朋友做完早操先去上班。

每逢你放假,為父必定帶你去見媽媽及弟弟。不過你可以放心,呢種情況不會維持太久。因為時間會過得好快,媽媽將會帶同弟弟一起回家,與我倆一起快快樂樂過新年!

最後,為父祝你同弟弟能建立一段好好的兄弟情。

(Part 2)

父 - 馬沙字

2010年1月17日深夜

揸緊中指

2009-11-16T19:04:00.007+08:00

等咗好多年,終於等到LMF重組,強勢回歸!

對好多人嚟講,LMF只係一隊專門唱粗口歌嘅粗口樂隊,但又有幾多人有真正去聽吓佢哋想表達嘅信息呢?

支持LMF.......
支持香港HipHop.......
HK HipHop Alive Not Dead.....

One 平等一個 freedom
不能容忍個世界點解變成咁
鬥爭不齗發生太多狡猾聲音
為咗自由兩個字太多人無辜犧牲

one 平等. 一個 freedom
為自由追尋同權力繼續繼續抗衡
不怨天尤人自由不分富貧
平等自由應該屬於每一個人

某年某日

2009-10-30T20:57:00.006+08:00

一生樂與怒

2009-07-24T17:36:00.022+08:00

很久沒有出文,原因只有一個....忙! 仲要係超忙嗰隻! 呢個星期,已經連續四日工作至零晨5時....唉......

今日穿上便服上班,時間越接近放班,我的心情越見興奮,原因並唔係今天是星期五,咁何解呢?

原因係........... "This is Rock n Roll"

有睇開呢個 BLOG 嘅應該知道馬沙只係鐘意睇BAND SHOW, 阿Paul (黃貫中) 今晚紅館開 SHOW (黃家強、黃貫中「This is Rock n Roll 一生樂與怒」Live 演唱會2009 ), 點可以唔去! 今晚會坐23行,算係咁啦!

則聞今次眾嘉賓之中有Anodize (阿龍大)! 如果係真,我好希望佢地係今晚嘅嘉賓,因為Anodize係其中一隊我最喜愛嘅本地Band。喜愛嘅程度一定唔比Beyond 低, 只可惜 "香港沒有樂擅, 只有娛樂圈",容不下呢隊好Band。
寫到呢道,係時後要停筆,因為要立即起行.....
PS 差啲忘記多謝太太幫我搶飛 ^_^
後記:
原來今晚嘉賓係“五月天”,第一次睇佢地現場表現,都算唔錯! 主音仲用廣東話唱咗首“情人”。
另外,每次睇Beyond 出 show, 馬沙都會好留意一位幕後英雄,特別係家駒唔喺到之後。基本上,馬沙認為佢一直係後Beyond嘅一員,因為大部份時間,佢先係主音結它手! 此君就係人稱“阿賢”嘅結它手“黃仲賢”是也! 基本上,我好鐘意睇佢彈solo! 今晚除咗大聲嗌阿Paul之外,情不自禁嗌咗"阿賢”幾次!

爸爸，我很想你知道．．．

2009-07-03T13:04:00.003+08:00

很多人說：爸爸是一家之主。

作爸爸的，總想為子女預備最好的事物，但同時，又會為子女預備一個怎樣的自己？

已為人父嘅爸爸們,睇完呢段片,是否有一些提醍呢?

這是牧鄰教會會友制作的短片，主角是楊旭輝牧師與他的兒子頌樂的精彩演出！

舞台王者

2009-06-26T13:25:00.006+08:00

真真正正嘅舞台王者「米高積遜 Michael Jackson」, 在台上始終係King of Pop, Goodbye Michael.....RIP..........

我們的天空

2009-06-19T16:10:00.004+08:00

黃家駒,一個令樂迷懷念的名字。其影響力,在香港可說前無古人,後無來者!

馬沙相信,即使時至今日,只要你係喺呢16年來玩過結它或夾過band嘅香港人,你一定曾經玩過佢嘅歌!

今日向大家推介一首歌,細心留意歌詞,數一數當中有幾多首係你曾經聽過或喜愛嘅家駒作品........

胡言亂語

2009-06-17T19:46:00.006+08:00

有立法會議員關注，風水師或按摩師等自僱人士收入不菲，但有機會逃稅。政府表示沒有自僱人士逃稅的數據。署理財經事務及庫務局長梁鳳儀說，《稅務條例》沒有為「自僱人士」作出定義，所以暫時未能提供自僱人士逃稅的資料。但她指，任何人士如無合理辯解而提交不正確的報稅表，或須課稅而未有依例通知稅務局，最高可被罰款10，000元及加罰相等於少繳稅款三倍的罰款。如提交不正確的報稅表意圖瞞稅，則最高刑罰為罰款50，000元、加罰相等於少繳稅款三倍的罰款，以及入獄三年。

簡單來說，自僱人士是為自己工作，而不是以僱員身分受僱的人士。

以下為有關自僱人士的定義:

如果你從買賣貨品、提供專業或個人服務賺取入息，你就會被視為經營行業、業務或專業，亦即自僱人士。自僱人士可以是東主或是合夥業務的合夥人。

以下為有關自僱人士的稅務責任:

作為自僱人士，你須就獨資業務或合夥業務賺得的應評稅利潤課繳利得稅，你須要：
-- 備存足夠的業務紀錄至少7年；
-- 根據你的會計紀錄擬備帳目；
-- 填寫及提交報稅表，以申報業務利潤或虧損；
-- 除非已收到稅務局發出的報稅表，否則你應於有關課稅年度的評稅基期結束後4個月內，以書面通知該局你須要課稅；
-- 如你的業務已結束，你須於1個月內通知稅務局；
-- 如你的地址有所更改，你須於1個月內通知稅務局；以及
-- 繳付你的稅款。

以上有關自僱人士的定義,無論你任何時侯問我,我都可以背得出,政府點解唔比我做局長?

我比梁鳳儀更加可以做好呢份工,同市民共度時艱,半價又點話!

屎眼追兇

2009-06-10T19:36:00.003+08:00

早兩晚馬沙準備經西洋菜南街,轉入奶路臣街地庫買DVD,當到達奶路臣街街口,見到好多儍人圍觀空空如也的奶路臣街。直覺話比我聽,高空擲物狂又再出現,馬沙唔理三七廿一,即急步直出亞皆老街,離開該危險地帶。馬沙一路走時一路想,點解香港咁多傻人,甘願冒生命危險去睇熱鬧?

我好肯定當時事件應該剛剛發生,因為當時除咗圍觀的傻人外,警車及救護車都未到。如果狂人相隔幾分鐘再擲第二次,呢班傻人因八卦和愛看熱鬧,自己走過去而中招,又可以怪誰?

返到屋企睇新聞,確認狂徒又掟鏹水,導致20多人受傷,真係覺得呢班傷者好慘。放工去旺角行吓街都中招,真係發夢都未必諗過!

呢單新聞,有好多嘢值得討論,首先想講嘅係立法會議員何秀蘭批評警方的其中一番言論。根據報導,何議員認為警方刻意隱瞞天眼的啟用,即使成功捉到兇徒,但侵犯市民私隱,傷害多咁多個途人,並唔值得。如此說明,在何議員心中,市民在公眾街道上的所謂私隱權,比市民的生命安全更加重要。投咗票比何議員嘅市民,唔知有乜感想!

另一樣要講吓嘅當然係嗰套講就天下無敵,影就有心無力嘅「屎眼」....噢...sorry....係「天眼」至真。就咁聽個名,馬沙仲以為「天眼」係超高科技系統,在控制中心按幾個制,就能透過人造衛星或全球定位系統,清晰觀看案發現場,追蹤兇徒下落。點知....所謂「天眼」,說穿了不過係幾部高清攝影機。頂......究竟邊條白痴幫呢套低科技產物起呢個「天眼」咁劃時代嘅名?

仲有就係呢套嘢聽聞用咗成170萬元,馬沙就諗極都唔明點解咁貴。其實負責呢單案嘅警官,只要走去鴨寮街請教吓啲電子器材公司班大哥,點樣係西洋菜南街每坐大廈天台入口同地下各出入口裝個普通紅外線針孔式鏡頭偷拍,兇手一犯案,就包保影到啦,做價分分鐘平過「天眼」。

今日睇新聞,有個書店職員話事發後見到個疑似兇徒,但就比佢走咗。如果我當時見到呢個疑兇,不論真假,即刻叫人一齊捉住佢。查過唔係佢,咪佢唔好彩囉。但若果真係佢,90萬元花紅即手到拿來。

又,如果我住係西洋菜南街一帶,依家最緊要嘅係set返部攝影機,長期zoom近同錄影住對面大廈天台。一個唔覺竟影到兇徒近鏡,分分鐘領咗份花紅成為大英雄。如果記者問你用乜嘢系統影到兇徒,「屎眼」真係一個不錯的選擇。

意亂情迷

2009-06-01T19:51:00.014+08:00

上周六一早起床,我嘅御用髮型師 (佢即係我"爸B ") 又再出動,幫我gel個靚靚髮型,換完衫就變咗咁:

究竟為乜呢?

唔.....有啲似桌球選手.....

拿拿聲穿起件"披",揾返今日個"拍哪"先......

呢個靚女,好面善吓喎........

呀! 半年前做花仔嗰次,佢又係花女喎.......半年內見兩次,仲要兩次都做正我"拍哪",唔通呢啲就係啲大人成日講嘅緣份?

到底我地仲有冇機會合作呢?

唔......下次我地係主角都唔定.......嘿.......

你地話我地係咪好"登對"呢?

喂喂...大家睇吓.....當後面另一對花仔花女已經貌合神離,我身邊呢位靚女隻手仔.......仲未捨得放開......嘿...........今次仲唔得米.......

驘得精彩

2009-05-28T05:24:00.007+08:00

熱烈興賀巴塞2:0臝得今屆歐冠決賽!

條曼魚比巴塞玩足全場,曼魚中場輸哂,後防又慌失失奇兵,C7踢到不知所謂。

反觀,美斯呢個級數嘅球星,全場竟然好似無人看管,攞親波都四處無人,唔入波至奇!

難怪我一出世爸B就叫我支持巴塞 ^_^

浪費資源

2009-05-21T03:26:00.000+08:00

昨天收到一封由運輸寄來的信,最初心諗,唔係告票呀!但自問一向極少超速,冇理由呀......

打開封信一睇,原來係一封抬頭「更改地址及其他個人資料」嘅信。咁呢封信又究竟係乜東東呢?

其實封信嘅目的係提醒一眾駕駛執照持有人/登記車主,根據道路交通規則,假若駕駛執照持有人/登記車主的姓名及地址跟封信列印嘅姓名及地址有所更改,應立即通知該署。

馬沙睇完封信,除咗覺得運輸署白痴到極同極不環保之外,真係再諗唔到仲有乜嘢可以形容運輸署呢個行動。首先,收得呢封信嘅人,即係代表其資料未有更改,封信即係垃圾。其次,若地址有所更改但未曾通知運輸署嘅人,根本唔可能收到呢封信,咁呢啲信又自動變成垃圾。

馬沙唔知運輸處是否向全港所有駕駛執照持有人/登記車主發出同樣信件。如果係,馬沙真係好想知由運輸處邊條友諗出嚟。呢個行動既浪費資源(即信封、信紙及加重郵政署工作),又未能達到封信嘅目的(即地址有所更改但未曾通知運輸署嘅人立刻更新資料),咁究竟做嚟做乜?

忠心順服

2009-05-12T22:55:00.003+08:00

這個世界,究竟係「天從人願」,還是「人從天願」?

此刻的心,既望「天從人願」,天父能回應孩子的呼求!

與此同時,亦望「人從天願」,孩子能順服天父的旨意!

為三餐溫飽感恩

2009-04-21T18:38:00.004+08:00

有BLOG友問馬沙,為何咁耐冇UPDATE個BLOG?

BLOG友阿思仲出尋人啟示,真係多謝大家關心!

咁耐冇UPDATE個BLOG,原因很簡單,忙於為口奔馳,仲要勁忙! 在金融海嘯之下,有得忙總比冇得忙好吧!

每天都為尚有「三餐溫飽」而感恩,祝願各位都能安然渡過今次金融海嘯,日日有飯開!

正在失業 / 待業嘅朋友,祝你地早日有工開!

我覺得,生活在世上,能有「三餐溫飽」,已經比好多人幸福!

大家都無謂花太多時間,去關心嗰條食飽飯冇屎屙出來胡說八道嘅「成膿」,有時間嘅,去關心吓身邊有需要嘅人好過。

強搶民脂

2009-03-31T07:30:00.000+08:00

馬沙在一連三篇「怒斬基金」中，講咗自己唔贊成買基金的理由。

但非常不幸，目前手上仍被迫持有一份月供基金，且一供就接近10年。此基金既不能斬，亦不能轉移到自己選擇的基金公司。呢份被迫月月奉獻的基金，就係全港打工仔同老闆都要供嘅強搶金(MPF)。

強搶金自2000年開始轉眼已經接近10年，其果效如何，大家有目共睹。基金成績差強人意，可供投資的選擇性極度偏低。不願面對投資風險的市民揀選保本基金，但扣除基金管理費後，竟出現保本基金不能保本的情況。政府又視若無睹，猶如協助基金公司強搶民脂。

馬沙一直不明白政府及強搶金管理局點解到今時今日，還未有就市民的投資選擇權作出相關檢討。要知道好多中產市民，與僱主共月供2,000元，10年來累計供款已超過20萬元，夫婦2人加起就接近40、50萬元。

對於強搶金出路，個人有幾個簡單建議。

第一，容許不想面對任何投資風險的市民，將供款放在普通定期存款，月月滾存，可免去高昂的基金管理費，好過放在不能保本的保本基金。

第二，讓市民有權選擇自己喜愛的基金公司。只有開放選擇權，各基金公司面對競爭下，才會肯大幅減低收費。

第三，考慮准許市民提用已供款額，支付「自置居所」部分首期或清還部分銀行貸款。如此，好多市民可以減低供樓壓力甚至提早贖樓。只要加入相關法例，訂明市民在到達退休年齡前，即使賣樓亦不能提取相關款項即可。

(2009年3月31日刊於《am730》)

怒斬基金 (三)

2009-03-26T07:30:00.002+08:00

基金除咗收費高昂以及不容易變現之外，透明度極低亦是一個問題。一個成熟的投資者，作出一個重要的長線投資之前，「先求知，再投資」係一件好重要的事情。

可是，無論你去一般商業銀行、投資銀行，以及跟你的保險經紀，要求詳細了解其推介的基金，你只會得到一系列由基金公司製作得美輪美奐的簡介。基金公司要吸引你買入其管理的基金，簡介當然隱惡揚善。至於基金實際如何運作以及所持有的資產明細表，則通通欠奉。

在一般情況下，投資者只能知道所買入的基金中，投資組合內十大資產的內容。但問題係呢十大資產往往加起來佔整體投資組合的比例還不過四成。換句話說，投資者無可能知道基金內餘下的六成資產係乜。

由於基金運作透明度極低，基金公司及基金經理如何保障基金持有人的最大利益，投資者本身就沒有任何方法去作出監察。假若不幸遇上操守欠奉的基金公司或基金經理，基金持有人就往往投訴無門。

舉兩個簡單例子，基金內資產每次賣出或買入，可能會為基金公司或其同系的相關經紀行帶來交易佣金收入。因此，即使有人將基金資產不停無意義地賣出同買入，基金持有人亦無法知悉。

第二，由於基金經理薪酬可能跟其所管理的基金表現掛鈎，在自身利益的大前提下，不顧基金持有人的利益，將資金投進高風險項目。成功獲利，當然皆大歡喜，但假若投資虧損，損失嘅只有基金持有人。

(2009年3月26日刊於《am730》)

怒斬基金 (二)

2009-03-24T11:40:00.002+08:00

馬沙不贊成買入任何基金,主要原因係一般投資者買入基金嗰一刻，大多數依賴基金中介人的推介，鮮有自行對同類型的基金作出比較。而注意力一般都放在該基金過去的表現，絕少有心機去理會基金繁複的收費。

試想像一下，若您上年中去買基金，中介人給您看各類基金07年的表現，有哪一個基金表現會差。再者，基金中介人在推介各類基金給您時，其首要考慮未必是該基金是否適合其客戶，反觀，賣出哪一類基金給客戶能為其賺取最多佣金，才是其首要任務。

第二，好多買基金的投資者，以為買基金的風險比直接在市場買入股票低，且基金價格的波動性亦較細。但實情係大部分基金表現，好多時都跑輸大市。即升市時升幅不及相關市場的平均升幅，但跌市時跌幅又比相關市場的平均跌幅大。更要命的是不論基金表現嚴重跑輸大市，基金管理人每年收取的管理人酬金一樣咁多。

另一個令馬沙唔會買基金的原因，係大部分基金受其章程所限，基金持有的現金水平不能超過整體資產的某個百分比。即係話無論基金經理眼光如何獨到，明知股災明天出現，亦不能將基金資產全數變現，為基金持有人避險。

相對地，基金持有人即使明知股災明天出現，亦了解到基金經理不大可能為自己避險，最後仍要因為基金贖回需時，眼白白睇住基金資產大跌。先不計贖回時被扣的特高手續費，好多基金可能每月只有一日定為基金贖回日。

(2009年3月24日刊於《am730》)

怒斬基金

2009-03-19T11:48:00.002+08:00

昨天同老友醫生K食飯，其間醫生K全程苦口苦面。記得早前有報道話因金融海嘯關係，好多市民由本來睇私家醫生轉為睇政府醫生。馬沙起初以為佢醫務所生意受到影響，所以心情唔多靚。誰不知醫生K話佢間醫務所生意不知幾咁好，呢排患上傷風感冒嘅病人幾乎多到睇都睇唔晒。馬沙當然打蛇隨棍上，問佢老哥既然醫務所生意咁好，何解仍愁眉苦臉。

嘩！點知醫生K話唔問就由自可，講起就把幾火。原來佢最近怒斬4份已供近10年的基金，損失非常慘重，仲話呢世都唔會再買基金咁話。醫生K話當年本住幫朋友，就幫襯朋友工作間基金公司。朋友教佢要分散風險，所以幫醫生K安排咗4份涉及唔同市場的基金，且一供就差不多近10年。

醫生K話近年收到的年結單，4份基金都顯示有錢賺。誰不知最近收到新一份年結單，一望之下心都實晒，4份基金通通蝕到入肉。即打電話俾朋友細問目前剩番幾多，朋友計一計答蝕咗近四成。醫生K話想全部贖回，點知朋友話佢啲基金要供至55歲退休，提早贖回要扣近一成作手續費。醫生K一怒之下，即全部贖回，最後埋單蝕近五成。

馬沙一向唔贊成啲朋友走去買基金，不論一次過供款及儲蓄成分供款的基金。原因係基金收費又高又複雜，基金資產本身透明度又極低，贖回時又要再蝕差價，贖回日又唔到你揀。若遇上操守欠奉的基金公司，隨時被屈機。

篇幅有限，下次續談。

(2009年3月19日刊於《am730》)

港男講男

2009-03-17T13:27:00.003+08:00

一連兩集名為《港女——講男》嘅電視節目播出之後，即引來網民極大迴響。女網友固然想極力去除「港女」之惡名，更力斥現今「港男」如何唔掂。而另一邊廂，一眾男網民就不斷在網上取笑節目中「港女」主角。

今日以港男身份寫呢篇文，目的不是要為眾「港男」平反，力數「港女」的不是。相反，係想以「港男」身份去講男。首先，馬沙極不認同該節目「港男」的選角方式。假若該節目的目的，係想比較現今社會男女的互相睇法，選角時就應該揀選質素相近的男女才有說服力。例如男女雙方同等學歷，再去比較互相的睇法。

在馬沙的認知，「港女」一詞，係泛指一般香港女性。但「電車男」一詞，就絕非泛指一般香港男性。因此，「電車男」並不等同「港男」! 「電車男」只係代表眾「港男」之中的一小部分而已。

不過話雖如此，呢班所謂「電車男」，有時確實丟盡香港男士面子。終日沉迷電腦，在網上批評「港女」時就天下無敵，在現實生活中卻連講句說話大聲啲都唔敢。莫講話女性，連我都頂主角Peter唔順！

「港男」一日到黑數「港女」如何唔掂，但有否想過，唔係受到你班「港男」萬般遷就及縱容，昔日大方得體的「港女」為何變得如斯景況，正所謂「種瓜得瓜，種豆得豆」，即自作自受也。再講，賢良淑德嘅香港女性大有人在，好嘅你唔去爭，但明知山有虎，卻偏向虎山行，中伏後又話俾「港女」食住，又怪得誰？

(2009年3月17日刊於《am730》)

樓市展望

2009-03-12T07:30:00.004+08:00

近日收到不少讀者電郵，希望知道馬沙對樓市的睇法。亦有人在博客留言，指馬沙在08年初幾睇好樓市，然而整體樓市於08年尾至今已回落不少，好明顯睇錯市咁話。

記憶所及，個人在07年第四季樓市展開升浪不久第一次講樓市。當時舉出例子，指一個近千呎的美孚單位，叫價只需330萬元，對於講求實際及唔怕舊的用家來說，算相當有吸引力。翻查資料，同類型單位， 2月份成交價仍在300至320萬元之間，跌幅尚算輕微。

08年第一季，樓市呈現膠著狀態，當時認為，只要不買入所謂假豪宅或當炒盤，又只做七成按揭，供樓絕對好過租樓。對於以上一點，個人認為至今仍然有效。樓價由08年第四季顯著回落至今，10年以上二手用家盤(熱炒屋苑除外)，一直只在窄幅上落，某些屋苑，目前叫價更不跌反升。

個人在去年7月開始，已多次指出在07年下半年買入所謂假豪宅的新盤買家，情況會非常凶險，隨時未入伙就大蝕收場。更曾以「論假豪宅」為題，說明呢類假豪宅在未來一年，呎價要下調三至四成，才接近合理水平。任何時候，用超高溢價買入呢類假豪宅，例如8,400多元一呎買入海濱南岸，同自殺有何分別。

以目前經濟環境，樓價雖然無可能大升，但並不代表租樓比買樓更勝一籌。自住用家可考慮以不高於3,000元一呎買入一個約20年樓齡的市區物業，700呎還不過200萬元。5年後樓價即使回落至150萬，亦剛好抵消過去5年租值吧了。

(2009年3月12日刊於《am730》)

全港首創

新一代附設五星級會所之豪華套房(板間房)

『海濱南岸』----- 進身豪宅不二之選!

保留實力

2009-03-10T07:30:00.001+08:00

要在股海生存，保留實力最為重要。何謂保留實力，即設法保護可用作投資的資金。需知道要在投資中賺錢，首要條件係有本金。如果在一次錯誤的投資中，將大部分甚至所有本金失去，在往後的日子，即使有獨步眼光，但身無分文，最後只有眼白白目送機會。

今次金融海嘯相信已經沖走投資者不少身家，連向來所謂最穩陣的滙控(005)，昨天都下跌至33元，相信金融海嘯對香港的中產以至小富豪，已造成非常沉痛的打擊。

如果你的投資組合在這次海嘯中，損失少於兩成，你已是投資界的高手，馬沙有理由相信，在下一次牛市來臨時，你好大機會進身富豪行列。

如果你的投資組合，目前損失在20-50%之間，請不要灰心，因為大多數所謂身經百戰的投資者，戰績應該在這個組別。你們的分別在於下次牛市再臨前，誰能有效保留最多戰鬥力再次出擊。

假若你的投資組合目前損失已超過50-80%，你算係今次今融海嘯中最不幸的一羣。我建議你應立即認真審視你目前的投資組合。盡可能將投資組合中的各項投資吐現，保留已經所餘無幾的實力。仍有賺的投資固然之要止賺，已虧損中的投資，更要睇位作出止蝕。千萬莫再心存僥倖，祈求死守已變質的股票，在不久將來能再見家鄉，只怕未見家鄉前已再下一城。

假若你損失已超過90%，對不起，你根本不適宜投資。

散戶想在大熊市賺大錢，猶如以卵擊石。到不如耐心等候，在潮退後用所餘的資金到處執骨！

(2009年3月10日刊於《am730》)

環球金融地踎智慧

2009-03-09T16:21:00.011+08:00

# 插圖由高登 skyward.@hkgolden 設計

曾經有個叫老董嘅人話:「離開係好容易，留低需要勇氣。」 ,我就話:「留低係好容易，止蝕離場需要勇氣。」。

香港股王滙控 (005) 讓全港所謂「價值投資者」,上咗最寶貴嘅一課。

滙豐控股 (005) 是日收巿 $33 下跌 24.14%
理論除權價今日為 $31.5 (更正)
供股權幾乎沒有價值!

沽貨永遠唔會遲

鳴謝: 狼人兄第一個短片

追揸沽

2009-03-05T07:30:00.004+08:00

各傳媒呢幾日就滙豐控股業績(005)各自訪問不同專家，但大部分都只係講出對「供股與不供股」的睇法，對於滙控最新的合理估值，就鮮有人談及。經過初步細閱08年業績，個人對於滙控09年合理價值有以下評估。

首先，我會以08年每股盈利0.47美元作為基礎，在預測09年每股盈利之前，先針對08年一次性的盈利及開支加以調整。根據業績公告，08年滙控因出售法國地區銀行獲得近25億美元利潤，節算後每股為0.2美元。

另外，亦是最重要一項，就是導致滙控業績大幅下跌超過七成的元兇「商譽減損」106億美元。根據業績補充資料，此「商譽減損」是因北美業務重組而作出的減損準備。個人相信此「商譽」係由當年收購美國滙控融資(HI)所產生，如今作全數減值撥備，經節算為每股0.89美元。計入以上兩項調整，08年經調整後每股盈利為1.16美元。

保守地假設09年整體業績再倒退三成，預測每股盈利為0.81美元。考慮到美國滙控宣布結束消費貸款業務，09年北美洲地區虧損每股可望減低約0.19美元。因此，09年經調整後每股基本預測盈利為1美元。

最後，根據「12供5」的供股計劃，09年每股攤薄後預測盈利為0.71美元，經節算為每股攤薄後預測盈利5.54港元。以昨天收市價44.2港元計算，09年預測市盈率為8倍。假設09年4次派息均為8美仙，09年預期派息率為5.6厘。

現價貴與否，請大家自行考慮。大家亦可自行加入各種假設，計算自己心目中滙控的合理價值，再決定追、揸、沽。

(2009年3月5日刊於《am730》)

後話:

個人認為當前時勢,滙控又有毒物在身,合理市盈率應少於5倍,即5.54港元 x 5= 27.7港元,所以供股價28港元只可以話係合理,但絕對唔可以話抵!

再見吧！股王

2009-03-03T07:30:00.000+08:00

號稱香港股王的滙控(005)昨天終於公佈08年成績表，每股盈利為3.6元，較去年同期12.7元大幅下跌72%。以停牌前收市價56.95元計算，最新往績市盈率約為16倍。16倍市盈率在金融海嘯之下肯定已經貴，假設09年盈利倒退三成，09年每股盈利為2.52元，預測市盈率將擴大至23倍，呢個數字表示55至60元嘅滙控係超貴。

馬沙早於 1月22日已指出，滙控好大機會下試40元，理由係在目前環境之下，銀行股市盈率超過10倍已經算貴。依據08年每股盈利為3.6元作非常簡單計算，滙控合理價為36元。若以09年預測每股盈利為2.52元計算，合理價更可能進一步下降至25元。當然，在評估合理價時，還需加入其他因素及個人預測。以上數字，旨在向讀者作簡單說明而已。

值得讀者特別注意的是，以上數字還未計及昨天公佈的供股計劃在內。滙控宣佈以「12股供5股」集資1,378億元，每股供股價約為28元。相信好多持有滙控的投資者，一向只投資藍籌股，鮮有供股經歷。

投資者千萬不要以為每股供股價28元好抵，更不要認為供股價越低越好，因為供股計劃對原本持有的股份會出現攤薄效應，而股價亦會作出調整。就以滙控為例，停牌前收報56.95元，供股計劃宣佈後，調整市價為48.4元。最重要一點，當供股計劃完成後，滙控股本數目將擴大近三成。即使09年全年盈利不變，每股盈利仍會因股數增多而大幅下跌。因此，執筆時滙控股價在英國已下跌近20%。

(2009年3月3日刊於《am730》)

執骨

2009-02-26T12:08:00.002+08:00

早兩星期同某從事珠寶生意的大L食飯，席間大L話現在好多香港珠寶商人，因生怕行業將會受金融海嘯嚴重打擊，即使遇上極品靚石，都無行家夠膽入貨，以免加工後乏人問津，令流動資金下降。新貨不敢入，舊貨照賣，好多珠寶商人因此就樂得清閒。

由於大L平日都有玩吓股票，話題好自然就由珠寶行業轉到股市。受外圍不明朗因素影響，恒指日上日落，散戶無從捉摸。大L話好想知道馬沙對後市睇法，因為近月見到好多行家蝕到眼光光，好幾位老友動輒蝕上億元。細問之下，原來大L幾位老友上年俾人老點買入俗稱「I kill you later」嘅 accumulator。大L仲話好慶幸自己當初無跟住班老友去買，執番身彩咁話。

記得當日大L話滙控(005)由1月低位55元回升至63元，理應見底，好想買入作長線收息之用。馬沙就建議佢考慮清楚先好買，第一，滙控正在海嘯水中央，業績面臨重大倒退，長期派息政策隨時因此而改。第二，街外有傳聞滙控正準備供股集資，正所謂空穴來風，事出必有其因，一日未經證實，其股價必繼續波動。第三，歐美金融問題短期內無可能解決得到，大型金融機構如AIG及銀行等隨時再有倒閉危機。假若問題一旦出現，作為海嘯重災區兼恒指重磅股，那有不跌之理。

我話正在耐心等後海嘯潮退後執骨，大L即時問馬沙滙控最差睇幾多，當我答佢40元時，大L流露出難以置信嘅眼神。我再同佢講，上次低位$55元必定會穿，如果唔穿，今年核數師費收你七折。

(2009年2月26日刊於《am730》)

溫室效應

2009-02-24T11:36:00.002+08:00

昨天有一則新聞，報道一名14歲小童軍，在戶外學習煎蛋時，因手忙腳亂險遭滾油毀容。有資深童軍領袖指出，現今一代的兒童，從小嬌生慣養，欠缺獨立性及自主性。更坦言曾經見過10歲童軍因不懂洗澡，在露營時不肯洗澡以免出醜。

好多時睇到呢啲報道，大家都可能會慨嘆新一代的兒童過度依賴。就好似以上例子，14歲點會煎隻蛋都搞唔掂。回想14歲的馬沙，莫講話煎隻蛋，就算煮餐飯都不成問題。

但個人就認為所有責任，應該由一眾精神近似分裂的新一代父母承擔。理由好簡單，因為時下好多年青父母，特別係一班中產及經濟比較富裕的父母，在教導其子女時，大部分時間將子女當作天才，但轉眼間又會將其子女當作需要特別照顧的弱能兒童般看待。

一班中產及經濟比較富裕的父母，為要將子女教育成才，從小到大都不惜工本，幫小朋友報讀大大小小不同課程。好些時候，若以局外人身份去看，一個小朋友同一時間除學校本身課程外，還能兼顧咁多興趣班，不是天才係乜？

但問題係呢班父母，在學術以外的事上，就將子女當作弱智兒童般看待。容讓一些生活最基本的自我照顧小事，交由外傭或自己親手去做。馬沙就親眼見過為數不少年近10歲的小朋友，唔識自己落街、綁鞋帶以及食物沒有起骨或剪碎就唔識食的情況。

最後，搞到好多小朋友變成小小年紀能歌善舞，集十八般武藝於一身，卻不懂照顧自己日常生活的社會怪物。

(2009年2月24日刊於《am730》)

反智 (二)

2009-02-19T11:42:00.002+08:00

除咗鼓勵畢業生將校園當作避難所外，政府班低能兒因為想力保大學畢業生就業，想出一套既分化社會，又令資源嚴重錯配的大法。

根據報道，政府準備設立一項所謂實習生計劃，資助每名大學畢業生每月二至三千元。有人可能會話，政府咁做都係想鼓勵多啲僱主吸納呢班應屆大學畢業生，係一個雙贏方案。但問題係政府點解淨係津貼大學畢業生，而不去津貼其他大學以下課程的應屆畢業生呢？

難道政府班低能兒認為大學畢業生比其他畢業生更難找到工作嗎？

首先，香港大學生其實在修讀大學課程時，已經接受咗政府在學費上的資助。加上大學畢業生在本質上，已經比其他非大學畢業生在就業上有優勢。反觀，眾多非大學畢業生本來已經沒有多少本錢，僱主在計算得到政府津貼後，付出相同工資就可以聘請大學畢業生的條件下，非大學畢業生怎能獲僱主青睞。

好多中小企本來為非大學畢業生提供職位，例如某中小企一向以7,000元招聘文員，但因為聘請大學畢業生有津貼，只需用9,000元的薪金(實際同樣付7,000元)，就能聘用大學生。最後，本來該由非大學畢業生擔當的職位，在呢個低能津貼計劃下，就被一眾大學畢業生霸佔。

資源不但嚴重錯配，更令非大學畢業生無法就業。更甚者，政府變相鼓勵無良僱主，裁減原有的低學歷僱員，再參與低能津貼計劃。

馬沙雖然作為僱主，可以在此計劃下受惠，但我全力反對呢種有欠公平的低能津貼計劃！

(2009年2月19日刊於《am730》)

反智

2009-02-17T11:25:00.003+08:00

好多人話香港的教育水準每況愈下，要找出問題所在，再對症下藥作出改善。對於教育政策近年朝令夕改，其影響之深遠，固然成為主流笑話。可是，一眾政府官員的反智思維，往往才是問題之所在。在金融海嘯之下，政府官員天天高呼當前急務是要力保就業，但他們提出的方法，就令社會資源錯配再錯配。

上個星期就有人走出來大叫，鼓勵各準畢業生，可考慮留在校園繼續進修。美其名就是提升及裝備自己，將來更有能力面對經濟不景。實際上就是想減少今年畢業生失業的數字。馬沙聽到「心都實」，世上竟有政府官員鼓勵大學畢業生逃避現實，將校園當作避難所。假如聽佢講，幾年之後進修完，經濟仍未轉好的話，是否又要留在校園更上一層樓呢？

將校園當作避難所這種做法嘅人，上一次金融風暴就已經很多。到經濟轉好時，最先受惠嘅肯定係市道最差時，走出來社會打逆境波嘅畢業生，而唔係嗰班只懂將校園當作避難所，有高學歷但毫無工作經驗的人。

昨天讀報，教育局長孫明揚又話，金融海嘯下，香港的教學語言亦要重新定位，讓學生多接觸英文，鞏固香港國際金融中心地位。雖然「金融海嘯」的而且確對好多範疇都有影響，但硬將「教改」及「教學語言微調」跟金融海嘯拉上關係就有點兒那個。敢問孫公何解在金融海嘯下，教學語言需要重新定位，學生要多接觸英文？兩者有何關係？篇幅所限，另一反智建議後天再續。

(2009年2月17日刊於《am730》)

給財爺的信

2009-02-12T11:37:00.002+08:00

財爺閣下，得知你想就即將發表的財政預算案，聽取社會不同意見。馬沙今天就大膽向閣下提出意見。

香港此刻正面對金融海嘯，凡對金融及經濟有點兒認知的人，當知道即使風暴完結，整體經濟需要一段長時間才能康復。個人認為，在此時此刻，向來自食其力的市民最希望得到的，相信並不是政府大幅加大派糖力度，而是能夠保持當下的就業職位。

經濟不景，市民最擔心的就是失業率持續上升及企業裁員。而當中面對最大壓力的，相信就是一班所謂中產收入的人士。不少企業為求保持盈利，都會先向中層員工開刀，再將被裁者原有的工作，由上層及下層員工分擔，令本來工時已過長的員工，再百上加斤。在好多時候，留下來的可能比被裁的更難受。

個人認為，政府可考慮加設單親就業免稅額。簡單來說，即凡有小孩的家庭，夫婦當中只有一人就業，就給予特定的免稅額。一方面可以鼓勵在職母親回歸家庭，全職教導子女以及增加出生率。另一方面，可以藉此增加職位空缺，讓失業人數下降。

比方說，夫婦若有子女兩名，夫婦收入分別為4萬元及2萬元，08/09年度需付合共6萬多元薪俸稅。如妻子不外出工作，家庭收入除減少20多萬元，還要付薪俸稅近3萬元。假若單親就業免稅額設定為20萬元，此家庭就能走出稅網。計算免去原先6萬多元薪俸稅，上班的交通、膳食和置裝費，以及每年近5萬元外傭薪金，在職母親回歸家庭教導子女的代價著實不多。

(2009年2月12日刊於《am730》)

投票權

2009-02-10T11:35:00.002+08:00

昨天午飯時看電視新聞，見到政制及內地事務局長林公公，講解政府將從本周六開始，直至下月23日止，展開在囚人士恢復投票權的諮詢公眾意見工作。當中政府提出3個方案供市民考慮，第一個方案係全面恢復在囚人士投票權，而第二個方案則是10年以上在囚人士不得投票，最後的一個方案係刑期10年以上的人士在最後5年方可以投票。

馬沙原本以為，今次係諮詢市民對應否放寬在囚人士投票權的意見，即支持現行法例，限制在囚人士行使其投票權，或對現行法例作出修改，給予所有在囚人士投票的權利。但根據諮詢文件，政府似乎已就08年3宗司法覆核個案的法庭裁決，斷定現行法例違憲，必定要修改。亦正因此，市民已無需考慮在囚人士是否適合投票呢一點。

問題係政府基於法庭裁決現有規定違憲，何解是次諮詢又搞分化，試圖維持某些所謂合理限制呢?

馬沙唔知各政黨對呢個諮詢的意見如何，但個人就支持全面取消在囚人士喪失投票資格的限制。在眾生平等及支持民主的前提下，冇理由同為在囚人士，有人有投票權，而有人就無。喺在囚人士當中再設限制，隨時又要面對另一場「人權法案」第21條及「基本法」第26條的司法覆核挑戰。

至於參考外國對在囚人士施加限制的做法更加多餘，如手頭資料正確，本港目前有5,400名在囚人士，當中需服刑10年以上的約有770人，真的要特別限制呢幾百名在囚人士的投票權嗎？

(2009年2月10日刊於《am730》)

遲來的法例

2009-02-05T11:32:00.002+08:00

私家車及輕型貨車的新牌司機，需要掛上「P」字牌的法例終於執行。馬沙話呢條係遲來的法例，因為電單車新牌司機掛「P」牌的法例，早在2000年已經執行。真的不明白當局何解要用近10年時間，才將此法例擴展至私家車及輕型貨車。其實暫准駕駛執照計劃，在好多國家已實施經年，且有效減低新牌司機涉及交通意外的數目。

記得十幾年前駕駛電單車遊車河時，就經常見到好多年輕人一考到電單車牌，就買架馬力非常強勁嘅fairling(大包圍)車嚟揸。他們大概受到《烈火戰車》呢類電影所影響，認為要揸fairling車先叫做有型，但他們就絕少考慮到呢類車馬力太大，當大力比油，車尾會有輕微搖晃的跡象，經驗唔夠的新手，隨時失去平衡炒車。最要命嘅一點係fairling車易放難收，車速一般能輕易提升至120km/h，但要在極短時間減速，就相當考技術。因此，當年新牌炒辣車的新聞，屢見不鮮。但呢種情況，由電單車新牌司機要掛「P」牌的法例實施後，有明顯改善。因辣車掛「P」牌有格格不入之感，加上各種限制，好多新牌仔就轉揸較細馬力的特色「綿羊仔」，安全性就大大提高。

如今駕駛私家車及輕型貨車的新牌司機，需要掛上「P」牌，相信會起異曲同工之效。不過，掛上「P」牌1年似乎太短，新牌司機容易避過有關法例。試諗下，年輕人考完車牌，儲夠錢買架自己喜歡嘅車，可能已經接近一年。如冇記錯，澳洲要掛3年，就比較合理得多。

(2009年2月5日刊於《am730》)

出入平安

2009-02-03T07:30:00.000+08:00

不知各位有否發覺，近年香港農曆新年的氣氛日漸減少。記得小時候，農曆新年，大部分商店都會關門，直到年初四或初五才啟市。大年初一走到街上，真係想揾餐食都難。就算有，都要雙計甚至三計。今時今日，無論大街小巷，大小餐廳幾乎年中無休，一眾餐飲業從業員連農曆年都不能放假，真不知是喜還是悲。

雖然係咁，但每年農曆新年，還是有好多人舉家出外，四處去親朋戚友家中拜年。而馬沙亦不例外，由大年初一清早開始，到不同長輩家中拜年，直到大年初三，真係忙得不可開交。因為方便緣故，馬沙喜愛自己駕車四處去。亦因為咁，留意到每次過年，道路交通總會比日常危險。

首先，每逢節日，路面都會出現好多假日司機(Sunday Driver)，所謂假日司機，即平日好少駕車出入，通常只在假日才駕駛的人士。而呢類人士，在過年又顯得特別多。正正因為他們平日甚少駕駛，本身對路面情況不太熟悉，再加上要去一些可能從未去過的親戚朋友家中拜年，往往出現好多突如其來的左cut 右插危險駕駛奇技，對其他道路駕駛者造成好多不必要的危險。其實香港有幾大？即使行錯路，轉個圈就可走回正軌，何需緊急轉向？

另外，好多人認為過年唔會抄牌，所以每次過年，好多駕車人士，都將愛車停泊在街邊。但問題係有些駕駛者將車泊到離晒大譜，對其他道路使用者造成不便，最後引來投訴，令整條街出現新年牛肉乾車隊奇景。

(2009年2月3日刊於《am730》)

既買貴又買錯

2009-01-22T12:12:00.006+08:00

滙控被大摩出報告，將其價值調低至50多元後，已連續多日在各地市場大跌，昨天收市報55元，已非常接近大摩預測。股王跌到50多元，事前好多人都唔會相信。因此，近日就有好多投資者築成人肉長城，試圖撈底買入滙控作長線投資。呢個情況由滙控跌穿80元開始，股價每跌一級，股民都排隊買入，且天天都出現。

馬沙相信出現呢種情況，主要由於好多投資者，多年來已經被人成功洗腦，深信無論在任何時候買入滙控，只會「有買貴、無買錯」!個人相信，當滙控跌穿100元開始，已好多人大叫話低買，深信再跌亦跌不了多少。而今次蟹貨重災區應該在70至80元之間。

個人覺得，「有買貴、無買錯」呢句說話本身已經好有問題，勉強亦只能套用在大牛市時。買貴咗本身就係錯，待其不日回升，只是財演自欺欺人的伎倆吧了。比方說，當你80元買入滙控，現價55元，即帳面已蝕去31%，呢個投資決定肯定係「既買貴、又買錯」。即使他日回升至買入價平手離場，股價便要升近45%。

在大熊市當中，即使係好股，切忌長揸不放，當某隻股票被市場定性為沽售對象，尤其係指數成分股，應先行沽出套現。以滙控為例，即使未能在高位沽出，在跌穿90元沽出，現價已可買回近倍數量。

個人認為，滙控在上半年好大機會下試40元，在其業績公布前切忌撈底。預期上半年渣打(2888)、國壽(2628)及港交所(388)將成為大行沽售對象，目標價分別為50元、15元及35元。而油價亦將會回落至30美元水平。

(2009年1月22日刊於《am730》)

你貼股我教路: 2009年01月06
渣打(2888)供股之後仲掂，匯控(005)肯定落唔到$65

唔怪之得滙控65元話穿就穿啦! 渣打呢次大鑊!

你貼股我教路:2009年01月20
匯豐(005)跌的四大理由

完全唔Q知佢想講乜.....

We are X

2009-01-20T07:30:00.005+08:00

「Dry your tears with love…」馬沙早幾日高聲叫喊呢一句無數次,眼淚差一點兒就掉下來。讀者請勿誤會,馬沙私人感情生活仍非常美滿,只是情緒一時高漲吧了。

如果有讀者睇完「Dry your tears with love…」呢句句子，即時情不自禁地哼出呢句歌詞，相信你可能同我一樣，早幾日跟身旁無數陌生中年男人(包括我在內)，一起大聲高唱呢首名為《Tears》嘅歌曲。點解我知道? 因為「We are X」!

我對上一次入場睇演唱會，相信無7年,至少都有5年。而對上一次入場,仲要係因為老友公司有大量免費門票之故。我近年不愛入場睇演唱會,主要原因是香港舉行的演唱會,無論製作水準,以至現場的氣氛都不能將樂迷帶入高潮。

勢估唔到09年不但入埸，仲要打破紀錄，一連兩日踏入亞洲國際博覽館。點解要連睇兩場，因為老友鼓佬文同我講，根據以往經驗，每場至少有30%以上不會相同，即若要聽盡所有名曲，唯有乖乖俾錢。亦全憑鼓佬文夠瘋狂，先至幫我買到飛。

X Japan 呢隊日本殿堂級樂隊，自97年宣布解散，再加上結他手Hide於98年不幸身亡。相信好多樂迷同我一樣，以為無機會再見到佢地在台上表演嘅風采。估唔到佢哋在07年尾突然宣布復出，並在08年初在日本舉行3場演唱會。之後公布歷史性作世界巡迴演唱會。而今次香港展開的更是世界巡迴演唱會的第一站，都算榮幸。

大部分香港 X Japan 的樂迷，年齡至少都35歲以上。好多當年長髮及肩的男樂迷，依家都人到中年，只得頭毛幾條加大肚腩一個。有時大家場內四目交投，眼神彷彿想話俾對方知，當年自己都識玩呢首歌。尤其當Endless Rain 奏起段solo，好鬼多中坑同我一樣，隻手不期然作彈結他狀。在場所見，大部分人跳足全場，仲成日玩人浪，都算勁。

話時話，我跳足兩場，今朝起身真係全身骨痛！

(2009年1月20日刊於《am730》)

Loneliness your silent whisper...
Fills a river of tears through the night....
Memory you never let me cry....
And you. You never said good-bye...

Sometimes our tears blinded the love..
We lost our dream along the way...
But I never thought you'd trade your soul to the fates..
Never thought you'd leave me alone...

Time through the rain has set me free..
Sands of time will keep you memory...
Love everlasting fades away..
Alive within you beatless heart....

Dry your tears with love…Dry your tears with love…

X Japan world tour live in Hong Kong ~ Tears 　

睇返youtube啲留言,原來真係有好多人忍唔住喊左出0黎!!

只報喜不報憂

2009-01-15T11:44:00.003+08:00

早前恒指一口氣升破15,000點時，好多財經演員紛紛走出來大叫熊市已成過去，牛一已經來臨，仲話咿一浪勢必突破16,000。更有人話美國黑帝就職前，恒指可能受惠美股帶動，上試18,000點。結果係點？

呢班財經演員，當然對自己兩周前的預測隻字不提。信佢哋走咗去入貨嘅散戶，過年前仲要蝕多一鋪，都咪話唔慘。

曾幾何時，我以為只有演員有戲上畫或歌星有新CD上市，才需要走出來宣傳，叫友好報章或雜誌，為佢哋寫番兩篇鱔稿，好使電影票房或CD銷量，有意想不到的增加。勢估唔到，現在連出書都要用呢招。

財經界猛人最近出書，今個星期各大小報章都有報道，有雜誌更以專題報道。內容大部分指猛人近年測市奇準，係我等散戶在股海的明燈。當中當然不乏猛人近年多次公開對大市後市作出的預測。但以我個人觀察所得，大部分傳媒只作出報喜不報憂的報道。鮮有將猛人測中及測錯的言論作出比對，以至評論有欠中肯。

中嘅大家已經聽得太多，唔中嘅就由我同大家講吓。

08年4月，猛人指恒指2萬點有強大支持，強調牛市未結束，結果不出四個月，恒指就跌破2萬點。

08年9月初，當恒指跌破2萬點後，指出恒指合理值為27,500點，再強調港股未步入「熊市」，仲話對樓市前景樂觀，目前已是樓市最差時期。

勢估唔到，事隔只有4個月，上星期竟然警告大家，港股離「熊市」完結尚遠。

08年9月初強調港股未步入「熊市」，上星期又警告港股離「熊市」完結尚遠,中間嗰4個月,佢究竟有冇講過港股已經步入「熊市」呢? 讀者如果知道,請留言話我知!

猛人仲話覺得太古城兩年後可以升到一萬蚊一呎,我就大膽講句,太古城3年內(個別高層靚景特色戶除外)平均呎價無可能升到一萬蚊一呎,除非香港變咗南非津巴布韋。

猛人測市究竟準唔準，就由讀者自行定奪。

(2009年1月15日刊於《am730》)

擘大眼講大話

2009-01-13T12:45:00.002+08:00

二百多家上市公司，反對延長董事禁售期的新修訂，越演越激烈。雖然港交所最終堅持決定，只應允將措施押後3個月執行，但上市公司及一眾大孖沙是否就此坐以待斃呢？我看就未必！看來4月前必定有連番挑戰港交所威信的好戲上演，我就已經買定幾包花生等睇戲。

有港交所上市委員就話，上述新修訂可有效打擊內幕交易，保障投資者利益。個人認為，如果世上所有投資者都嚴守條例，目前的條例本來就已經足夠。反而有關監管機構，有必要修訂現行執法程序。點解咁講，因為近十多年來，有關監管機構就內幕交易檢控大老虎的數目屈指可數。

如果市場沒有大老虎的存在，又何需修例。所以，若監管機構想順利在4月執行新例，有必要在4月前捉番幾隻大老虎，證明新修訂案有其逼切性。

如果新修訂案真的如期執行，各上市公司董事要將禁售期縮短，唯一的方法就只有盡快將公司業績向市場公佈。要盡早公布公司業績，就有賴公司核數師幫手。

有中小型上市公司主事人就話，好多時業績拖延至近限期才公布係身不由己，因四大會計師行要先照顧藍籌公司等大客的核數工作。

目前四大會計師行佔香港上市公司核數師的份額超過70%。不過，近日四大會計師行強調不會「先做大客生意」。但凡有做過生意嘅人當知，「先做大客生意」絕對係一個營商硬道理，話自己對大小客戶一視同仁嘅，肯定係擘大眼講大話。

(2009年1月13日刊於《am730》)

信不信由你

2009-01-08T10:04:00.001+08:00

要在投資市場賺錢,我等散戶當然希望能夠快人一步,捕捉到大戶手影乘搭順風車。不過有經驗嘅投資者都會知道,大戶特別喜歡向市場發放假消息,藉此引君入甕。但假若細心留意,有些人對市場的公開言論或行動,往往係一個對後市好壞嘅指標。

記得早前睇過蔡東豪的一篇文章,內容提到散戶千萬不要試圖跟市場上某些人對著幹。而其中一個點名提及的就係長實主席李嘉誠先生,對我個人嚟講就深表認同。遠嘅唔講,07年大牛市,香港股神四叔話炒股好過做地產,叫大家放心入市齊齊等恆指創新高,賭王又大叫恆指睇4萬點時,李嘉誠就曾經多次公開表示無論長線或短炒都有危機,並呼籲市民切忌借貸炒股。講都唔夠,仲身體力行,在07年11月2日至12月14日大幅減持集團及個人持有近35%中海集運(2866)股票。今日睇番,該股股價已從07年10月高位11.6元下跌至昨日收市1.56元,最低更曾見0.65元,其眼光真係點到你唔服。

08年又點呢? 長實在08年初,成功把握機會,在樓市高峯期把將軍澳首都出售吐現。該盤預計今年中才入伙,一手購入的買家,樓還未入住,樓價已下跌近3成。又一次見証李先生高位出貨妙技。

踏入09年只有7日,李先生昨天又帶俾市場一個重要信息。李嘉誠旗下基金以每股作價1.98至2.03元,配售20億中國銀行(3988)股份,吐現40多億元。究竟今次李先生是否再一次眼光獨到,高位出貨,真係信不信由你!

(2009年1月8日刊於《am730》)

新不如舊

2009-01-06T11:57:00.002+08:00

香港樓市自去年從高位急速回落，踏入施老闆所講的冰河時期。過去半年，樓市交投異常淡靜，最痛苦的當然是一眾依賴成交量去養活的地產代理。其次就係一班在08年初市旺時，在高位購入假豪宅的一眾苦主。昨天閱報，知道上月成交量終於止跌回升，更創出半年來的單月新高，真為一班近月來不斷努力的地產代理感到高興。

誠然，我一向對地產代理無甚好感。理由係在一般情況下，特別是地產市道暢旺時，不專業及不太誠實的地產代理往往比專業及誠實的為多。不過要數最討厭的，還是那些不惜一切跑出馬路，強行將行駛中的車輛截停，兼不停用手拍打車窗的年輕代理。

以上所述的代理，在經過大半年汰弱留強的嚴冬期，相信好多已經自然流失。上月曾多次去九龍站上蓋睇幾個樓盤，每次用上半天以上，負責的兩位代理不但事前做足功課，睇樓時更不厭其煩細心解答問題。

由於個別樓盤已從高位回落不少，其實去年11月開始，好多準買家已經四出睇樓。就以上月多次到九龍站上蓋睇盤為例，睇樓人數之多，近半年少見。

不過，個人認為，大部分市區半新樓的呎價調整尚未完成，未來還有10至15%下調空間。

至於新盤，特別係九龍區多個單幢新盤，個人估計到入伙時，跌幅至少20至30%不等。

反觀，好多樓齡達15至30年且坐落在傳統豪宅地段的物業，09年跌幅度應該在10%之內。

簡單而言，09年樓市方面，我會用「新不如舊」去形容。

(2009年1月6日刊於《am730》)

海嘯到咗未？

2008-12-30T11:20:00.005+08:00

今年聖誕節港人面對金融海嘯，好多行業又正值裁員高峰期，經濟及零售市道步向衰退，似乎已是大家的共識。人心雖怯，但經多日來觀察，好多港人的消費模式，卻似乎又未有因金融海嘯出現重大變化。

本來諗住市道唔好，又難得有5天假期，出外旅遊應該比較往年廉宜。但到各大小旅行社走一趟，即見人山人海，旅費計及假期附加費後，跟往年沒有多少分別，最後唯有打退堂鼓。

留港消費，更加覺得好多港人對經濟前景好有信心。不知是今朝有酒今朝醉的心態，還是港人經歷過03年沙士之後，無嘢再覺得可怕。

好多奢侈品，價格不但未有下調，每年年尾例行加價行動，依舊不變。走入相熟錶行，座無虛席，好幾隻品牌的折扣比往年還要少。

另一種不減反加嘅就係音響器材，上星期去灣仔某代理陳列室試音，該代理老總就話旗下某品牌名器已鐵定 1月1日起加價10至15%。而老友大L聞之，即面不改容，妙筆一揮，然後把近10萬元支票放低，滿足地將心儀已久的膽機帶回家，嗰一刻馬沙還以為恒指仍在3萬點。

唔講奢侈品，以各大商場及食肆而言，就旺到不得了。早幾日本來打算到apm晚膳，就因其停車場已滿，過門而不能入。

周六連平日人跡罕至的數碼港，因兒童嘉年華會吸引無數家庭，30元玩3分鐘的跳彈床遊戲，竟大排長龍，高峰時更要等近1小時。之後走入赤柱晚膳，幾乎所有餐廳都高朋滿座。

馬沙心諗，究竟金融海嘯到咗未？

(2008年12月30日刊於《am730》)

聖誕交叉扑之還聖誕一個奇蹟...

2008-12-25T00:01:00.004+08:00

危難是否真的可怕?
需知, 共患難多, 共富貴少...
沒有考試測驗, 少了自我認知的機會...
(以上不是Heros的開場白)

上帝按自己的形象做人...
平安夜...
老中青少年按自己的本能做人...

節日是一部強力amplifiler...(好似廣雄個friendAndo)
你平常不會做的...(好似"棟"棵樹喺屋企)
平日你唔會買嘅...(例如: 潤手禮品套裝)
節日告訴你係時候透過消費去贖罪...
(這遠比"整式整水"降生馬槽再哺育成"祭品"來得"單簡"...)

聖誕好像一個宿命的故事...
聖嬰誕生為去送死,
救贖變了消費, 不知就裏以為基督名叫Shopping...

全世界政府面對金融海嘯 x Tsunami,
彷彿美國攻打伊拉克...
銀彈亂石投林...
只因一個字 = Panic

過往, 每當聖誕前夕...
一輪炒冷飯童話故事會Replay n Repeat...
A night before christmas...
Santa Claus...
快樂王子...
賣火柴的女孩...
可能我們只管報以噓聲...
忘懷了思考這些小故事的隱喻...
記得世上有千萬個像賣火柴的女孩需要救助嗎?
你/妳可以像快樂王子般付出嗎?

光憑個人之力量,
縱然是超級英雄,
也不足以抗衡逆境...
所以才有元氣玉...的出現...

要求多多, 付出豆寸...如何自強不息...
Wiki Wong唔錯得晒噃...

不談挽救世界, 先行完善自我...
還自身一個奇蹟...
還聖誕一個奇蹟...
你/妳! 才是John McClane...

鳴謝聖誕交叉扑作者: 學霖

聖誕交叉扑熱身之 (CMLY)

2008-12-24T02:03:00.000+08:00

電視上又見我們尊敬的行政長官跟溫家寶總理會面，情景似曾相識。

溫總講話時，曾爵士又同以往一樣起勢咁抄notes。

如果我係溫總理，我諗我會一手搶走Sir Donald 本拍紙簿，邊睇邊心裡問：「咁多支鏡頭同收音咪擺晒響度，仲抄乜撚野呀你?」

(文章由地球某舉世知名博客提供)

_________________________________________________
後話:

奉地球某舉世知名博客指令,為今年聖誕交叉扑作出簡短示範,馬沙亦在此為2008年聖誕交叉扑正式揭開序幕,各參加者請把握機會參與,並記得準時交稿比大會攪手「靚仔鎚」。

麻木不仁

2008-12-23T11:51:00.002+08:00

在過去一年，政府一眾高層官員，幾乎在所有事故發生後，向市民解畫的表現都令人感到失望。市民不禁會問，究竟呢班官員本身欠缺危機管理意識，還是因為但求自保，所以麻木不仁，背着良心講大話。正所謂權力令人腐敗，香港政府的高官，正正在彰顯「越高層、越低能」。

為求逃避責任，講嘢既不經大腦，且毫無常識可言的文化，現在更入侵各個服務機構。要數不負責任方面，醫管局屬下多間醫院的總監，在每次發生醫療事故時，就最出神入化。

還記得多月前某醫院，有病人不幸被錯誤割去一邊乳房。馬沙好記得當日在電視上，收看醫院就該醫療事故的新聞發布會，某名醫生竟可當住眾人面前說:「錯割病人乳房，係一個壞消息，但可喜的是證實咗病人並無患上乳癌」。不知呢位仁兄是否覺得自己好幽默，但如果懂得將心比己，想想若病人係自己至親，當知以上一番說話實在一啲都唔好笑。

日前明愛事件，病人已經不幸死亡。先不管誰對誰錯，那個醫院總監馬學章，竟然夠膽面對公眾，大大聲話明愛服務已經做得好好，員工已經依足指引。

人家到達醫院門前，醫院見死不救都算，還要說死者兒子不幸，以為去到懷明樓(事故地點)門口，已經到咗醫院。即係暗示最錯就係死者兒子，無直接送父親到適當地點，去錯地方又唔識自己打999。講得出呢番麻木不仁的說話，已經無資格當明愛總監，唔好影衰晒其他好醫生。

(2008年12月23日刊於《am730》)

來侮辱我吧！

2008-12-18T11:37:00.003+08:00

市建局前天就觀塘市中心舊區重建項目，正式公布收購價。住宅每實用平方呎，定價為5,937元。如果閣下熟悉呢區，相信無不為受影響的自住業主感到高興，因為在現今樓市水平，受影響的自住業主在收到收購款項後，絕對足夠在同區選購比原來面積更大及更優質的物業。

儘管以上收購價比較同區以及鄰近二手樓盤的平均呎價2,400元，已經高出一倍有多，但受影響自住業主似乎好唔滿意。重建業主大聯盟批評收購價不合理，因根據居民委聘的獨立測量師過去估價每呎9,000元以上，而本月最新一次估值為8,200元。因此，市建局是次提出的收購價對居民來說，係一種「侮辱」!

究竟誰是誰非，馬沙嘗試用中肯角度同大家探討。由於整個觀塘市中心屬舊區，幾乎所有物業樓齡超過30年，大部分二手樓盤呎價跟市建局公布的平均呎價2,400元相近。若不計為人熟悉的麗港城 (近期平均呎價3,635元) 及匯景花園 (近期平均呎價4,067元) 兩個大型屋苑，整個觀塘區二手呎價能夠長期高於3,500元，相信只有人稱東九龍半山的功樂道及康利道一帶。而其中坐落於功樂道42號，樓齡只有10年的海天園，個人相信係觀塘區目前成交呎價最高的屋苑，10月尾一個頂層海景單位，呎價高達5,759元。睇到呢度，看官認為收購價5,937元，是否一種「侮辱」呢？

在一般情況下，相信冇人願意被人公開侮辱。但如果有得揀，相信好多香港市民都同馬沙一樣，想俾市建局公開侮辱一下。

(2008年12月18日刊於《am730》)

聖誕交叉 blog

2008-12-17T12:46:00.000+08:00

由知名博客大鐵鎚發起,一年一度之「聖誕交叉 blog」,現正接受報名!

想將自己玩嘢之「聖誕扑文」放在人地嘅扑,請從速報名!

欲知詳情,請到以下網址:
鎚心所欲一仆一碌

免會費

2008-12-16T11:59:00.003+08:00

面對金融海嘯，好多市民都開始認真審閱自己日常開支，好使在未來更惡劣的經濟環境下，盡量將不必要的開支減省。在日常生活中，衣、食、住、行需視為必要開支，但如果加以細心調整，相信仍可減低不少。

先講衣著方面，打工仔可以選購一些比較傳統的款式，咁就唔使每件衫都只能穿一季。

飲食方面，早餐可以求其食個包。午餐盡量避免去大型餐廳用膳，有朋友平常每日午餐使費近100元，一個月下來，以每月20個工作天計，單係午餐費每月就已經2,000元，比馬沙高出3倍。晚餐如沒有必要，留在家中享受住家飯肯定係最平最有營養。

至於住屋方面，個人認為在這階段應該不變應萬變，理由係改變居住地方，所花的間接使費，隨時得不償失。

最後行方面，唔使多講，善用公共交通工具，肯定係減低呢方面使費的不二法門。

對於一班專業人士，有一種固定的費用就無可避免。唔講大家未必知，大部分專業人士，為要維持其專業資格，每年都要向其所屬的專業學會或註冊機構上繳年費。至於年費多少，就完全由學會或機構全權決定，會員冇得 say「No!」。

昨天從報章看到香港律師會一則新聞，馬沙就為本港一眾律師高興。根據報道，香港律師會為幫助律師會員對抗經濟蕭條，免去會員明年會費及提供免費培訓課程。

馬沙在此希望各個專業學會(特別係香港會計師公會)，考慮效法香港律師會嘅做法，免去來年會費，共度嚴冬。

(2008年12月16日刊於《am730》)

風暴已過嗎？

2008-12-11T11:32:00.001+08:00

港股昨天無懼隔夜道指跌240多點，恒指收市報升824點，以接近全日最高位收市。減去周二恒指跌291點，恒指本周已升近13%，國企指數更升近15%，凸顯這次升浪中，一眾中資股跑蠃其他股份。這次升浪，恒指一口氣升破10天、20天及50天移動平均線。昨天更連上次反彈高位亦一舉升破。

恒指這次升浪既快且急，淡友傷亡慘重。單是本周被收回熊證數目已逾百隻。大家不禁會問，究竟呢次係熊市反彈浪，還是牛市一期，已無聲無息重臨。昨天收市後，一眾財經演員又開始見好唱好，有人更在電台大聲肯定地說確認熊市已結束，港股最壞時刻已過。

恒指是否已見底及最壞時刻是否已過，個人睇法係絕對否定。這次金融海嘯對香港中小企嘅衝擊，可謂剛剛開始。馬沙同好多不同行業嘅老闆傾過，大部分中小企老闆不約而同預期，明年首兩季才是最大考驗，有部分甚至已作出最壞打算。

雖說股市走在實體經濟之先，有反映未來之效。但細心想想，金融海嘯影響禍及全球，金融市場怎可能在短時間重踏正軌。經驗所得，幾乎每次熊市見底時，大部分散戶已損手離場，目前卻是等入市者眾。

最後值得一提，昨天不論恒指及多隻中資金融股，其14天相對強弱指標(RSI)已相當接近今年每次大型反彈浪的浪頂，料這次反彈即將結束。

(2008年12月11日刊於《am730》)

大滾友

2008-12-09T11:17:00.003+08:00

剛過去的周六日，馬沙一連兩天走去滾。讀者千萬不要誤會，馬沙所指的「滾」，即係打邊爐是也。

打從八十年代尾起，香港人開始喜歡火鍋，港九新界都其門如市。記得當年有一間由藝人經營，名叫「天天火鍋」的火鍋集團，就令馬沙愛上呢種飲食方法。以前各大小食肆，只會在入秋後才提供火鍋。時至今日，大家不只在冬天才可享用火鍋，目前好多地方一年四季都有火鍋提供。馬沙個人相信，除日本餐廳外，火鍋店肯定列入香港最受歡迎的食店之一。

馬沙既能稱為大滾友，當然經常相約友人四處去滾。上年就曾經試過一周去滾3次，唔知今個星期會否將呢個紀錄打破。

最近天氣轉冷，各大小火鍋店開始展開宣傳攻勢。馬沙留意到今年好多地方，鼓吹一人一爐的食法。雖然呢種方式比較衛生，免除一班人一起洗筷子的壞處。但馬沙個人就唔係咁喜歡呢一種食法，理由係食火鍋美妙之處，在於跟幾個大滾友圍埋一爐，叫打啤酒，你一言、我一語，上至天南、下至地北，暢所欲言度過一個晚上。今天同商界老友論經濟，明天同舊同學細說從前，可謂人生一樂也。

講到好食，馬沙就首推大角咀區某豬骨煲，豬骨好味之餘，還可因個人喜好，淨係要骨頭或豬軟骨。次選就係四川麻辣火鍋，一路食一路滴汗，再大口大口灌下啤酒，嗰種感覺絕非筆墨所能形容。俾我揀，馬沙情願同友人去滾，都唔去四季酒店嗰間米芝蓮3星級食肆。

(2008年12月9日刊於《am730》)

A message to the world!!

2008-12-06T00:49:00.001+08:00

簡單任務

2008-12-04T11:27:00.001+08:00

昨天從電視中看到唐英年為港人滯泰事件解畫，其言論不但未能為政府開脫，更突顯呢班高官嘅無能。納稅人用咁多錢去養呢班所謂特區精英，竟得出呢個不知所謂的集體決定，看來好像烏龜一樣正在一角冬眠的曾浮雲，不能繼續龜縮在一角，要走出來再向市民解說。

呢件事件的處理方法其實好簡單，各位只需在食早餐時多口問吓茶餐廳任何一位伙計，都會得到答案。一個心智正常的人，在工作時遇上問題要作出重要決定時，梗係先不求有功，但求無過。在包機事件中，包機與否，官員其實乜都唔使諗，只要使出所謂「敵不動、我不動；敵欲動、我先動」之法，肯定唔使俾市民鬧。

簡單而言，事前只需觀察各國有否行動，其他國家冇出包機，「敵不動、我不動」，港府有大條道理唔出包機。喺呢個情況，就算有港人不幸出事，市民都未必會怪責港府。但當各地政府紛紛安排包機接送國民，特別係連內地及澳門都安排包機時，所謂「敵欲動、我先動」，梗係不惜一切，第一時間派出包機接市民回港。試問呢個時候用公帑包機救人，有邊條政棍夠膽話政府錯？

偏偏呢班智力低於猿猴嘅特區高官，反其道而行，大鑼大鼓開記招拒絕包機。記招一開，即自絕後路，連彎都無得轉，又何苦呢？

下次再有類似事件，千萬不要再作集體決定了，走落「茶仔」請教啲伙計好過。試問一班智力低於猿猴嘅人，集體作出嘅決定，又會高得去邊？

(2008年12月4日刊於《am730》)

假如我在泰國

2008-12-02T11:47:00.003+08:00

馬沙天生不愛行街及購物，每次放假外遊，目的地通常只有兩個選擇，其一係冰天雪地，其二就係陽光與海灘。由於冰天雪地又有氣氛嘅地方，比如歐洲各國，或比較近的北海道，每次行程動輒要花兩星期大假。

對於日常工作繁重嘅馬沙，要安排一個超過兩星期的假期，真係唔係咁容易。所以5至7天的陽光與海灘之旅，就幾乎成為馬沙小休必然之選。

相信好多香港人同馬沙一樣，喜歡去泰國周邊小島如布吉及蘇梅享受一個短線假期。泰國曼谷機場自 11月25日晚上關閉起，至今已踏入一星期。滯留在泰國的各地旅客，據報道多達16萬人，而滯留當地的港人則未有確實數字。

這星期無論睇報章或看電視，大家都會看到正在滯留泰國的香港市民，是何等的無助。馬沙曾經在想，假若我現身在泰國，究竟我可以做乜?

軍用機場開放，各國即安排包機接國民返回原居地，致電回港家人尋求協助，寄望港府作出適當安排，似乎是唯一希望。港府前日一個記招，堅拒派包機救港人，正正就將一班滯泰旅客及其家人的心打碎。

如果我真的身在泰國，喺嗰一刻，我多麼的希望我係一個正正式式的中國國民。退而求其次，做一個澳門特區的市民也好。同樣是中國人，中國國民及澳門特區居民已迅速被包機接走，何解港府如此冷血。

昨天有滯泰市民死傷，才改變初衷安排包機，港府一眾高層，對得住香港市民嗎？

(2008年12月2日刊於《am730》)

攝影怪傑

2008-11-27T11:38:00.001+08:00

不知是科技先進,還是潮流使然。在現今社會,無論走在大街小巷,或大小餐廳,好多人都喜愛拿出手機或小型相機通處影。目的可以有好多,包括將美好的一刻留作紀念,亦有部分朋友將相片放在博客跟讀者欣賞。

隨住數碼科技日趨成熟,專業型數碼單鏡反光相機價格已沒有以往那般昂貴。最近幾年,好多年輕人都喜歡手執一部非常專業的相機周圍去。攝影係一門藝術,不管閣下喜愛拍攝風景或人像,只要不影響人,實在係一種幾好嘅興趣。

不過,發燒友在拍攝時,應要好好考慮拍攝時的地點或環境。早幾日,馬沙就遇到一名攝影怪傑。話說馬沙早幾日到四季酒店出席囍宴,該酒店貴為城中最高級的酒店之一,其室內設計以至各樣擺設,當然吸引一些攝影發燒友。本來攝影師一場來到,四處去拍攝留影,實屬無可厚非。但攝影師當晚其中一個舉動,著實令馬沙不悅。

事緣馬沙人有三急,豈料一步進洗手間,竟見到攝影師在內不停咁影洗手間內大小擺設。更重要的是同一時間,有人正在解手。該攝影師見馬沙進來,竟未有停止拍攝,明目將膽繼續四處拍攝。

馬沙奉勸各位攝影師,即使洗手間內的擺設有多具特色,但走進洗手間內進行拍攝,是極之不禮貌,亦對正在使用洗手間的人極不尊重。尤其「四季」等高級酒店,無數名人出入,分分鐘會因此惹上官非。

早幾日嗰個高佬攝影師,遇到我係你好彩,下次咪再試!

(2008年11月25日刊於《am730》)

花仔

2008-11-25T10:32:00.008+08:00

距離農曆新年唔夠兩個月，又踏入結婚的高峰期。如果大家有留意，近排每逢周六或日，特別多花車在街道上行走。

靚女友人覓得如意郎君，周日舉行盛大婚禮，馬沙當天大清早就要起身準備，真係早過返工。人家結婚，何解馬沙會咁緊張呢？答案好簡單，因為馬沙兒子獲邀請成為花仔花女團中一員。

馬沙當年婚禮都是在教堂舉行，亦有邀請友人子女作花仔花女。講真，馬沙當時真係唔知原來作為花仔花女的父母，壓力真係幾大。直到兒子周日第一次要做花仔，才深明箇中壓力。記得一年前獲邀請時，仔仔還剛過一歲，馬沙當時輕鬆回答：「到時剛過兩歲，妳夠膽就用，後果自負！」，勢估唔到靚女友人咁夠膽色起用仔仔。

作為花仔的父母，最大壓力係婚禮無take two，子女表現唔好，分分鐘影響新人整個婚禮的完整性。不過，臨場表現失準、唔肯出場或小朋友行到一半突然放聲嚎哭，最緊張嘅唔係佢哋父母，而係企在台前等候的新郎，以及站在其後準備踏入禮堂的新娘。

花仔父親在婚禮當天可以做甚麼呢？一早起身為兒子梳洗，整番一個醒目髮型。穿起一套一個月前已經訂造的「踢死兔」禮服及一雙新鞋，揸車準時及安全地將呢個兩歲多的縮水版紳士送達教堂。

乜嘢令花仔父親最滿足呢？小紳士順利完成任務，以及過程中聽到好多賓客話：「個花仔好有型呀！」

最後，要順利完成任務，最有效的武器就一定係佢地平日最愛嗰隻「糖」！

(2008年11月25日刊於《am730》)

珍惜眼前人

2008-11-21T16:13:00.003+08:00

教會姊妹「抗癌戰士 Cindy」返天家多月,今天見到其夫Marco寫下一篇以「第一次一個人的六週年」為題的Blog 文,內容非常感人。

夫人看後哭了,原以為自己可以強忍眼淚,但當我將他倆快樂的臉容代入文章字裏行間,一份莫名嘅悲傷,只能透過淚水釋放出來!

在面對金融海嘯之下,大家無論遇到任何困難,都不要輕易放棄生命! 要知道呢個世界上,好多人努力抗戰到底,仍不能活在世上! 還活在世上的,更要學懂珍惜眼前人!

Cindy の生活點滴: http://hk.myblog.yahoo.com/cindy-marco/article?mid=28608

冇陰功

2008-11-20T12:13:00.002+08:00

雷曼迷債結構的複雜性，就算金融專材，單看產品的銷售單張都未必能夠明白，更遑論銀行分行的銷售員。要免除日後再有類似事件發生，政府應禁止所有商業銀行，出售各類結構性產品及衍生工具予普羅大眾。

以後市民要買入呢類產品，得走入投資銀行或股票行。市民自己走入投行或股票行，就當知自己正在投資，要明白任何投資產品都有風險，可升可跌。就算所謂低風險，亦可能隨時間或市場形勢而改變。要知道「低風險」即風險相對比較低而已，並非百分百保證無風險。

另外，市民在揀選所謂財務顧問時要非常小心。千祈唔好以為顧問細心聆聽，幫你做個風險評估，就會提供一個合適方案給你，實情係佢隨時為咗自己份佣金而出賣你。

昨天馬沙就在食早餐時，聽到鄰桌一位估計年近70歲的老太婆，被某大金融集團一名無良財務顧問遊說的例子。此君高聲談論世界各市場未來走勢，更暢談自己在97金融風暴如何教其客戶賺大錢。問題係呢位看上去30歲未夠的顧問，97年可能連書都未讀完，更遑論幫人賺錢。

此君之後話股市目前未係入市時，反之中國最近在700美元大量買入黃金，極力遊說老太婆投資黃金。最令人難以相信是出自財顧把口的，是若生怕買入黃金後下跌，可幫佢買入港交所(388)作對沖，仲話有個大客都聽佢講咁做。

對住個70歲的老太婆，咁嘅投資建議都講得出，你話幾咁冇陰功! 此君真係要小心生仔冇屎忽。

(2008年11月20日刊於《am730》)

一個棄權者的告白

2008-11-19T23:59:00.000+08:00

昨天收到一個棄權者的告白:

Dear Friends,

Not the right time to invoke LegCo special powers

LegCo voted last week to approve the motion to invoke special powers to investigate the minibonds matter. Even before the debate began, Members returned by direct election overwhelmingly favoured the motion. Support among Members returned by functional constituencies was less clear. It was a controversial issue and some Members were weighing the pros and cons till the end.

My position on the minibonds matter has been clear and firm all along. There were clearly cases of misselling by the financial institutions, and there were loopholes/weaknesses in the current regulatory regime and process. I believe that the banks, the regulatory authorities and the investors all have their share of the responsibilities in this financial mishap. A review of the regulatory regime should be made to find out where the system failed and to close the loopholes. I am also greatly disappointed by the tardy response and the slow progress in the settlement of the grievances of those retired and underprivileged persons who had been misled into investing in such risky derivative products. I have been a critic of the banks all along.

However, I do not support invoking LegCo’s special powers & privileges to investigate into the matter at this time. I believe the better approach is to set up a committee of highly credible independent experts to investigate into this matter and submit its report to the government and LegCo for consideration. Invoking LegCo’s special powers to investigate should only be the last resort.

My vote was abstention. Why did I vote ‘abstain’ instead of ‘No’ the motion? Let me explain. Under the prevailing LegCo rules governing the decision on motions, an abstention vote has a strong effect of disapproving a motion, though of a lesser degree than outright objection. Let us look at the following simplified illustration.

Suppose at a meeting with 29 members present, 14 votes ‘Yes’, 12 ‘No’ and 3 ‘abstain’. Although the number of ‘Yes’ exceeds the number of ‘No’, the motion cannot be carried because it needs 15 votes (i.e. over 50% of those present) for the motion to carry. Abstention in effect works against the carriage of a motion.

Stemming from several major concerns, I have strong reservations about supporting the motion:

1. Given the large number of parties involved and the complexity of the issues and legal technicality, the investigation process is expected to take a long time, thus diminishing the timeliness and usefulness of the outcome in helping the victims;

2. Invoking special powers of the LegCo at this time may force the banks to resort to a legalistic approach to all the cases and hold up the handling of disputes pending the outcome of the investigation. This may jeopardize the interest of investors whose priority is to salvage as much money as early as possible;

3. In the investigation process, sensitive and confidential business information may be revealed. This will adversely affect the business operating environment of Hong Kong and undermine Hong Kong’s reputation as a world-class financial center. Although some advocates of this motion argued that confidentiality would be strictly observed by members of the LegCo Committee while dealing with highly sensitive information, there are, sadly, precedents where sensitive and confidential information leaked nonetheless; and

4. The bigger challenge that Hong Kong now faces is the sudden downturn of the economy and rising unemployment. Hong Kong’s economy is bleeding badly and needs emergency care. Precious time and energy should not be diverted to the post-mortem investigation of the minibonds matter at this stage, or else all the people of Hong Kong may have to pay a very dear price for this.

If you would like to read the full text of the floor speech I gave, please follow this link:
http://www.paulmpchan.org/mailing/081119/Speech.html

My floor speech was in Chinese. If you would like to read the English translation, please let me know by sending an email to paul@paulmpchan.org. My staff will arrange to have the transcript forwarded to you as soon as it becomes available.

As always, I shall be pleased to hear your views on this highly controversial, and somewhat divisive, issue.
　
Sincere regards,

Paul M P Chan

Telephone No. : (852) 2165-7887
E-mail address : paul@paulmpchan.org
Personal web site : http://www.paulmpchan.org/

呢個解釋,大家接受嗎?

對我嚟講,“support” 就投“Yes”! “do not support” 就要投“No”!

把口話自己其實“do not support”, 但走去投“棄權”,仲要長篇大論去解釋投“棄權”票嘅好處,簡直係會計界嘅笑話!

如果你當日有投波哥一票,請話比我聽你現在有否後悔,謝謝!

棄權

2008-11-18T11:37:00.002+08:00

上周立法會以大比數通過特權法，調查雷曼迷債事件。馬沙持反對意見的立場相當清楚，早在雷曼事件發生初期，已不相信大部分所謂苦主，買入雷曼迷債的主因，完全是受銀行誤導。有人厚顏無恥說銀行職員從未提及雷曼兄弟與迷債有關，否則必定不會買入。呢種馬後炮式的控訴，明眼人一睇，就知道完全偏離事實。

當然，個人亦相信有部分苦主，真係受到一些為求達到銷售目標，毫無職業操守可言的銀行銷售員，以失實陳述的方式，誘騙買入迷債。但不論如何，不先求知就去投資，投資者本身都要負上某程度的責任。

由於是次投票以記名方式進行，馬沙好留意自己業界代表陳茂波的意向。記得波哥參選時多次表示，遇到重大事情，必定先向業界諮詢才投票。由於雷曼事件不涉及一般市民利益，相信業界都放心交俾波哥自行決定。

馬沙個人好開明，雷曼事件各人有唔同睇法，加上波哥早前提出案例，建議政府出手干預，逼令銀行和解，投出「贊成」票，馬沙尚可接受。但結果令人震驚，波哥竟投出「棄權」票。支持調查投「贊成」、不支持就投「反對」，簡單不過，投「棄權」即係點?

作為金融業界相關代表，在金融有相當認識的事項上都不能明確表達支持或反對，難道以後非金融議題繼續投「棄權」票。在我看來，波哥似乎要公開向當日投你一票的會計師選民，講解「棄權」票的決定，點樣「睇得遠、做得到」。

(2008年11月18日刊於《am730》)

學前教育 (下)

2008-11-13T11:18:00.003+08:00

講咗兩日，都係時候講吓自己為小朋友選擇幼稚園的準則。個人認為幼稚園既然係學前教育，培養及提高小朋友對學習的興趣，先至係重點。因此，一些專門催谷小朋友及極多家課的學校，馬沙絕不考慮。

個人第一個考慮因素，是幼稚園本身的宗教信仰背景。以馬沙為例，作為一位基督徒，無理由將自己的子女，送進一所由其他宗教申辦的幼稚園吧。所以，即使家居附近有一所人人讚許的佛教幼稚園，馬沙亦從未考慮為犬兒報名。

其次，學習的主要語言亦相當重要。有別於一般家長，個人相當重視中文。所以會選擇以中文教學為先，英文教學為副的學校。理由是作為一個中國人，至少要先把中文學好。

對於一些家長，自小刻意要小朋友在家以英語作為溝通語言，馬沙就相當反對。除非父母本身在外國長大，且母語係英語就作別論。試想想，若家長的母語為中文，即使英語再好，其英語表達能力最多只有母語七成。馬沙就不止一次在不同場合遇到呢類父母，不停以其水準有限的英語同小朋友溝通，小朋友有樣學樣，結果佢哋講乜，只有佢哋一家人明白。

最後，就係學校最緊要接送方便，校車就可免則免。一方面可讓孩子有充足睡眠，免除舟車勞頓，亦減少意外發生。另一方面，對於工作繁重的家長們，能夠每天親自送子女到達校門，其實係一種福氣。

至於津校定私校，就要視乎自己經濟能力，千萬要記住「勉強無幸福」！

(2008年11月13日刊於《am730》)

一起高呼Rock'N'Roll

2008-11-12T15:51:00.005+08:00

小飛俠蘇德華無得頂..........從過去到現在,依然係香港頂級結它手.....

學前教育 (中)

2008-11-11T11:03:00.002+08:00

上星期談論過好多父母，要年幼小朋友長途跋涉到所謂名校上學，間接降低小朋友的休息時間及學習能力。今天再討論現今家長為小朋友報考幼稚園的怪現象。

現今父母們除一窩蜂走去報讀所謂名校外，更加喜歡以魚翁撒網方式為小朋友報名。這陣子在網上討論區其中一個熱門話題，就係互相詢問大家，準備為子女向多少間幼稚園報名。

根據馬沙非正式統計，大部分家長選擇報名的幼稚園數目，就算無10間，都必定有8間。當中馬沙見過有家長竟然打算為其小朋友，報考15間學校之多。

唔好以為報讀幾多間學校，只係一眾家長嘅事。其實一班平均年齡只有兩歲多少少的小朋友先至係真正苦主。雖然佢哋唔使好似雷曼苦主一樣，要天天走去示威遊行。但小小年紀，在這兩三個月，卻要每個周六及日，去到不同的學校接受「面試」。若不幸遇上撞期，分分鐘仲要一日走幾場。

作為家長，對自己子女面試的表現有所期望，本來沒有問題。可是有部分家長，對自己小朋友的表現似乎有點過份嚴苛。馬沙早前帶犬兒去面試時，就親身見到為數不少的家長，一走出面試的課室，已經急不及待地責備自己的小朋友。而責備的內容不外乎「老師問你乜嘢名，你做乜唔答？」及「個問題明明教過你，點解剛才面試不答老師？」等等。試問一個只有兩歲的人仔，突被一位素未謀面的陌生人(老師)正經提問，因心生害怕而不敢出聲，又何罪之有呢？

(2008年11月11日刊於《am730》)

學前教育 (上)

2008-11-06T11:14:00.003+08:00

每年踏入10月,香港不少父母都要面對學前教育的迷思。因為從這個月份開始,要為明年正式入讀所謂學前教育K1的子女報名。

剛巧小兒明年正值入學年齡,最近對選校呢個問題有少少體會。由於身邊有幾位老友的子女跟小兒同齡,所以近日每次見面,馬沙都被問以下幾個相同的問題。「你報咗九龍塘某某名校未?」、「你一共報咗幾多間名校?」及「邊間名校收咗你個仔?」等等。

不知何時開始,香港的父母們連幼稚園都愛為子女報讀所謂名校。特別係家住九龍區的父母,不論遠近,總要一窩蜂走去九龍塘,為子女報考名校,彷彿只要手執名校幼稚園學額,即天下我有。說實話,馬沙不但未有為小兒報讀九龍塘任何一間幼稚園,在好些時候,馬沙甚至認為現時好多家長已經走火入魔。

首先,明明唔係住喺九龍塘區,點解要只有3歲的子女每天千里迢迢,走去九龍塘返學? 友人分別家住荃灣及屯門,齊聲話誓要為子女在九龍塘名校取得學額。問他們他日如何接送子女往返學校,他們同聲話有校車,所以非常方便。

有經驗的父母都會知道,一般校車服務,通常要遊走各區不同地點接載學生才返到學校。好似馬沙以上兩位友人,其子女由上車至到達學校,車程可能超過90分鐘。假若上課時間是早上8時半,即要一個3歲小孩每天最遲早上6時半起床,7時就要上校車返學。試問咁樣,一個天真無邪的3歲小孩哪有精神去學習。

(2008年11月6日刊於《am730》)

信貸收縮

2008-11-04T11:40:00.001+08:00

早在10月初期，馬沙已聽聞市場一間能直接審批7成以上物業按揭的大銀行，內部發出通知，即時終止承辦七成以上按揭。對於準備做七成以上按揭的準業主，唯有依賴香港按揭證券有限公司(HKMC)作出審批。

本來未有三成首期的準業主，只要有足夠的入息證明，仍可一嘗業主滋味，但八至九成物業按揭近日開始變得明存實亡。事緣近日各大小銀行因港元拆息大幅抽高相繼調高按息外，上星期開始更大幅調低各區物業估價及可提供的按揭成數。美其名係審慎批出貸款及降低銀行風險，實質係唔想承做物業貸款。

銀行在金融海嘯衝擊之下，對審批貸款時比以往嚴謹一點本來無錯。嗰班準備年尾收樓又未上會嘅假豪宅業主，大蝕至少三成幾乎可以肯定。只可怪自己有眼無珠，用超高溢價，誤將石九公當作石斑。目前最大問題係有銀行刻意將估價調至低於市場最新成交價一至兩成，以及只批出其估價的五至六成貸款，就玩死好多正正經經想圓置業夢想，並已付大訂的準業主。

舉一實例，A君早前以228萬買入東九龍一單位，準備以七成按揭上會。而該屋苑同類單位，近日在220至250萬有多項成交。點知銀行上星期估價只有190萬，按揭亦只能批出估價之六成。換句話，首期由原先預計70萬大增近115萬。幸好A 君最後有能力籌多45萬差額，否則要撻訂收場。所以，若你正準備買平貨，至少要預留樓價四成才穩當。至於八至九成按揭，想也別想。

(2008年11月4日刊於《am730》)

烈火戰車

2008-10-31T11:38:00.001+08:00

面對當年情...... 真心說句 .........

乖仔,
穿起戰衣,果然有乃父當年七成......
不過你仲細,都係唔好扮型,學識踏單車先啦!

嘻哈委員會

2008-10-30T12:02:00.001+08:00

前天政府宣布「經濟機遇委員會」正式成立，曾特首更親自落場當主席。而副主席一職則由近來每天清早，向市民講一則對經濟毫無意義的廢話的財爺曾俊華擔當。曾特首更即時委任10名包括財金專家、經濟學者、以及主要產業等跨界別人士為委員會的成員。

不知近來評分跌至谷底的曾特首，是否期望透過親自帶領呢個所謂尋找機遇的委員會，帶領市民離開經濟危機，幫自己翻身。如果係，馬沙幾乎可斷言，佢注定死多幾錢。曾特首話，呢個嘻哈委員會主要工作係要及時評估金融海嘯的形勢、籌謀應對之道、以及捕捉新嘅機遇，從而提高香港嘅國際競爭力。

睇返剛被委任的10位委員，在各界身居要職。在經濟急轉直下的情況下，連本來已退下火線的施老闆，都要重掌中原地產，仲有邊個唔使全力為自己所屬機構救亡，哪有時間一起同你評估形勢。

另外，「捕捉新機遇」一點，不論經濟好壞，全世界的生意人本已無時無刻去尋找。如果閣下係其中一個委員，又有幸找到或想出新機遇，你會私下開發呢個機遇，還是在委員會無私分享呢?

誠如施老闆接受訪問時話，自己本來每天已經透過本報「C觀點」專欄，向大家解說金融海嘯的最新形勢及對市民的影響，他的意見很容易可以聽得到。

可以估計得到，呢個委員會每次開會，只能對已知的問題討論一番及加以確認，解決方法呢，都係睇毫無束縛的「C觀點」較好。

(2008年10月30日刊於《am730》)

大仔業績

2008-10-29T21:49:00.007+08:00

大仔招商銀行(3968)剛公佈二○○八年第三季度報告, 08年首3季淨利潤較去年同期增長90.56%,比早前預計08年首3季淨利潤較去年同期增長80%以上更多。初步睇,呢份業績相當理想。

根據資料顯示,截至9月30日:

每股淨資產值為HK$6.45 (人民幣5.68)

每股基本盈利HK$1.46 (人民幣1.29)

今天(29.10.2008) 收市價為HK$10.62

巿賬率(PB)為 HK$10.62 / HK$6.45 = 1.6倍

假設第四季每股基本盈利為第三季HK$0.44 (人民幣0.39)之八成,即HK$0.35,全年每股基本盈利為HK$1.81,現價08預期市盈率為5.8倍。

假設第四季每股基本盈利為第三季HK$0.44 (人民幣0.39)之五成,即HK$0.22,全年每股基本盈利為HK$1.68,現價08預期市盈率為6.3倍。

睇到呢到,相信招行可以繼續安心持有,有多餘現金,更可不斷增持!

飲食業逆境

2008-10-28T11:25:00.002+08:00

港股經過昨天一跌,相信每個人都應該感受到呢次金融海嘯之巨大威力。

過去兩星期，馬沙每次走到街上，都會特別留意各類生意的變化。或許香港市民經歷過股災、樓劫及SARS，已懂得如何面對逆境。雖然目前樓價並未出現大幅下瀉，亦未有大量企業出現減薪或裁員潮，但市民明顯預先開始量入為出。

在飲食業方面，兩間大型飲食快餐店，晚飯時段人流明顯有所增加。又有專營牛扒的連鎖店，近月開始增設早餐時段，免收加一，價錢更與兩間大型飲食快餐店相當接近。

個人相信，最難避過這次海嘯的，是走中檔路線中式酒家。特別係某個酒樓集團，過去兩三年間，上至大型商場，下至公屋商場，以不同風格開設中檔特色酒家。當經濟環境轉差，市民最先就是減少光顧這類檔次的食肆。最要命的一點，是這兩年開業的新店，是以非常昂貴的租金承租。由於經營酒家需要先投入過百萬元在裝修上，為避免裝修未回本就被業主大幅加租，一般來說，租約至少會簽5至7年。因此，呢類新派酒家能否在生意額大幅下滑及未能減租的情況下，持續經營幾年至經濟好轉，存有很大問號。

馬沙昨天食早餐時，就遇上一件多年未見的事。話說馬沙在M記享用早餐時，有一年約40歲的中年人走到鄰桌坐下。望一望覺得有點兒奇怪，點解一個人叫4杯咖啡。最後才發覺此中年人為近年少見的二手食客，即4杯咖啡乃係來自其他4名食客用餐後剩下來的。

(2008年10月28日刊於《am730》)

真假董事

2008-10-23T01:20:00.004+08:00

中信泰富 (267) 炒濃外滙,一夜之間市值蒸發超過一半,都算香港金融界一件奇聞。

獨立股評人David Webb 即晚就在其網站發表文章,表示根據公司最新的年報資料,質疑太子女榮明方先至係公司「集團財務部之董事 Director, Group Finance」,應該知情及負責,財務董事張立憲及財務總監周志賢做咗所謂「替死鬼」。。

董事總經理范鴻齡公開作出回應,榮明方只係財務部主管,唔係董事局成員之一。馬沙午飯時從有線新聞聽完以上解釋,即時同身旁的合伙人講咗聲:「有無攪錯!」。根據公司法,董事得一種,只要你係董事,就一定係董事局成員,絕無一種誠如范鴻齡所講,係董事但唔係董事局成員的職能。

昨天馬沙空閒,上網睇睇中信泰富07年份年報,董事及高級經理(54-56頁)列表中分成3層,首先係執行董事,共有12人。其次係非執行董事,共有8人。最後係高級經理,共有7人,其中榮明方排在首位。最特別一點係每名高級經理名字之後,註明各人係相關部門之董事。而榮明方名字之後就一如David Webb 所指,乃集團財務部之董事。

馬沙後來翻查公司註冊處紀錄(正確資料以董事名冊為最終依據),根據公司07年及08年之「周年申報表 Annual Return」,發現范鴻齡的確無吹水, 榮小姐根本就唔係公司董事。比較年報,7名「高級經理」全部都唔係董事。

至於點解要係年報冠以「董事」之名,以及咁樣做有否誤導公眾之嫌,就要待剛暫停港交所董事及證監會收購合併委員會委員既范鴻齡解釋。

(2008年10月24日刊於《am730》)

非一般會計師

2008-10-21T11:51:00.002+08:00

早前曾特首在其施政報告中提及，要在金融海嘯的危機中尋找新機會。在經濟走向谷底時，最直接獲得盈利增長的，相信是一眾專門處理企業清盤及債務重組案的會計師行相關部門。

由於企業清盤涉及非常繁複的程序及法律常識，所以絕非一般會計師能夠勝任。又因資源關係，目前除了四大會計師行外，相信只有幾間中型會計師行設有專責處理清盤的部門。亦因此，每次有大型上市公司倒閉，大家見到獲法庭委任的臨時清盤人，來來去去都係同一班人。

面對經濟逆轉，來年畢業的準會計畢業生，大概又要面對僧多粥少的情況。如果有志成為專業中的專業，大可考慮加入會計師行的企業清盤或企業重組部門。你或許會擔心，金融風暴唔係年年有，經濟轉好時豈非無嘢做？

請你放心，我實實在在告訴你，一個普通上市公司的清盤案，快則用3年，慢則分分鐘超過5年。若有幸碰上大型上市公司清盤案如當年的廣南集團等，肯定到你離職，件案都未完。

再講，每當一個金融風暴過後，必定有無數經營不善或過度投資的大型中小企需要做債務重組。就以2000年科網爆破後，直至2003年，馬沙在某大會計師行中，仍要為無數走在清盤邊緣的客戶，跟其主要債權銀行處理債務重組方案。

有別於一般核數工作，清盤工作好多時都好有趣味。例如即時拉隊爆門及查封資產，參與資產拍賣及重組殘缺不堪的帳目，都十分值得回味。

(2008年10月21日刊於《am730》)

喜出望外

2008-10-16T11:35:00.002+08:00

港股經過2天大幅度反彈,昨天又再一次下插,收市跌835點,16,000點又再度失守。收市後歐洲各主要市場跌幅擴大,各指數下跌近3-4%,看來預視即晚美股凶多吉少。面對金融海嘯,各地市場無可避免會非常動盪,相信仍留在市場奮戰的股海戰士,已經開始習慣每日過千點上落的日子。

正當全球準備迎接未來經濟大幅下滑的同時,又有否地方可以獨善其身呢? 個人認為今次金融海嘯,雖然對中國本來幟熱的經濟增長有所影響,但未必出現嚴重衰退。反之,金融海嘯的出現,幫助中國急速冷卻之前出現的泡沫。

換言之,以倍數式上升的盈利增長,在大部分板塊將不復再。尤其是內房股,未來經濟增長減慢,房價必然下跌,加上融資比以往困難,內房股隨時要被迫賤賣資產去減債。

如果現在對中國未來前景仍充滿信心,刻下繼續不斷收集優質的中資股,相信不失為一個好方法。10年後回首,盈利應該相當可觀。要數邊個板塊最穩陣,就非金融股莫屬,尤其內銀股。銀行向來有百業之母的稱號,當經濟再次起飛,第一個受惠的必然是銀行股。

昨天馬沙大仔招商銀行(3968)率先發出08年第3季業績預增公告。招行預計08年首3季淨利潤較去年同期增長80%以上。換句話,招行首3季每股基本盈利至少為人民幣1.22元,比07年全年每股基本盈利人民幣1.04元超出近兩成。預期招行08年全年每股盈利人民幣1.5元,現價$16.9計預期市盈率下降至接近10倍。

(2008年10月16日刊於《am730》)

講多錯多

2008-10-14T11:03:00.003+08:00

金融海嘯衝擊全球，身為國際金融中心的香港，絕無可能置身事外。上星期恒指下跌，每每以千點計算。作為香港市民，不管有否投身股票市場，不多不少，亦早應感受到金融海嘯已捲至香港。無可避免，各市民都要面對大少不同的資產減值，與歐美國民一起同唱哀歌。

不知是否受到早前東亞銀行擠提事件影響，政府各財金官員好像生怕市民再度出現恐慌，每天早上一個接一個企出來，拍心口話香港金融體制好健全，叫市民不用怕。

馬沙近日每天清早打開電視，都想睇睇金管局任總開工前發表的意見。儘管有好多人話任總廢及人工貴，但馬沙個人就認為任總向公眾發表的言論，對後市或未來經濟前景，幾有指標性。如果無記錯，當政府各官員年初在次按風暴爆發初期，大大聲公開話風暴對香港不會造成影響時，任總已經公開叫市民小心。馬沙平日並唔想見到任總，因為每次任總發表公開言論，幾乎都唔係好事。

反觀曾俊華司長，每天向市民發表的言論千篇一律，聽完都唔知佢想講乜。上個星期曾司長更化身成為天氣報道員，仲要學天文台長無時準，搞到市民更加驚慌。上星期曾司長在恒指大跌至近萬四點時，大大聲話海嘯還未到。樓股皆瀉海嘯都未到，怎叫市民安心。

另一邊廂，同為財金官員的梁鳳儀副局長，又公開話現時係黎明前的黑暗。以馬沙理解，即風暴已近尾聲，曙光將現。咁實情眾財金官員，究竟認為風暴到了沒有？

(2008年10月14日刊於《am730》)

論假豪宅

2008-10-09T11:12:00.003+08:00

上星期討論過真豪宅及用家盤，今天就同大家講下假豪宅。此類物業的特色是以豪宅作為賣點，本身不是坐落在傳統豪宅區，開賣呎價往往比同區二手市場高出三至四成。呢類物業的銷售目標絕不是一般小市民，因為呎價一般設定在7,000元以上，在港島區甚至去到過萬元一呎。根據馬沙近年觀察，假豪宅在開售時，主要買家先為物業投資者，即所謂炒家，其次就係一班自命品味非凡的高級中產。

馬沙一直不明白嗰班高級中產用家，點解會相信自己買入的物業係豪宅。就好似用7,000元以上呎價買入將軍澳、深水埗及大角咀區新樓的用家，買之前有否親自去視察環境？對於有錢人而言，莫講話居於此地，他們連去都未必肯去。沒有多少富戶的住宅，點可以叫豪宅？

近年市場又出現了一種叫「精品豪宅」的怪物，顧名思義，精品豪宅一般坐落在較優質的港島區，單位建築面積雖然只有500多呎(即實用面積只有300多呎)，但竟索價近萬元一呎。試問真係有錢人的話，邊會肯屈居於如此細小的環境？

以上假豪宅，由於主要買家為炒家，物業正式入伙後，十室九空的奇觀必定出現。當假豪宅入伙後5至8年，呎價勢必向下與同區相同質素的二手物業接軌。

面對金融海嘯，炒家們為求自保，勢必減價止蝕甚至撻訂離場。依馬沙愚見，假豪宅在未來一年，呎價要下調三至四成，才接近合理水平。如果今次樓價出現大跌，相信最傷一定係一班高級中產。

(2008年10月9日刊於《am730》)

冰河時期

2008-10-02T11:25:00.003+08:00

昨天閱報,施老板話今次金融海嘯,將促使地產代理業步進冰河時期。報導一出,即在網上引來大肆討論。在地產業界地位舉足輕重的施老板,其言論一向對後市的去向有指標性作用。今次的言論,對樓價往後的走勢,無疑加上一份壓力。

不知是否報章錯誤解讀施老板的言論,馬沙個人認為,施老板所謂的冰河時期,乃係指地產代理業界而言。馬沙在上年尾已經多次指出,大部分二手樓盤在急升過後,交投已出現膠著狀態,即所謂有價無市。賣家叫價過於進取,唔肯降價,而準買家(用家們)又不急於入市,唔肯追價,地產代理已注定搵食艱難。近日不斷出現的所謂減價成交,查實係一班賣家終於面對現實,將本來過高的叫價,重返買賣雙方都能接受的水平。

樓市去向方面,要劃分3個層次去睇。

首先是真豪宅市場,價格本身同經濟好壞沒有必然關係。真豪宅的價格下跌,跟富豪們的身家相比,不能造成任何根本性傷害。富豪們絕不會在不看好樓市的情況下,轉買為租。

其次係所謂用家盤,有名你叫,用家盤一向以用家為多,各區價格貼近各區市民的供樓水平,因交投量不大,升市時不會升太多,跌市亦不會超出實際可接受的水平太多。特別係現今息率相對97年低,而未來數年大幅增加的機會亦不大,加上供樓佔入息的比率不高,樓價調整幅度應該有限。

最後一類就係馬沙經常講的所謂假豪宅,篇幅所限,下次再談。

(2008年10月2日刊於《am730》)

自我反省

2008-09-30T11:45:00.006+08:00

上星期一篇新聞報道指香港唱片生意由89年的27億元，下跌至目前只得4億多元。國際唱片業協會(香港)總會的發言人，再度將香港唱片銷路下跌的主要原因，歸咎於非法下載。

馬沙睇完呢篇報道，不禁駡了一聲不知所謂。香港唱片業多年來將唱片銷路下跌怪罪於非法下載，究竟業界曾否自我反省問題的真正所在？

誠然，自互聯網普及之後，非法下載活動猖獗，但銷路嚴重下跌，是否完全因為非法下載而起呢，馬沙就認為唔係。而問題的癥結所在，乃係香港唱片業界多年來不思進取所致。

早在80年代初期，雖然未有非法下載，但因為當時的市民普遍經濟能力不及現在，租賃黑膠唱片及收費轉錄卡式錄音帶的小店舉目皆是，何以當時的唱片業仍能百花齊放，答案只有一個，當時香港的歌曲質素好，人人愛聽。

現今樂迷的消費能力，普遍比80年代好。我輩喜愛聽音樂的樂迷，家中的音響系統已經花費五、六萬元，又點會將翻版CD放入心愛的CD播放機。簡而言之，呢類高消費能力的樂迷，遇到高質素的唱片，自然樂於奉上金錢。

年青一輩，喜愛以電腦、iPod以及手提電話聽歌，由於播放器的關係，音樂製作的質素已是次要，重點是如何方便地將歌曲輸入播放器。部分年輕人喜愛非法下載，就係貪其方便，即下即聽，無需再轉換格式。如果業界能為年輕人提供價錢合理的合法下載方法，只要夠方便，年輕人自然樂意俾，既方便又環保。

(2008年9月30日刊於《am730》)

最近最愛聽嘅,就係 VITAS 呢位人兄嘅新CD!

VITAS "Lucia Di Lammermoorr"

Vitas - Dedication

Vitas - The Star

謠言

2008-09-25T10:36:00.001+08:00

颱風過後，昨天市民最關心的不是毒奶事件，更不是股市升跌，而是銀行不穩的謠言。受到謠言影響，從昨天下午起，東亞銀行本地各大小分行相繼出現擠提情況。尤其3時過後，情況更見嚴重。馬沙自己亦收到各方好友來電告知，及詢問個人意見。

馬沙記憶所及，最近20多年以來，香港銀行倒閉令市民直接蒙受最大損失的，要數1991年停業的國商銀行。雖然當年馬沙及家人並沒有在國商事件中有任何損失，但剛加入核數界工作不久的馬沙，當年就見盡無數大小客戶，因國商倒閉事件的慘痛經歷。有一些本來業務非常穩建的客戶，更因大部分資金被凍結而步向破產收場。

經歷國商事件之後，香港銀行的監管制度變得更加健全。我輩亦漸漸養成一種香港政府不會讓香港商業銀行倒閉的巨大信心。所以無論97金融風暴、科網股爆破以及SARS期間，多次傳出有銀行出現問題，出現擠提的情況都好快平息。香港銀行近年未有重大事故出現，其實有賴金管局持之以恆的監察制度。特別係對銀行本身的資本及流動資金充足比率方面，金管局就睇得非常嚴謹。

那麼，為何這次東亞銀行事件，最後演變成如此大型的擠提事故，答案顯而易見係香港市民近日因金融海嘯，已經出現嚴重信心問題。另外，近半年電視上經常播放一條存款保障的廣告，市民知道銀行一旦出事，存款保障原來只有10萬。高存款市民遇見擠提，唔去至奇。話之你是否謠言，自保至上。

(2008年9月25日刊於《am730》)

犧牲小我

2008-09-23T11:32:00.003+08:00

金融海嘯席捲全球，投資者面臨各式各樣的投資虧損。馬沙經常叫人要「先求知，再投資」，了解投資產品的真正風險才好買入。雷曼兄弟清盤，無數手持雷曼迷你債券的投資者隨時血本無歸。500多名苦主一連幾天上街遊行，大喊因被銀行用不當手法誤導，才購入該批迷你債券。對於呢班苦主，馬沙深表同情。但是否需要向他們作出賠償，就可圈可點。

有個伯伯投資千萬，依家先話唔知風險，怪得誰。又有好多苦主話唔知產品同雷曼有關，呢點更屬「姓賴」。試問一個月前，有誰會信雷曼會死? 一個月前講俾你知，迷你債券係由實力雄厚的雷曼兄弟作擔保，分分鐘買多啲都唔定。

歸根究底，問題係監管機構，為何批准呢啲比三聚氰胺更毒的金融毒品，經商業銀行廣泛流入市面。馬沙相信銀行職員並沒有刻意誤導呢班苦主，因為馬沙相信推銷呢啲迷你債券的銀行職員，本身都唔知迷你債券其實唔係「債券」，而係「結構性票據」。

今次呢班苦主恐怕要在金融海嘯中壯烈犧牲了。不過他們的血並不會白流，因為他們提醒了其他無知的投資者，立即去了解自己是否持有金融毒品。馬沙提醒大家，目前市場上的金融毒品，除了以上不是「債券」的債券外，還有不是一般「存款」的高息投資存款票據，以及不是「股票投資」的股票掛鈎投資票據。若一早話俾你知呢啲金融毒品，其實係用各式各樣的期權包裝而成，你還夠膽買嗎？

(2008年9月23日刊於《am730》)