星期六, 9月 26, 2020

姓賴

 

香港人好多都姓賴,獅子銀行近日跌到阿媽都唔認得,竟然得出「不要信長揸、不要再信巴菲特」呢個超越人間智慧嘅結論!

先講「長揸」,如果你呢十年長揸「企鵝亅,升咗90幾倍,依家可能發咗達。退一萬步而言,走去跟巴菲特買入「脾阿敵亅長揸,近5年「脾阿敵亅股價升咗大約170%。而長揸「脾阿敵亅,已為巴菲特帶來240億進賬。

再講「不要再信巴菲特」,如果你信巴菲特,你唔應該買獅子銀行。第一,巴菲特從來無叫大家買入獅子銀行。第二,巴菲特本身亦無持有獅子銀行。再講,若你深信巴菲特係股神,你係應該投 BKK.B 信心一票,買入 BKK.B 之後長揸。附圖為 BKK.B 1997年至今表現,股價升咗7.7倍。

至於獅子銀行,十幾年前我寫專欄時,已評論佢管理層係「環球金融、地踎智慧亅,從佢踏隻腳收購美帝銀行嗰日開始,已經注定有今日!


星期五, 9月 25, 2020

低調

 

早兩日某討論區,有位無知嘅小妹妹,話揾男友一定要有車,無奶油拍拖要逼公交。準男友要有車不突止,仲至少要揸 MB 或 Bimmer 先似樣,佢話揸架日本錢七,比親戚、朋友見到真失禮!

咁啱諗起老友 Billy,條友仔平日返工出入,都係揸圖中上面嗰架所謂唔入流嘅日本慳油錢七。佢話成日都比啲女同事、新相識嘅女仔寸,話佢接近40歲人,仲係揸呢啲日本老人車,無錢買歐洲車,至少都買架日本跑車揸啦,仲寸佢揸架咁 cheap 嘅日本車點出去溝女。

對於以上難聽嘅說話, Billy 都好少反駁,因為每到假期及節日,佢都會改揸圖中下面嗰架車。你無睇錯,Billy 另一架車係「細牛亅。

其實對 Billy 嚟講,隻細牛邊算貴,佢兩架車泊緊嘅呢兩個位處九龍市中心嘅子母車位,應該比兩架車加埋仲貴。