名店新常態

某大著名珠寶品牌，近日試途打開新血路。趁其新系列名錶上市，大賣廣告試玩網購，免費送遞到府上，上午訂貨下午收貨，仲有14天退貨期。

如果今次成功，未來可以縮減旗下商場名店數目，慳到唔少店舖租金。如果未來自由行未能放鬆，仲可以玩埋免費送貨比大陸客。

若果今次攪網購成功，各大品牌又一齊玩網購，各大商場未來都可以收皮。

再進一步講，以名錶為例，若果買家可以直接向各品牌網上訂購，而各品牌將原來俾AD賺嘅錢，直接俾買家作為折扣，名錶AD嘅存在價值，可能慢慢地失去。

未來日子，香港人上淘寶買cheap嘢落嚟，大陸人上名店網購名牌返上去。

馬沙 facebook :  https://www.facebook.com/charblogger02

信者失救

我個客2008年用二千萬買嘅樓，今日銀行估值近四千萬。而事實上，個物業下星期五會以四千萬成交。

未有樓、未安居樂業嘅各位年青儍西，你地繼續聽班政棍、環保撚老點，唔好比政府填海、用效野公園地起樓。繼續係咁叫政府收返粉領高爾夫球場、叫政府收返每日150人入境啦。

只有自己有樓住嘅離地環保撚，才會提議保留郊野公園土地比乜柒「六班月飄蟲」住都唔L肯比人住！

你地即管繼續無止境咁拖、爭吵落去啦，過多十年必定仍原地踏步，到時你班年靑儍西三、四十歲連劏房都住唔起。

到嗰陣時教你班儍西乜都反對嘅有樓人士會點呢，層樓到嗰陣時當然因為越多人越唔夠地之下水脹船高。到嗰陣時一個今日連港女都睇唔起嘅兩房單位分分鐘都過千萬，佢地賣樓套現夠哂搬去外國享受退休生活。

你班人到中年嘅儍西，睇怕到時仍然係到日日儍叫做十九幾廿年嘢都未儲到首期上車囉！

#人都未有得住留啲地比昆蟲住
#自己屋企人都未安居樂業擔心管海馬無地方住

馬沙 facebook :  https://www.facebook.com/charblogger02

人類總要重複同樣的錯誤 之 《直播罪證》

本來早兩日已經出現出帖，不過記得今日判案大日子，就乾脆等多兩日確認犯法先出。

西九龍法院法官今天裁定，5名Uber 司機被控《駕駛汽車以作出租或取酬用途》及《沒有第三者保險而在道路使用車輛》兩項控罪均罪名成立。

正如我一早講過，唔理大家幾鐘意Uber服務都好，唔合法就係唔合法。一日法例未修改，無的士牌做同的士一樣嘅服務，即係等同「白牌車」。

有啲人成日話法例追唔上Uber呢啲營運模式，呢點我個人係非常認同。不過我認為Uber 係應該先要求政府修改法例，等修法後先至先開業，而唔係依家咁挑戰政府底線囉。

Uber 公司其實同佔中三人組一樣，叫司機唔駛擔心去以身試法。事實上就係精人（Uber 公司）出口，笨人（Uber 司機）出手仲出埋車。結果呢，咪出手嘅笨人被控罪成兼留案底，而出口嘅精人就企係安全位置叫大家唔好怕，繼續叫另一班去以身試法！

而片中呢位擁有法律高級文憑嘅女藝人呢，仲蠢到比Uber利用，直播自己《駕駛汽車以作出租或取酬用途》（依家Uber 有AIG受第三保告唔到呢條喇），真係叻到無嘢好講。希望佢唔會因為條直播片比人告喇。

馬沙 facebook :  https://www.facebook.com/charblogger02

試問誰人在禁聲

參加選委，連梁振英係第四任特首都攪錯，留言提下你地，唔該都無句就刪除我留言，偷偷將「經歷三任特首」改咗做「經歷三位特首」扮無嘢不突止，仲竟然夠膽死禁止我留言。

所謂民主進步會計師，你地究竟有幾「民主」及有乜「進步」可言？

參加選委，連梁振英係第四任特首都攪錯，留言提下你地，唔該都無句就刪除我留言，偷偷將「經歷三任特首」改咗做「經歷三位特首」扮無嘢不突止，仲竟然夠膽死禁止我留言。

你地堂堂會計師，咁做無嘢呀？

若果驚比人知攪錯嘢影響選情，刪除我留言無問題㗎，刪完之後自己求其留返句「手民之誤，已經修正，謝謝指正」，係咪大方得體啲呢？

禁止我比like及留言即係想點呀，即係只能接納比like 及 留言支持你地嘅會計師選民？

其實你地知唔知乜嘢叫「民主」？

禁止/唔想選民留言（發聲）呢種行為，係「民主進步」還是「民主倒退」？

最令人發笑嘅係，你呢個帖入面條片「誰還未覺醒」入面第一句係......「 試問誰還未發聲？」...... ，勢估唔到我向你地發第一次聲，第二日就比你地滅聲，我係咪要好似歌詞入面「  要認命噤聲」咁唔出聲？

作為一位資深會計師，對你地呢一隊由業界代表梁繼昌議員全力支持嘅選委參選團隊，真係感到極度失望！

#民主進步會計師 #無資格做選委 #知唔知乜嘢叫民主 #民主倒退 #被民主進步會計師滅聲 #極度失望

馬沙 facebook :  https://www.facebook.com/charblogger02

走私內地違禁品變英雄

執筆時剛巧見到李波先生在其 Facebook 回應林先生，簡單講，李波大致上係話：「林榮基，你呃人！」

銅鑼灣書店單嘢，本來都唔想寫，之不過見店長林榮基昨晚高調現身，即刻比好多人捧為英雄，我就真係有啲頂佢唔順！

就林先生而言，好鬼簡單，佢多次郵寄及親身帶內地違禁品（內地禁書）返大陸，明顯已經干犯中國法律！仲夠膽返大陸，唔比人拉至奇！

大陸不知其實幾有耐性，等咗幾年先係內地境內拉佢，絕對無越境執法，點破壞一國兩制。而事實上，林先生已經親口澄清自己喺國內被拉，即係公安絕對無越境執法，無打破一國兩制囉！

一個走私禁書返大陸嘅人，在內地境內被拉，根本上係抵死，關所有香港人乜事！簡而言之，佢係一個斷到正嘅走私客。

有好多人話，喺香港出版及售賣「內地禁書」唔犯法！呢點一啲都無錯，之但係香港唔犯法嘅事，唔代係世界各地做唔犯法。例如有啲國家允許買賣及吸食大麻，但你做係該等國家郵寄或親身帶大麻到美國、香港、中國等地，係咪會干犯美國、香港、中國等地本身法律，你一入境人地是否會執法拉人？

明乎此理，就知中國依中國法律拉人，根本上係合情、合理、合法。香港人要鬧，最多係鬧中國法制唔夠建全！

至於李波是否有被中國公安越境執法呢，仲鬼好笑！李波之前已在香港以第一身嘅身分公開現身說法，話內地公安絕無越境執法，係自己自願往返內地協助調查。香港人聽完就偏偏不信。當然，你係有權懷疑李波講大話唔信！

之但係奇就奇在李波昨晚無啦啦被代表，林先生一句李波係非自願被公安越境執法帶返內地，香港人又反而照單全收，齊齊高叫內地越境執法。

原來李波第一身嘅身分說話，比林先生嘅代言可信度更低。到底係香港人只接受自己想聽嘅答案定係點？

昨晚李波因為無啦啦被代表，而說法同佢當日所說恰恰相反，李波要再一次出嚟解話幾可肯定！

書店呢單野，香港人唯一要關心嘅其實只係一樣嘢，到底李波是否有被內地公安越境執法拉回內地！而有定無，事實上只有當事人李波一個人可以親口證實！

執筆時剛巧見到李波先生在其 Facebook 回應林先生，簡單講，李波大致上係話：「林榮基，你呃人！」

(2016年6月19日刊於 全民媒體) 

馬沙 facebook :  https://www.facebook.com/charblogger02

香港不再支持初創企業 （二）

假如外地（包括中國及外國人）投資者無法滿足銀行開戶條件，基本上就同滙豐銀行有緣無份。當然，如果你認識有特權人士，銀行應該可以為你特事特辦。

對於外地（包括中國及外國人）投資者，銀行要求更加嚴格。目前香港各大小銀行，都嚴格執行 KYC (Know you client) 呢個開戶審查，換言之，比銀行問長問短已經唔係一件新事物。
就以滙豐銀行為例，根據其3月中開始執行之最新公司戶囗開戶政策，外地（包括中國及外國人）投資者要為其新成立的香港公司成功開立公司戶口，除以住需要的文件外，需要具備以下新條件：-

1）開戶的新成立香港公司，其股東或董事必須要在海外或內地有一間公司；

2）海外公司或內地公司或集團的營業額，每年至少要達1,500萬美元以上；

3）申請開設公司戶口時，必須提供海外或國內公司之最新一年財務報表；

4）申請開設公司戶口時，必須提供海外或國內公司之最近三個月之銀行月結單。

假如外地（包括中國及外國人）投資者無法滿足銀行以上開戶條件，基本上就同滙豐銀行有緣無份。當然，如果你認識有特權人士，銀行應該可以為你特事特辦。

原則上，其他銀行的開戶條件及要求，亦不斷在更新中。換句話，即係今時今日係香港，想開間公司仔做下小生意，要有心理準備，要比銀行拒於門外。

不過，話雖如此，馬沙近日就發現台灣有幾間銀行，近年就非常積極為台灣人解決呢個銀行開戶問題。馬沙就有唔少台灣客，為其香港開設嘅公司在台灣銀行開戶。

昨天同一位來自台灣嘅新客開會，佢就同馬沙講，準備為其新成立嘅香港公司，於台灣銀行開設公司戶口。佢話台灣有幾間銀行，依家都有離岸專設戶口，為 海外註冊（包括香港）公司提供各類金融服務。難怪近年那幾間台灣銀行的bank confirmation 在audit file 中常出現。

馬沙忽發奇想，以後係香港開唔到公司戶口，可以推薦客戶飛去台灣開戶，反正依家有internet banking，銀行所在地已經不太重要，來回台灣機票分分鐘仲平過香港銀行開戶手續費。
你地話，香港銀行業再咁趕客落去，真係唔知銀行未來點算。要知道香港目前有32萬間中小企，佔全港企業總數逾98%。

(2016年4月15日刊於 全民媒體) 

馬沙 facebook :  https://www.facebook.com/charblogger02

香港不再支持創業 （一）

現在幾間大銀行要求開戶者提供公司商業註冊地址證明。此要求指明新成立公司必須有其實質業務地址，即係新公司必須已租賃一個工商大廈單位作為辦公室。換句 話，即係以往所謂home office 、在商務中心租用register office address、virtual office，銀行一概列為沒有實際業務地址，不處理開戶。

當全宇宙都熱烈討論初創、startup ，鼓勵年青人創業，殺出一條血路，原來香港已經進入唔鼓勵人創業嘅年代。

點解馬沙咁講？

你話喇，一個人想創業，第一步係做乜？

當然係開返間公司先喇。一個人要係香港要開公司做老闆係好容易，最簡單就係自己搭地鐵去稅局4樓商業登記處，填一張申請無限公司商業登記表格，放低$250 (2016年4月1號起由$2,250減至$250），真係行出稅局已經做咗老闆。

如果要註冊一間有限公司，申請程序就比較麻煩一點，馬沙就建議各位準老闆搵間正正經經嘅會計師事務所代辦，記住千期咪貪平係坊間搵嗰啲乜嘢$1 開公司，需知道光棍佬教仔，「便宜莫貪」！

本來，香港近幾十年嚟，政府都無任歡迎任何本地市民或外國人來港開公司創業，但呢個情況近年已經改變。呢個問題不在於政府，而係在於近年銀行監管方面。

一個創業者，當你開咗人生第一間公司成為真正老闆之後，第一件事通常係走去銀行開一個公司戶口。問題就嚟，依家香港各大銀行，包括滙豐、恆生、中銀等大銀行，在開戶過程中設下大小關卡，一個普通創業小老闆，理論上係好難滿足到以上各銀行嘅所謂開戶基本要求。

首先，以馬沙所知，現在幾間大銀行要求開戶者提供公司商業註冊地址證明。此要求指明新成立公司必須有其實質業務地址，即係新公司必須已租賃一個工商大廈單位作為辦公室。換句話，即係以往所謂home office 、在商務中心租用register office address、virtual office，銀行一概列為沒有實際業務地址，不處理開戶。

馬沙2015年尾就曾經親身受過中銀無禮對待。是咁的，2015年尾一個下午，馬沙親身 到中銀某分行，準備為名下其中一間服務公司開設一個新戶口。中銀客服要求馬沙提供辦公室地址證明，馬沙多次向該客服指明辦公室租約及所有服務合約均以本人 主要業務的會計師事務所簽署，並即時提供本人卡片所參考。但該客服卻一口咬定服務公司只是租用該地址，本身並沒有實質業務地址，真係比佢吹脹。因為一個業 務地址，同該客服爭論咗成個鐘，仲不得要領。一氣之下，馬沙叫該客服退回所有開戶文件，一走了之。

馬沙今日就聽過一個客講，佢因為業務地址呢個問題，滙豐就拒絕為其新公司開戶。最後成功係中銀開戶，不過中銀就要求佢開戶時存入$50萬。大家話，試問有幾多個創業人士可以隨便拎出$50萬放係公司戶口？

對於外地（包括中國及外國人）投資者呢，要求更加嚴格，下篇再續！

(2016年4月2日刊於 全民媒體) 

馬沙 facebook :  https://www.facebook.com/charblogger02

人渣

正常一個有血性嘅人，即使從未受過任何教育，只要智力唔係低於猿猴，見到有人墮樓，一定會第一時間call 白車將墮樓嘅人送院救治。只有人渣先會講得出女學生當時只係似瞓咗覺、可以自行坐輪椅入院呢啲鬼話。

乜嘢叫人渣？ 人中之渣滓也！

相比起垃圾，渣滓絕對比垃圾更不堪入目。人中垃圾，至少有其回收價值，最多只能判定為廢柴一條！人渣通常冷血，無視生命之寶貴！

在基真小學女學生墮樓事件中，就充分突顯咗一班教育界嘅人渣高管。根據呢班人渣係死因庭上比嘅口供，在在證明咗基真小學呢班人渣校長、副校長、訓導 主任及一干有關人等，死不悔改，大話連篇，絕對係人渣中嘅人渣。為咗一校之譽，呢班人渣竟然可以置墮樓女生生死於不顧。雖然以表證嚟睇，即使班人渣當日有 即時叫喚白車，墮樓女生都未必一定救得到，但班教育界人渣當日所思所想，其冷血程度，就令人心寒！

事件過後，班人渣不但沒有對自己做過嘅事感到羞恥，向女學生父母作出道歉，仲竟然夠膽死振振有詞咁講已經跟足程序去做，真係人無恥則無敵。即使到今時今日，呢班教育界人渣，仲係到將責任歸咎於教育局欠缺程序指引，真係唔鬧爆你呢班人渣都對唔住自護家族！

作為教師，仲要係基督徒，啲愛心究竟去咗邊到？如果你班人渣自己嘅仔女墮樓，你班人渣仲會唔會嘥時間去硏究程序指引？

正常一個有血性嘅人，即使從未受過任何教育，只要智力唔係低於猿猴，見到有人墮樓，一定會第一時間call 白車將墮樓嘅人送院救治。只有人渣先會講得出女學生當時只係似瞓咗覺、可以自行坐輪椅入院呢啲鬼話。而法醫事後亦證明，女學生當時頭骨粉碎、身體多處嚴重 骨折，雙腳亦扭曲。

基真小學嗰位學務總監更加離普，明知班人渣喺呢件事上，處理嚴重失當，竟然不向呢班人渣斬立決。反之，在死因庭結案後，仲要向公眾表示要睇下判詞先決定炒唔炒班人渣，同幫凶有乜分別，試問學校如何面對女學生父母，還小妹妹一個公道？

另一令馬沙感到十分奇怪嘅係，事件發生之後，基真小學在校班家長做過乜？其家教會又做過乜？學校由一班人渣主事，家長仲可以放心將自己子女交托比呢班人渣，當呢件不幸嘅事從未發生過？比著係我，學校唔炒哂呢班人渣，我第一時間幫自己子女轉校！

正如我在文首所講，教育局局長「唔得掂」，無樣嘢做得好，但極其量只能叫佢「垃圾」局長。但教育界到處充斥好似基真小學呢班人渣咁嘅人，先至係香港教育嘅大問題！

馬沙現正公開要求，有把口、有支筆嘅人，應盡一分力，同心合力將基真小學校長黃静雯、副校長石玲及高婉華、訓導主任顧美玲與及一干涉事教職員，趕出教育界！

我重申一次，唔止要求基真小學即時解僱，直情要將呢班教育界人渣趕出教育界！

(2015年7月24日刊於 全民媒體) 


馬沙 facebook :  https://www.facebook.com/charblogger02

病態老母

好多人成日鬧政府教育政策唔好，計我話不如立例管制一下時下班病態老母好過啦！

呢幾日網上人人都瘋傳嗰個抽中喇叭小學嘅母子，老母陳女士開心到係咁同各大傳媒分享心得，本來好靚仔嘅6歲小朋友就比老母攪到大大對熊貓眼，成個道友咁！

最攪笑係考入喇叭小學明明係靠計分抽獎，既唔駛面試亦唔考慮學過乜嘢興趣班，一切全靠分數及運氣！

呢段新聞出街之後，人人鬧爆老母陳女士，今日就有人寫咗篇叫「非洲鼓小朋友16年後的自白」嘅［潮文］，篇文大致係講陳女士個仔「非洲鼓小朋友」 16年後同大家講佢老母做得無錯，教育嘅嘢你班花生友識條鐵咩！作者阿潮最後結語仲咁寫：「如果你有一個這樣的老母，恭喜你、你的人生已經成功一半！」。

馬沙就係Facebook 留咗個言：「其實個小朋友未完小學可能已經轉咗入青山醫院！」

對於有個近乎病態嘅老母，個小朋友16年後變成點馬沙就唔知，不過馬沙今日就好想同大家分享一個真實個案，一個讀某小學名校又有個好似陳女士呢類病態老母嘅小朋友，內心深處究竟諗緊乜！

呢封信係由一位名校小學生，親筆寫比其校長吐心事，封信講乜？先去片：

 

呢位小朋友話自從一次英文測驗不及格，佢個病態老母就開始攪到佢累到想同「周公」捉棋都唔得！大家認真睇下佢每天的生活程序，真係大人都頂唔順。

試諗一下，我叫你每日由朝早7點起身，不准離開你張工作椅，不准瞓覺，不准食嘢，不准上FB、不准WhatsApp，一天做哂一個星期工作，一直做到上床為止，每天如是，你會否感到很充實？

好多人成日鬧政府教育政策唔好，計我話不如立例管制一下時下班病態老母好過啦！例如強制唔比小學生出去上課外補習班，興趣班都不能超過兩樣之類，返 去以前一切靠學校咪好囉！大家無得課外補習，唔駛出去鬥學琴、棋、書、畫，無得玩嬴在起跑線遊戲，小朋友咪多啲時間玩下，有返個似啲樣（都唔好講快樂）嘅 童年囉！

你可能又會話馬沙唔公平，點解成篇文有病態老母，無病態老豆？好老實，病態老豆唔係無，但一定少之又少！反觀，睇住自己仔女比自己老婆（病態老母）係咁精神虐待，唔敢出聲救自己仔女出火海，仲要出錢助紂為弱嘅幫凶老豆就比目皆是！

(2015年6月9日刊於 全民媒體)  

陰陽路

辭職走咗成年先收到佢嘅正式辭職信，公司班管理層究竟同呢位CEO係咪活在不同時空？

呢間上市公司主業做廣告媒體及開發電影業務，可能因為咁，公司班管理層都相當有創意！

根據其2014年6月27日發出的最新一份公司年報，高級管理層一欄清楚寫明「黃偉剛」先生於2014年3月獲委任為公司之行政總裁。即係話公司之核數師在2014年6月27號簽發核數報告前理應見過呢位新上任CEO!

咁靈異之處係乜呢？

根據公司於2015年4月1日所發出之公告，呢位公司新貴原來在上任未夠三個月即2014年5月21日已經跳船！即係話出年報之時，呢位CEO已經跳咗船，點解年報出之前無人知道CEO 已經離職，公司年報高級管理層一欄仲清楚寫明「黃偉剛」先生係公司之CEO呢？

最靈異之處係公司竟然夠膽死係2015年4月1日所發出之公告大大隻字話:「公司係其CEO跳咗船成年嘅2015年3月31日先收到佢嘅正式辭職信」，仲話未有在2014年5月公布佢跳船係「不經意所致」…..

上市公司CEO跳船咁大件事都可以「不經意」，你估請咗個信差返咗兩日工見辛苦粒聲唔出閃咗人咩？

辭職走咗成年先收到佢嘅正式辭職信，公司班管理層究竟同呢位CEO係咪活在不同時空？

呢個簡直係香港上市公司企業管治嘅經典！

(2015年4月29日刊於 全民媒體) 

癲倒是非

我理得會計師公會23個理事係親中定反共，三萬八千名會員都係專業人士，又唔係白痴，民調只需簡單叫會員在「支持袋住先」/「反對袋住先」中二擇其一，結果就必定相當清析。

嘩嘩嘩! 大家知唔知乜嘢叫癲倒事非呀? 尊貴嘅會計業界代表梁繼昌竟然用「會計師公會24個理事中，3個是官員、3個是政府委任，而四大會計師行代表亦較親政府」做理由，話政府逼他轉軚袋住先！

係討論之先，馬沙必須指出會計師公會理事會嘅組成。

根據《專業會計師條例》，公會理事會最多由23名成員組成，包括14名當選理事、上屆會長、2名增選理事、2名當然理事（即財政司司長或其代表，以 及庫務署署長或其代表），以及4名由香港特區行政長官委任的業外成員。 即係話，會計師公會理事會係絕對唔會出現梁繼昌所講有24個理事，因為23個已經係理事會成員組成嘅上限! 更加唔係尊貴嘅會計業界代表梁繼昌所講，理事中有3個是官員、3個是政府委任！正確應該係2名當然理事（即財政司司長或其代表，以及庫務署署長或其代 表），以及4名由香港特區行政長官委任的業外成員。

先唔講四大會計師行代表，尊貴嘅業界代表梁繼昌無理由唔知，會計師公會23個理事中常設2個當然理事及4個政府委任的業外成員之目的何在！在會計師 公會理事會中加入2個當然理事（財金官員）及4個政府委任的業外成員嘅目的，係提高會計專業的規管制度，使之公開、有效、具透明度及讓投資者有信心，而唔 係為咗幫政府在會計業界內進行拉票！

再講 ，馬沙個人認為，會計師公會如果不在業界代表投票之前，就政改進行最新一輪民調，聽取三萬八千名會員意向先係極之不負責任。而家會計師公會想聽取三萬八千名會員意見，反被業界代表指不是 ，真係唔知尊貴嘅業界代表梁繼昌乜嘢邏輯！

另外，我理得會計師公會23個理事係親中定反共，三萬八千名會員都係專業人士，又唔係白痴，民調只需簡單叫會員在「支持袋住先」/「反對袋住先」中 二擇其一，結果就必定相當清晰。如果真係有逾半甚至六、七成支持袋住先，尊貴嘅業界代表梁繼昌無理由唔投支持票，此乃順應民意，唔係叫轉軚！

相反，若果有逾半會員「反對袋住先」，我相信會計師公會三萬八千名會員 （包括我） 都相當樂意支持尊貴嘅業界代表梁繼昌就政改投下反對票，因為專業會計師都應該會尊重同業主流意見！

(2015年2月13日刊於 全民媒體)

為咗吹大個問題，可以去到幾盡？

成日話儲唔到首期嘅人, 就以上述家庭月入得$24,000為例, 買樓之前嘅一年,能否持續每月儲 $11,000? 如果得, 即係唔駛日日係到小狗「青年事務委員會主席陳振彬」話儲5、6年都儲唔到首期買樓, 因為月儲$11,000, 唔駛3年就夠首期9成按揭上車 (用$300萬計)!

今日睇咗一篇題為「港人不吃17年 方能置業」嘅文章，幾值得大家討論一下。

首先，文章內用家庭年入息中位數同樓價中位數去計算，家庭年入息中位數月入得嗰 $24,000，乜最盡可以買到樓價中位數$489萬嘅樓咩？

我先用會計同業瓜瓜今日am730「誰放棄了靑年」篇文入面個計法︰

『現在樓價高企，在新界買個二手上車盤，怎麼樣也要300萬元左右（但朋友說已經很難找了），假設向銀行借足九成按揭並加借按揭保險，而且購買的樓 宇樓齡不 太舊，還款期可以拖至最長30年期，以目前最優惠利率5.25厘減3.1厘計算（即是2.15厘），每月供款額大約要10,545元。可是，要成功取得按 揭，還需要通過金管局要求的壓力測試，即以現行利率加3厘計算，而每月供款額必須低於其每月入息的60%。按此計算，最低每月入息至少要25,443 元。』

依上述計法，家庭月入得$24,000 ，點買300萬樓，更枉論「港人不吃17年 方能置業」篇文章內用樓價中位數 $489萬嘅樓去計17年呢個低B答案！

如果有人家庭月入得 $24,000又夠膽死諗住去買 $489萬嘅樓，第日跌市燒炭都真係唔駛可憐！其實以一家2大1小家庭，如果月入得 $24,000，供 $300萬嘅上車盤都好辛苦！
馬沙今日再講以下一些絕少人提出o既現實問題︰

首期︰成日話儲唔到首期嘅人，就以上述家庭月入得$24,000為例，買樓之前嘅一年,能否持續每月儲 $11,000？如果得，即係唔駛日日係到小狗「青年事務委員會主席陳振彬」話儲5、6年都儲唔到首期買樓，因為月儲$11,000, 唔駛3年就夠首期9成按揭上車 （用$300萬計）！ 如果唔得，咁比你上咗車又如何？你點應付每月供樓$10,545條數？都未同你計每月差响、管理費、水電煤，呢啲每月$1,500坐底，即係每月供樓負擔至少要$12,000！

供款︰再諗落去，上咗車之後要供30年！ 家庭月入$24,000一個人揾定兩個人揾？ 若果一個人揾,，突然失業又點？好彩兩個人揾，突然其中一個失業，剩返嗰個份糧又頂唔頂得順？

利率︰ 瓜瓜條數係用2.15厘計，若果短期內加息5厘去到7.15厘，大家知唔知每月變咗要供幾多錢？答案係 $18,236！供完樓 ($24,000-$18,236) 得返$5,764, 再交埋差响、管理費、水電煤 ($5,764-$1,500) 得返$4,264, 日子應該點過自己問下自己！

樓價︰現在$300萬可以買到乜樓？私樓大約15-30年內舊樓，10年內半新樓唔駛諗。 呎數一般300-400建築呎 (實呎210-280)， 呢類單位買咗要你住一世，你接唔接受？ 生小朋友又夠唔夠住？ 唔好同我講之後upgrade 換樓，即使你買完樓價無再升，upgrade 換樓樓價每多一百萬你人工要加$9,430 先合乎按揭標準。 若果你買完樓一個唔好彩，再次發生樓劫樓價跌3成即係你即時負資產$60萬，如果樓價再次跌5成即係你即時負資產$120萬！唔供樓要破產，跌5成死供等 樓價升返上$300萬即係樓價要升一倍，咁你應該要住一世無得upgrade！

有網友問︰「馬沙，你未計買樓前要租樓呢。」, 老實講，我睇唔到點解想儲首期嘅人，會嘥錢走去租樓而唔係同屋企人住。我識得又靠自己買到樓嘅人，差不多全部買樓前都係同企人住。 唔好同我講乜鬼屋企唔夠地方住呀，同屋企人唔啱呀，呢啲係abnormal case！

又有網友問︰「之前有個印度佬同我講…..任何時候都係買樓時候…」。 無錯，誠哥之前幾年都係咁講 (值得注意係誠哥今次已經無再講），我都好認同，只不過呢個講法只適用於有足夠實力嘅人！ 咁點為之有足夠實力嘅人？

馬沙個人認為，俾足至少三成 （最好四成） 首期，按揭只做15年，每月供款佔家庭入息3成！點解？即使二人當中有一人失業家庭入息少一半，剩返嗰半供完樓仲有原本家庭入息2成頂住。二人當中有一人 長期失業或轉做家庭主婦，剩返嗰半頂唔順，可以加長按揭年期至20年。 再唔好彩遇上加息周期，仲可以加長按揭年期最長至30年或増加按揭成數最高至9成！如此，即使第日樓價大跌5成，呢類人好難同負資產拉上關係，更枉論破 產、燒炭！

(2015年1月22日刊於 全民媒體)

佔中被捕真係可以「慳稅」四成?

尋日明報有一篇題為「佔中被捕「慳稅」四成」嘅報導，馬沙作為資深流氓會計師，當然要認真了解一下點解佔中被捕，即係走去犯法被捕，竟然可以「慳稅」四成咁正!

尋日喺明報網站，見到一篇題為「佔中被捕「慳稅」四成」嘅報導，馬沙作為資深流氓會計師，當然要認真了解一下點解佔中被捕，即係走去犯法被捕，竟然可以「慳稅」四成咁正!

睇完篇文，真係「唔識嘅就開心死、識嘅就笑Q死」! 首先，有乜嘢證明報導中嗰位得到稅務局批准暫緩繳付薪俸稅嘅申請理由 (其實正確應該係叫緩繳 2014/15 暫繳薪俸稅 Provisional Salaries Tax held over 先啱) ， 真係用 「曾參與佔領而被警方拘捕，可能會遭到刑事檢控而被僱主開除，喺收入有可能受影響下，要求稅務局重新評稅。」?

明報有無查證過嗰位申請人嘅申請信稅局吸收副本? 人講明報就信?

稅務局回覆話基於《稅務條例》嘅規定，唔方便評論個別個案。既然稅局唔方便講，就由我呢位流氓會計師講下。根據《稅務條例》，在一般情況下，要申請 「緩繳暫繳薪俸稅」，申請人係需要在申請書內清楚填寫整個課稅年度估計入息的數額，而該估計入息的數額要少於或可能會少於前一年度的應課稅入息實額的90 %，又或少於或可能會少於暫繳稅課稅年度估計入息的90%! 單係用「曾參與佔領而被警方拘捕，可能會遭到刑事檢控而被僱主開除，喺收入有可能受影響下，要求稅務局重新評稅」呢個理由，似乎唔係事實之全部！

下次唔該明報記者Emily専業一啲，即使「緩繳暫繳薪俸稅」申請獲得稅局接納,該納稅人只係申請「緩繳暫繳薪俸稅」，即係只針對預繳稅呢部份，而課稅年度2013/14嘅已評定稅款係絕不會減，因此稅局「重估」呢個行為根本不存在。

而成篇文最誤導無知市民嘅，係大字標題用「慳稅」二字，仲要「慳稅」四成咁Q多! 你依家只不過係向稅局申請唔交預繳稅獲得稅局接納而已，唔係向稅局申請免稅或扣減成功，你今年 (課稅年度2013/14) 嘅稅款一毫子都無減過， 下年（課稅年度2014/15） 嘅稅款亦一樣一毫子都無得減， 何來「慳稅」四成? 一個唔好彩，如果下年 （課稅年度2014/15） 即1/4/2014 – 31/3/2015間， 最後應課稅入息實額高過今年呢， 仲分分鐘比稅局罸錢！

今次寫呢篇文嘅目的，純粹係希望點化下對稅務毫無認識嘅無知市民，尤其係嗰班誤信佔中被捕竟然可以「慳稅四成」嘅佔中被捕者。千期咪咁輕易信人，以為曾經被警方拘捕，今年真係可以「慳稅四成」咁爽！

 (2015年1月8日刊於 全民媒體) 

放過我

幾日前有一晚,女人在電視看見有鳩嗚人士被扑濕,於是向另一半提出:「我地一齊去鳩嗚!」

男人:「算了吧! 今天工作很累,放過班黑警吧!」

其實男人想說的是「妳放過我」啦 ............

會計界福祉誰負責

好多會計師成日話會計界立法會梁繼昌議員，成日唔理會計界嘅事，不為會計界出一分力，為會計界謀福祉！

我認為大家一直錯怪梁議員，其實會計界立法會議員嘅職能同其他直選議員一樣，首要工作係參與立法會立法工作、出席立法會各類咨詢會議及監察政府施政。

會計界嘅福祉唔係會計界立法會議員負責，理論上係由會計師公會去爭取！公會攪唔掂先搵議員幫下手，同市民有事攪唔掂搵議員幫手一樣。只不過會計界咁啱有個功能組別議員而已。

相對地，立法會議員係應該相信法治精神，有責任維護法治，不應鼓勵甚至參與任何違反法治的言論或活動或所謂公民抗命！

試問不相信法治或不守法的人，有何資格參與立法工作？

荒謬都市

佔中已經踏入第三個星期，好多支持佔中嘅人，尤其係一班有學識嘅中產，特別喜歡指責反佔中人士反佔中係為咗搵錢、為咗保持同國內做生意而唔肯支持佔中！馬沙在會計界，甚至比一眾支持佔中嘅會計師老屈，搖身一變，成為冷血、涼薄、為錢而盲撑中共嘅五毛！

正如上一篇文所講，依家香港社會已經變成非黑即白，正所謂夏蟲不可語冰，同班自命有高尚情操嘅佔中友講多都嘥氣。本來都唔想多作回應，不過睇完上周警務處前高級助理處長鄧厚江上TBB講清講楚嘅訪問，即刻覺得有必要寫返篇文。因為鄧Sir 完全講出一班反佔中人士嘅心聲。

鄧Sir 一開始就指出，依家佔中嘅現象好唔正常，有啲荒旦，甚至荒謬！其理由有三：-
（1）點解有啲大學教法律嘅學者，會呼籲啲市民走去違法；
（2）點解其中一部分負責立法嘅立法會議員，要求警方唔好執法；
（3）點解一啲本身違法嘅示威者會要求警方保護佢地繼續去違法示威。

以上三點，在一向以法治為核心價值嘅香港，根本就係一連串荒謬嘅事情！如果社會各界唔好好反省、反思依家呢種利用感性去代替理性嘅思考方式，未來將會見到更加多荒謬嘅事。

若果你說要公民抗命，只要唔影響到其他市民，我個人絕對唔會反對。但當你影響到其他市民，呢個就非常之可笑。何解要犠牲某一社群嘅利益，去達成你班 友嘅政治理念？你地要記住，你地並不代表所有香港人，至少不代表我！如果佔中人士因為某種政治原因可以抗命，咁究竟以邊條粉腸嘅標準作為將來行動嘅根據 呢？

講咗不知幾多次，依家佔中人士明明犯法霸佔路面。如果你班友唔需要警方保護，咁就請隨便啦。但當你班佔中人士需要警方保護，而你班友佔中根本係一個 違法嘅行為的話，依個就正正係今日香港社會荒謬嘅地方。當社會各人有不同理念，今次你可以抗命，聽日佢都可以抗命，咁法治基礎究竟係邊到？

鄧Sir 特別提到一個社會觀點，點解要你啲學者控制社會嘅發展，點解黑社會就唔可以走嚟控制社會嘅發展，反正大家都在用犯法方式去爭取社會嘅發展方向！依家攪到社 會各界無止境嘅爭論，以往用咁多時間去發展出嚟嘅法治精神，香港最重要嘅基石，就咁樣就沖散咗，大家係咪好開心？

其實公民抗命只不過係美化咗嘅犯法行為，所謂「和平佔中」，亦都係美化咗嘅犯法行為，警察唔係睇你班友美唔美化，而係睇你犯唔犯法。「和平佔中」即 使幾和平都好 (而依家事實擺在眼前一啲都唔和平)，係咪理性合法呢？包裝係點樣都好，但需要獨立思考。因為你拆開咗包裝紙之後，要明白裡面嘅含意係乜，唔好因為包裝美 麗，買返屋企之後先發覺連累了自己和整個社群。

有人不斷以佔中係和平非暴力去申辯，要知道好多犯法嘅事係唔需要暴力。鄧Sir就舉出一個例子，訛騙案從來無使用暴力，咁係咪唔用暴力嘅案件，警察以後都唔好執法呢？

最後，鄧Sir 提出兩個值得大家反思嘅問題：-
（1）我地希望個社會係守法嘅社會，定係依據某一啲人自己嘅意願去決定，社會係應該守法定不守法？
（2）我地更加要想一想，警察要因政治因素不執法，還是不理政治因素嚴格執法？

至於星期六有個自稱住係蘭開夏道嘅女作家王迪詩係其専欄話「有些人認為民主不重要，自由不重要，重要的是有錢賺。在這些人眼中，香港的核心價值就是「搵 食」，跟一頭狗的核心價值沒有分別。」，阿王大作家妳知否絕大部分唔支持佔中嘅人核心價值唔係「揾食」，唔支持佔中亦不代表佢地認為民主不重要，自由不重 要，佢地唔支持佔中只係要守護香港法治精神呢個核心價值。不過，即使有人掛住搵錢又點，人地靠雙手努力賺錢養活妻兒，妳憑乜話人係一頭狗？在我看來，妳自 己先跟一頭為取悅讀者而狗口沒有長出象牙嘅Bull Terrier沒有兩樣！話時話，講到自己咁支持佔中，又唔覺妳呢隻經常著住Jimmy Choo 嘅Bull Terrier係佔中現場出現？快啲同妳啲讀者落去佔中現場影返張相啦，散咗場就補唔到飛！

(2014年10月21日刊於 全民媒體)

傲慢與偏見

唔知點解，香港人回歸以來，學問本來應該顯著提高咗，但係思想就好似退化咗好多咁，有些人直情智力低於猿猴。點解咁講？例如當一件錯綜復雜嘅事發生，為何往往只係一方錯哂，責任點解得一方要負責？雙方都有錯、雙方都要負啲責唔得咩？

點解永遠唔係「黑」、就係「白」？呢類人係咪讀書時參加辯論比賽太多，攪到個腦只能單向活動。在議論社會每件事時，一開始就要選定企埋一邊，㨂咗「正方」之後就點都要同「反方」的人對著幹？

其實呢個世界好Q複雜，好多事點會只得「對」同「錯」咁簡單？「對」與「錯」之間可以係「對中有錯」、「錯中有對」同「唔Q知」。係呀，當一個人肯認自己無知時，批判一件事嘅時候就會唔怕人笑咁話比人知你「唔Q知」誰對誰錯！

就好似呢個星期佔中單嘢，傳媒、facebook 主流意見緊係狂鬧警察係暴力對待人民！你問我點睇？我其實支持警察執法，因為佔中確實犯法，警察執法有乜錯？再加上我又唔buy佔中三子所講乜鬼「和平與愛」嘅理念！佔中點可能和平？

有人就會即刻閙，咁你即係支持出動防暴隊啦！老實講，要有效驅散幾萬人，唔用防暴隊其實可以點攪？ 不過話時話，其實我又未做過警察，是否應該出動防暴隊，我識條鐡咩！所以出防暴隊係咪錯呢？我嘅答案係「唔Q知」！

好多人話啲示威者手無寸鐵，駛唔駛放成87個催淚彈咁暴力呀？但客觀事實又話我知，當日放咗87個催淚彈都無辨法軀散嗰幾萬個示威人士。又見唔到有示威人士有較嚴重受傷，咁其實放催淚彈有幾暴力呢？

今時今日，係任何地方大叫689下台，或大讚佔中人士辛苦啦，都唔錯得去邊！正所為要成為人民英雄，識講緊係講呢啲！如果你唔怕死，可以試下出文讚 下香港警察盡忠職守、well done 之類。如果連落地獄都不怕，不妨試試話689政府處理適當或指責佔中人士不對，睇下有乜收場！

689有無錯？唔駛講當然有錯啦！佢根本背負著原罪，無論佢做乜，必定係錯。喺所謂追求真普選嘅人士眼中，佢生存係呢個世界上就係錯！咁事實呢？當然唔係一個人錯哂咁簡單啦！

成件事由黃之鋒係台上叫原本諗住參與罷課嘅學生狗衝入廣場而起。當日黃之鋒明明集會前話無任何衝擊佈處，但係佔領咗廣場之後，先對外公布行動係事前 同學聯一早佈處好。如此，黃之鋒有無呃咗班本來淨係諗住參與和平罷課嘅學生，同埋放心比自己小朋友去參與和平罷課嘅家長？唔好又長篇大論，有就有、無就 無！

佔中三子呢？明明實牙實齒話用「和平與愛」佔中，一有唔對路就可以叫大家解散，點知依家叫解散無人理。夠膽死話啲人自己集結，以後佔中人士發展成點唔關佢地事，咁都得？平時把口叫官員問責，依家一出事，作為佔中發起人，求 L 其一句話控制唔到就唔洗負責？

最後又講下班普通市民，受佔旺、佔銅所害，返工要轉幾百次車。有小朋友嘅更加慘，返唔到學之餘，家長要放成個星期大假看管小朋友，唔鬧到拆天就奇。

另外，好鬼多人話係呢個星期見盡身邊係人係鬼，又unfriend又鬧交。呢啲低能舉動發生在熱血小朋友身上唔奇，但發生在一班6、70後身上，就 顯得相當幼稚！大佬，做咗4、50年人，竟然話接受唔到其他唔同聲音？乜唔係話自由民主社會，應該接受100種唔同聲音，求同存異咩？做乜又同三幾個同聲 同氣嘅人，喺到不停小狗一啲持相反意見嘅人，數算人地冷血、無恥之類? 其實一件自己以為好啱嘅事，即使主流意見企係你嗰面，都唔代表你真係啱哂。其實做人做到咁，點同人好好相處？

其實政治嘅嘢，一向各有睇法。評論一件政治事件，必須針對件事，唔係乜鬼個人品格、修養，除非閣下全職投身政治職位，咁就預咗時時刻刻要比人攻擊人格。各位香港人，為咗追求所謂真普選，一日到黑喺到鬼打鬼，攪到四分五裂，好友變仇人，何苦呢？

 (2014年10月7日刊於 全民媒體)

真係雙方讓步？

特首梁振英昨晚開完記招後，有好多人嘅睇法係雙方終於讓步，有得坐低傾…..

認真睇其實係學聯輸哂就真！學聯之前明明就好清楚講明昨晚午夜係最後通牒，特首必須辭咗職，學聯先考慮同林鄭傾，否則學聯會將行動升級！

梁特首於是急急趕在最後通牒限期前（11:4x PM) 公開大大聲話：「我唔會辭職！」。

特首就公開回應咗唔會辭職，咁學聯之前又講明要特首先辭職再會面，理論上係要拒絕會面加行動升級，結果又點？

特首開完記招，學聯份聲明對原先要特首先辭職才同政府傾呢一個要求隻字不提。

政府一方呢？特首一開囗就話交比林鄭及另外兩位同事跟，有人話特首縮骨又將個波踢比女人，好無恥…..！啲人究竟有無聽清楚特首講乜？佢係叫學聯同「政改三人組」傾！即係無論你地點佔中，出乜嘢最後通牒都好，要傾就跟返政府原來政改路線圖去同「政改三人組」玩！

另外，學聯唔好以為同林鄭傾，可以爭取到公民提名之類！特首明明確確在記招講咗，學聯所有要求必須合乎基本法及人大決定！即係話公民提名呢啲要求，係百分之二百無得傾。人大決定呢，就更加唔會挑戰，即係想人大收返袋住先方案係痴峰說夢話！

最後，對於依家佔領咗特首辦出面班佔中人士，表面上特首同呢班佔中人士講唔會作清場行動，任你地佔領。但事實係特首一再重申幾次出咗「Warning」俾佔領特首辦出面班人，講到明正在容忍緊出面班非法集會人士！清楚說明若有人衝擊任何政府大樓，後果必定好嚴重！

從以上牌面睇，政府根本寸步都未讓過。反觀學聯就由昨晚特首唔辭職就將行動升級改為會把握同林鄭對話（唔知幾時）機會，究竟被迫退咗幾多步？

再講，好多受佔中影響而停學嘅家長，擔心子女學業受無限期停學所影響，開始有不滿！在電視所見，好多四大佔領區嘅街方更加對佔領佢地屋企附近非常不滿。即係話，佔中時間越長，不滿佔中嘅受影響人士就越多！

 (2014年10月3日刊於 全民媒體)

等 • Smartone • 退訂

 

呢幾日傳媒不斷報導iPhone 6 果農損失如何慘重，查實市場上重有幾個大贏家！

首先要講嘅當然係夠膽死用炒價賣機嘅零售商。正所謂無圖無真相，馬沙早兩日就冒死衝入蘇寧影咗呢副相，當時仲大把自由行排隊等出機！

當零售店鋪用炒價賣機都有人買時，呢個就係iPhone 6 嘅fair value (公允價值）。所以當收機佬話iPhone 6 64G 回收價跌破IPO價只有$6,300 時，擺明就係搵果農笨柒。點解？蘇寧零售賣緊$8,688 呀老友！你拎部機企係蘇寜門口大叫: 「iPhone 6 64G 未開盒齊單 $8,000!」，分分鐘成班排緊隊嘅自由行向你狗衝！

今日馬沙呢篇文嘅重點，其實係想講下另一無本生利嘅大贏家 – 「Smartone」！

眾所週知，果農另一戰綫係出上台機之後劏機。各大電訊商今次同果店同步接受客戶預定上台iPhone 6 / 6 Plus 。唯獨Smartone 一間夠膽收取客戶$500 不可退回嘅定金。

好多人見今次Smartone 係咁推乜鬼登記Red Pass 預定，可以快人一步云云，又得佢敢收客$500定，諗住Smartone 應該有大量貨派比上台客，紛紛登記預定。

誰知iPhone 6 開賣，除了極少數客戶收到call 取機外，大部分預定客戶得個等字。最戲劇嘅係原先預定咗iPhone 6 Plus 嘅客紛紛收到Smartone 通知，內容大致係話iPhone Plus 無貨，預定客戶有個黃金機會由預定iPhone 6 Plus 轉去iPhone 6。

好喇！如今 iPhone 6 上市已經一星期，Smartone 依然無貨比預定客，而iPhone 6 回收價又跌至近原價，即係失去劏機賺錢嘅價值。一大班Smartone 預定客就落入咗進退兩難嘅困局，因為等到有機收時 (查實不知何年何月何日)，已經肯定無利可圖，但唔出機$500定金又收唔返即蝕。

於是乎，$500 定金變相就係向Smartone買咗一份期權。依家份期權時間值每日下跌，內在值亦跟住iPhone 回收價大跌 ，實質價值已經跌至近乎「零」。所以呢班比咗$500定金嘅客，好大機會唔會行駛呢份期權。咁Smartone 呢個期權發行商，就理所當然咁無本生利，「通殺」$500 期權金！

依家比咗定金班預定客，最不服氣唔係iPhone 無得炒，而係Smartone 收咗定無貨比人又唔主動比客退定。比得定金都係諗住快人一步出機，到周街都輕易買到，你Smartone 仲無貨比人，仲唔退定，Smartone 你究竟想點？

話時話，收客定金又不能在合理期間內供應合理數量的產品,可能已違反《商品說明條例》中「商戶接受市民付款後卻無意供應產品」。

最後, 希望大家可以將呢篇文廣傳，比啲壓力Smartone 管理層，因為真係好多比咗$500定金嘅預定客正在「等 • Smartone • 退定」！

(2014年9月25日刊於 全民媒體)

iPhone 6 64G 市場走勢分析

由於市場對iPhone 6 64G 睇法過份悲觀, iPhone 6 64G H股回收價反覆向下跌穿招股價HK$6,388，H股現價HK$6,300, 創上市5日新低。

iPhone 6 64G 5天RSI 跌穿30報25.52, 已呈嚴重超賣,預期會作出比較顯著反彈, 反彈目標為HK$7,000。

至於iPhone 6 64G A股回收價企隱RMB6,900 (約HK$8,970)。

由於中港iPhone 互通已準備好, 香港phone管局預期, iPhone H股 / A股回收價在未來一星期將進行回收價接軌。至於H股回收價會向上追A股回收價,還是A股回收價向下跟H股回收價,有待市場對iPhone 6 64G 未來一星期出貨量去確認!

(2014年9月24日刊於 全民媒體)