多舊魚磚家

即係咁，睇完佢長篇大論嘅分析，先「有機會亅賺300大元。

攪咁鬼死多嘢，如果目標都係穩賺$300，咁不如用15分鐘去網上券商開個戶口，即刻有免費股票送比你。例如牛牛，依期開戶及存入一皮嘢，即送一股Twitter (TWTR)，今日市值US50. 44 (約港元390)，沽完可以吐現走人。

其他網上券商送乜股票，我唔花時間去揾，自己去 Google 下就知。

＃絕非廣告

馬沙 facebook :  https://www.facebook.com/charblogger02

三角關係

愛情呢家嘢，好多時就係咁，好講 「Timing」。要適當時間遇上適當嘅人，即所謂Mr. Right, 談何容易？

對於三角關係，我嘅人生導師 Michael 及 Gabriel 由細到大咁樣教我:-

Gabriel 一向主張我應該趁人家戀情仲未成熟時，從人家手中將所愛嘅人搶返嚟，仲日日不停係我耳邊講埋好多橫刀奪愛嘅方法。

Michael 則成日同我講，「愛」係要講道德！一段關係之間，永遠只可以容納兩個人。既不能讓第三者加入破壞一段關係，更絕不能做第三者去拆散一段關係。你今日奪人所愛，他日必被人奪去你嘅最愛。

講到感情呢方面，我就比較 buy Michael 嘅理論。正所謂「剃人頭者、人亦剃其頭」也，所以做人真係要學識珍惜眼前人。

馬沙 facebook :  https://www.facebook.com/charblogger02

問題天天都多

準備出兩份 Professional Clearance Letter，同事攪咗大半日都未拎比我簽，問吓佢點解攪咁Q耐，答案相當精彩 😱😱😱

附圖取自呢位用人名執葉嘅盧姓女會計師嘅信紙，用硬身紙及印刷相當精美，佢信紙上印住 Beauty P.K. Lo CPA (Practising)。問題在於公會執葉名冊上搵唔到同名嘅執葉會員，而同姓唯一 match 到嘅叫 Lo Pok Kai 😓

另一個 畸士 問題亦相當近似，呢位都係用人名執葉嘅馬姓男會計師，佢嘅信紙印住 Handsome Ma CPA (Practising)，但係公會執業名冊上搵唔到同名嘅執葉會員，而同姓唯一 match 到嘅叫 Ma Pok Kai Handsome 😓

同事話雖然同姓唯一 match 到應該無錯，但唔係100%肯定係同一人，唔知封信出比乜名先至啱 😪

以上兩位執葉同業幫艇仔簽Report 攪爛哂啲客盤數以經唔好，仲連自己執業個寶號都亂哂大龍，到底攪邊科 🤔

理論上，你地用咗同執葉證書上面所顯示唔一樣嘅名去簽發 柯跌報告 ，同無牌執葉係無乜分別 😓

PS 大家唔駛search啦，以上兩位 Beauty & Handsome 都係假名嚟 😌

 

 馬沙 facebook :  https://www.facebook.com/charblogger02

人類總要重複同樣的錯誤 之 《直播罪證》

本來早兩日已經出現出帖，不過記得今日判案大日子，就乾脆等多兩日確認犯法先出。

西九龍法院法官今天裁定，5名Uber 司機被控《駕駛汽車以作出租或取酬用途》及《沒有第三者保險而在道路使用車輛》兩項控罪均罪名成立。

正如我一早講過，唔理大家幾鐘意Uber服務都好，唔合法就係唔合法。一日法例未修改，無的士牌做同的士一樣嘅服務，即係等同「白牌車」。

有啲人成日話法例追唔上Uber呢啲營運模式，呢點我個人係非常認同。不過我認為Uber 係應該先要求政府修改法例，等修法後先至先開業，而唔係依家咁挑戰政府底線囉。

Uber 公司其實同佔中三人組一樣，叫司機唔駛擔心去以身試法。事實上就係精人（Uber 公司）出口，笨人（Uber 司機）出手仲出埋車。結果呢，咪出手嘅笨人被控罪成兼留案底，而出口嘅精人就企係安全位置叫大家唔好怕，繼續叫另一班去以身試法！

而片中呢位擁有法律高級文憑嘅女藝人呢，仲蠢到比Uber利用，直播自己《駕駛汽車以作出租或取酬用途》（依家Uber 有AIG受第三保告唔到呢條喇），真係叻到無嘢好講。希望佢唔會因為條直播片比人告喇。

馬沙 facebook :  https://www.facebook.com/charblogger02

人地棵樹

一諗起嗰對夫婦，返到屋企睇返自己影嘅相，發現自己連親生仔都唔認得，成朝影咗人地棵樹，對唔住 ....... 我又笑到長腹肌 .......

今朝同老婆出席細仔幼稚園聯合畢業典禮，坐係我隔離嘅一對父母嘅對話，笑到我長腹肌。

典禮一開始，所有應屆畢業生企哂係台前唱校歌，所有家長好興奮咁揾自己嘅小朋友，一搵到就當然拎起相機或手機係咁影相。

坐係我隔離嘅一位爸爸係咁問佢老婆：「阿仔係邊到？」。佢老婆係咁幚手搵，直到校歌唱完，閉幕……… 都仲未搵到 ……

畢業典禮繼續，當幼稚園總校長向每一位應屆畢業生頒發畢業證書，畢業典禮最受家長歡迎嘅表演節目就正式開始。

跟往年一樣，幼稚園每間分校，分別會演出不同話劇。正當分校 M 開始演出不久，坐係我隔離對父母就開始攪笑。

爸爸：「媽媽！你睇！嗰個咪就係阿仔囉！」

媽媽：「好似唔係喎！」

爸爸：「係定啦！阿仔今日扮樹呀！妳睇，阿仔幾可愛！」

之後兩夫婦就各持相機及手機，起勢係咁幫正在扮緊一棵樹嘅仔影相。

佢兩夫婦一路影，我就一路係咁忍笑，之後比身邊老婆發現咗我無啦啦係咁長腹肌，就問我笑乜 ………

馬沙：「隔離兩位家長係邊間分校？」

老婆：「我地嗰間（分校 L）！」

馬沙：「依家表演緊係邊間分校？」

老婆：「分校 M！」

馬沙：「佢地依家同佢地扮緊樹嘅仔影緊相！」

我老婆望咗一眼，即刻好大力扼住我手臂係咁忍住笑，我隱約感覺到老婆都笑到長腹肌 ……….

過咗無幾耐，分校 M 劇目完畢，輪到分校 L 開始表演。因為同一分校嘅父母被安排坐係會場同一個 zone嘅關係，坐係馬沙身邊嘅其他父母，紛紛開始拎起相機影相，有部分就好似馬沙咁，一個負責影相，另一個負責影片。

我下意識再望下坐係隔離嘅一對父母，佢地再無任何動作，仿佛正在等待畢業典禮完場走人。即係話，佢地似乎未意識到佢地負責扮樹嘅公子正在台上扮緊樹 ………

我內心曾經爭扎咗幾十秒，究竟我應唔應該同隔離嗰位看上去充滿自信嘅爸爸講一聲：「你嗰棵樹依家企係台上表演緊！」。不過當我考慮到學校係有安排攝影師全程拍攝，之後派比各位家長，就決定專心為今日扮演「三隻小豬」入面隻大灰狼嘅細仔影靚相。

畢業典禮完咗之後返到公司，睇返今朝幫細仔影嘅相。一諗起嗰對夫婦，返到屋企睇返自己影嘅相，發現自己連親生仔都唔認得，成朝影咗人地棵樹，對唔住 ……. 我又笑到長腹肌 …….

(2016年6月15日刊於 全民媒體) 

馬沙 facebook :  https://www.facebook.com/charblogger02

人渣

正常一個有血性嘅人，即使從未受過任何教育，只要智力唔係低於猿猴，見到有人墮樓，一定會第一時間call 白車將墮樓嘅人送院救治。只有人渣先會講得出女學生當時只係似瞓咗覺、可以自行坐輪椅入院呢啲鬼話。

乜嘢叫人渣？ 人中之渣滓也！

相比起垃圾，渣滓絕對比垃圾更不堪入目。人中垃圾，至少有其回收價值，最多只能判定為廢柴一條！人渣通常冷血，無視生命之寶貴！

在基真小學女學生墮樓事件中，就充分突顯咗一班教育界嘅人渣高管。根據呢班人渣係死因庭上比嘅口供，在在證明咗基真小學呢班人渣校長、副校長、訓導 主任及一干有關人等，死不悔改，大話連篇，絕對係人渣中嘅人渣。為咗一校之譽，呢班人渣竟然可以置墮樓女生生死於不顧。雖然以表證嚟睇，即使班人渣當日有 即時叫喚白車，墮樓女生都未必一定救得到，但班教育界人渣當日所思所想，其冷血程度，就令人心寒！

事件過後，班人渣不但沒有對自己做過嘅事感到羞恥，向女學生父母作出道歉，仲竟然夠膽死振振有詞咁講已經跟足程序去做，真係人無恥則無敵。即使到今時今日，呢班教育界人渣，仲係到將責任歸咎於教育局欠缺程序指引，真係唔鬧爆你呢班人渣都對唔住自護家族！

作為教師，仲要係基督徒，啲愛心究竟去咗邊到？如果你班人渣自己嘅仔女墮樓，你班人渣仲會唔會嘥時間去硏究程序指引？

正常一個有血性嘅人，即使從未受過任何教育，只要智力唔係低於猿猴，見到有人墮樓，一定會第一時間call 白車將墮樓嘅人送院救治。只有人渣先會講得出女學生當時只係似瞓咗覺、可以自行坐輪椅入院呢啲鬼話。而法醫事後亦證明，女學生當時頭骨粉碎、身體多處嚴重 骨折，雙腳亦扭曲。

基真小學嗰位學務總監更加離普，明知班人渣喺呢件事上，處理嚴重失當，竟然不向呢班人渣斬立決。反之，在死因庭結案後，仲要向公眾表示要睇下判詞先決定炒唔炒班人渣，同幫凶有乜分別，試問學校如何面對女學生父母，還小妹妹一個公道？

另一令馬沙感到十分奇怪嘅係，事件發生之後，基真小學在校班家長做過乜？其家教會又做過乜？學校由一班人渣主事，家長仲可以放心將自己子女交托比呢班人渣，當呢件不幸嘅事從未發生過？比著係我，學校唔炒哂呢班人渣，我第一時間幫自己子女轉校！

正如我在文首所講，教育局局長「唔得掂」，無樣嘢做得好，但極其量只能叫佢「垃圾」局長。但教育界到處充斥好似基真小學呢班人渣咁嘅人，先至係香港教育嘅大問題！

馬沙現正公開要求，有把口、有支筆嘅人，應盡一分力，同心合力將基真小學校長黃静雯、副校長石玲及高婉華、訓導主任顧美玲與及一干涉事教職員，趕出教育界！

我重申一次，唔止要求基真小學即時解僱，直情要將呢班教育界人渣趕出教育界！

(2015年7月24日刊於 全民媒體) 


馬沙 facebook :  https://www.facebook.com/charblogger02

ACCA member 喜訊

《ACCA member 喜訊》

HKICPA 已同ACCA簽署新一份互認協議，並由之前ARA 升格為MRA，新MRA 由2015年7月1日生效！

根據新協議，ACCA member 只要持有公會承認之大學學位，只需完成任何一QP Workshop 及取得Final Examniation （FE) 合格，加上足夠經驗就可以成為HKICPA 會員！

今次份MRA 同之前份ARA 最大嘅分別就係由7月1日起，ACCA member 唔需要再考公會兩科 Aptitude Test!

病態老母

好多人成日鬧政府教育政策唔好，計我話不如立例管制一下時下班病態老母好過啦！

呢幾日網上人人都瘋傳嗰個抽中喇叭小學嘅母子，老母陳女士開心到係咁同各大傳媒分享心得，本來好靚仔嘅6歲小朋友就比老母攪到大大對熊貓眼，成個道友咁！

最攪笑係考入喇叭小學明明係靠計分抽獎，既唔駛面試亦唔考慮學過乜嘢興趣班，一切全靠分數及運氣！

呢段新聞出街之後，人人鬧爆老母陳女士，今日就有人寫咗篇叫「非洲鼓小朋友16年後的自白」嘅［潮文］，篇文大致係講陳女士個仔「非洲鼓小朋友」 16年後同大家講佢老母做得無錯，教育嘅嘢你班花生友識條鐵咩！作者阿潮最後結語仲咁寫：「如果你有一個這樣的老母，恭喜你、你的人生已經成功一半！」。

馬沙就係Facebook 留咗個言：「其實個小朋友未完小學可能已經轉咗入青山醫院！」

對於有個近乎病態嘅老母，個小朋友16年後變成點馬沙就唔知，不過馬沙今日就好想同大家分享一個真實個案，一個讀某小學名校又有個好似陳女士呢類病態老母嘅小朋友，內心深處究竟諗緊乜！

呢封信係由一位名校小學生，親筆寫比其校長吐心事，封信講乜？先去片：

 

呢位小朋友話自從一次英文測驗不及格，佢個病態老母就開始攪到佢累到想同「周公」捉棋都唔得！大家認真睇下佢每天的生活程序，真係大人都頂唔順。

試諗一下，我叫你每日由朝早7點起身，不准離開你張工作椅，不准瞓覺，不准食嘢，不准上FB、不准WhatsApp，一天做哂一個星期工作，一直做到上床為止，每天如是，你會否感到很充實？

好多人成日鬧政府教育政策唔好，計我話不如立例管制一下時下班病態老母好過啦！例如強制唔比小學生出去上課外補習班，興趣班都不能超過兩樣之類，返 去以前一切靠學校咪好囉！大家無得課外補習，唔駛出去鬥學琴、棋、書、畫，無得玩嬴在起跑線遊戲，小朋友咪多啲時間玩下，有返個似啲樣（都唔好講快樂）嘅 童年囉！

你可能又會話馬沙唔公平，點解成篇文有病態老母，無病態老豆？好老實，病態老豆唔係無，但一定少之又少！反觀，睇住自己仔女比自己老婆（病態老母）係咁精神虐待，唔敢出聲救自己仔女出火海，仲要出錢助紂為弱嘅幫凶老豆就比目皆是！

(2015年6月9日刊於 全民媒體)  

陰陽路

辭職走咗成年先收到佢嘅正式辭職信，公司班管理層究竟同呢位CEO係咪活在不同時空？

呢間上市公司主業做廣告媒體及開發電影業務，可能因為咁，公司班管理層都相當有創意！

根據其2014年6月27日發出的最新一份公司年報，高級管理層一欄清楚寫明「黃偉剛」先生於2014年3月獲委任為公司之行政總裁。即係話公司之核數師在2014年6月27號簽發核數報告前理應見過呢位新上任CEO!

咁靈異之處係乜呢？

根據公司於2015年4月1日所發出之公告，呢位公司新貴原來在上任未夠三個月即2014年5月21日已經跳船！即係話出年報之時，呢位CEO已經跳咗船，點解年報出之前無人知道CEO 已經離職，公司年報高級管理層一欄仲清楚寫明「黃偉剛」先生係公司之CEO呢？

最靈異之處係公司竟然夠膽死係2015年4月1日所發出之公告大大隻字話:「公司係其CEO跳咗船成年嘅2015年3月31日先收到佢嘅正式辭職信」，仲話未有在2014年5月公布佢跳船係「不經意所致」…..

上市公司CEO跳船咁大件事都可以「不經意」，你估請咗個信差返咗兩日工見辛苦粒聲唔出閃咗人咩？

辭職走咗成年先收到佢嘅正式辭職信，公司班管理層究竟同呢位CEO係咪活在不同時空？

呢個簡直係香港上市公司企業管治嘅經典！

(2015年4月29日刊於 全民媒體) 

癲倒是非

我理得會計師公會23個理事係親中定反共，三萬八千名會員都係專業人士，又唔係白痴，民調只需簡單叫會員在「支持袋住先」/「反對袋住先」中二擇其一，結果就必定相當清析。

嘩嘩嘩! 大家知唔知乜嘢叫癲倒事非呀? 尊貴嘅會計業界代表梁繼昌竟然用「會計師公會24個理事中，3個是官員、3個是政府委任，而四大會計師行代表亦較親政府」做理由，話政府逼他轉軚袋住先！

係討論之先，馬沙必須指出會計師公會理事會嘅組成。

根據《專業會計師條例》，公會理事會最多由23名成員組成，包括14名當選理事、上屆會長、2名增選理事、2名當然理事（即財政司司長或其代表，以 及庫務署署長或其代表），以及4名由香港特區行政長官委任的業外成員。 即係話，會計師公會理事會係絕對唔會出現梁繼昌所講有24個理事，因為23個已經係理事會成員組成嘅上限! 更加唔係尊貴嘅會計業界代表梁繼昌所講，理事中有3個是官員、3個是政府委任！正確應該係2名當然理事（即財政司司長或其代表，以及庫務署署長或其代 表），以及4名由香港特區行政長官委任的業外成員。

先唔講四大會計師行代表，尊貴嘅業界代表梁繼昌無理由唔知，會計師公會23個理事中常設2個當然理事及4個政府委任的業外成員之目的何在！在會計師 公會理事會中加入2個當然理事（財金官員）及4個政府委任的業外成員嘅目的，係提高會計專業的規管制度，使之公開、有效、具透明度及讓投資者有信心，而唔 係為咗幫政府在會計業界內進行拉票！

再講 ，馬沙個人認為，會計師公會如果不在業界代表投票之前，就政改進行最新一輪民調，聽取三萬八千名會員意向先係極之不負責任。而家會計師公會想聽取三萬八千名會員意見，反被業界代表指不是 ，真係唔知尊貴嘅業界代表梁繼昌乜嘢邏輯！

另外，我理得會計師公會23個理事係親中定反共，三萬八千名會員都係專業人士，又唔係白痴，民調只需簡單叫會員在「支持袋住先」/「反對袋住先」中 二擇其一，結果就必定相當清晰。如果真係有逾半甚至六、七成支持袋住先，尊貴嘅業界代表梁繼昌無理由唔投支持票，此乃順應民意，唔係叫轉軚！

相反，若果有逾半會員「反對袋住先」，我相信會計師公會三萬八千名會員 （包括我） 都相當樂意支持尊貴嘅業界代表梁繼昌就政改投下反對票，因為專業會計師都應該會尊重同業主流意見！

(2015年2月13日刊於 全民媒體)

佔中被捕真係可以「慳稅」四成?

尋日明報有一篇題為「佔中被捕「慳稅」四成」嘅報導，馬沙作為資深流氓會計師，當然要認真了解一下點解佔中被捕，即係走去犯法被捕，竟然可以「慳稅」四成咁正!

尋日喺明報網站，見到一篇題為「佔中被捕「慳稅」四成」嘅報導，馬沙作為資深流氓會計師，當然要認真了解一下點解佔中被捕，即係走去犯法被捕，竟然可以「慳稅」四成咁正!

睇完篇文，真係「唔識嘅就開心死、識嘅就笑Q死」! 首先，有乜嘢證明報導中嗰位得到稅務局批准暫緩繳付薪俸稅嘅申請理由 (其實正確應該係叫緩繳 2014/15 暫繳薪俸稅 Provisional Salaries Tax held over 先啱) ， 真係用 「曾參與佔領而被警方拘捕，可能會遭到刑事檢控而被僱主開除，喺收入有可能受影響下，要求稅務局重新評稅。」?

明報有無查證過嗰位申請人嘅申請信稅局吸收副本? 人講明報就信?

稅務局回覆話基於《稅務條例》嘅規定，唔方便評論個別個案。既然稅局唔方便講，就由我呢位流氓會計師講下。根據《稅務條例》，在一般情況下，要申請 「緩繳暫繳薪俸稅」，申請人係需要在申請書內清楚填寫整個課稅年度估計入息的數額，而該估計入息的數額要少於或可能會少於前一年度的應課稅入息實額的90 %，又或少於或可能會少於暫繳稅課稅年度估計入息的90%! 單係用「曾參與佔領而被警方拘捕，可能會遭到刑事檢控而被僱主開除，喺收入有可能受影響下，要求稅務局重新評稅」呢個理由，似乎唔係事實之全部！

下次唔該明報記者Emily専業一啲，即使「緩繳暫繳薪俸稅」申請獲得稅局接納,該納稅人只係申請「緩繳暫繳薪俸稅」，即係只針對預繳稅呢部份，而課稅年度2013/14嘅已評定稅款係絕不會減，因此稅局「重估」呢個行為根本不存在。

而成篇文最誤導無知市民嘅，係大字標題用「慳稅」二字，仲要「慳稅」四成咁Q多! 你依家只不過係向稅局申請唔交預繳稅獲得稅局接納而已，唔係向稅局申請免稅或扣減成功，你今年 (課稅年度2013/14) 嘅稅款一毫子都無減過， 下年（課稅年度2014/15） 嘅稅款亦一樣一毫子都無得減， 何來「慳稅」四成? 一個唔好彩，如果下年 （課稅年度2014/15） 即1/4/2014 – 31/3/2015間， 最後應課稅入息實額高過今年呢， 仲分分鐘比稅局罸錢！

今次寫呢篇文嘅目的，純粹係希望點化下對稅務毫無認識嘅無知市民，尤其係嗰班誤信佔中被捕竟然可以「慳稅四成」嘅佔中被捕者。千期咪咁輕易信人，以為曾經被警方拘捕，今年真係可以「慳稅四成」咁爽！

 (2015年1月8日刊於 全民媒體) 

會計界福祉誰負責

好多會計師成日話會計界立法會梁繼昌議員，成日唔理會計界嘅事，不為會計界出一分力，為會計界謀福祉！

我認為大家一直錯怪梁議員，其實會計界立法會議員嘅職能同其他直選議員一樣，首要工作係參與立法會立法工作、出席立法會各類咨詢會議及監察政府施政。

會計界嘅福祉唔係會計界立法會議員負責，理論上係由會計師公會去爭取！公會攪唔掂先搵議員幫下手，同市民有事攪唔掂搵議員幫手一樣。只不過會計界咁啱有個功能組別議員而已。

相對地，立法會議員係應該相信法治精神，有責任維護法治，不應鼓勵甚至參與任何違反法治的言論或活動或所謂公民抗命！

試問不相信法治或不守法的人，有何資格參與立法工作？

荒謬都市

佔中已經踏入第三個星期，好多支持佔中嘅人，尤其係一班有學識嘅中產，特別喜歡指責反佔中人士反佔中係為咗搵錢、為咗保持同國內做生意而唔肯支持佔中！馬沙在會計界，甚至比一眾支持佔中嘅會計師老屈，搖身一變，成為冷血、涼薄、為錢而盲撑中共嘅五毛！

正如上一篇文所講，依家香港社會已經變成非黑即白，正所謂夏蟲不可語冰，同班自命有高尚情操嘅佔中友講多都嘥氣。本來都唔想多作回應，不過睇完上周警務處前高級助理處長鄧厚江上TBB講清講楚嘅訪問，即刻覺得有必要寫返篇文。因為鄧Sir 完全講出一班反佔中人士嘅心聲。

鄧Sir 一開始就指出，依家佔中嘅現象好唔正常，有啲荒旦，甚至荒謬！其理由有三：-
（1）點解有啲大學教法律嘅學者，會呼籲啲市民走去違法；
（2）點解其中一部分負責立法嘅立法會議員，要求警方唔好執法；
（3）點解一啲本身違法嘅示威者會要求警方保護佢地繼續去違法示威。

以上三點，在一向以法治為核心價值嘅香港，根本就係一連串荒謬嘅事情！如果社會各界唔好好反省、反思依家呢種利用感性去代替理性嘅思考方式，未來將會見到更加多荒謬嘅事。

若果你說要公民抗命，只要唔影響到其他市民，我個人絕對唔會反對。但當你影響到其他市民，呢個就非常之可笑。何解要犠牲某一社群嘅利益，去達成你班 友嘅政治理念？你地要記住，你地並不代表所有香港人，至少不代表我！如果佔中人士因為某種政治原因可以抗命，咁究竟以邊條粉腸嘅標準作為將來行動嘅根據 呢？

講咗不知幾多次，依家佔中人士明明犯法霸佔路面。如果你班友唔需要警方保護，咁就請隨便啦。但當你班佔中人士需要警方保護，而你班友佔中根本係一個 違法嘅行為的話，依個就正正係今日香港社會荒謬嘅地方。當社會各人有不同理念，今次你可以抗命，聽日佢都可以抗命，咁法治基礎究竟係邊到？

鄧Sir 特別提到一個社會觀點，點解要你啲學者控制社會嘅發展，點解黑社會就唔可以走嚟控制社會嘅發展，反正大家都在用犯法方式去爭取社會嘅發展方向！依家攪到社 會各界無止境嘅爭論，以往用咁多時間去發展出嚟嘅法治精神，香港最重要嘅基石，就咁樣就沖散咗，大家係咪好開心？

其實公民抗命只不過係美化咗嘅犯法行為，所謂「和平佔中」，亦都係美化咗嘅犯法行為，警察唔係睇你班友美唔美化，而係睇你犯唔犯法。「和平佔中」即 使幾和平都好 (而依家事實擺在眼前一啲都唔和平)，係咪理性合法呢？包裝係點樣都好，但需要獨立思考。因為你拆開咗包裝紙之後，要明白裡面嘅含意係乜，唔好因為包裝美 麗，買返屋企之後先發覺連累了自己和整個社群。

有人不斷以佔中係和平非暴力去申辯，要知道好多犯法嘅事係唔需要暴力。鄧Sir就舉出一個例子，訛騙案從來無使用暴力，咁係咪唔用暴力嘅案件，警察以後都唔好執法呢？

最後，鄧Sir 提出兩個值得大家反思嘅問題：-
（1）我地希望個社會係守法嘅社會，定係依據某一啲人自己嘅意願去決定，社會係應該守法定不守法？
（2）我地更加要想一想，警察要因政治因素不執法，還是不理政治因素嚴格執法？

至於星期六有個自稱住係蘭開夏道嘅女作家王迪詩係其専欄話「有些人認為民主不重要，自由不重要，重要的是有錢賺。在這些人眼中，香港的核心價值就是「搵 食」，跟一頭狗的核心價值沒有分別。」，阿王大作家妳知否絕大部分唔支持佔中嘅人核心價值唔係「揾食」，唔支持佔中亦不代表佢地認為民主不重要，自由不重 要，佢地唔支持佔中只係要守護香港法治精神呢個核心價值。不過，即使有人掛住搵錢又點，人地靠雙手努力賺錢養活妻兒，妳憑乜話人係一頭狗？在我看來，妳自 己先跟一頭為取悅讀者而狗口沒有長出象牙嘅Bull Terrier沒有兩樣！話時話，講到自己咁支持佔中，又唔覺妳呢隻經常著住Jimmy Choo 嘅Bull Terrier係佔中現場出現？快啲同妳啲讀者落去佔中現場影返張相啦，散咗場就補唔到飛！

(2014年10月21日刊於 全民媒體)

周街便溺

講到國內人容許小朋友周街便溺,我支持依例執法,見一次票控一次！

不過,執法票控國內人小朋友周街便溺嘅同時,最好嚴厲執法票控嗰啲容許狗隻周街便溺嘅狗主!

經常係街見到啲狗主比隻狗周街屙尿,屙完就扮有家教咁倒啲水落狗尿上面! 呢啲狗主智力低於猿猴,倒啲水落狗尿上面就當沖乾淨咗?

倒啲水落狗尿上面,除咗擴大地上液體範圍及表面上沖淡咗啲狗尿外,實質上同唔倒啲水落狗尿上面根本一啲分別都無,篤狗尿100%仍留在地上!

狗屙屎前有放報紙墊住啲屎之後放入垃圾筒還好,比隻狗周街直接屙屎落地走咗去嘅正PK! 至於嗰啲比隻狗周街直接屙屎落地之後揾報紙包走啲狗屎放入垃圾筒嘅,都唔好得幾多,同國內人容許小朋友周街便溺之後揾報紙包走啲屎放入垃圾筒一Q樣咁衰!

好多人鬧國內人將屎放入垃圾筒唔啱,因為垃圾筒唔預你掉屎! 咁何解啲狗主個個將啲狗屎掉入垃圾筒又得呢?

計我話,趁住個勢,一次過票控埋啲容許狗隻周街便溺嘅狗主就啱!

先辭職、再被炒

拋開所有政治因素,純講HR問題,其實伍珮瑩打咗咁耐工,講嘅嘢都幾低B! 首先,佢認咗係佢自己先提出辭職,其後總公司高層來港開會,叫她即日離職!

香港各大傳媒、市民就將呢個解讀成「伍珮瑩先辭職再被炒」! 各大傳媒、市民個個鬧威普公司好PK, 明明係伍珮瑩辭職在先,做乜仲走去炒人,無良顧主兼炒人唔賠錢!

睇返伍珮瑩尋日記招,更加證明根本無「被炒」呢回事,只係各大傳媒有心做新聞,無知巿民又人講乜就信乜,下下先入為主,當正伍珮瑩係英雄,乜鬼因「仗義執言」被炒!

要分析呢單嘢好鬼簡單:

第一,伍珮瑩清楚表示,自己先向顧問公司威普呈辭獲接納! 「呈辭獲接納」係呢個CASE 係重中之重! 即係話,伍珮瑩呈辭 (RESIGN) 並獲顧主 接納 (ACCEPT), 咁由顧主接納佢呈辭嗰刻開始, 伍珮瑩已進入咗離職通知期,根據伍珮瑩追薪資料,佢嘅職位呈辭要俾3個月通知期 (合乎一般公司高層3-6個月通知期);

第二,伍珮瑩表示,周刊其後刊出報道後,威普再出信將伍解僱 (估計目的是「唔想俾錢」。而伍連假期都未獲賠,通知期亦欠奉。)! 問題就係到喇,其實一間公司係「絕對唔會」炒一個已進入咗離職通知期嘅員工,因為理論上呢位員工已經辭L咗職,干脆叫佢通知期唔駛返工即刻走就得,仲炒乜 Q? 伍珮瑩對外聲稱自己被「解僱」已經錯到不得了,正確係佢自己「辭職」,公司唔使佢3個月通知期返工,叫她即日離職先至啱!

所以現實根本唔會有「先辭職、再被炒」呢回膠事! 呢句說話你講出嚟我唔笑9你,其實係我有修養而已!

呢單嘢唯一有討論價值係「錢」! 打過下工嘅人都應該好清楚,一般情況,不論辭職或被炒,都有個叫「通知期」存在,一般人通知期係1個月、中高層就3個月、非常重要職位就半年甚至1年都唔奇,總之顧傭合約應該寫得淸淸楚楚!

先講公司炒人,因為較為簡單:
1) 公司要炒人,理論上要比通知期,不過現實世界,除咗啲孤寒又怕蝕底嘅老闆外,十居其九都係賠錢(代通知金)比被炒員,叫被炒員工即日走!

2) 另一常見方法咪叫你打封信自己辭職,同意免你通知期,比你即走囉! 好處係你仲可以大大聲同新顧主講你係自動離職,唔係比公司炒囉!

3) 捉你違反合理命令,免賠即炒!

以上要錢定要公司reference letter, 自己決定啦!

再講員工辭職:
1) 正常人比辭職信公司又獲公司接納 (事實係根本無得唔接納),好嚟好去有交帶,咪做埋通知期(一般人1個月)先走人囉! 如果辭職員工想即刻離職 (例如趕住返新工),咪同樣賠錢(代通知金)比公司囉,打工仔無人唔知掛?

2) 另一個較為複雜嘅係公司與員工關係持續不良,即係員工俗稱「博炒」,比員工博到,咪收多個月代通知金走人囉! 博極公司都唔炒,反被公司玩返轉頭頂唔順自己辭職,比人玩多個月囉! 不過好多公司都怕鬼咗呢啲員工係通知期攪亂檔,叫呢啲員工通知期唔駛返工即日走! 理論上公司咁做,雖然呢啲員工通知期無再返工,但係錢係要照俾,之但係公司肯白白咁賠呢個月人工比呢啲員工,一早就賠錢炒Q咗佢啦! 咁點好呢,現實世界,咪口講經雙方協商後,公司同意免去員工通知期,允許員工即日走囉! 員工當然可以堅持唔就犯,但通知期一定好難過囉 (例如叫你搬去廁所門口坐、全日唔俾嘢你做要你坐到直一直又唔準做任何私人嘢)!

http://www.metrohk.com.hk/?cmd=detail&id=229386

好文共賞 (三)

糟老頭真係勁,一氣呵成寫哂回歸至今成台戲,同我睇法完全一樣!

如果能加入埋董營梁粉蟲呢位MPS劊子手如何未上戰場,就比MPS 利益集團暗殺,就very good !

**********************************************
**********************************************

作者: 糟老頭

法律要求電台要拎牌, 所以傷台雖名為商業, 但行事要付合社會公眾既合理期望, 係可以理解.

正正就係咁, 你小姐作為 烽煙節目主持, 應炒, 一早炒. 唯有如此, 方能璋顯香港言論自由.

何解 ?

你小姐有明顯政治立場, 有 agenda ( 反鷹), 乃是不爭之事實. 相信佢自己都要認. 既然如此, 她應去從政, 參黨, 組黨, 競選議員, 或是打正旗號做時事評論員 , 一樣可以海闊天空發光發熱, 我都會耐不耐聽下, I promise .

郁文, 長毛就係好例子. 你套理論只要有人 buy, 當選議席自然就可以在廟堂之上大發高論, 甚至掟蕉掟你姥姆西, 誰曰不宜 ? 邊個話香港冇言論自由 ? 真係劈大眼講大話.

但以你小姐有明顯政治立場之身, 點解可以以咩「不偏不依不群不黨」去做 烽煙節目主持, 其實係霸住個大氣電波去握殺異見聲音, 實則去實行你既 hidden agenda ? 你應該去做受訪嘉賓先o岩 !

佢其實係繼承緊某條大石班既舊路. ie,

老懵董時期, 要打擊地主黨同 MPS 利益集團, 彼方自然聯手反擊. 策略之一, 就係搵條大石班係電台發功, 拆老懵董台. 佢非常之成功, 令老懵董腳疼下台, 換上一個高地價同 MPS 利益集團代言人煲呔僧. 終其任內, 香港公共房屋供應大減, 樓價大昇. 依家幾十萬人住當ij 房就係佢既 legacy, 可笑既就係, 受害者冇人識得追究佢. 而隻大石班呢 ? 佢以民意領袖身份, 高票當選議員, 而哩度先係佢露出真面目既地方. 佢係個度做過尐乜? 正正就係乜都冇 ! 粒聲都冇 ! Because mission already accomplished !
到第三個凸手選舉 , 爆出九龍塘大宅 僭建風波. 你小姐搵當事人上台解畫, 言辭間大有護航味道, 因為主角正正就係高地價同 MPS 利益集團栽培已久既代言人.

無怪近日九龍塘大宅男, 同另一個前朝怨婦即刻走出黎撐阿你小姐, 因為你小姐既任務, 就係要重演一次老董腳痛 , 可惜出師未捷身先死.

佢將佢既被炒, 政治化裝成打壓言論自由, 而無視佢自已利用公眾既大氣電波中進行黨同伐異, 限制不同意見人仕發聲, 去鋪排另一個高地價同 MPS 利益集團既代言人上台既行徑. 可笑復可哀者也.

郁文講得冇錯, 當日郁文被炒時, 你小姐你有冇為「言論自由被打壓」出過聲 ?

智障研究報告

如果星養兒開支300萬、英200萬,而香港竟然要860萬,只能說香港人智障!

香港人點解咁智障? 咪就係因為香港有智障研究中心呢類智障研究報告囉!

話養一名子女到18歲大時約要860萬,簡單計咁平均每個月 ($860萬除18年再12個月) 即係要$39,815! 睇到依個數就知個研究有幾智障!

香港中產家庭入息中位數係幾多? 養一件平均每個月要$39,815, 咁養兩件平均每個月要$79,630! 事實真係咁的話,香港9成中產家庭小朋友已經死咗9世啦!

老實講,呢個智障研究中心副主席劉鳴煒,眾所周知係富豪大劉個長子,佢對孖仔依家每個月洗佢$79,630唔出奇,不過無理由將自己富豪式洗費講成普通中產家庭生活水平估計!

******************************************************************************

養子女到讀大學 要花860萬

【經濟日報專訊】在香港養大一個小朋友究竟要花費多少？最新估計指，中產家庭撫養子女到大學畢業，需550萬元，若計算通脹更高達860萬元，遠高於英國及新加坡。

養兒開支之巨嚇怕年輕夫婦，至2031年，生育率仍處於1.19的低水平，有研究建議加強移民政策。
有學者直指，教養子女不應以金錢來衡量，明言「家長教育」，才是本港現時需要的。

智經研究中心根據最新的生活水平估計，現時一個中產家庭由小朋友出生到大學畢業，養育費用高達550萬元，如把通脹計算入內，到子女大學畢業時，總「成本」更達860萬元。

星養兒開支300萬 英200萬

而在新加坡，養兒育女的開支大約為300萬港元，至於在英國撫養一名子女到18歲大時，約只要200萬港元。

該中心副主席劉鳴煒指出，即使政府提供經濟誘因，亦難以提高本地生育率：「就算俾兩、三萬元生育津貼，但養大個小朋友要幾百萬元，根本幫唔到夫婦。」

對於養大子女需要花逾500萬元，嶺大公共政策研究中心主任何濼生直言，教養子女並非以錢行先，強調關鍵是精神及時間，「個數根本無譜，因為視乎你如何花錢，你話要再多些都可以。」
他認為，「家長教育」才是現今香港缺少的一環，不少父母不懂與子女相處，遑論建立親子關係，「好多人是『無符』，教細路教到驚，不知如何與他們溝通。」
學者：家長教育 才最重要

事實上，開支大，窒礙港人選擇多生育。根據智經研究中心最新發表的《香港至2030年的人口及人力需求》研究報告，到2031年，本港生育率將只有1.19，遠低於更替水平、即每名婦女要生2.1名子女。

報告又指，屆時本港人口遇到的其他3大挑戰，包括人口老齡化，即每1,000名年齡介乎15至64歲的人士，就要撫養578名年齡15歲以下及65歲以上的人士；其次是勞動力萎縮至350萬人，並需要額外50萬勞動人口；以及難以吸引及挽留人才。
報告建議，政府應檢視移民及入境政策，鼓勵有財力及教育水平高的雙非家長有秩序地來港，並吸納東南亞鄰近國家的專才，以及吸引海外港人回流等。
新移民生育高 人口勿設限
劉鳴煒解釋，根據英國及澳洲的經驗，新移民女性的生育率較本土女性高，加上透過各種移民及入境政策，政府可以控制輸入優質人才，因此，加強移民政策既有助本港提高生育率，亦能補充優質勞動力。
要吸引大量的移民來港，劉認為首先不需要為本港人口設定上限，「人口上限只是一種排斥主義的講法……香港一直都在發展，會起新樓、會重建，有能力容納更多人。」
劉鳴煒認同人口政策「不單是一盤數字」，政府需要考慮港人感受，以達致社會共識。
他呼籲政府應該先詳細檢討目前的人口政策，以及計算人口政策所需要涉及的財政收支，包括經濟生產力數字、醫護開支等。

http://hk.news.yahoo.com/%E9%A4%8A%E5%AD%90%E5%A5%B3%E5%88%B0%E8%AE%80%E5%A4%A7%E5%AD%B8-%E8%A6%81%E8%8A%B1860%E8%90%AC-225550034.html;_ylt=As4AC024YSVFrhvLw2VyyPCqVsd_;_ylu=X3oDMTExZXU1YmFrBG1pdAMEcG9zAzIyBHNlYwNNZWRpYVRvcFN0b3J5VGVtcA--;_ylg=X3oDMTBmaG90YXE3BGxhbmcDemgtSGFudC1ISw--;_ylv=3

贏在起跑線

今日毒果有標題報導話「難抵密集式升小一面試; 5歲女童抑鬱想跳樓」! 

點解香港考小一會攪到小朋友抑鬱想跳樓? 咪又係拜「贏在起跑線」呢個魔咒所賜囉!

成日有人問究竟「贏在起跑線」係咪真係work, 定係香港獨有,由班港爸港媽吹出嚟! 「贏在起跑線」這概念,其實真係有教育學家正正經經研究過的,只不過被亞洲地區發揚光大!

有人會問, 究竟這條起跑線在哪裡？ 一般理解,當然係由出世嗰一刻計起..........之不過.......香港嘅走勢係越推越前! 何解? 因為有部份痴撚線幼稚園, 要父母在小朋友還在媽媽肚入面 (即未出世) 就要排定隊報讀,所以對於嗰啲樣樣要有plan 嘅父母, 真係扑緊嘢做人嗰刻,其實已經決定咗將來小朋友要讀邊間名幼。咁基本上,對呢班咁有planning 嘅父母,佢地小朋友條起跑線就係父母扑緊嘢嗰一刻而唔係佢地出世嗰一刻計。你地話呢班小朋友幾撚型呀,未出世以經贏在起跑「點」!

不過,無論起跑線點作定義和定位,事後根本都無辦法知輸贏(結果)! 

因為:
1) 終點線係邊?
2) 點定義輸贏! 以財富、成就、健康、心靈、社會認同、還是快樂度?

所以,依我看來,一個人未到死嗰一刻,根本不能論輸贏!

班港爸港媽話「贏在起跑線」係有教育學家正正經經研究過的,聽落又好有道理,錯不了幾多啦! 問題在於,呢類研究過程需要十幾廿年,因為要跟下班小朋友長大後有無分別。但班港爸港媽偏偏淨係聽上半場,完全無理下半場 (研究結論) 講乜!

簡而言之,歐美主流教育學家最後認為「贏在起跑線」係唔work 的！

以全地球教育最出色嘅芬蘭為例,芬蘭沒有所謂的“資優班”、小朋友要滿七歲先可以入學接受教育,學校沒有制服、沒有督學、毫不標榜精英培養、考試次數不多、學校不做排名、老師不作成績考核等等！

經濟最強嘅德國直情立法禁止學前教育,即幼稚園不可教授學術性科目,只可以集中教小朋友自理能力、禮貌、畫畫之類！

又有人話,新移民並不是像港式家長迫子女贏在起跑線,在這方面，大陸人比香港人正常。我會答,呢個只不過係表面! 根本原因,係因為玩「贏在起跑線」呢個游戲基本要求係父母有咁上下教育程度及有啲錢!

港式家長近年將「贏在起跑線」玩到白熱化,主要原因係呢一代港式家長大部份已經接受過大專以上學歷 (博士級都大有人在) 及叫做揾到個錢,當中玩得最落力嘅就一定係嗰班所謂偽中產。

之所以在這方面,大陸人好似比香港人正常,原因得一個,就係「窮」! 我上面已經講咗, 玩「贏在起跑線」呢個游戲基本要求係父母有咁上下教育程度及有啲錢, 大家經常係傳媒見識到嘅雙非童父母,大部份教育程度唔高及無乜錢,甚至諗住食香港福利,邊有資格玩「贏在起跑線」呢個游戲!

基本上,同香港班偽中產一樣,有返咁上下教育程度及有啲錢嘅雙非童父母,根本唔駛亦唔會去北區排幾日幾夜隊拎表格報讀免費嘅津貼幼稚園,佢地會出現係另一個戰場 「九龍塘」! 又因為各「九龍塘」名幼收好貴嘅學費而佢地嘅對象非富則貴(或自命貴嘅偽中產),所以呢類「九龍塘」名幼係無可能要班非富則貴(或自命貴嘅偽中產)嘅家長通宵排隊攞表,更枉論排幾日幾夜! 咁無通宵排隊攞表,自不然無傳媒報導! 無傳媒報導,大家咪以為大陸人好似比香港人正常囉!

簡而言之,大陸人同港式家長係一樣咁尊崇玩「贏在起跑線」呢個游戲! 其實唔只大陸人同港式家長鍾意,幾乎所有亞洲人都特別鍾意,日本、馬來西亞華人、新加坡華人、印度都一樣,無一幸免!