買咗隻怪物

作為會計師及稅務顧問，呢幾日有不少人問過我對於雍澄軒買家將面對嘅稅務問題，而我每次都係答:「唔知！」

因為我認為依家除咗長實班創意律師團隊知道自己賣乜外，根本無人真正知道班買家買咗件乜嘢「怪物」返嚟！所以一日份正式S&P (Sale & Purchase Agreement) 未浮上水面，未真正了解過份S&P內啲terms and conditions, 我唔會評論任何稅務問題！

不過，我反而想知依家除咗中環幾間著名大律師行有能力（財力）去處理雍澄軒買賣個案，究竟有無其他律師行夠膽代表買家！

尋晚已經有個著名律師係TVB講，律師好難為買家釐清雍澄軒嘅買賣風險，在不能釐清買家風險的情況下，律師為咗避免自己之後比人告，無可耐何之下唯有唔接買賣雍澄軒啲case!

如果一般律師無能力代表買家完成買賣交易，第一手買家就話可以同用發展商律師完成交易！但之後買賣點算？比大行㯲住搶？到時收幾皮都焗住要比！

再引申去按揭，既然一般律師都無辦法去釐清買家買賣風險，咁銀行點樣可以釐清銀行自己承按風險呢？

銀行無理由為咗幾單幾百萬嘅按揭生意，用大量內部資源去了解呢隻「怪物」，所以唔接呢啲生意就好正常！

所以馬沙個人認為，刻下班雍澄軒買家最大嘅存在風險，唔係稅務問題，係買完之後點樣完成交易及上會，以及將來獲利或想變現時點樣將雍澄軒呢隻「怪物」賣出?

反假唱

強烈推介: 呢個「湖南卫视《我是歌手》」係2013年到目前為止,最好睇、最緊張嘅音樂節目! 

最令我感到驚喜嘅係,節目音樂總監叫梁趐柏,即係以前香港隊浮世繪嗰個! 仲有,結他手竟然係黃仲賢 (Beyond 御用結他手), Keyboard 係黃丹儀! 即係節目隊Band係香港班底組成, 香港音樂人衝出香港! 

難得作為殿堂級歌手嘅齊奏,竟然肯參加! 香港除咗黃貫中夠膽上去,我諗好難有第二個肯上去!

樓價痴線系列 (八)

對於私樓巿場樓價問題,好多人依家假設咗私人巿場樓價唔會回落,以上呢種言論係97樓劫爆發前，都有一大班政棍及想上車買樓嘅中產成日咁講，攪到當時得2X歳嘅我差啲信以為真，以為自己呢世注定儲唔到首期，永遠買唔到私樓！

一般嚟講,私樓市場除非政府大大力出手干預，否則政府無可能控制佢嘅上落！私樓市場有佢自己升/跌嘅週期，升到人人頂唔順或受內部／外部經濟影響自然會爆煲或回落！

對於中產置業問題，唔好正係講，講／閙容乜易，比個方案出嚟先！

我認為私樓現價要跌50%以上（即係04-07年個價）先至合理，冇人幫要靠自己儲首期嘅中產先至上到車，低層市民先有動力努力向上游！

我雖然有物業,但我個人極力贊成（其實幾年前貪曾應該做）政府應用盡一切行政方法，去干預私樓市場，並致力維持樓價係合理水平！但係如果依家政府咁做，你班已經有樓嘅中產（既得利益者）制唔制先？

到時做咗負資產咪又係咁鬧政府！現在政府要施政令樓價下滑到所謂合理水平，有人得（上到車），自然要有人失（變負資產）！

另外，就當樓價跌返去所謂合理水平，大家有能力上車，但當你知到政府未來會致力維持樓價係現有水平，即係買完樓之後唔駛旨意樓價升值，你仲買唔買？

大家睇下03-07年啲私樓咁平，點解成交量咁低就知！

人總係自私，未上車日日叫drop drop drop! 一上咗車就望日日go go go!

咁到底點做先叫公平？

Oh...sorry! 依我個人愚見，呢個世界根本就從來都冇「公平」呢回事！

能醫不自醫

最近一個專門教導企業內部控制(Internal Control) 確保企業制度的可靠性 及 企業管治（Corporate Governance） 嘅專業學會,竟然比人棟咗成球（HK$1.1 million ）,仲要隔咗成兩年先發現,你話可笑不可笑?

棟咗呢舊錢嘅人都算好嘢,睇返個專業學會盤數, 2010 & 2011年現金及銀行結餘分別得HK$3.9 million & HK$4.9 million,少咗成球（HK$1.1 million ）都無比人發現,又過到核數師嗰下先好嘢!　同中咗兩口孖寶真係無乜分別!

本來呢個專業學會中伏比人棟咗成球（HK$1.1 million）已經夠好笑,發現咗問題嘅處理方法仲好笑!　佢地嘅做法係如下:－

- the engagement of an external forensic accounting consultant to investigate the cash discrepancies;
- the establishment of a Recovery Sub-Committee to ascertain the cause and extent of the discrepancies, to enhance internal controls and risks management procedures and to handle all related matters;
- the immediate introduction of measures to enhance accounting and control systems;
- reporting the matter to the police;
- the establishment or upgrading of key committees of the Institute; and
- the establishment of an Advisory Board to provide guidance to the Council and to oversee the enhancement and implementation work of the Recovery Sub-Committee.

查實比人棟咗錢,仲要棟咗成球（HK$1.1 million）,要查根本好易查,使乜揾「external forensic accounting consultant」！你估依家查洗黑錢集團,要智破復習電腦加密咩?

成立個乜鬼Recovery Sub-Committee,　再成立一個 Advisory Board去睇住個Recovery Sub-Committee做嘢,呢個思為仲勁過政府!

好喇, 再使多十幾廿個去請「external forensic accounting consultant」及成立一個 Advisory Board去睇住個Recovery Sub-Committee做嘢,得出以下提議:－

- continuing the suspension by the Institute of the receipt of cash payments;
- enhanced segregation of duties and strengthened independent verification and cross-checking in critical accounting routines;
- additional departmental engagement in recording and reconciliation of income;
- reinforcing the staffing of the Institute’s financial management; and
- increased oversight by the Council and its Committees.

以上各點唔難明,基本上求其打開本管理學嘅書就有得抄,使乜攪咁多嘢!　

不過最難明係第一項提議,收CASH比人棟咗去,好明顯係收CASH嘅流程中出現嚴重內部控制問題,使多十幾廿個去請「external forensic accounting consultant」及成立一個 Advisory Board去睇住個Recovery Sub-Committee,之後唔係提議點樣改善收CASH流程中內部控制問題,而係。。。「suspension by the Institute of the receipt of cash payments」,你地話好唔好笑?

德政

昨晚收到我地偉大嘅會計師公會電郵,內容大致係公會終於聽到我地嘅訴求,由即月起停止再向幾萬會員寄發印刷版A Plus!

地球每年即時少咗近60萬本由A Plus制造出嚟嘅垃圾,今次公會嘅決定實屬德政!

另一有趣嘅係同一晚馬沙收到另一封由某資深會員Rocky轉寄過嚟嘅相同電郵,Rocky大哥簡簡單單留咗以下7個字:-

『會否減 會員年費?』

警訊系列 (三)

今時今日係香港地,拎$500萬出嚟買新樓,已經好難可以搵到好嘢。即使你可以好似電視Law霸咁,肯住係深水埗呢啲所謂平民區,同一價錢,以為可以住大小小,一個唔小心,亦好容易中伏! 

以下呢個坐落係深水埗嘅盤建築面積588呎, 呎價夠膽死開$8,400, 即係要$500萬! 不過發展商開$8,400/呎唔奇, 奇就奇在竟然有人肯買! 特別要留意嘅係,呢個盤嘅管理費高達$3/呎, 即係呢個盤嘅管理費每月已經係$1,7xx。

咁比咗成$5球買呢個近600呎嘅新樓, 究竟比返咩級數同環境境你呢?

自己睇:
 

呢間嘢話就話成600呎,實際得6成7即係395呎, 實用呎價即係要成$12,5xx/呎,係深水埗喎......

個廳超細唔在講,話就話有對流窗,問題係有咗呢對對流窗之後,點放電視及梳化呢? 飯枱睇怕更加無處容身!

我到依家都唔明白,點解香港有人肯拎$500萬出嚟,買間咁嘅屋返嚟住,唔通香港人特別喜歡虐待自己同家人?

樓價痴線系列 (七)

好耐無寫過樓市,對上一次應該係兩年前。今日睇到以下呢單成交,真係覺得兩年後嘅香港唔止樓價痴線,直情連人都開始痴線。

樓市瘋狂，小市民驚上不到車的心態已進入失控地步，蚊型樓都有人爭餐飽。黃大仙一個289方呎蝸居，客廳細到可以用「腳趾開電視」，上周六晚原以205萬元賣出，呎價高達7093元，但昨天竟有另一名買家開出216萬元，業主賠定再賣，多賺近兩萬元。

位 於黃大仙蒲崗村道75號的富祐大廈，鄰近滙豪山，兩年前呎價三千元有找，但現已炒過7000元，認真誇張。富誠地產區域經理林栢榮指，全城缺盤，蚊型洋樓 也有人搶，富祐大廈一個建築面積只有289方呎（實用238方呎）低層 H室，原本上周六晚以205萬元售出，買家即場落定5萬元。

剛易手的蚊型戶，客廳闊度不足六呎，細到可用「腳趾開電視」

但昨天有另一名用家再畀高9萬元，至216萬元，呎價7474元，業主即賠定重售，扣除賠定及佣金共9.21萬元，多賺1.79萬元。

雖然單位只有二百多方呎，從代理提供的相片所見，客廳的闊度應不足六呎，細到可以用「腳趾開電視」。林栢榮則指出，買家是一名女子，「單位係細啲，但都叫做有一間房，一個女仔夠住啦」

蚊型樓好炒，以上述單位為例，過去短短兩年已三度轉手。一名炒家前年6月以85萬元購入，四個月後即以140萬元轉售，昨再以216萬元售出，兩年升值1.5倍。黃大仙售價200萬元內的蚊型樓（不計居屋及唐樓），現仍有32個，327至380方呎，售價160萬元起。

世紀21富山分行經理陳振文表示，黃大仙洋樓叫價都開始癲，環鳳街安康大廈高層 A室，實用面積僅292方呎，業主癲嗌230萬元，呎價7876元。另外，大角嘴居屋海富苑 A座高層1室，285方呎，連地價以190萬元成交，呎價6667元，創屋苑新高。

 
香港人其實係咪同自己有仇,用216萬係黃大仙區買個得289呎嘅蚊型舊樓,以實用面績238呎計價,呎價係$7,474/呎!

再望下上面將相個客廳, 上手業主真係有品味,咁細個廳仲夠膽升高兩呎個地台, 張梳化又大到唔合比例。好彩依家電視夠薄,如果放部舊款29吋「畫王」,睇電視時真係好似睇緊過百吋投影一樣,因為畫面近到直接放咗係你眼球前面,大到左右兩邊都睇唔哂!

如果你要我付出所有積蓄比首期,之後用上每月大部份薪金去供,仲要一供20-30年,之後可能成世人住係以上呢間屋,我諗我未供完呢間屋,我個人已經同刻下樓市一樣,痴Q咗線!

逃稅

魔果報連續3日A1頭條大字標提報導新上任局長陳茂波涉嫌逃稅,今日終於有時間望下呢單新聞!

先唔講出租板間房,單睇田生09年以280多萬收購該單位,但將金額拆成樓價120萬及150多萬的搬遷費,涉嫌逃稅呢個指控,我敢講百份百唔成立!

比意見毒果嗰幾個所謂前區議員、前立法會議員和律師,一係就智力低於猿猴,一係就自己催眠自己,講一啲出賣自己良心嘅說話!

先講下將收購金額拆成樓價120萬及150多萬的搬遷費呢個問題,其實呢個做法唔係陳局長單位係咁做,你見比意見毒果嗰個所謂前區議員,佢自己都話佢母親嗰個單位都係咁樣成交。如果陳局長呢單交易嘅做法有問題,咁差不多所有大角嘴海安樓接受田生收購嘅原業主單交易都有問題 (包括阿前區議員母親)。

其實平日只要有留意下新聞 (馬沙當然唔係講毒果嘅洗腦新聞),將收購金額拆成樓價及搬遷費呢種做法,唔係大角嘴海安樓收購計劃首創,大部份田生嘅收購計劃都係咁做。不過呢種做法亦唔係由田生首創, 因為好多地產發展商或其收購代表都係咁做,就連市建局 / 前土發收樓都有用過類似招數,呢樣嘢整個地產行業嘅業內人都知,就連負責監管嘅地產代理監管局都知,何解毒果講到好似係北極發現咗企鵝咁?

嗰個律師又指以上做法涉嫌等同串謀逃稅(印花稅),唔知嗰個律師仲記唔記得自己上年中已經接受過明報就大角嘴海安樓收購金額拆成樓價及搬遷費呢種做法表達意見,佢當日嘅意見係乜呢? 之唔係好似係北極發現咗企鵝咁,話上述手法佢首次聽聞囉!

印花稅
就陳局長大角嘴海安樓收購呢單嘢,究竟有無逃稅(印花稅),根據明報當日查詢稅務局後發現,個案統統按真實樓價全數繳付印花稅。嘅然明報講明查證咗田生在田土廳只註冊買賣契約(樓價120萬)，交印花稅時則按真實樓價(280多萬)交足全數,我都費事再考究!

利得稅
就陳局長大角嘴海安樓被收購呢單嘢,究竟有無逃稅(利得稅),以馬沙個人見解就無啦! 點解?

就以大角嘴海安樓由田生收購呢個單一個案而言,據報導指出,該單位94年以公司名義買入,一直持有至09年被收購才售出,持有足足15年之久,且當中期間該單位出租板間房!

從會計準則而言,呢個物業絕對會以投資物業入賬,而持有15年呢段時間,所有租金收入必定要損益表計算課稅。租金收入是否交足稅呢個問題,基本上唔可能存在!

至於09年賣樓又點呢? 毒果就話假若以市值樓價計算,估計此物業交易賬面賺216萬。根據公司利得稅規定，公司須為賣樓利潤繳付16.5%利得稅。

問題嚟喇,乜嘢叫根據「公司利得稅規定」? 就私人公司而言,香港得《公司條例》（第32 章）及《稅務條例》（第112 章）規管,利得稅應該在稅務條例內,所以應該係根據「《稅務條例》（第112 章）規定」而唔係根據「公司利得稅規定」至啱,呢樣我都當你毒果手民之誤。

再嚟「公司須為賣樓利潤繳付16.5%利得稅」邊條稅例講? 我可以好負責任咁同你毒果講,「稅務條例」內絕對無任何一條條例清楚寫住「公司須為賣樓利潤繳付16.5%利得稅」!

至於賣樓利潤是否需要繳付利得稅,以一般情況及最簡單嘅方式講,分別如下:-

1) 地産發展商如「長實」從事樓宇買賣、公司從事物業炒賣活動 (即係所謂炒家), 由於佢地賣樓嘅利潤係產生自一般商業活動,所以有關利潤係需要繳付利得稅;

2) 資本增值 (Capital Gain), 由於香港幾十年來未有「資本增值稅 Capital Gain Tax)」(又叫資產增值稅), 所以賣樓利潤係來自長期投資物業的話,不論「個人」或「公司」持有相關物業,有關利潤係唔需要繳付利得稅!

照睇陳局長個case,持有相關出租物業足足15年, 算唔算「長期投資物業」,我諗只要讀者智力唔係低於猿猴,自己心中一定諗到答案!

如果有人對住一個根本唔需要繳付利得稅嘅人,講佢逃稅,你話好笑不好笑?

如果有人硬係要話呢個case唔係資本增值,咁都好,全港市民只要曾經賣/換持有少過15年嘅樓,快啲交返利得稅,我代香港巿民多謝您! 仲有,昨日電台嗰條「大班」大大聲話陳局長好快因逃稅坐監,如果真係咁,以上講嗰班市民交返稅之後記得洗定pat pat。

罷課

睇睇下奧運,忽然見到以下一段新聞:-

教 協 稱 政 府 不 撤 國 民 教 育 　 積 極 考 慮 9 月 罷 課 
 2012-07-30 HKT 23:48

教 協 晚 上 召 開 常 務 會 議 ， 通 過 決 議 決 定 如 果 政 府 在 新 學 年 不 撤 回 國 民 教 育 ， 就 會 積 極 考 慮 在 9 月 罷 課 。

 教 協 理 事 方 景 樂 表 示 ， 要 以 強 而 有 力 的 方 式 向 政 府 施 壓 ， 現 階 段 很 難 評 估 會 有 多 少 學 校 參 與 ， 教 協 會 向 辦 學 團 體 、 校 長 會 等 ， 爭 取 支 持 罷 課 ， 他 不 擔 心 罷 課 反 應 不 佳 。

方 景 樂 表 示 ， 明 白 有 家 長 擔 心 罷 課 時 照 顧 小 朋 友 的 問 題 ， 亦 明 白 罷 課 會 損 害 學 生 學 習 的 權 利 ， 因 此 罷 課 一 定 要 得 到 家 長 及 學 生 認 同 。 至 於 罷 課 形 式 ， 例 如 學 生 是 否 需 要 回 校 或 罷 課 的 堂 數 ， 方 景 樂 表 示 未 有 定 案 。

方 景 樂 又 表 示 ， 會 要 求 所 有 教 授 德 育 及 國 民 教 育 的 教 師 簽 署 約 章 ， 拒 教 科 目 。

你地做教師嘅發起罷課,有無尊重過支持國民教育嘅一班家長與學生? 我當係7:3嘅學生或佢地老豆老母唔支持國民教育 (我認為眞實3:7都唔奇), 你7條友咪自行決定罷課囉! 你班教師發起罷課,咁剩返3個支持國民教育嘅學生無得學? 如果有間學校嘅所有學生或佢地老豆老母支持國民教育,個教師係咪仲堅持罷課,如果係,個教師走吧啦! 教協會要求所有教授德育及國民教育的教師簽署約章，拒教科目。 教協最多支持教師自己罷課決定! 依家係咪100%教師唔支持國民教育? 教協幾時變咗三合會?  作為教協,要求所有教授德育及國民教育的教師簽署約章，拒教科目,仲霸道過共產黨,真係恐共恐到short Q咗! 至於班反國民教育嘅家長呢.....如果今年名小如DBS & DGS 等小一入學面試,有以下一條問題:- 學校:「本校會根據政府指引,由小一開始推行國民教育,如貴子女獲本校取錄,閣下會否讓貴子女績極參與國民教育科?」 我幾乎百份百肯定所有參與面試家長會有以下答案:- 家長:「我地向來支持政府推行國民教育,如蒙貴校取錄,小兒/小女定必績極參與國民教育科!」

好文共賞 (二)

非常值得港人深思的一篇網上留言.........


作者:  洛克

我認為人對任何事物既判斷, 應該係用持平求實既態度進行獨立思考, 先係人類文明既表現,但多數人總是用自己既價值觀為好壞標準, 去判斷其他人既價值觀,如自己覺得國家唔好, 見到其他人唱好國家, 就等於被洗腦 ? 

有無諗過自己既價值觀, 都可能係被其他信息渠道洗出來 ?

事情無絕對好壞, 永遠係好中有壞, 壞中有好, 即使個人, 組織, 國家都是一樣,如果你係為下一代細路好, 唔單止係提供全面教育, 仲要多元化, 先可以培養出獨立思考既細路出來,唔係你自己覺得咩係好就係好, 世事沒有壞, 人係不知什麼是好,當你自以為是地認為教細路, 只應該教你認為係好既好, 那你只不過在進行另一套洗腦教育而已。

我細路果時係讀天主教學校, 日日都要被迫唱完歌, 先可以上堂, 又唔見我大個做左教徒 ?

係現在處於全球化, 網絡化的時代下, 單靠一門學科及幾本手冊就想達致洗腦效果, 根本就係笑話,只要接收多元化信息渠道越多, 人就越難被洗腦, 人就會懂得思考真偽,得閒上下天涯果D論壇睇, 佢地班人個個從小都接受國民教育, 咪一樣成日暗"小"毛煮直,連同胞都洗唔到, 你竟然怕港人會被幾本手冊洗腦 ?

其實港人似被傳媒霸權洗腦多D......

殺鱷三雄

話時話,ICAC依排咁興翻舊帳查貪,唔知幾時會查下97時,殺鱷三雄做乜唔乘勝追擊,無啦啦放生幾隻大鱷,之後仲夠膽死以英雄自居!


許英雄相信好快第一個入倉,都算係善惡到頭終有報。不過正所謂無三不成「幾」,如果有一日 貪英雄 同 白英雄 齊齊入倉,三條友喺倉入面再重敘,真係勁過以前電影嗰個「嘩英雄」同漫畫嗰個「華英雄」,仲唔即時成為國際笑話?


大部分無知嘅香港人叫咗呢三條友做殺鱷三雄足足15年,如果有一日突然知道呢三條友原來唔係乜嘢「殺鱷三雄」,係「賣港三蟲」先至真,唔知呢個真相係咪比李旺陽自殺更加難接受呢!

為反而反

一路以嚟,我都直指香港好多所謂民主派,真正身份其實係民主政棍嚟! 佢地只會抽政治油水,鮮有真心為民主政制或民生出力。 總之建制派叫好嘅,佢地為爭取選票,唔理三七廿一,反之而後快! 唔理件事對香港或市民好唔好,一定要「為反而反」!

咁點為之「為反而反」呢? 以下就一個實例:

長 者 促 盡 快 落 實 特 惠 生 果 金
　　(星島日報報道)民主黨及一批市民昨先後遊行到特首辦及新政府總部外請願，要求特首梁振英盡快落實特惠生果金政策，增至每月三千元，並待九月份立法會選舉完結後，召開特別財委會通過有關建議撥款，以及加快研究「港人港地」政策具體內容及推行時間表。

　　近百名長者昨聯同民主黨成員到特首辦門外請願，不滿勞工及福利局局長張建宗稱今年內難向長者派發特惠生果金，質疑梁振英違反選舉承諾，要求盡快落實政策。

　　他們又將紙飛機拋入特首辦，諷刺梁「放飛機」。民主黨立法會議員李永達建議政府在九月新一屆立法會誕生後，馬上召開特別財委會通過有關撥款，並設立追溯期，令六十五歲或以上長者毋須通過審查，最快於十月領取特惠生果金。

早幾日班政棍去擲飛機,諷刺梁「放飛機」,今日就話打尖,咁政府應該點去落實利民的政策呢? 李永達早幾日唔知程序,還是他的意見唔係代表該黨的?

梁促召特別財會批款 議員斥漠視程序
【明報專訊】特首梁振英昨宣布推出長者生活津貼計劃時，特地提出要求立法會在10月上旬召開特別財委會審批撥款。法律界議員吳靄儀狠批梁的建議漠視立法會 程序，認為先應待新一屆立法會上任後，再交出詳細報告書讓議員討論，而非要「財委會為他而開」，「唔該他尊重自己、尊重立法會」。

吳靄儀：唔該尊重自己 尊重立會

梁振英建議長者生活津貼的生效日期，定於財委會通過撥款當天，並表明政府會爭取立法會在10月上旬為之召開特別財委會審批。熟悉議會程序的吳靄儀對此表示反感，直指財委會不是「鍾意自己開就開，亦不一定要為梁振英而開」。

吳靄儀指出，審批撥款的建議應先在事務委員會討論，而立法會即將換屆，梁振英應在新議員上任後才遞交計劃書，讓議員仔細審議，「究竟個建議簡單定複雜、審查制度應該怎樣，這些都要詳細傾，不是你一開口要財委會審批就得。特首不可決定立法會的事，麻煩他尊重一下規矩」。

涂謹申：一上就上財會 開壞先例

民主黨涂謹申指出，因有關津貼建議涉及政策改變，按程序應先交事務委員會審議，若要在10月上旬通過趕不及召開事務委員會，亦至少應交內務委員會討論，「如果你一上就上財委會，將會開壞先例，因財委會不應討論政策問題」。

班民主政棍話明係反對派,佢地為咗貫切佢地反對派角色,就算政府點做得好,佢地都會從另一個角度去攻擊。總之就「為反而反」,要一直鬧爆CY,窮追猛打,就算CY推出措施係好的,都唔好放鬆鬧佢其他嘢,總之唔好比佢有好日子過。

大美國主義

美國人其實係好白痴的！

新聞話美國人唔滿意由Ralph Lauren 設計同出品呢套美國倫敦奧運代表團官方制服，理由係因為該等制服係 Made in China，唔專重美國製衣業，依家有班議員要求全部燒毀該批制服，重新係美國做過咁話。

真係痴線, 究竟啲美國人知唔知美國好多知名品牌不嬲都係Made in China 㗎!

你老美咁叻,夠姜以後叫各知名品牌唔好嚟中國生產啦!

 

 

振英文集

對於梁振英，好多人選擇日鬧夜鬧，總之佢做乜都鬧一餐，誓要未上台就要小到佢下台。但係佢又未正式施政喎，做又唔啱，唔做又錯，明知佢唔會下台，咁香港人究竟想佢點？

如今梁振英做特首已是既定事實，我個人就頃向放長雙眼睇下條友未來日子真心係幫香港人定係害香港人。

正所謂小人都要小得有根有據，我專登買咗呢本「振英文集」睇，內容大致由2008-2010年篇寫，日後佢施政同文章睇法有好大落差，就小到佢上天花板！

 

警訊系列 (二)

呢個盤明明坐落係「新界」將軍澳石角路, 究竟點解一開首會叫........「全城曯目, 香港東峻瀅」?

成條片不停影住「九龍東」及「香港東」嘅發展, 幾乎提都無提過「新界」!

盡攬「九龍東」及「港島東」雙核心優勢,即係點「攬」樣?

係咪即係話住咗係「新界」將軍澳,可以睇住人地「九龍東」及「香港東」發達?

究竟「香港東千億璀璨 」關「新界」將軍澳乜事呢?

最抵死嘅係片尾 (約1:42)  夠擔大大聲讀出 ..... 香港東....峻瀅.....The Beaumount.......個發展商究竟知唔知個「醜」字點寫?

如果有買家以為自己買咗「香港東峻瀅」,點知收樓先發覺原來自己買咗「新界樓」,究竟誰對誰錯?

警訊系列 (一)

大埔臨海豪宅天賦海灣，海景單位的地下層（ G/F）建在地面以下!

街外啲人可以由高處望落嚟，好似參觀動物園嘅動物咁,夠哂罕有兼有特色!

係窗口加番張"請勿餵食及拍打"咪得囉!

 

仆清光

上星期日「城市論壇」有個神秘人喺鏡頭前竟然自稱係「美國三藩市福清幫第二把交椅」。嚇到主持人即時以「我哋唔講黑社會嘢」為由，阻止該奇人發言。相信坐喺電視睇直播嘅人,應該都會「嘩!」一聲!

咁爆炸性嘅畫面,緊係即時喺網上瘋傳啦! 由於條友仔都幾似藝人「後庭瘋」,所以好多人叫呢位大佬做「維園後庭瘋」!

講真,呢位哥仔真係幾有明星相, 可惜當日大家都聽錯哂,佢原來唔係乜嘢黑社會大佬,只係好似啲明星最鐘意扮哂啱啱喺L....A.....返嚟,有啲英文口音咁......., 其實呢位「維園後庭瘋」係想話比大家知佢係美國「仆清光」第二把「膠椅」!



其實呢位「維園後庭瘋」係網上仲有幾段片,其中以下呢條就幾攪鬼, 呢次仲係自己額頭畫上「海虎」戰紋!

政治變色龍

前政務司司長陳方安生表示，周日的特首選舉是小圈子選舉，非公平公正，背後有中央透過中聯辦操控。她指，近日有人不斷游說選委支持梁振英。

陳方安生接受《華爾街日報》訪問時形容，梁振英是「變色龍」，擅於迴避問題。她又指，大部份港人對唐英年及梁振英都不滿，流選會更好。或許有更多有能力的人能參選，以維持一國兩制，及堅守香港核心價值。

 ***********************************************************************************  

呢隻陳老妖自己先係回歸以來變身最多嘅「變色龍」!

呢隻陳老妖都白痴, 話「周日的特首選舉是小圈子選舉，非公平公正，背後有中央透過中聯辦操控。」! 係未有真正確立雙普選之前,本身就係小圈子選舉,呢點係人所共知! 而只要係小圈子選舉,就肯中央會透過中聯辦或其他人去操控。老董係、貪曾係,呢屆點可能唔係? 難道有人會相信喺小圈子選舉之下, 鐡頭何或泛民政棍有機會當選嗎?

呢隻陳老妖當年同今日謊唐狗一樣,以為可以一世食住貪曾,點知最後比貪曾跑出,一怒之下變色做香港良心。 同謊唐狗日前突然大大聲話支持雙普選及為巿民知情權爆响口一樣。 

遲下隻謊唐狗可能又基因異變, 變成「香港雙普選之父」,日日為民請命,咬住隻鷹唔放,大叫:「你講大話,我要雙普選!」。

為乜? 咪好似啲小學雞咁, 我得唔到嘅,都唔想比你輕易得到咁囉! 最好就一拍兩散,正所謂「風吹雞蛋殼,財散人安樂」!

公信力

以下係一份自稱最有公信力嘅報紙嘅即時新聞:
*********************************************************************************** 

田北俊：相信唐英年言論

明報明報 – 22分前

自由黨榮譽主席田北俊表示，他與特首候選人唐英年相熟，所以相信他對另一候選人梁振英的言論。

唐英年較早時指出，梁振英在2003年七一遊行後的行政會議，為強推23條立法，稱本港始終有一次要出動防暴隊及催淚彈。

田北俊今早在電台節目中表示，行會與立法會不同，行會是可暢所欲言及提出問題，所以會談論很多東西。

他認為行會需保密，不認同公眾利益凌駕行政會議的保密制度。

他表示，他當年擔任行會成員，現已不記得發言，所以不評論當時情況。

他指出，前教統局局長李國章稱，能清楚記得梁振英當時沒說過防暴隊及催淚彈，是很厲害的。

（即時新聞）

***********************************************************************************

呢段新聞嘅標題係「田北俊：相信唐英年言論」, 即係話田少暗示隻鷹有講過「出動防暴隊和催淚彈對付反對23條的示威者」!

今朝咁啱揸車送阿囝返學時係車聽哂訪問田少個電台節目,馬沙聽到田少嘅意思係話佢地班勁人日日開咁Q多會,講過咁X多嘢,佢地無乜可能記得10年前開會時邊個人講過啲乜! 佢話自己最多只可以肯定自己有無講過邊一類說話, 人地有無講過,佢唔會記得! 

至於點解田少會話信謊唐狗,田少解釋佢同謊唐狗好熟,亦好了解謊唐狗為人! 相反,佢同隻鷹呢10幾年嚟只係喺行會見過面,行會以外從未見面,一點交情都無,對隻鷹為人豪不理解! 在這種情況,當然信老友謊唐狗的說話!

你胃零條三八問田少係咪即係只憑友情丶感覺,並無實則支持。田少佢自己都話係咁意思,都算係對朋友嘅實則支持! 意若自己老母係街市同人鬧交, 你一言、我一語,都唔知邊個啱、邊個錯,緊係信自己老母,唔通信個自己唔識嘅人乎!

馬沙個人覺得,目下只剩返以下呢份「太公報」 最有公信力:

無車用的日子

自上星期陪咗我4年隻老馬牌費、保險到期無續之後,正式開始咗無車用的日子。

呢兩星期最唔習慣嘅係朝早送大仔返學,平時慣咗由出門口到學校預15分鐘,依家至少要預30分鐘,撞啱無的士,仲分分鐘遲到!

細仔就叫做有啲得著,每朝送完阿哥返學,多咗好多機會行路,尤其係上一條幾長嘅樓梯, 第一次上完呢條幾長嘅樓梯仲腳仔軟,真係笑死我!

今日隻老馬終於比人揸走咗,目送佢駛離屋苑,有少少唔舍得!

大仔早兩星期知道隻老馬即將要離開我地時,好認真咁同我講佢好唔舍得隻老馬! 呢點我明,畢竟隻老馬幾乎係佢專車, 自佢1歲開始坐到依家。當中由未懂事坐喺BB car seat 呱呱叫, 到自己坐車頭跟住我接媽媽收工。又由K1 開始朝朝早坐返學到就嚟幼稚園畢業。今次應該係佢人生第一次學習乜嘢叫做「放低」!

其實人一生中確實會有好多人、事或物令人唔舍得, 但人一定要學習放手,今次就當幫佢上人生寶貴嘅一課!

人蠢無藥醫

古語有云:「人蠢無藥醫」,我由細到大都想信只要肯努力,即使蠢人都可以成功,不每日見到謊唐狗啲對答,我開始相信「人蠢無藥醫」呢句說話!

謊唐狗本身蠢都唔緊要,但唔明點解幫謊唐狗寫稿嘅政治文膽同謊唐狗一樣弱智,教謊唐狗日日公開對人咁講野.....

例子:

*******************************************************************************************************

唐 英 年 評 論 另 外 兩 名 候 選 人 時 說 ， 尊 重 何 俊 仁 做 人 有 原 則 ， 但 對 於 梁 振 英 ， 他 認 為 香 港 人 要 擔 心 ， 有 人 「 講 就 天 下 無 敵 ， 但 做 就 有 心 無 力 」 ， 例 如 「 八 萬 五 」 就 是 一 個 例 子 。

咁講野真係好肉酸，一日前先話選擇要重回正軌，第二日就開名攻擊人，仲要毫無理據，最後仲要用一把吊詭既聲線話：諗起都心寒!
我心諗：聽見你講d咁既就我就真係心寒！

*******************************************************************************************************

謊唐狗再批隻鷹欠經驗！

如果我係隻鷹，我一定大大方方承認曰：「冇錯！我不得不承認，對於飲紅酒、婚外情及僭建幾千呎地下行宮呢幾方面，我真係完全冇經驗！相信香港巿民會體諒，多謝!」。

 *******************************************************************************************************

啱啱睇新聞,記者追問隻謊唐狗私生子問題,記者迫狗跳牆,謊唐狗差啲自爆,最後記者問:「你係咪即係認有私生子?」
謊唐狗即刻好驚咁答:「我無講過!」 

其實呢個問題唔決絕地否認,咪即係黙認咗囉!

*******************************************************************************************************

最好笑係記者問謊唐狗:「你養嗰隻狗仔,之前出賣咗你,俾人知兩間屋係相通,狗狗現在點?」
條謊唐狗竟然對住電視答曰:「係呀,狗狗依家好L慘呀! 依家冇人再去探佢地......」

 聽到佢咁答,我真係忍唔住笑咗出聲.......

*******************************************************************************************************

記者問謊唐狗同地產商關係,隻謊唐狗無端端就話隻鷹嘅財產係由地產商得嚟,因為佢做測量,所以係勾結地產商。而佢自己係做廠，自己啲財產係揼石仔一啲一啲咁揼返嚟!

我淨係知人地隻鷹用自己努力賺取財富,打個江山返嚟! 而你只不過係一個蠢到無可藥救嘅二世祖嚟! 揼石仔? 佢係咪講緊間2千幾呎嘅地下行宮係揼石仔咁揼返嚟？

*******************************************************************************************************

忍咗好多日,打完! 舒服哂!

佣金「5折」！

呢排好多報章勁吹樓市正値小陽春,乜嘢一小時60台客搶住睇樓呀,呢道又話高價成交,嗰道又話創新高,事實又係點呢?

正所謂「事實勝於排便」,早兩日馬沙經過一間地產舗,見到門口呢個牌,真係睇到眼都凸,話哂呢個都係藍籌屋苑,所以停低影張相咁....

如果個巿真係咁好,點解會咁? 唔地產經紀有錢都唔想賺?

地產市道應該真係好差下，03年沙士時單邊免佣都要自己開口,玩到咁公開佣金「5折」,真係第一次見！

給兒子的信 (七)

親愛的德信:
 

很久已沒有寫信給你,記得上次寫信給你時,已經是2011年2月的事了!

一年時間眨眼間又過去,今年你已經升讀K3,亦是幼稚園的最後一年了。 過去一年, 讀書成績雖未見特出,不過尚算滿意,相信你只要再加努力,必有進步。其它方面的表現,為父相當滿意。為父今天再為你記下你過去一年的生活點滴, 作為你的回憶。

在自理能力方面, 你從未要為父擔心。今年最大的突破,相信是學識自己綁鞋帶吧! 正如為父早前跟你說過,只要學識自己綁鞋帶,好多靚靚波鞋等著你! 今年你正式擁有一對你愛不惜手的綁帶波鞋,而這對綁帶波鞋跟爸媽一樣,見證了你的成長!

讀書以外,因希望你能有一個快樂童年,為父及媽媽沒有為你再多選其它課外活動或學習班,依舊保留游泳及鋼琴兩個課外活動,相信短期內亦不會作出更改。

先記游泳,學了已經21個月, 上年學識自由式,今年已學識背泳及蛙泳。期望你來年能夠學識蝶泳,跟為父一起在海中樸蝶。不過都是嗰句,最緊要你學得開心就是了。

至於學鋼琴方面,原來進步可以這樣大。下星期日你會參加你人生第一次演奏,為父預祝你表演成功。琴試方面,一如既往,為父只希望你透過學習鋼琴, 段練你多一點兒耐性。除非鋼琴老師主動向我提出你已達到考試能力並希望你去考,否則為父不會向老師提出考琴試要求。

最後,為父希望你身體健康,永遠快樂!

父 - 馬沙字

2012年2月20日深夜

大廚出馬

今日冬至,好多家庭主婦要準備大茶飯!

馬沙雖然已成家立室8年,不過做節都係返老家,所以準備個肚返老家就得!

太座公司今日開聖誕 party, 每人要負責一樣食物,今年我就『認頭 』整沙律! 你地無睇錯,我亦都無寫錯, 『太座公司開聖誕 party, 我『認頭 』整沙律!」! 點解會咁,因為馬沙由細到大都鐘意整嘢食! 每年太座公司開聖誕 party, 對馬沙嚟講, 都係一次表演嘅機會嚟!

今朝專登比平時早一小時起床, 整咗呢盤嘢比太座帶返公司。

各位觀衆.........  大廚出馬...........

Char's Salad With Smoked Salmon & Parma Ham (Italian Dressing)

維園白痴仔

[林偉基 人肉錄音機......林偉基 人肉錄音機......林偉基 人肉錄音機......]

先此聲明,貼呢條片嘅目的唔係想講林偉基, 反而係想講下最後得3XX幾票嘅維園白痴仔!

呢個選區,如果無陳婉嫻,上面兩個二揀一, 維園白痴仔都唔駛旨意蠃, 點睇條維園白痴仔都唔似真心為該區市民做嘢啦! 啲行為仲衰過啲小學雞嘈交,唉........!

身為人父,帶住小朋友係街上遇到呢條維園白痴仔,真係要即刻運路走! 小朋友只要學咗佢一成以上行為,包保即刻「輸在起跑線」!

改圖真不該!

呢幾張好值得save起佢!

 

 

人不早抖枉英年!

香港版 The Good Wife

早幾日嗰隻好似低低地嘅唐狗先走出嚟,對住大庭廣衆,大大聲咁吠:『在選舉中難免有不同的傳聞及緋聞,版本很多,甚具娛樂性,但不會評論有關報道。』

果然,呢隻唐狗處事方式又真係好鬼富娛樂性! 明明辭職唔守政務司官邸門口,原因係想轉守特首官邸嘅門口,就係都唔認,吠曰:『要諗多幾日!』。諗諗諗......諗乜Q?

今日仲攪鬼, 發表聲明:『承認過去在個人感情上曾經有過缺失，但獲得太太的諒解，並且得到太太原諒。多謝大家關心。而唐太就在聲明說在私人感情上早已決心不再往後看，相信大家會諒解。』

首先,究竟乜嘢叫 『感情缺失』? 究竟唐狗曾經包二奶、婚外情、嫖妓定攪基呢? 唐狗你一日唔講清楚, 嚟緊買花生都買窮我!

其次,唔知唐狗太太係咪因為自9歲就識隻唐狗,且跟得隻唐狗太耐,攪到講嘢都好似隻唐狗一樣低低地。妳老公有負於妳,獲得妳諒解佢就得! 但關我地差事咩! 做乜又要大家諒解? 

頭先睇電視見到唐狗拖住唐狗太太出嚟,以為佢會解釋比大家知乜嘢叫做『感情缺失』。點知佢又吠曰:『份聲名乜Q都講哂啦! 無嘢再補充!』咁........。 之後仲好開心咁拖住唐狗太太返狗屋! 嗰一刻真係好似美劇『The Good Wife』開場一幕! 唔知唐狗太太返入狗屋有無好似Alicia 咁, 一大巴車落唐狗塊面到!

話時話,有傳聞話唐狗仲有隻『私生犬』跟尾! 明天放假,今晚都係要去買多幾包花生返屋企等睇戲 !