陰陽路

辭職走咗成年先收到佢嘅正式辭職信，公司班管理層究竟同呢位CEO係咪活在不同時空？

呢間上市公司主業做廣告媒體及開發電影業務，可能因為咁，公司班管理層都相當有創意！

根據其2014年6月27日發出的最新一份公司年報，高級管理層一欄清楚寫明「黃偉剛」先生於2014年3月獲委任為公司之行政總裁。即係話公司之核數師在2014年6月27號簽發核數報告前理應見過呢位新上任CEO!

咁靈異之處係乜呢？

根據公司於2015年4月1日所發出之公告，呢位公司新貴原來在上任未夠三個月即2014年5月21日已經跳船！即係話出年報之時，呢位CEO已經跳咗船，點解年報出之前無人知道CEO 已經離職，公司年報高級管理層一欄仲清楚寫明「黃偉剛」先生係公司之CEO呢？

最靈異之處係公司竟然夠膽死係2015年4月1日所發出之公告大大隻字話:「公司係其CEO跳咗船成年嘅2015年3月31日先收到佢嘅正式辭職信」，仲話未有在2014年5月公布佢跳船係「不經意所致」…..

上市公司CEO跳船咁大件事都可以「不經意」，你估請咗個信差返咗兩日工見辛苦粒聲唔出閃咗人咩？

辭職走咗成年先收到佢嘅正式辭職信，公司班管理層究竟同呢位CEO係咪活在不同時空？

呢個簡直係香港上市公司企業管治嘅經典！

(2015年4月29日刊於 全民媒體) 

癲倒是非

我理得會計師公會23個理事係親中定反共，三萬八千名會員都係專業人士，又唔係白痴，民調只需簡單叫會員在「支持袋住先」/「反對袋住先」中二擇其一，結果就必定相當清析。

嘩嘩嘩! 大家知唔知乜嘢叫癲倒事非呀? 尊貴嘅會計業界代表梁繼昌竟然用「會計師公會24個理事中，3個是官員、3個是政府委任，而四大會計師行代表亦較親政府」做理由，話政府逼他轉軚袋住先！

係討論之先，馬沙必須指出會計師公會理事會嘅組成。

根據《專業會計師條例》，公會理事會最多由23名成員組成，包括14名當選理事、上屆會長、2名增選理事、2名當然理事（即財政司司長或其代表，以 及庫務署署長或其代表），以及4名由香港特區行政長官委任的業外成員。 即係話，會計師公會理事會係絕對唔會出現梁繼昌所講有24個理事，因為23個已經係理事會成員組成嘅上限! 更加唔係尊貴嘅會計業界代表梁繼昌所講，理事中有3個是官員、3個是政府委任！正確應該係2名當然理事（即財政司司長或其代表，以及庫務署署長或其代 表），以及4名由香港特區行政長官委任的業外成員。

先唔講四大會計師行代表，尊貴嘅業界代表梁繼昌無理由唔知，會計師公會23個理事中常設2個當然理事及4個政府委任的業外成員之目的何在！在會計師 公會理事會中加入2個當然理事（財金官員）及4個政府委任的業外成員嘅目的，係提高會計專業的規管制度，使之公開、有效、具透明度及讓投資者有信心，而唔 係為咗幫政府在會計業界內進行拉票！

再講 ，馬沙個人認為，會計師公會如果不在業界代表投票之前，就政改進行最新一輪民調，聽取三萬八千名會員意向先係極之不負責任。而家會計師公會想聽取三萬八千名會員意見，反被業界代表指不是 ，真係唔知尊貴嘅業界代表梁繼昌乜嘢邏輯！

另外，我理得會計師公會23個理事係親中定反共，三萬八千名會員都係專業人士，又唔係白痴，民調只需簡單叫會員在「支持袋住先」/「反對袋住先」中 二擇其一，結果就必定相當清晰。如果真係有逾半甚至六、七成支持袋住先，尊貴嘅業界代表梁繼昌無理由唔投支持票，此乃順應民意，唔係叫轉軚！

相反，若果有逾半會員「反對袋住先」，我相信會計師公會三萬八千名會員 （包括我） 都相當樂意支持尊貴嘅業界代表梁繼昌就政改投下反對票，因為專業會計師都應該會尊重同業主流意見！

(2015年2月13日刊於 全民媒體)

為咗吹大個問題，可以去到幾盡？

成日話儲唔到首期嘅人, 就以上述家庭月入得$24,000為例, 買樓之前嘅一年,能否持續每月儲 $11,000? 如果得, 即係唔駛日日係到小狗「青年事務委員會主席陳振彬」話儲5、6年都儲唔到首期買樓, 因為月儲$11,000, 唔駛3年就夠首期9成按揭上車 (用$300萬計)!

今日睇咗一篇題為「港人不吃17年 方能置業」嘅文章，幾值得大家討論一下。

首先，文章內用家庭年入息中位數同樓價中位數去計算，家庭年入息中位數月入得嗰 $24,000，乜最盡可以買到樓價中位數$489萬嘅樓咩？

我先用會計同業瓜瓜今日am730「誰放棄了靑年」篇文入面個計法︰

『現在樓價高企，在新界買個二手上車盤，怎麼樣也要300萬元左右（但朋友說已經很難找了），假設向銀行借足九成按揭並加借按揭保險，而且購買的樓 宇樓齡不 太舊，還款期可以拖至最長30年期，以目前最優惠利率5.25厘減3.1厘計算（即是2.15厘），每月供款額大約要10,545元。可是，要成功取得按 揭，還需要通過金管局要求的壓力測試，即以現行利率加3厘計算，而每月供款額必須低於其每月入息的60%。按此計算，最低每月入息至少要25,443 元。』

依上述計法，家庭月入得$24,000 ，點買300萬樓，更枉論「港人不吃17年 方能置業」篇文章內用樓價中位數 $489萬嘅樓去計17年呢個低B答案！

如果有人家庭月入得 $24,000又夠膽死諗住去買 $489萬嘅樓，第日跌市燒炭都真係唔駛可憐！其實以一家2大1小家庭，如果月入得 $24,000，供 $300萬嘅上車盤都好辛苦！
馬沙今日再講以下一些絕少人提出o既現實問題︰

首期︰成日話儲唔到首期嘅人，就以上述家庭月入得$24,000為例，買樓之前嘅一年,能否持續每月儲 $11,000？如果得，即係唔駛日日係到小狗「青年事務委員會主席陳振彬」話儲5、6年都儲唔到首期買樓，因為月儲$11,000, 唔駛3年就夠首期9成按揭上車 （用$300萬計）！ 如果唔得，咁比你上咗車又如何？你點應付每月供樓$10,545條數？都未同你計每月差响、管理費、水電煤，呢啲每月$1,500坐底，即係每月供樓負擔至少要$12,000！

供款︰再諗落去，上咗車之後要供30年！ 家庭月入$24,000一個人揾定兩個人揾？ 若果一個人揾,，突然失業又點？好彩兩個人揾，突然其中一個失業，剩返嗰個份糧又頂唔頂得順？

利率︰ 瓜瓜條數係用2.15厘計，若果短期內加息5厘去到7.15厘，大家知唔知每月變咗要供幾多錢？答案係 $18,236！供完樓 ($24,000-$18,236) 得返$5,764, 再交埋差响、管理費、水電煤 ($5,764-$1,500) 得返$4,264, 日子應該點過自己問下自己！

樓價︰現在$300萬可以買到乜樓？私樓大約15-30年內舊樓，10年內半新樓唔駛諗。 呎數一般300-400建築呎 (實呎210-280)， 呢類單位買咗要你住一世，你接唔接受？ 生小朋友又夠唔夠住？ 唔好同我講之後upgrade 換樓，即使你買完樓價無再升，upgrade 換樓樓價每多一百萬你人工要加$9,430 先合乎按揭標準。 若果你買完樓一個唔好彩，再次發生樓劫樓價跌3成即係你即時負資產$60萬，如果樓價再次跌5成即係你即時負資產$120萬！唔供樓要破產，跌5成死供等 樓價升返上$300萬即係樓價要升一倍，咁你應該要住一世無得upgrade！

有網友問︰「馬沙，你未計買樓前要租樓呢。」, 老實講，我睇唔到點解想儲首期嘅人，會嘥錢走去租樓而唔係同屋企人住。我識得又靠自己買到樓嘅人，差不多全部買樓前都係同企人住。 唔好同我講乜鬼屋企唔夠地方住呀，同屋企人唔啱呀，呢啲係abnormal case！

又有網友問︰「之前有個印度佬同我講…..任何時候都係買樓時候…」。 無錯，誠哥之前幾年都係咁講 (值得注意係誠哥今次已經無再講），我都好認同，只不過呢個講法只適用於有足夠實力嘅人！ 咁點為之有足夠實力嘅人？

馬沙個人認為，俾足至少三成 （最好四成） 首期，按揭只做15年，每月供款佔家庭入息3成！點解？即使二人當中有一人失業家庭入息少一半，剩返嗰半供完樓仲有原本家庭入息2成頂住。二人當中有一人 長期失業或轉做家庭主婦，剩返嗰半頂唔順，可以加長按揭年期至20年。 再唔好彩遇上加息周期，仲可以加長按揭年期最長至30年或増加按揭成數最高至9成！如此，即使第日樓價大跌5成，呢類人好難同負資產拉上關係，更枉論破 產、燒炭！

(2015年1月22日刊於 全民媒體)

佔中被捕真係可以「慳稅」四成?

尋日明報有一篇題為「佔中被捕「慳稅」四成」嘅報導，馬沙作為資深流氓會計師，當然要認真了解一下點解佔中被捕，即係走去犯法被捕，竟然可以「慳稅」四成咁正!

尋日喺明報網站，見到一篇題為「佔中被捕「慳稅」四成」嘅報導，馬沙作為資深流氓會計師，當然要認真了解一下點解佔中被捕，即係走去犯法被捕，竟然可以「慳稅」四成咁正!

睇完篇文，真係「唔識嘅就開心死、識嘅就笑Q死」! 首先，有乜嘢證明報導中嗰位得到稅務局批准暫緩繳付薪俸稅嘅申請理由 (其實正確應該係叫緩繳 2014/15 暫繳薪俸稅 Provisional Salaries Tax held over 先啱) ， 真係用 「曾參與佔領而被警方拘捕，可能會遭到刑事檢控而被僱主開除，喺收入有可能受影響下，要求稅務局重新評稅。」?

明報有無查證過嗰位申請人嘅申請信稅局吸收副本? 人講明報就信?

稅務局回覆話基於《稅務條例》嘅規定，唔方便評論個別個案。既然稅局唔方便講，就由我呢位流氓會計師講下。根據《稅務條例》，在一般情況下，要申請 「緩繳暫繳薪俸稅」，申請人係需要在申請書內清楚填寫整個課稅年度估計入息的數額，而該估計入息的數額要少於或可能會少於前一年度的應課稅入息實額的90 %，又或少於或可能會少於暫繳稅課稅年度估計入息的90%! 單係用「曾參與佔領而被警方拘捕，可能會遭到刑事檢控而被僱主開除，喺收入有可能受影響下，要求稅務局重新評稅」呢個理由，似乎唔係事實之全部！

下次唔該明報記者Emily専業一啲，即使「緩繳暫繳薪俸稅」申請獲得稅局接納,該納稅人只係申請「緩繳暫繳薪俸稅」，即係只針對預繳稅呢部份，而課稅年度2013/14嘅已評定稅款係絕不會減，因此稅局「重估」呢個行為根本不存在。

而成篇文最誤導無知市民嘅，係大字標題用「慳稅」二字，仲要「慳稅」四成咁Q多! 你依家只不過係向稅局申請唔交預繳稅獲得稅局接納而已，唔係向稅局申請免稅或扣減成功，你今年 (課稅年度2013/14) 嘅稅款一毫子都無減過， 下年（課稅年度2014/15） 嘅稅款亦一樣一毫子都無得減， 何來「慳稅」四成? 一個唔好彩，如果下年 （課稅年度2014/15） 即1/4/2014 – 31/3/2015間， 最後應課稅入息實額高過今年呢， 仲分分鐘比稅局罸錢！

今次寫呢篇文嘅目的，純粹係希望點化下對稅務毫無認識嘅無知市民，尤其係嗰班誤信佔中被捕竟然可以「慳稅四成」嘅佔中被捕者。千期咪咁輕易信人，以為曾經被警方拘捕，今年真係可以「慳稅四成」咁爽！

 (2015年1月8日刊於 全民媒體) 

鴨場呻吟

呢個所謂「信託安排」究竟應該叫「財技」，還是「語言偽術」? 《鴨場呻吟》三名發起人係咪真係再沒有人實質擁有公司權益?

《豬場》隻豬死士因恐懼、誤判而停止呻吟，繼而龜縮。豬死士今日正式交棒比《鴨場》隻鴨，讓隻鴨再度在《鴨場呻吟》!

隻鴨: 「我行山，因為我恐懼，我行完山返嚟啦!」

喂!喂!喂!  《鴨場呻吟》第一日就刪人留言，你今日恐懼完未?

『《鴨場呻吟》以「立場」為名，敢於宣示立場，不掩飾，不迴避。「鴨場」堅持報道真相，不因立場而扭曲事實。』。咁幾時先不掩飾，不迴避，不因立場而扭曲事實咁報道《豬場呻吟》所謂「非正常死亡」真相?

 

『《鴨場呻吟》與《豬場呻吟》最大的分別，是再沒有人實質擁有公司權益。為了確保《鴨場呻吟》不受任何個人控制，可以持續發展，《鴨場呻吟》三名發 起人通 過信託安排，放棄股權的經濟利益和處置股份的權利；信託安排將長期持有《鴨場呻吟》股權，《鴨場呻吟》發起人沒有轉讓公司股份的能力。』

1) 用咗「信託安排」就真係不受任何個人控制?
2) 用咗「信託安排」就真係放棄股權的經濟利益和處置股份的權利?
3) 邊個係「信託安排」管理人 (Administrator)?
4) 邊個係「信託安排」受益人 (Beneficiary)?
5) 管理人真的沒有轉讓公司股份的能力?
6) 呢個所謂「信託安排」究竟應該叫「財技」,還是「語言偽術」?

諗起《新雄雞》「覺得勝」為了確保《新雄雞》不受任何個人控制，可以持續發展，《新雄雞》發起人「覺得勝」通過信託安排長期持有《新雄雞》股權， 《新雄 雞》「打死不離三兄弟」沒有轉讓公司股份的能力。但事實《新雄雞》「打死不離三兄弟」係咪真係再沒有人實質擁有公司權益?

 (2014年12月23日刊於 全民媒體) 

一星期女友 (五）

當我返到香港，好快又變回那個只愛一個人在辦公室留守至深夜，跟一大堆數字談談情、說說愛嘅流氓會計師。

一覺瞓醒，係清晨七點。Queenie 仍在安睡，我換件衫寫低張字條，一個人走到酒店附近一間咖啡館飲咖啡。

唔經唔覺，來了台灣已經五日。係呢五日，感覺相當relax。第一，很久沒有放下工作，在香港每日朝八半夜兩、三點，幾乎沒有了自己。第二，當然係Queenie 呢位識咗5日嘅女朋友。好老實咁講，同Queenie 一齊呢五日，真係令我身心都回到30歲嘅感覺。

平靜下來時，都係時候想一想到底回港前，點樣處理同Queenie 呢一段關係。照例同4x年好兄弟Michael 及 Gabriel 討論一下。

Gabriel 嘅意見係 keep住聯絡，得閒就飛過嚟台灣搵下Queenie，食得唔好嘥！Gabriel 一向嘅強項係癲倒是非黑白，在工作上面，Gabriel 的確俾咗好多出人意表嘅意見，協助我打勝一場又一場嘅仗。今次佢嘅意見一樣咁特別，佢仲叫我改機票留多幾日。雖然我真係有咁諗過，但我尚且還有一點理智。 我仲記得我離港當日已經置tax deadline於不顧，如今tax deadline已過，相信公司已經有十幾個files正等著我返去。若果我再唔返去處理，客戶一旦收到税局罰款，分分鐘客都無埋。

而Michael 嘅意見當然一如往日，同Gabriel 持相反睇法，Michael 認為，呢段只不過係一段霧水情緣，無必要為咗一個只係識咗五日嘅女仔，而去改變整個人生規劃。當我返到香港，好快又變回那個只愛一個人在辦公室留守至深 夜，跟一大堆數字談談情、說說愛嘅流氓會計師。況且，呢個台灣之旅，本來就係為咗出席Krystal 婚宴，無必要節外生枝。Michael 最後仲問咗我一個問題，若果今次不是為咗Krystal，到底你會唔會放假離港？你呢隻工作狂點有可能得閒就飛過去搵人，你根本永遠都唔得閒………。 Michael 真係好似我心裡面一條蟲，清楚知道平日約我係要即興先迫到我出嚟。

Gabriel 眼見自己即將再輸比Michael 一仗，努力繼續游說，佢話難得識到Queenie 呢個咁靚又咁可愛嘅台妹，又睇得出Queenie 對我係真心，無理由輕易就放棄。

話就係咁講，但問題係Queenie 當初只係話陪我渡過呢個台灣之旅，咁多日嚟都無向我明示或暗示之後會點。我地三個大男人討論咗成朝，究竟會唔會諗多咗？

都係嗱嗱聲埋單返酒店搵Queenie，今日仲要趕火車返台北。

 (2014年12月22日刊於 全民媒體) 

聽話

女人認為「愛我就要聽我話、愛我就不做未經我批准的事!」

可惜男人卻是天生不愛被管的動物!

放過我

幾日前有一晚,女人在電視看見有鳩嗚人士被扑濕,於是向另一半提出:「我地一齊去鳩嗚!」

男人:「算了吧! 今天工作很累,放過班黑警吧!」

其實男人想說的是「妳放過我」啦 ............

道別

雙手接過 Grace 兩張餅卡, 輕輕回應:「Grace ,多謝妳! 祝妳新婚生活愉快!」

我親自送 Grace 到公司大門口, 握下手講一咗聲再見, 心裡暗嘆: 「係我無福氣, 一個咁幫得手嘅員工, 就咁比個新郎哥搶走咗!」

會計界福祉誰負責

好多會計師成日話會計界立法會梁繼昌議員，成日唔理會計界嘅事，不為會計界出一分力，為會計界謀福祉！

我認為大家一直錯怪梁議員，其實會計界立法會議員嘅職能同其他直選議員一樣，首要工作係參與立法會立法工作、出席立法會各類咨詢會議及監察政府施政。

會計界嘅福祉唔係會計界立法會議員負責，理論上係由會計師公會去爭取！公會攪唔掂先搵議員幫下手，同市民有事攪唔掂搵議員幫手一樣。只不過會計界咁啱有個功能組別議員而已。

相對地，立法會議員係應該相信法治精神，有責任維護法治，不應鼓勵甚至參與任何違反法治的言論或活動或所謂公民抗命！

試問不相信法治或不守法的人，有何資格參與立法工作？

做兵

有人話做兵苦!

原來最痛苦的還不是做一隻兵,而是女神漸漸不太回應你呢一隻兵,即係你連隻兵都做不成!

一星期女友 (四）

Queenie:「你知道嗎，其實出火最有趣的玩法，就是要在黑黑的環境四處找洞洞，然後插入去，之後「嘿咻」一聲咁噴哂出嚟，真的超爽耶！」

終於等到第二朝，熱切期待Queenie 帶我去出火。

走落酒店coffee shop 嗱嗱聲食個早餐，差不多食完，就見到Queenie 嚟到，Queenie 今日一身背心熱褲，對腳長到呢……又令我不自覺地諗起佢尋日沖涼嘅情景………

Queenie:「Tony，昨天休息夠嗎？」
馬沙：「成晚瞓唔著，成晚想住妳!」
Queenie: 「你真識說謊耶！」
馬沙：「沒騙妳，成晚想住妳洗澡時向我揮手時妸娜多姿啲模樣！」
Queenie: 「Tony 你好衰耶！」
馬沙：「昨晚妳說今天帶我去邊？」
Queenie:「帶你去出火耶，巧不巧？」
馬沙：「好！當然巧！」

Queenie 帶咗我去坐火車，佢話要坐成3個鐘，我心諗去出火駛唔駛去咁Q遠呀？不過既然有美相伴，仲係去出火，遠啲都無所謂啦。

Queenie:「Tony，你有沒有去過出火？」
馬沙：「沒有！從來沒有！」
Queenie:「你知道嗎，其實出火最有趣的玩法，就是要在黑黑的環境四處找洞洞，然後插入去，之後「嘿咻」一聲咁噴哂出嚟，真的超爽耶！」
馬沙：「妳説話倒真的直接！」
Queenie:「呵呵，這才叫出火嘛！」

搭咗唔知幾耐車，終於到埗。一落車，我終於明白Queenie 所謂出火係乜嘢意思！我內心按耐不住，講咗@#%*# 十連發！原來Queenie 所講嘅出火係一個叫「出火」嘅旅遊景點，而唔係我所諗嗰樣。呢次真係瘀爆，如果比Gabriel 知道一定日日比佢係我耳邊笑Q我。

Queenie 好鬼開心拖住我去買咗好多爆米花、沖天炮就入去玩。不過Queenie 話其實最好玩係周圍搵凹陷的洞洞，然後試下點火，會有「轟」一聲冒出火來……… 。其實唔駛點火，我已經無名火起三十萬丈。不過既然一場嚟到，the show must go on! 我唯有即刻調整心情，投入呢個出火之旅。

玩到咁上下，Queenie 大概見我個樣怪怪，就問…

Queenie:「這裡不好玩嗎？」
馬沙：「幾有趣。只是…」
Queenie: 「只是什麼？Tony你快説噢！」
馬沙：「妳知道在香港，出火是什麼意思嗎？」
Queenie:「不知噢！快說！」

於是我係Queenie 耳邊細細聲咁講比佢聽， Queenie 聽完之後臉都紅哂咁係我耳邊講咗句：「Tony 你好衰耶！」。

說實話，出火呢個地方其實幾特別，尤其入夜之後，大家去開台灣可以去玩下。不過點去就唔好問我，因為我到今日都唔Q知出火係邊，只知出火離台北好Q遠。正正因為咁，當晚離開出火嘅旅遊景點之後，己經無乜可能返到台北酒店，唯有係附近求其搵間酒店過一晚。

今次呢間酒店個浴室正常過正常，出咗成身汗嘅我第一時間走去沖涼。正當我享受緊淋浴時，浴屏突然被打開。Queenie 失驚無神走咗入嚟從後攬住咗我，並在我耳邊佻皮地問我：「港式出火比較好玩吧…….」。

(2014年11月24日刊於 全民媒體)  

男人大忌

男人大忌，被所愛的女人看不起!

矛盾

每個男人，其實都是各項優點及缺點集於一身的混合怪胎

女人之所以還是單身，是因為她們的愛情世界裏，理想與現實之間存在著好大矛盾。女人希望男人付出無條件嘅愛，之但係男人叫女人無條件咁愛人呢？No way！

究竟呢個宇宙有冇無條件嘅愛呢？

有！當然有！之但係當一段關係未開始，將無條件嘅愛設定成擇偶條件之一，那就正正將整個關係變成有條件。

女人另一個令其長期單身嘅地方係口是心非！口裏說擇偶無乜要求，身體卻非常誠實。一般說不介意男人是否富有，只求五官端正又不比自己矮小就是，但現實去結識男人時卻往往嫌三嫌四。

當男人搵錢不及別人多時，她不會跟搵得最少的去比較。當發現搵得最少的好有情趣，她就嫌搵得較多的男人不夠情趣。女人喜愛將各人最好的優點併合在一起，放在擇偶一事上，要目標男人一個打十個，鬥贏所有人。

只可惜每個男人，其實都是各項優點及缺點集於一身的混合怪胎，呢一點女人未真正試過、失去過，未必能夠明白。

大多數女人其實唔知道自己想要乜，但骨子裡非常介意人地點睇自己，於是生出雙重標準，對身邊男人只有要求，卻欠缺咗一份發自內心對男人嘅欣賞及感謝。

對於男人，妳要試過、愛過，到妳發掘出男人嘅錯誤、缺點時，若果妳仍然愛著這個男人，那就是真愛。

先放下矛盾，才有可能找到另一半。好男人其實唔多，仲買少見少！

 (2014年11月14日刊於 全民媒體)  

一星期女友 (三）

做咗咁多年人，雖然我唔係第一次睇一個美女沖涼，但此情此景，相信係男人都應該估到我當時嘅反應。無錯，當時我係著住一套踢死兔，企係浴室玻璃牆前，對住Queenie 立正升旗敬禮，個腦仲不其然奏起國歌…..「起來….起來…起來…… 」。

在這個無乜香港人識嘅小人國，除咗公園，還有機動遊戲遊樂場。我同Queenie 就好似返老還童，不斷地排隊玩那些看似好低能嘅機動遊戲如旋轉木馬。我必須承認，有Queenie 呢個女朋友在一起，和我原先諗住一條友周街行的確有顯著嘅分別。

常言道，快樂不知時日過。眨眼間已經到咗4點，因為要去飲Krystal 嗰餐喜宴，雖然Queenie 話想玩多一次旋轉木馬，因為要先回酒店換過飲樣，只好趕去搭公車返酒店。在公車上，Queenie 大概玩咗一日見攰，上車無耐就依偎著我睡著了。呢個時候，我終於可以細心欣賞Queenie 面容，「好靚」呢兩個字不其然在我心底裏說出來。我望住Queenie 10分鐘，終於按耐不住在Queenie 額上輕吻咗一下。大約個多小時車程，我將Queenie 緊緊抱在懷中。

回到酒店樓下，本來諗住Queenie 會自行離開，點知Queenie 話因為在公車上睡著了，堅持要上酒店陪我多一陣，直至我離開酒店去參加婚宴。係咁嘅情況，邊有男人會say “NO”。上到酒店，由於已近晚上6點，我好快咁沖咗個涼，之後拎出禮服準備裝身。

正當我忙於裝身冇時間理會Queenie 時，Queenie 忽然同我講…

Queenie:「我可以在這裡洗個澡嘛？」
馬沙：「妳請隨便吧！」
Queenie 笑住講：「那我不客氣啦！」
馬沙：「別客氣！別客氣！」


我掛住裝身，本來都無乜點理會Queenie，但當我換完套禮服之後，先至醒起我酒店個浴室係用透明玻璃做牆。換句話講，我係可以淸淸楚楚咁望到正在沐浴嘅Queenie，呢一點Queenie 無理由唔知！

死火！咁即係話頭先我沖涼時，Queenie 同樣已經睇過我全相？為咗公平起見，我下意識向浴室一望，果然清楚見到Queenie 正在享受淋浴中。做咗咁多年人，雖然我唔係第一次睇一個美女沖涼，但此情此景，相信係男人都應該估到我當時嘅反應。無錯，當時我係著住一套踢死兔，企係浴 室玻璃牆前，對住Queenie 立正升旗敬禮，個腦仲不其然奏起國歌…..「起來….起來…起來…… 」。

正當我兩兄弟興高彩烈唱緊國歌時，Queenie 突然發現我望住佢，我本來以為Queenie 會比我嚇到大叫，點知佢竟然臉帶笑容同我揮手。比著係你，有個好似《明珠生活》主持張曦雯咁索嘅靚女，一絲不掛咁笑住向你揮手，你會有乜反應？大概應該會 即刻跳去國歌最後一句……「前進…前進…前進….進…..」吧！

好可惜，我又再一次讓大家失望。我當時嘅反應係嚇到走回房間一角坐下，靜靜地等Queenie 沖完涼著返衫出嚟。之後我地就離開酒店，Queenie 自行回家，而我就自己一個人去飲。成個婚宴發生過乜我毫無印象，因為成餐飯我腦海不斷浮現Queenie 剛才笑住同我揮手嗰一幕。今天回想返當日情境，我必須承認，我當日之所以有咁嘅反應，絕對係因為「我恐懼、我錯判、我愧疚！」。


飲宴完咗即回酒店，臨瞓前收到Queenie WhatsApp，內容如下：

「沙，好想你噢！今晚早點休息，明天我帶你去出火 ^_^」。

出火咁激？唔L係掛！收完Queenie 呢個WhatsApp，更加成晚瞓唔著…….。張曦雯話帶你去出火喎，點瞓得著呀大佬！

 (2014年11月12日刊於 全民媒體) 

為何如此對待你

你明明真誠對待女神，關心女神，沒有心懷不軌。女神叫你出現就出現，叫你消失就立即消失，但被遣棄的總是你、被欺騙的總是你。最後落得流淚收場、落得孤立無援。你真的很想知道……「WHY ME?」

你從此不再對別人好，以為咁就變得成熟。其實你這樣一點也不成熟，只是不珍惜自己嘅優點。你嘅問題只是不幸遇上港女，呢個係際遇問題，是你倒霉，遇上女神甘做兵，但這個跟你的人格沒有丁點兒關係。

她港女是她的問題，如果你因為她港女而改變自己做人嘅態度或對女性嘅睇法，那就是你嘅問題，被港女影響才叫不值得。你有權選擇不做兵，只有不再做兵才能證明你是個真男人。
你的真正價值，是你自己給自己的，由兵仔升級至男朋友，從來都是為了自己。

寧做光棍莫做兵.......

 (2014年11月11日刊於 全民媒體) 

一星期女友 （二）

返到酒店，我思想開始有點凌亂。一個咁索嘅台妹，為什麼會看上我？我當然不會天真到以為自己真係好似賤輝咁有型，於是我即刻換上跑步鞋，落街跑步，試圖讓自己腦袋清醒一下，正所謂跑步出哲學。  

結果 …………. 係我諗多咗。當到達Queenie 家門前，Queenie 只笑著對我説了一聲謝謝。大概昨晚不尋常嘅表現，係受到酒精影響。

正當我帶一點點失望之際，Queenie 忽然問我明天有沒有約，我答她除了明晚要出席朋友婚宴外，打後幾天都沒有特別約會。Queenie 就問我需不需要一個可愛女朋友陪著渡過餘下的台灣之旅？

我對於Queenie 呢個突如其來嘅提問，真的不知如何是好。如果身在香港遇上呢種情況，Gabriel 一定叫力勸我去馬。正當Gabriel 啲PK 思想在佔領我我腦海的中環時，Queenie 已經先開聲說：「給你一個小女友不好嗎？」。就由這一刻開始就讓我當你幾天的小女友吧，明天9點在你的酒店lobby 等你。Queenie 講完隨即給我一個goodbye kiss ，輕步返回住所。

我雖然不是什麼情場浪子，食女無數，但自18歲起跟佐敦儍豹由廟街蒲起，再殺落中環老蘭，行走夜場廿年，都可謂閱女無數，贏得流氓會計師之名。但好似Queenie 呢種既靚又帶點清純嘅台妹，馬沙都係第一次遇到。

返到酒店，我思想開始有點凌亂。一個咁索嘅台妹，為什麼會看上我？我當然不會天真到以為自己真係好似賤輝咁有型，於是我即刻換上跑步鞋，落街跑步，試圖讓自己腦袋清醒一下，正所謂跑步出哲學。

經常有年近40嘅剩男/剩女朋友同我講，要在香港這片土地，搵到真愛好鬼死難。在我看來，如果你好似班民主鬥士咁，要一步到位，死都唔會袋住先，咁 你好有可能呢世都遇唔到你嘅Mr./Ms. Right, 更慘嘅係等足成世人都係得個等字！正因如此，與其「等 • 一個人 • 出現」，我個人一向主張「食住先」！因為你唔食住先，點確認對方係咪自己嘅Mr./Ms. Right？ 之但係食還食，做人點都要有點格調，「寧缺莫濫」係我馬沙做人嘅宗旨。

第二朝一早，Queenie 果然準時喺酒店大堂等我。呢次係我第一次在大白天見到Queenie 真身，原來白天化淡妝嘅Queenie，比夜晩化得比較濃妝嘅Queenie 更加青春可人。

 Queenie 帶我食完地到牛肉麵做早餐之後，就帶咗我去一個叫小人國嘅地方。我地係公園入面慢步，Queenie 忽然拖住我隻手，我忍唔住我嘅好奇心，問咗Queenie 以下問題：

馬沙：「你明知我只會在台北一星期，為什麼要做我女朋友？」

Queenie:「因為我未試過同香港男生交往，加上你係我杯咖啡耶…..」

馬沙：「你不怕我是壞人嗎？」

Queenie:「我覺得你不是一個絕望嘅男人！」

Queenie 跟住同我講，好多好男人在女人眼中找不到吸引力，就是因為太認真。如果男人在一段感情開始時就本着「我對你好認真，非你不娶」嘅心態，就會令女人感覺受到 脅迫，萬一有日發覺性格不合提出分手，這類男人分分鐘接受不了去尋死或傷害女人。所以Queenie 話情願獨身，也不要一個絕望嘅男人。Queenie 所講嘅理論，我其實唔係太明。

馬沙：「不要男人對妳認真，不是很奇怪嗎？」

Queenie:「你要是對我認真，我怎會感受不到。你若夠好，我怎會捨得不要你。所以認真與否，是不需要說岀口噢！」

老實講，對住呢個既特別、又靚嘅台妹，我開始有少許心動 ………..

 (2014年10月29日刊於 全民媒體) 

荒謬都市

佔中已經踏入第三個星期，好多支持佔中嘅人，尤其係一班有學識嘅中產，特別喜歡指責反佔中人士反佔中係為咗搵錢、為咗保持同國內做生意而唔肯支持佔中！馬沙在會計界，甚至比一眾支持佔中嘅會計師老屈，搖身一變，成為冷血、涼薄、為錢而盲撑中共嘅五毛！

正如上一篇文所講，依家香港社會已經變成非黑即白，正所謂夏蟲不可語冰，同班自命有高尚情操嘅佔中友講多都嘥氣。本來都唔想多作回應，不過睇完上周警務處前高級助理處長鄧厚江上TBB講清講楚嘅訪問，即刻覺得有必要寫返篇文。因為鄧Sir 完全講出一班反佔中人士嘅心聲。

鄧Sir 一開始就指出，依家佔中嘅現象好唔正常，有啲荒旦，甚至荒謬！其理由有三：-
（1）點解有啲大學教法律嘅學者，會呼籲啲市民走去違法；
（2）點解其中一部分負責立法嘅立法會議員，要求警方唔好執法；
（3）點解一啲本身違法嘅示威者會要求警方保護佢地繼續去違法示威。

以上三點，在一向以法治為核心價值嘅香港，根本就係一連串荒謬嘅事情！如果社會各界唔好好反省、反思依家呢種利用感性去代替理性嘅思考方式，未來將會見到更加多荒謬嘅事。

若果你說要公民抗命，只要唔影響到其他市民，我個人絕對唔會反對。但當你影響到其他市民，呢個就非常之可笑。何解要犠牲某一社群嘅利益，去達成你班 友嘅政治理念？你地要記住，你地並不代表所有香港人，至少不代表我！如果佔中人士因為某種政治原因可以抗命，咁究竟以邊條粉腸嘅標準作為將來行動嘅根據 呢？

講咗不知幾多次，依家佔中人士明明犯法霸佔路面。如果你班友唔需要警方保護，咁就請隨便啦。但當你班佔中人士需要警方保護，而你班友佔中根本係一個 違法嘅行為的話，依個就正正係今日香港社會荒謬嘅地方。當社會各人有不同理念，今次你可以抗命，聽日佢都可以抗命，咁法治基礎究竟係邊到？

鄧Sir 特別提到一個社會觀點，點解要你啲學者控制社會嘅發展，點解黑社會就唔可以走嚟控制社會嘅發展，反正大家都在用犯法方式去爭取社會嘅發展方向！依家攪到社 會各界無止境嘅爭論，以往用咁多時間去發展出嚟嘅法治精神，香港最重要嘅基石，就咁樣就沖散咗，大家係咪好開心？

其實公民抗命只不過係美化咗嘅犯法行為，所謂「和平佔中」，亦都係美化咗嘅犯法行為，警察唔係睇你班友美唔美化，而係睇你犯唔犯法。「和平佔中」即 使幾和平都好 (而依家事實擺在眼前一啲都唔和平)，係咪理性合法呢？包裝係點樣都好，但需要獨立思考。因為你拆開咗包裝紙之後，要明白裡面嘅含意係乜，唔好因為包裝美 麗，買返屋企之後先發覺連累了自己和整個社群。

有人不斷以佔中係和平非暴力去申辯，要知道好多犯法嘅事係唔需要暴力。鄧Sir就舉出一個例子，訛騙案從來無使用暴力，咁係咪唔用暴力嘅案件，警察以後都唔好執法呢？

最後，鄧Sir 提出兩個值得大家反思嘅問題：-
（1）我地希望個社會係守法嘅社會，定係依據某一啲人自己嘅意願去決定，社會係應該守法定不守法？
（2）我地更加要想一想，警察要因政治因素不執法，還是不理政治因素嚴格執法？

至於星期六有個自稱住係蘭開夏道嘅女作家王迪詩係其専欄話「有些人認為民主不重要，自由不重要，重要的是有錢賺。在這些人眼中，香港的核心價值就是「搵 食」，跟一頭狗的核心價值沒有分別。」，阿王大作家妳知否絕大部分唔支持佔中嘅人核心價值唔係「揾食」，唔支持佔中亦不代表佢地認為民主不重要，自由不重 要，佢地唔支持佔中只係要守護香港法治精神呢個核心價值。不過，即使有人掛住搵錢又點，人地靠雙手努力賺錢養活妻兒，妳憑乜話人係一頭狗？在我看來，妳自 己先跟一頭為取悅讀者而狗口沒有長出象牙嘅Bull Terrier沒有兩樣！話時話，講到自己咁支持佔中，又唔覺妳呢隻經常著住Jimmy Choo 嘅Bull Terrier係佔中現場出現？快啲同妳啲讀者落去佔中現場影返張相啦，散咗場就補唔到飛！

(2014年10月21日刊於 全民媒體)

傲慢與偏見

唔知點解，香港人回歸以來，學問本來應該顯著提高咗，但係思想就好似退化咗好多咁，有些人直情智力低於猿猴。點解咁講？例如當一件錯綜復雜嘅事發生，為何往往只係一方錯哂，責任點解得一方要負責？雙方都有錯、雙方都要負啲責唔得咩？

點解永遠唔係「黑」、就係「白」？呢類人係咪讀書時參加辯論比賽太多，攪到個腦只能單向活動。在議論社會每件事時，一開始就要選定企埋一邊，㨂咗「正方」之後就點都要同「反方」的人對著幹？

其實呢個世界好Q複雜，好多事點會只得「對」同「錯」咁簡單？「對」與「錯」之間可以係「對中有錯」、「錯中有對」同「唔Q知」。係呀，當一個人肯認自己無知時，批判一件事嘅時候就會唔怕人笑咁話比人知你「唔Q知」誰對誰錯！

就好似呢個星期佔中單嘢，傳媒、facebook 主流意見緊係狂鬧警察係暴力對待人民！你問我點睇？我其實支持警察執法，因為佔中確實犯法，警察執法有乜錯？再加上我又唔buy佔中三子所講乜鬼「和平與愛」嘅理念！佔中點可能和平？

有人就會即刻閙，咁你即係支持出動防暴隊啦！老實講，要有效驅散幾萬人，唔用防暴隊其實可以點攪？ 不過話時話，其實我又未做過警察，是否應該出動防暴隊，我識條鐡咩！所以出防暴隊係咪錯呢？我嘅答案係「唔Q知」！

好多人話啲示威者手無寸鐵，駛唔駛放成87個催淚彈咁暴力呀？但客觀事實又話我知，當日放咗87個催淚彈都無辨法軀散嗰幾萬個示威人士。又見唔到有示威人士有較嚴重受傷，咁其實放催淚彈有幾暴力呢？

今時今日，係任何地方大叫689下台，或大讚佔中人士辛苦啦，都唔錯得去邊！正所為要成為人民英雄，識講緊係講呢啲！如果你唔怕死，可以試下出文讚 下香港警察盡忠職守、well done 之類。如果連落地獄都不怕，不妨試試話689政府處理適當或指責佔中人士不對，睇下有乜收場！

689有無錯？唔駛講當然有錯啦！佢根本背負著原罪，無論佢做乜，必定係錯。喺所謂追求真普選嘅人士眼中，佢生存係呢個世界上就係錯！咁事實呢？當然唔係一個人錯哂咁簡單啦！

成件事由黃之鋒係台上叫原本諗住參與罷課嘅學生狗衝入廣場而起。當日黃之鋒明明集會前話無任何衝擊佈處，但係佔領咗廣場之後，先對外公布行動係事前 同學聯一早佈處好。如此，黃之鋒有無呃咗班本來淨係諗住參與和平罷課嘅學生，同埋放心比自己小朋友去參與和平罷課嘅家長？唔好又長篇大論，有就有、無就 無！

佔中三子呢？明明實牙實齒話用「和平與愛」佔中，一有唔對路就可以叫大家解散，點知依家叫解散無人理。夠膽死話啲人自己集結，以後佔中人士發展成點唔關佢地事，咁都得？平時把口叫官員問責，依家一出事，作為佔中發起人，求 L 其一句話控制唔到就唔洗負責？

最後又講下班普通市民，受佔旺、佔銅所害，返工要轉幾百次車。有小朋友嘅更加慘，返唔到學之餘，家長要放成個星期大假看管小朋友，唔鬧到拆天就奇。

另外，好鬼多人話係呢個星期見盡身邊係人係鬼，又unfriend又鬧交。呢啲低能舉動發生在熱血小朋友身上唔奇，但發生在一班6、70後身上，就 顯得相當幼稚！大佬，做咗4、50年人，竟然話接受唔到其他唔同聲音？乜唔係話自由民主社會，應該接受100種唔同聲音，求同存異咩？做乜又同三幾個同聲 同氣嘅人，喺到不停小狗一啲持相反意見嘅人，數算人地冷血、無恥之類? 其實一件自己以為好啱嘅事，即使主流意見企係你嗰面，都唔代表你真係啱哂。其實做人做到咁，點同人好好相處？

其實政治嘅嘢，一向各有睇法。評論一件政治事件，必須針對件事，唔係乜鬼個人品格、修養，除非閣下全職投身政治職位，咁就預咗時時刻刻要比人攻擊人格。各位香港人，為咗追求所謂真普選，一日到黑喺到鬼打鬼，攪到四分五裂，好友變仇人，何苦呢？

 (2014年10月7日刊於 全民媒體)

真係雙方讓步？

特首梁振英昨晚開完記招後，有好多人嘅睇法係雙方終於讓步，有得坐低傾…..

認真睇其實係學聯輸哂就真！學聯之前明明就好清楚講明昨晚午夜係最後通牒，特首必須辭咗職，學聯先考慮同林鄭傾，否則學聯會將行動升級！

梁特首於是急急趕在最後通牒限期前（11:4x PM) 公開大大聲話：「我唔會辭職！」。

特首就公開回應咗唔會辭職，咁學聯之前又講明要特首先辭職再會面，理論上係要拒絕會面加行動升級，結果又點？

特首開完記招，學聯份聲明對原先要特首先辭職才同政府傾呢一個要求隻字不提。

政府一方呢？特首一開囗就話交比林鄭及另外兩位同事跟，有人話特首縮骨又將個波踢比女人，好無恥…..！啲人究竟有無聽清楚特首講乜？佢係叫學聯同「政改三人組」傾！即係無論你地點佔中，出乜嘢最後通牒都好，要傾就跟返政府原來政改路線圖去同「政改三人組」玩！

另外，學聯唔好以為同林鄭傾，可以爭取到公民提名之類！特首明明確確在記招講咗，學聯所有要求必須合乎基本法及人大決定！即係話公民提名呢啲要求，係百分之二百無得傾。人大決定呢，就更加唔會挑戰，即係想人大收返袋住先方案係痴峰說夢話！

最後，對於依家佔領咗特首辦出面班佔中人士，表面上特首同呢班佔中人士講唔會作清場行動，任你地佔領。但事實係特首一再重申幾次出咗「Warning」俾佔領特首辦出面班人，講到明正在容忍緊出面班非法集會人士！清楚說明若有人衝擊任何政府大樓，後果必定好嚴重！

從以上牌面睇，政府根本寸步都未讓過。反觀學聯就由昨晚特首唔辭職就將行動升級改為會把握同林鄭對話（唔知幾時）機會，究竟被迫退咗幾多步？

再講，好多受佔中影響而停學嘅家長，擔心子女學業受無限期停學所影響，開始有不滿！在電視所見，好多四大佔領區嘅街方更加對佔領佢地屋企附近非常不滿。即係話，佔中時間越長，不滿佔中嘅受影響人士就越多！

 (2014年10月3日刊於 全民媒體)