等

男：「妳知道嘛，緣份是需要等，但是我一向不喜歡等！」

女：「那麼你喜歡什麼呢？」

男：「我喜歡妳！」

馬沙 facebook :  https://www.facebook.com/charblogger02

夢伴

我真論盡，我頭先去吃雲吞麵時，見隔離枱碟豬手咁香，問人好不好吃，想叫多碟小食，點知個男士話請我吃，我不小心搞到人地件衫全部都係豬手汁 ......

情急之下，只想到幫他除下被豬手汁弄污的白色裇衫。當鈕扣被打開，目測近42吋的胸肌即時展現我眼前，那一刻我即時紅都面哂 .........

Hm.... Hm.... 我腦裏面出現咗好多畫面，幻想自己跌入對方嘅懷裡，強大嘅胸肌正好貼在我臉上，2 人上演臉紅心跳的「胸咚」畫面.... 思潮漂遠～～ 突然間聽到佢嘅聲音。。

我心入面， 就好似觸電一樣， 有十萬伏電流經過。 面紅紅像火燙，似煮熟嘅蝦子。我只希望現在天黑，佢睇唔清我紅酒般嘅臉～~~

呢一刻，我更希望月光被遮住了，周圍突然變暗。我可以用手電筒一邊照著腳下，一邊小心地移動腳步 .........

呢幾秒鐘我同42吋胸肌嘅佢， 對望咗幾秒鐘。 身邊嘅景物漸漸淡出， 就好似王家衛電影一樣， 呈現一種遊離狀態， 身邊嘅喧鬧聲， 餐廳裏嘅客人，全部喺我身邊淡出，我眼裏面只有前面呢個男人... 我只想同佢月光下, 拎住手電筒，去探索花園... 深入探索......

一切都進行得非常順利，幾乎可以説是完美的。或許有點過分完美。他的胸肌結實而富有彈性，或許稍微流著溫泉湯水，和初秋月光的皎潔，也更添加了喜歡和複數的對象同時擁有的破裂關係........

佔有？ 不！ 放棄？ 不！ 我不想，也不捨得。 但是我忽然間想起， 我倆還未開始， 也很難談得上開始的邊端。我什麼也想不到， 腦內一片空白， 我只想這一刻好好和你在一起， 好好看著你， 每一分每一秒。 是前進，或是後退甚麼， 我已經不想去管， 因腦袋突然 cannot function ...... 我腦內想起王菲的歌：「實在是愛你，雨天沒有你，並不是雨天。 」

如果這刻是永恆便好了～~ 我......你.....

他終於開口問：「喂！你會不會是很久沒做這事？」

「好可憐。」他說完這三個字，再溫柔地撫摸我的頭：「好可憐」...... 就走了 .......

我腦子𥚃反覆著他的話，好可憐....... 被他如此這麼一説，感覺自己真的.....很...可...憐。

完

註: 此文為接龍式集體創作!

特別嗚謝網友 Ho Siu Chi (內文中「我」) 起題, Michelle Wong 績極接龍!

馬沙 facebook :  https://www.facebook.com/charblogger02

秘密

每個人心裡總藏著一些秘密，假如我的秘密是喜歡妳，很想知道妳心裡的秘密，是否會是我！

馬沙 facebook :  https://www.facebook.com/charblogger02

低水準的香港傳媒

順豐同DHL單交易，在在證明咗香港傳媒報新聞嘅水準低到一個點......直情仲低過十八層地獄........

去到呢一刻，絕大部分香港傳媒仲係大字標題「順豐55億人仔收購DHL中港澳業務」！

係一個會計師群組，仲有條儍西話順豐老闆係咪儍㗎，55億咪即係要成70年先回本（即係70倍PE) ！

大佬呀，人地依家淨係賣「Chinese contract logistics business」咋，一般平民百姓認知嘅 「DHL 中港澳 快遞業務」不受影響呀！

更重要嘅係順豐嗰55億人仔，係叫「upfront payment」，雙方仲簽咗長達十年嘅戰略協議，之後 DHL 德國母公司仲要每年比返「Revenue-based partnership fee」順豐。

至於DHL德國母公司每年要比返幾多所謂partnership fee 順豐，扣完呢舊錢其實順豐係呢單鵰實際付出多少，之後十年合作期收獲又係多少，我就緊係無咁得閒去計。

計數呢家嘢，緊係留返比會計界「一計就明」啦！

馬沙 facebook :  https://www.facebook.com/charblogger02

音樂分享

呢隻CD已經有24年歴史，1994年呢張專輯推出時，號稱「中國人的新音樂世界」。

今日再聽，依然可以由頭聽到落尾，10首歌每一首編曲都有不同特色，樂器編排嘅細𠊷絕非現今電腦制作可比。

#竇唯黑夢
#DouWeiBlackDream

馬沙 facebook :  https://www.facebook.com/charblogger02

信者失救

我個客2008年用二千萬買嘅樓，今日銀行估值近四千萬。而事實上，個物業下星期五會以四千萬成交。

未有樓、未安居樂業嘅各位年青儍西，你地繼續聽班政棍、環保撚老點，唔好比政府填海、用效野公園地起樓。繼續係咁叫政府收返粉領高爾夫球場、叫政府收返每日150人入境啦。

只有自己有樓住嘅離地環保撚，才會提議保留郊野公園土地比乜柒「六班月飄蟲」住都唔L肯比人住！

你地即管繼續無止境咁拖、爭吵落去啦，過多十年必定仍原地踏步，到時你班年靑儍西三、四十歲連劏房都住唔起。

到嗰陣時教你班儍西乜都反對嘅有樓人士會點呢，層樓到嗰陣時當然因為越多人越唔夠地之下水脹船高。到嗰陣時一個今日連港女都睇唔起嘅兩房單位分分鐘都過千萬，佢地賣樓套現夠哂搬去外國享受退休生活。

你班人到中年嘅儍西，睇怕到時仍然係到日日儍叫做十九幾廿年嘢都未儲到首期上車囉！

#人都未有得住留啲地比昆蟲住
#自己屋企人都未安居樂業擔心管海馬無地方住

馬沙 facebook :  https://www.facebook.com/charblogger02

音樂

夜欄人靜可以做乜，除咗食宵夜，就係嘆住紅酒沉醉於音樂之中 🍷🍷

#沉醉於音階她不讚賞
#母親的愛卻永未退讓

馬沙 facebook :  https://www.facebook.com/charblogger02

調情

枱下調情大家睇戲就睇得多，現實生活大家見過未？

坐係我面前食緊宵夜呢對男女同事，男已婚女唔知，但酒過三巡，從對話已經明顯知道條女對面前呢位年過40嘅男同事相當有性趣⋯⋯

佢地再飲多兩杯，條女已經忍唔住在枱底不停掃腳，男同事對於女同事用雙腳步步進逼，一啲迴避都無，仲似乎相當受落......

睇怕佢地飲再飲多兩支，今晚就會超出友誼關係......

我一向都話，依家好多後生女喜歡40+有婦之夫！

啱啱條女仲同佢位男同事講自己好少對男人有感覺，呢個係對男同事明示定暗示？

馬沙 facebook :  https://www.facebook.com/charblogger02

女人

昨天喺一個會計師谷上面，有人開題問：「史上最難理解的生物是什麼？」

絕大部分男人都答係「女人」，就連一眾女會計師也表示認同。

其實女人有乜咁難了解？

老老豆豆，容許小弟為女人説兩句。其實絕大多數嘅女人，根本上並無要求自己男人去完全理解自己，何解？

因為大多數嘅女人，有時連自己都不太理解自己。女人想要嘅，不外乎身邊男人懂得縱容她天生「善變」呢個特質！

假若有男人經常掛在口邊（通常向身邊女性講），話自己女人結婚後或生小朋友後變得難以理解。我幾乎可以肯定，呢啲男人係想為自己偷跳（或想出去偷跳）找借口。

女人其實有幾難理解，尤其結咗婚又有小朋友嘅女人，佢地所有心血全部就放係小朋友及家庭上面。男人出去搵食又好，出去玩又好，只要唔好失去聯絡，見字即覆，女人就會安心。千期唔好以為女人唔信你check住你，女人只係擔心你安全而巳！

女人，好多嘢都可以忍，唯獨是天生不能跟另一女人分享自己嘅男人，男人只要緊記呢一點就夠！

馬沙 facebook :  https://www.facebook.com/charblogger02

放棄

大約兩年前，係工作上認識咗一位人妻 Bernice，Bernice 樣靚不在話下，有學識之餘仲出身自大富之家。有一次，我地一齊出席一個飯局之後，就順道揸車送佢返麥當勞道屋企。車駛至紅錦道，人妻忽然開口問：-

Bernice:「以女人嚟講，我算唔算有吸引力呀？」

馬沙:「都有嘅！」

Bernice:「唔差過你太太吧？」

馬沙:「我太太同妳吸引人嘅地方都唔同.......」

Bernice:「你 ......... 有無一刻諗過追我呀？」

馬沙:「............. 你有老公個喎 ........」

Bernice:「我老公佢依家個心已經唔係我到，我知道佢喺出面有第二個女人 ........... 我想要佢親身感受一下 ........ 自己女人比人搶走嘅滋味！而且我更加想比佢知道，曾經比佢放棄過嘅女人，究竟係幾咁有魅力！」

馬沙:「...............」

Bernice:「可唔可以呀？」

馬沙:「................」

車已經到達 Bernice 屋企門前，我送 Bernice 到地下大堂 ........

馬沙:「就送到呢到啦，唔送妳上去啦！」

Bernice:「屋企無人，上唔上嚟飲杯咖啡？」

馬沙:「唔好啦！比人影到半夜三更，有男人上妳屋企就唔係咁好！Goodnight!」

Bernice:「................」

Bernice:「你未答我問題？我想係你老婆手上搶走你，究竟可唔可以呀？」

馬沙:「唔得！依家嘅妳唔可以！」

**********************************************
**********************************************

今朝一早，收到 Bernice WhatsApp 以下留言：「我已經回復單身」

馬沙 facebook :  https://www.facebook.com/charblogger02

空間

今夜，在某天台酒吧，跟 Carol 有以下對話：

Carol :「係喇！叫 Tammy 嗰個女人，係你嘅ex? 佢生得同我好似樣？」

馬沙：「......... 係！你估中咗 ....... 佢係我個ex .....」

Carol:「唔怪得你每次飲醉，都猛咁叫我 Tammy 啦！咁多年你都忘記唔到佢，睇嚟你愛佢愛得好深喎！」

馬沙：「係！我嗰陣真係做咗好多對佢唔住嘅事 .......」

Carol:「我 ...... 可唔可以鍾意你？」

馬沙：「唔可以 ......... 我人生再容納唔到其他女人！」

馬沙 facebook :  https://www.facebook.com/charblogger02

分手

今晚去茶仔食飯，同個靚靚中女前後腳坐入一張卡位，咁啱一齊落order，之後個侍應以為我地一齊，就將我地叫嘅嘢寫埋落一張單😆

我叫個侍應埋嚟同佢有以下對話：

馬沙：「麻煩你幫我分單！」
侍應：「分單？」
馬沙：「係呀！我哋一人一碟！」
待應：「一人食一碟唔駛分單喎⋯⋯」
馬沙：「我地已經分咗手好耐 .........」
侍應：「明！收到！」

侍應分完兩張單之後，我望下對面嗰位靚靚中女，佢居然係咁笑，仲笑到流眼淚 😭

於是我同佢講：「其實我請妳食無乜所謂，不過條友未問過妳就自把自為，咁就唔係咁好啦⋯⋯」

佢聽我咁講完，又忍唔住係咁笑 😂😂😂

等佢笑完，我就同佢講：「您好！我叫馬沙，未請教？」

靚靚中女笑笑口細細聲答：「Jasmine」

話閘就咁打開咗 ........

食完飯埋單，區區$50緊係我請客啦⋯⋯之後仲一齊過對面太平道嘅酒吧飲嘢！

行出茶仔門口時，我聽到個侍應自言自語：「挑！又話分咗手好耐！」

我心諗，唔講分手邊有得開始呀兄弟.......

馬沙 facebook :  https://www.facebook.com/charblogger02

監禮人

富豪，有時真係好難憑外表去分辨，尤其係嗰啲隱世富豪！

今日同老婆食緊 lunch 時，收到老友 banker J 電話，佢叫我食完 lunch 嗱嗱聲飛的落長沙灣某工廠大廈，有要事搵我幫手，臨收線仲要加句：「記得2:30準時到！」

雖然未趕完D Code deadline，但老友叫到，好難托手掙。食完飯，返上公司拎返件披即刻打的落去長沙灣工廠區。去到 banker J 指定某工廠大廈大堂，見到banker J ，同行仲有 banker J 老頂 banker L。

我心諗，乜料呀！乜依家唔係客仔求銀行開戶年代咩，乜解救 32 度大熱天時，banker 要親身走落工廠區。老友banker J 本身職位已經算高級，仲要出埋佢老頂 banker L。之後老友 Banker J 簡單同我解釋咗點解要急 call 我到場，內容無乜特別，反而佢最後一句說話就令我充滿好奇，因為佢最後一句係咁講：「一陣我地上去見嘅人，身家我地見到嘅已經超過300億！」，難怪佢老頂banker L 都親身上陣。

上到去間公司嘅會議室，同佢地 GM 吹咗半個鐘頭水，佢老闆富豪W終於出場。老實講，呢位隱世富豪，橫睇掂睇都唔似一個有錢人。最攪笑係互相交換卡片作介紹時，banker L 竟然同富豪W講，我係今日成件事嘅主禮嘉賓。

大家互換完卡片吹幾句水之後，就坐低開始做正經事。而我開口第一句同富豪W講嘅說話，就係：「麻煩熄匙、車牌、身份證，唔該！」

當我在文件上簽完最後一個名，banker L 大聲宣布：「好！禮成！」。富豪W細細聲講咗句唔該哂各位，就離開咗會議室。

做完banker L 口中所謂監禮人，當然第一時間離開現場，飛的返公司繼續趕餘下嘅D Code cases。

馬沙 facebook :  https://www.facebook.com/charblogger02

三角關係

愛情呢家嘢，好多時就係咁，好講 「Timing」。要適當時間遇上適當嘅人，即所謂Mr. Right, 談何容易？

對於三角關係，我嘅人生導師 Michael 及 Gabriel 由細到大咁樣教我:-

Gabriel 一向主張我應該趁人家戀情仲未成熟時，從人家手中將所愛嘅人搶返嚟，仲日日不停係我耳邊講埋好多橫刀奪愛嘅方法。

Michael 則成日同我講，「愛」係要講道德！一段關係之間，永遠只可以容納兩個人。既不能讓第三者加入破壞一段關係，更絕不能做第三者去拆散一段關係。你今日奪人所愛，他日必被人奪去你嘅最愛。

講到感情呢方面，我就比較 buy Michael 嘅理論。正所謂「剃人頭者、人亦剃其頭」也，所以做人真係要學識珍惜眼前人。

馬沙 facebook :  https://www.facebook.com/charblogger02

問題天天都多

準備出兩份 Professional Clearance Letter，同事攪咗大半日都未拎比我簽，問吓佢點解攪咁Q耐，答案相當精彩 😱😱😱

附圖取自呢位用人名執葉嘅盧姓女會計師嘅信紙，用硬身紙及印刷相當精美，佢信紙上印住 Beauty P.K. Lo CPA (Practising)。問題在於公會執葉名冊上搵唔到同名嘅執葉會員，而同姓唯一 match 到嘅叫 Lo Pok Kai 😓

另一個 畸士 問題亦相當近似，呢位都係用人名執葉嘅馬姓男會計師，佢嘅信紙印住 Handsome Ma CPA (Practising)，但係公會執業名冊上搵唔到同名嘅執葉會員，而同姓唯一 match 到嘅叫 Ma Pok Kai Handsome 😓

同事話雖然同姓唯一 match 到應該無錯，但唔係100%肯定係同一人，唔知封信出比乜名先至啱 😪

以上兩位執葉同業幫艇仔簽Report 攪爛哂啲客盤數以經唔好，仲連自己執業個寶號都亂哂大龍，到底攪邊科 🤔

理論上，你地用咗同執葉證書上面所顯示唔一樣嘅名去簽發 柯跌報告 ，同無牌執葉係無乜分別 😓

PS 大家唔駛search啦，以上兩位 Beauty & Handsome 都係假名嚟 😌

 

 馬沙 facebook :  https://www.facebook.com/charblogger02

千丈之堤,以螻蟻之穴潰。 《韓非子》

幾宏偉嘅堤圍,都可以被螻蟻巢穴引致倒塌。

在職場上,不要輕視任何小事,要防患未然。若小事疏忽,隨時可招至不能彌補的局面,也無法完成大事業。

好嘅專業會計師,就是可以在賬目出現問題初期時發現問題之所在,根據各項準則並作出適當更正。而唔係等埋數之後先發現種種入賬錯誤,再進行修補工作。

馬沙 facebook :  https://www.facebook.com/charblogger02

人類總要重複同樣的錯誤 之 《直播罪證》

本來早兩日已經出現出帖，不過記得今日判案大日子，就乾脆等多兩日確認犯法先出。

西九龍法院法官今天裁定，5名Uber 司機被控《駕駛汽車以作出租或取酬用途》及《沒有第三者保險而在道路使用車輛》兩項控罪均罪名成立。

正如我一早講過，唔理大家幾鐘意Uber服務都好，唔合法就係唔合法。一日法例未修改，無的士牌做同的士一樣嘅服務，即係等同「白牌車」。

有啲人成日話法例追唔上Uber呢啲營運模式，呢點我個人係非常認同。不過我認為Uber 係應該先要求政府修改法例，等修法後先至先開業，而唔係依家咁挑戰政府底線囉。

Uber 公司其實同佔中三人組一樣，叫司機唔駛擔心去以身試法。事實上就係精人（Uber 公司）出口，笨人（Uber 司機）出手仲出埋車。結果呢，咪出手嘅笨人被控罪成兼留案底，而出口嘅精人就企係安全位置叫大家唔好怕，繼續叫另一班去以身試法！

而片中呢位擁有法律高級文憑嘅女藝人呢，仲蠢到比Uber利用，直播自己《駕駛汽車以作出租或取酬用途》（依家Uber 有AIG受第三保告唔到呢條喇），真係叻到無嘢好講。希望佢唔會因為條直播片比人告喇。

馬沙 facebook :  https://www.facebook.com/charblogger02

以備待時，以時興事。《管子》

無論打工、做生意，如果沒有充足準備，好少會得到成功。不過，除咗要準備充足外，更重要嘅係找得住時機，否則，即使有好嘅準備，最後還是免不了面對失敗。

人生，至少總會有一兩次機會出現吧，問題在於機會出現時你能否察覺得到。時常帶著負能量嘅人，係好難嗅到機會嘅氣味。

現在好多人話「機會係留給有凖備嘅人」，我個人認為，「機會只會展現給充滿正能量嘅人」。

馬沙 facebook :  https://www.facebook.com/charblogger02

試問誰人在禁聲

參加選委，連梁振英係第四任特首都攪錯，留言提下你地，唔該都無句就刪除我留言，偷偷將「經歷三任特首」改咗做「經歷三位特首」扮無嘢不突止，仲竟然夠膽死禁止我留言。

所謂民主進步會計師，你地究竟有幾「民主」及有乜「進步」可言？

參加選委，連梁振英係第四任特首都攪錯，留言提下你地，唔該都無句就刪除我留言，偷偷將「經歷三任特首」改咗做「經歷三位特首」扮無嘢不突止，仲竟然夠膽死禁止我留言。

你地堂堂會計師，咁做無嘢呀？

若果驚比人知攪錯嘢影響選情，刪除我留言無問題㗎，刪完之後自己求其留返句「手民之誤，已經修正，謝謝指正」，係咪大方得體啲呢？

禁止我比like及留言即係想點呀，即係只能接納比like 及 留言支持你地嘅會計師選民？

其實你地知唔知乜嘢叫「民主」？

禁止/唔想選民留言（發聲）呢種行為，係「民主進步」還是「民主倒退」？

最令人發笑嘅係，你呢個帖入面條片「誰還未覺醒」入面第一句係......「 試問誰還未發聲？」...... ，勢估唔到我向你地發第一次聲，第二日就比你地滅聲，我係咪要好似歌詞入面「  要認命噤聲」咁唔出聲？

作為一位資深會計師，對你地呢一隊由業界代表梁繼昌議員全力支持嘅選委參選團隊，真係感到極度失望！

#民主進步會計師 #無資格做選委 #知唔知乜嘢叫民主 #民主倒退 #被民主進步會計師滅聲 #極度失望

馬沙 facebook :  https://www.facebook.com/charblogger02

人地棵樹

一諗起嗰對夫婦，返到屋企睇返自己影嘅相，發現自己連親生仔都唔認得，成朝影咗人地棵樹，對唔住 ....... 我又笑到長腹肌 .......

今朝同老婆出席細仔幼稚園聯合畢業典禮，坐係我隔離嘅一對父母嘅對話，笑到我長腹肌。

典禮一開始，所有應屆畢業生企哂係台前唱校歌，所有家長好興奮咁揾自己嘅小朋友，一搵到就當然拎起相機或手機係咁影相。

坐係我隔離嘅一位爸爸係咁問佢老婆：「阿仔係邊到？」。佢老婆係咁幚手搵，直到校歌唱完，閉幕……… 都仲未搵到 ……

畢業典禮繼續，當幼稚園總校長向每一位應屆畢業生頒發畢業證書，畢業典禮最受家長歡迎嘅表演節目就正式開始。

跟往年一樣，幼稚園每間分校，分別會演出不同話劇。正當分校 M 開始演出不久，坐係我隔離對父母就開始攪笑。

爸爸：「媽媽！你睇！嗰個咪就係阿仔囉！」

媽媽：「好似唔係喎！」

爸爸：「係定啦！阿仔今日扮樹呀！妳睇，阿仔幾可愛！」

之後兩夫婦就各持相機及手機，起勢係咁幫正在扮緊一棵樹嘅仔影相。

佢兩夫婦一路影，我就一路係咁忍笑，之後比身邊老婆發現咗我無啦啦係咁長腹肌，就問我笑乜 ………

馬沙：「隔離兩位家長係邊間分校？」

老婆：「我地嗰間（分校 L）！」

馬沙：「依家表演緊係邊間分校？」

老婆：「分校 M！」

馬沙：「佢地依家同佢地扮緊樹嘅仔影緊相！」

我老婆望咗一眼，即刻好大力扼住我手臂係咁忍住笑，我隱約感覺到老婆都笑到長腹肌 ……….

過咗無幾耐，分校 M 劇目完畢，輪到分校 L 開始表演。因為同一分校嘅父母被安排坐係會場同一個 zone嘅關係，坐係馬沙身邊嘅其他父母，紛紛開始拎起相機影相，有部分就好似馬沙咁，一個負責影相，另一個負責影片。

我下意識再望下坐係隔離嘅一對父母，佢地再無任何動作，仿佛正在等待畢業典禮完場走人。即係話，佢地似乎未意識到佢地負責扮樹嘅公子正在台上扮緊樹 ………

我內心曾經爭扎咗幾十秒，究竟我應唔應該同隔離嗰位看上去充滿自信嘅爸爸講一聲：「你嗰棵樹依家企係台上表演緊！」。不過當我考慮到學校係有安排攝影師全程拍攝，之後派比各位家長，就決定專心為今日扮演「三隻小豬」入面隻大灰狼嘅細仔影靚相。

畢業典禮完咗之後返到公司，睇返今朝幫細仔影嘅相。一諗起嗰對夫婦，返到屋企睇返自己影嘅相，發現自己連親生仔都唔認得，成朝影咗人地棵樹，對唔住 ……. 我又笑到長腹肌 …….

(2016年6月15日刊於 全民媒體) 

馬沙 facebook :  https://www.facebook.com/charblogger02