星期二, 3月 03, 2009

再見吧!股王

號稱香港股王的滙控(005)昨天終於公佈08年成績表,每股盈利為3.6元,較去年同期12.7元大幅下跌72%。以停牌前收市價56.95元計算,最新往績市盈率約為16倍。16倍市盈率在金融海嘯之下肯定已經貴,假設09年盈利倒退三成,09年每股盈利為2.52元,預測市盈率將擴大至23倍,呢個數字表示55至60元嘅滙控係超貴。

馬沙早於 1月22日已指出,滙控好大機會下試40元,理由係在目前環境之下,銀行股市盈率超過10倍已經算貴。依據08年每股盈利為3.6元作非常簡單計算,滙控合理價為36元。若以09年預測每股盈利為2.52元計算,合理價更可能進一步下降至25元。當然,在評估合理價時,還需加入其他因素及個人預測。以上數字,旨在向讀者作簡單說明而已。

值得讀者特別注意的是,以上數字還未計及昨天公佈的供股計劃在內。滙控宣佈以「12股供5股」集資1,378億元,每股供股價約為28元。相信好多持有滙控的投資者,一向只投資藍籌股,鮮有供股經歷。

投資者千萬不要以為每股供股價28元好抵,更不要認為供股價越低越好,因為供股計劃對原本持有的股份會出現攤薄效應,而股價亦會作出調整。就以滙控為例,停牌前收報56.95元,供股計劃宣佈後,調整市價為48.4元。最重要一點,當供股計劃完成後,滙控股本數目將擴大近三成。即使09年全年盈利不變,每股盈利仍會因股數增多而大幅下跌。因此,執筆時滙控股價在英國已下跌近20%。

(2009年3月3日刊於《am730》)

5 則留言:

Hana 說...

雖然我係5仔小股東,但都想讚下你:馬沙兄抵你牙擦嘅。

匿名 說...

馬沙兄,

久未留言...今次都希望出下聲...

AK依家手上無股...如果有既話,會比較傾向唔供...

以停牌前價計算,供埋股之後,每手個價係四十幾蚊...

AK覺得,四十幾蚊,係一個好貴既價,依家面對進退兩難既局面,怪就只好怪之前洗濕左個頭,透過供股...可以選擇溝淡,表面上收窄番過去既一d損失...

不過,之前既「摩笛價」講緊33蚊...而匯豐自己開個價係28蚊...大家對於依個行業以及依個管理層有d咩前景...其實應該頗清楚...要估價大幅反彈,應該都唔係講緊短線...長線投資,可以揀既就一定唔止匯豐...

如果係以利息作考慮既,供股之後,每股盈利因股數增加而進一步攤薄...係咁既情況下,又點可以既望佢派息會好...

bittermelon 說...

好快咁睇咗佢地個result,其實profit before tax 都只係跌18%,北美PFS業務做咁多impairment,我覺得佢地有少少bathing的味道,將上年洗干洗淨,今年就可以輕身上路。不過北美PFS會lay off 成6100人聽到都心寒。

匿名 說...

3.6是未供股前的EPS,供股後應攤薄至2.52,你計計對不對?

匿名 說...

$3.6 x 0.7 (估计下年profit倒退3成) = $2.52

滩薄之後每股利润: 2.52 / (17/12) = $1.78
假设合理P/E为10倍, 合理价为 $17.8??