星期四, 2月 28, 2013

中產財爺

是咁的,財爺尋日話自己係中產,呢兩日係咁比人閙!

不過我個人認為佢真係中產嚟,只不過在中產入面叫高級中產!

咁如果你問我,每月搵成30幾皮都仲叫中產,咁入門級中產要搵幾多?
其實喺香港地,每月無10皮嘢學乜鬼嘢人叫中產?

試諗下,假設初級中產每月揾10皮,年薪1球多啲,買樓安全系數當年薪嘅10倍,即係樓價1千萬!依家想用1千萬係巿區搵一個約一千呎好好睇睇,見得下人嘅盤,有幾多選擇?

仲有,作為每月揾10皮初級中產,買返架車代步都好正常! 今時今日, 一架歐洲入門車 BMW 3系、 Benz C Class、 Audi A4, 新車價近40萬, 一個每月揾10皮初級中產,都未必個個可以一炮過科水唔駛供車會!
仲有, 一個每月揾10皮初級中產, 如果家有兩個小朋友,老婆在家親自管教小朋友, 每月開支計及供樓、供車、子女學費、子女活動及補習費用、家庭各項開支(水電煤等等)、供養兩邊父母,剩返可以儲蓄嘅都未必好多! 
查實依家香港好鬼死多月薪3、4皮嘅人興叫自己做中產,呢一點從昨日大部份人都喺facebook留言「你(財爺)係中產,咁我係乜?」可知一二,或許叫自己做中產自我感覺上高級啲!但係喺呢個收入階層嘅人,其實係最不幸!公、居屋固然冇份,但4球嘢500呎所謂「窮人恩物」都未必買得起!每月供樓/交租後, 其他使費要千算萬算, 若呢個月使大咗,下個月唔慳住使都唔掂! 
好老實講,月薪3、4皮嘅人,如果家有兩個小朋友,老婆在家親自管教小朋友,生活壓力分分鐘慘過住公屋嘅低收入階層! 好話唔好聽,有時住公屋嘅領綜援人士,生活快樂指數可能比嗰班月薪3、4皮嘅人還要高!

咁你地話
,依家香港地月薪3、4皮嘅人有乜資格叫自己做中產?

所以話,
財爺尋日話自己係中產,其實錯唔哂,只係漏咗「高級」兩個字!

星期五, 2月 22, 2013

買咗隻怪物

作為會計師及稅務顧問,呢幾日有不少人問過我對於雍澄軒買家將面對嘅稅務問題,而我每次都係答:「唔知!」

因為我認為依家除咗長實班創意律師團隊知道自己賣乜外,根本無人真正知道班買家買咗件乜嘢「怪物」返嚟!所以一日份正式S&P (Sale & Purchase Agreement) 未浮上水面,未真正了解過份S&P內啲terms and conditions, 我唔會評論任何稅務問題!


不過,我反而想知依家除咗中環幾間著名律師行有能力(財力)去處理雍澄軒買賣個案,究竟有無其他律師行夠膽代表買家!

尋晚已經有個著名律師係TVB講,律師好難為買家釐清雍澄軒嘅買賣風險,在不能釐清買家風險的情況下,律師為咗避免自己之後比人告,無可耐何之下唯有唔接
買賣雍澄軒啲case!


如果一般律師無能力代表買家完成買賣交易,第一手買家就話可以同用發展商律師完成交易!但之後買賣點算?比大行㯲住搶?到時收幾皮都焗住要比!

再引申去按揭,既然一般律師都無辦法去釐清買家
買賣風險,咁銀行點樣可以釐清銀行自己承按風險呢?


銀行無理為咗幾單幾百萬嘅按揭生意,用大量內部資源去了解呢隻「怪物」,所以唔接呢啲生意就好正常!

所以馬沙個人認為
刻下班
雍澄軒買家最大嘅存在風險唔係稅務問題係買完之後點樣完成交易及上會,以及將來獲利或想變現時點樣將雍澄軒呢隻「怪物」賣出?