星期五, 8月 29, 2008

自畫像

見好多人玩,我又玩!

畫完自己都唔知似唔似,昨晚問吓老婆,佢話唔係好似!

咁啱仔仔走入書房,就問吓佢呢個係邊個,佢望一望,平日睇相見到唔識嘅中年男性會叫「叔叔」嘅佢,竟然指住幅圖笑住大聲答:「爸B呀.....」。

唔通我真係仲咁靚仔? 哈...哈....哈.....

星期四, 8月 28, 2008

喜訊再來

港股自颱風過後表現氣勢如虹,周二更跑贏各地市場。恒指昨天繼續做好,收市上升408點,報21,465點。或許好多投資者會問,近日港股為何會如此強?

馬沙個人認為,與大部分大行錯誤估計中資股中期業績,搞到依家市場一地眼鏡有關。這兩星期係一眾中資龍頭股,中期業績發布的高峰期,不論各中資金融股及其他龍頭企業,成績都相當亮麗,部分成績表更是遠遠優於各大行預期。呢點亦足以證明各大行向外界(大戶除外)公布的預測係「睇不遠、做不到」及不可信。

昨天係自上月起剛剛加入成為馬沙第四仔的中移動 (941),交功課的大日子。既能名列馬沙長線組合的第四個仔,個人對此中期業績當然相當睇好。各大行事前預測中期盈利上升32%至42%不等,結果中移公布中期盈利上升45%,再一次超出市場預期上限。

有別於一眾唔派中期息的中資股,中移昨天同時宣布派中期息1.339元。中移午後開市即見投資者追入,昨天收報96.55元,上升3.25元(3.5%)。

近日投資者在網上討論得最熱烈的話題,相信就係究竟哪一隻中資股,被股神巴菲特睇中。馬沙個人就認為估來估去實在無甚意思,目下首要做嘅係問問自己長線對大市有否信心。即係就算依家講俾你知邊隻,你是否夠膽大大注跟買?

如果夠膽的話,點解你依家唔自己揀幾隻優質股,建立長線組合?

根據股神揀股原則,即係長線從新睇好中資股前景,依家唔買,難道等人炒高咗先買嗎?

(2008年8月28日刊於《am730》)

星期二, 8月 26, 2008

鸚鵡救港股

上周三港股受中央擬用4千億救市影響,恆指一道大升400多點。由於方案未獲得証實,次日港股即跟隨國內A股大幅回落,且有越插越深之勢。

周五A股繼續尋底,跌幅驚人,本來港股勢必再一次跟跌。幸好香港有個唔係好識簡單中文的天文台台長林超英,將清晨硬改為午夜後1至3時,以致可以提早掛出8號風球。不但給全港市民一天假期,更令港股周五全日休市,避過大跌一劫。

試諗吓,若當日天文台真的在清晨前不改掛8號烈風信號,港股上午開市後先跟國內A股大跌,然後天文台在開市後才宣佈即將掛上8號烈風信號,面對當時A股形勢及下午休市的不明朗因素,炒友不在收市前出貨鎖定風險才怪。如此一來,恆指必定在收市前進一步下跌。

昨天恆指受上周五晚美股上升近200點的利好消息所帶動,再加上國內A股見反彈,恆指大升713點收市,從新返回2萬1千點之上,惜未能升穿10天平均線21,119點之上。

最可憐的相信就係嗰班上周四揸淡倉過夜的炒家,周五大好形勢下未能平倉獲利,昨天一開市就被夾爆,呢餐真係無仇報。

繼早前大仔招行(3968)交出讓馬沙相當滿意的中期業績後,昨天輪到第二仔國壽(2628)交功課。事前各大行估計,中期盈利下降46%至74%不等。

執筆時壽仔剛公佈中期盈利下跌32%,大大優於預期,不愧我每月將大部分績蓄供養壽仔。表面睇,呢份中期業績相當不錯,但詳細內容就要慢慢硏究!

(2008年8月26日刊於《am730》)

星期一, 8月 25, 2008

紅星閃、強者現

為慶祝2008年北京奧運,潛咗水多年嘅亞洲神童章魚城,強勢回歸! 城城用咗三、四年時間創作「友誼的光彩」。

真係好佩服無線,唔怕趕客,夠膽比近乎五音不全嘅城城上音樂節目。更加佩服嗰2位主持,竟可如此認真介紹城城,夠專業!

其中一位主持仲話:「好似城城咁正面,咁有創作天份真係好難得!」。用三、四年時間創作一首咁嘅歌,真係好難得!

友誼的光彩 - 章魚城

星期四, 8月 21, 2008

反高潮

07年817股市大奇蹟日一周年剛過去,今天回望,投資者必定有一番感受。由817開始,投資者分別經歷了吹水港股直通車,財爺自己一個人決定用政府公帑高位買入港交所(388)事件。促使香港各大小社區,出現無數街坊股神。3萬多點的大牛市過後,恆指短短半年反覆下跌至近2萬點。上年因為大牛市見人人賺錢,才加入股海的新丁,相信大部分不死也重傷。

恆指從上月尾2萬3千多點的高位回落,早幾日好多人對後市都睇得好淡。特別係美股及內地股市本周不斷下跌,而內地更有要錢唔要貨之勢。正當各大行紛紛降低後市預測及人人話恆指今次必定見1萬8千點時,股市昨天就給大家來個反高潮。

昨天市傳中央擬用4千億救市,內地各主要市場隨即大幅上升,且近乎由頭升到尾,無數A股更漲至停板。受內地A股帶動,恆指昨天亦大幅上升407點。值得注意的是昨天的升幅主要由國企股所帶動,單睇國企指數,昨天就升超過4% (457點)。由於國企指數的基數比恆指少近半,所以純以點數計算,國企點數升幅比恆指大算是08年罕見。

今次4千億救市方案是否一如以往,屬吹水之作,大家就要慢慢等。不過馬沙個人認為,若以5至10年作為投資期,目下好多優質股的現價已非常吸引。由於個人7月底已將最後一注資金增持招行(3968),由8月開始,改用月供形式,繼續無間斷地增持滙控(005)、中移動(941)、國壽(2628)及招行(3968),期望5年後組合能有倍數增長。

(2008年8月21日刊於《am730》)

星期二, 8月 19, 2008

退出

昨天早上馬沙同一大班同事聚集在會客室,為的不是要開特別會議,而是一起欣賞有「劉欄王」之稱的劉翔,參加 110米欄的初賽。這場賽事,可算是今屆奧運,最令世界各地華人矚目的初賽。結果係點,相信今天大家只要望一望各大小報章頭版,就可以知道。

說實話,馬沙從未期望劉翔能夠在今屆奧運為中國再次奪得這面金牌。只要在最後決賽,能取得一面銀牌或者銅牌,已經算是對所有支持者的一個交代。唔係話睇死劉翔,只係馬沙相信,劉翔絕對有可能喺今屆參加奧運的運動員當中,背負最沉重壓力的運動員。在主場底下,中國13億人民都引頸以待,期望中國欄王能夠讓周四決賽後的頒獎禮,再一次奏起中國國歌。只是現在的結果,事前相信無人能夠估計得到。

昨天直播結束後,一班同事隨即議論紛紛,有個別同事心情久久未能平復。其後再睇劉翔的教練所召開的記者招待會,見到其教練以聲淚俱下的方式,向世人交代劉欄王的傷勢,就叫馬沙對劉翔及其教練賽前的決定好失望。如劉翔賽前的傷勢真的一如教練所說般嚴重,根本就唔應該繼續被派出賽。有報道稱係欄王自己堅持出賽,但作為主教練,無理由不堅決反對。

另一奇怪的是香港幾個電視台,將劉翔因傷退出一事,講到好似劉翔死咗咁。最好笑係電視台有人竟然話歡迎家庭觀眾,到網上留言版留言「弔唁」劉翔,簡直離譜。其實職業運動員因傷退出比賽,根本好平常。

(2008年8月19日刊於《am730》)

星期四, 8月 14, 2008

為國家隊打氣

中國第一次搞奧運,當然要大力支持。若不是工作極之繁忙,巴不得放下公事包,飛去北京欣賞賽事。香港今次協辦馬術比賽,但馬沙對呢個項目就完全沒有興趣。早幾日睇電視報道,話好多市民一早入場,準備睇馬術比賽。但比賽未到一半,部分市民已經因不同理由提早離場。呢個結果,其實由政府公布協辦馬術時已經可以估計得到。

首先,香港市民基本上對各項馬術比賽毫無認識。

其次,由二世祖率領的港奧辦幾年來從未向市民推廣馬術呢種比賽。比賽項目、比賽規則介紹或展覽幾乎通通欠奉。

最後,位於雙魚河的比賽場,地方偏遠。馬沙敢講,若不是有馬術賽,知道雙魚河喺邊的市民,肯定萬中無一。因為以往雙魚河除該處的原居民出入外,恐怕就只有高貴的馬會會員。

講番奧運比賽,就好似睇世界盃咁,要睇直播才刺激。但馬沙最想睇的賽事,如體操,游泳及跳水等等項目,幾乎全部安排在辦公時間進行,點算?

幸好有線電視今次提供4條免費網上直播頻道,幾乎覆蓋所有賽事。馬沙為支持中國國家隊,於是把心一橫,索性將手提電腦接駁到公司會客室部42吋LCD電視,實行與眾同樂,同班手足一齊睇奧運直播。昨天一齊見證國家女子體操隊,首次奪得女子體操金牌,真係不亦樂乎。

最後,馬沙要特別鳴謝香港稅務局,為體恤納稅人及會計師行因奧運舉行期間的影響,特別將原定在明天的報稅死線順延至下周五。

(2008年8月14日刊於《am730》)

星期三, 8月 13, 2008

舉重斷手.......痛! 真係睇見都覺得好痛!

係金牌既歡呼聲背後,仲有呢D悲劇!

這位不幸的選手,希望佢早日康復。不過,相信佢今生都不能再參加相同賽事!

注意:
內容含有極恐佈場面,可能會引起不安,敬請三思而後睇!

星期二, 8月 12, 2008

談奧運

萬眾矚目的北京奧運,上周五正式開始。一向熱愛運動的馬沙,晚晚又要追看各項賽事。今屆奧運由中國舉辦,所以開幕禮特別多市民收看。上周五午飯時接到老友P來電,話當睌在某酒店訂下廂房,問馬沙有無興趣齊齊「港仔迎奧運」。說實話,馬沙向來對奧運的開幕禮都沒有多大興趣,不過今屆在中國舉行,點都要支持一下。

馬沙當晚準時到達酒店,場面只能用人山人海去形容。還好老友P一早訂下廂房,一班老友可以舒舒服服,揸住支啤酒睇開幕直播。講到這場開幕禮,馬沙的觀後感可以簡單用「驚喜、精彩」四個字去形容。其中最欣賞就是李寧燃點聖火一幕。如果要評分,個人就俾95分。如果可以減去本身不是歌手的成龍高歌一段,馬沙就俾足100分。

周六日兩天假期,馬沙就安在家中睇奧運直播。可是兩個免費電視台這兩天給馬沙的感覺,同樣可以簡單用「不知所謂」去形容。

首先,兩台的多位主持表現出對運動幾乎毫無認識。唔識不打緊,但基本功課都唔做就好唔掂。每有中國運動員出場就胡亂叫好,既無專業,又不持平。有個女主持竟然話日本蛙王北島康介係游背泳,情形有如話中國欄王劉翔係跑 100米短跑。

另外,廣告多得過份,最不明所以就是經常在中國選手演出後去廣告。就以女子雙人 3米板跳水賽事為例,每次中國隊跳完即去廣告,緊隨中國隊的一隊,觀眾就無緣看其演出。

(2008年8月12日刊於《am730》)

星期四, 8月 07, 2008

動口不動手

隨住08年立法會選舉報名結束,各候選人開始展開其競選工程。馬沙身為會計界業內人事,當然要關心一吓會計界功能組別的選情。雖然今屆出選人數比上屆九男女為少,但仍有5人之多,且各具獨特優勢,論選情之激烈,絕對是各功能組別之冠。今屆5名候選人分別有角逐連任的譚香文,以及陳茂波龔耀輝、黃宏泰及嚴定偉。

首先,馬沙要讚一讚會計師公會。為讓會員對各候選人有更深入認識,公會今屆將舉行兩場選舉論壇,會員更有機會以書面向各候選人提問。為滿足未能親身到達論壇的會員,公會更在其網站為未能親身到論壇的會員提供現場視像直播。首個論壇前晚舉行,除早已表明不會出席的嚴定偉,其餘4人均有出席。

論壇中激烈內容,昨天在各大報章已有報導。馬沙今天就想講吓一啲個人睇法,先講親身參與的會員,估計人數不夠200人,而且大部分為年過40歲的會員。嗰啲天天在網上討論哪一個候選人比較好的年輕會計師們,齋睇各候選人的宣傳單張係唔夠,請親身聽吓佢哋言談,先好投票。馬沙去完前晚近4個小時的論壇,就對各候選人有另一番新感受。

先講嚴定偉,唔肯同會員見吓面及接受提問,叫人點投票俾你。

爭取連任的譚香文,前晚的表現著實教人失望,作答時答案近乎千篇一律,無甚新意且經常答非所問,可謂露晒「底」,下次論壇再係咁,票源肯定流失不少。

上屆以幾十票之差落選的陳茂波,準備充足,對答穩健,雖自說係獨立候選人,但其建制派身份,不言而喻。

青年才俊龔耀輝,對答尚算不錯,惟其EQ真係要加以改善一吓,前晚幾度目露凶光,失分不少。另外馬沙亦好想知龔生在論壇進行其間,成晚喺台上食乜,有欠禮儀,知否台下所有選民正在捱肚餓。

全晚最令馬沙驚喜的反而是黃宏泰,此君成晚玩棟篤笑,但笑裡藏刀,字字珠璣,3名對手都曾被其戲言所傷,絕對係今屆不能忽視的黑馬。

最後馬沙希望公會下一場能為會員準備一些餅乾以作充饑,我哋要6點到場,成10點完場先食飯,得一支水,真係有情飲水飽咩!

(2008年8月7日刊於《am730》)

(以上為完整版 Uncut Version)


******************************************************************************

******************************************************************************

後話:

以下為馬沙在論壇開場前的小小個人觀感:

龔耀輝好識做,站在登記站前,馬沙一完成登記,即上前同馬沙握手同派咭片,抵讚!

譚香文在會場四圍同人打招呼,亦有主動上前同馬沙握手,基本功夫叫到做足!

黃宏泰論壇開始前,馬沙完全唔知邊個係佢,下場應該要主動啲,我哋依啲所謂遊離票,其實好易攞!

陳茂波真係好鬼現實,四大的合伙人一到就即上前打招呼,其間雖曾主動上前同在坐會員握手,同坐在馬沙前幾排及後幾排的會員握手,卻偏偏跳過馬沙,馬沙不似有能力幫閣下拉票的合伙人嗎? 淨係呢樣我就扣你好多分!

會後同幾位同業晚飯,各人不約而同表示可能改投冷面笑匠黃宏泰。

最後,馬沙希望各位會計同業,預留時間出席下一場 (下場係九9月2日 6 p.m. – 9 p.m. ) 選舉論壇,就算未克參加,都想想辦法上公會網站睇睇現場視像直播。有問題想在下場提問又未克參加的會員,可在此留言,馬沙可嘗試在下場代為提問,謝謝!

今天開始至9月7日,馬沙將設一個網上虛擬投票比大家作參考!


註: 請各候選人或相關人士勿再嘗試以電郵約見馬沙,選舉完結前,馬沙絕不會與各候選人或相關人士私下聯絡。

星期二, 8月 05, 2008

仲夏的婚禮

講到結婚,馬沙就好怕在盛夏收到請帖。對男士來說,要在30幾度高溫之下,穿著整齊西裝或禮服出席婚禮,真係有苦自己知。

多年前有老友選擇在炎夏舉行婚禮,馬沙仲係兄弟團其中一員。好記得當天大清早到停車場佈置花車時,汗流夾背,已心知不妙。之後去到新娘家門前,30幾度高溫及穿著整齊西裝的情況下,在那條舉目無窗的走廊,接受姊妹團那半小時早設定好的各種難關,簡直比死更難受。還記得禮成之後,眾兄弟第一時間走落樓下公園,脫去上身所有衣服,互相淋水降溫。一班兄弟同聲話,以後唔應承人在炎夏做兄弟。講就咁講,原班兄弟第二年炎夏,又一樣為兄弟再披甲上陣。

除了炎夏之外,馬沙個人就唔係咁喜愛在工作天出席婚宴,尤其地方偏遠的飲宴場地。

早陣子收到老朋友喜帖,打開一睇,心即下沉。因為婚宴安排在周三晚上,而地點在迪士尼樂園酒店。幾位老死齊聲話,如果唔係想見識下所謂夢幻婚禮,真係唔會去。喺工作天在如此偏遠的地方設宴,著實有好多唔好處。由於要考慮長者比較早睡、小童及其他賓客第二天要上學及上班,所以婚宴晚上7時半就開始。問題係一般打工仔,怎能準時去到迪士尼呢? 另一令馬沙不滿的是,婚宴進行其間,三番四次要請 (即係強迫) 賓客排隊上台同米奇老鼠及其他卡通人物影相。說實話,我千里迢迢趕到去,都係比面你同想安安樂樂食餐飯。

(2008年8月5日刊於《am730》)