顯示包含「信仰、生活」標籤的文章。顯示所有文章
顯示包含「信仰、生活」標籤的文章。顯示所有文章

星期一, 10月 19, 2020

任性

雨,很冷酷;風,很無情。我坐在公園裡的椅子上,閉上眼睛,任由時間在我身邊溜走。在我腦海深處,刻烙着一個微小的身影,已然矇糊。這應該是我最後一次見妳的畫面。

現在想起,百般滋味湧上心頭,如果思念是一種聲音,我想,妳應該震耳欲聾。

往事像潮水般湧現掠過腦海。第一次遇見妳,是多麼難忘,多麼美好。妳美麗的瞳孔綻放出獨特的光芒,令我心動。當初的我天真地以為世上會有白馬王子和公主,所以和妳在一起。當時妳住在山頂,妳家很富有;而我很貧窮,住在山下。我媽跟我說:「你和她在一起是沒有結果的,你們並不是同一個世界的人。」。我並沒有理會,堅持每天徒步上山,只為見妳一面。

當妳的父親知道後,送了妳到外國讀書,不想妳再找我。之後我和妳相距千里,雖然關係上和妳在一起,但實際上卻看不到妳。


直到一天,衝動的我終於按耐不住退了學,用家中剩下的一些積蓄,買了一張單程機票飛去找妳。途中我不斷回味着以前我倆在一起的時光。一想到很快就可以再見到妳,一想到妳見到我時驚喜的微笑,一想到可以再次聽到妳跟我說我愛你,我不禁笑了又笑。就在我猶豫着用什麼方式出現在妳面前時,不知不覺已經到達了。再過不久就能再見到妳,我一想到這裏,嘴角就忍不住向上仰。


本以為是一場美麗的邂逅,但現實卻是殘酷的。我突然收到妳要結婚的消息。這突如其來的打擊令我感到心碎,我的世界發出陣陣破裂的聲音,我崩潰了......,到頭來只是一場空歡喜!


這是夢嗎?我抬頭看著天空,雨突然降下。雨是真的;風也是真的,原來這一切都是真的。我幾經掙扎才接受了現實。


到了妳結婚當天,我扮作賓客,遠遠地觀望着妳!看到妳身上華麗的婚紗,名貴的手袋和妳罕見幸福的笑容,我漸漸明白我們之間的距離。雖然與妳相隔幾步之距,但這應該就是最遙遠的距離吧!見得到,卻愛不起 ......


「讓妳嫁給一個能夠給妳幸福的人,也算是我給妳的祝福吧!」,我心裏苦笑 ......


或許,我們曾經歡喜過;
或許,我們曾經在乎過;
或許,我們曾經相愛過;
但現在一切都結束了。


跟妳在一起,或許是我最後一次任性吧!


雨,停下了;風,也平靜了。我嘆了一聲,定一定神,站了起來,走了 ...... 而妳,乜隨著風雨,在我生命中消失了 ......



馬沙 facebook :  https://www.facebook.com/charblogger02

星期五, 9月 25, 2020

低調

 

早兩日某討論區,有位無知嘅小妹妹,話揾男友一定要有車,無奶油拍拖要逼公交。準男友要有車不突止,仲至少要揸 MB 或 Bimmer 先似樣,佢話揸架日本錢七,比親戚、朋友見到真失禮!

咁啱諗起老友 Billy,條友仔平日返工出入,都係揸圖中上面嗰架所謂唔入流嘅日本慳油錢七。佢話成日都比啲女同事、新相識嘅女仔寸,話佢接近40歲人,仲係揸呢啲日本老人車,無錢買歐洲車,至少都買架日本跑車揸啦,仲寸佢揸架咁 cheap 嘅日本車點出去溝女。

對於以上難聽嘅說話, Billy 都好少反駁,因為每到假期及節日,佢都會改揸圖中下面嗰架車。你無睇錯,Billy 另一架車係「細牛亅。

其實對 Billy 嚟講,隻細牛邊算貴,佢兩架車泊緊嘅呢兩個位處九龍市中心嘅子母車位,應該比兩架車加埋仲貴。


星期四, 7月 02, 2020

頂妳唔順

 

肥仔會計師 S 早兩日終於以慶祝1/7回歸為理由,約到公司新入職女神 B 小姐食晚餐,開心到飛起。S 即刻喺意大利餐廳 Osteria 訂好枱,仲諗住晚飯後再過隔離 Hari's 酒吧直落談心。

S 早早到達 Osteria,等 B 小姐來到,先來一杯白酒,輕嘗各類芝士,S 向 B 小姐分享公司各類需要特別注意嘅地方,依人連聲感謝,S 感到今次十拿九穩。

換過一杯紅酒,兩人依舊言談甚歡。正當 B 小姐份慢煮羊肋排上桌及準備享用之際,突然碰一聲,原來係 B 小姐嘅名牌手袋跌到地上!

B 小姐隨即從地上執返起自己嘅手袋,之後對住個手袋不斷自言自語曰:「對唔住呀!你有無事呀!跌得痛唔痛呀!你有無跌花邊到呀!心痛死我啦! ......... 亅

S 睇到 B 小姐如此反應,登時嚇得目定口呆。S 飲一大口紅酒定定驚,隨即對 B 小姐說:「妳真係幾可愛同特別!」。

B 小姐好開心地回應:「係咩!亅。

其實呢 ..... S 心嗰句係:「妳真係 CLS! 亅。

食完甜品,S 禮貌地送 B 小姐上的士。之後 S 即刻箭步上返去酒店 Hari's 酒吧,call 返自己支 Macallan 12 years 出來,自斟自飲。相熟經理 Alan 見到 S 自已一個獨飲,忍唔住寸 S :「乜你今晚唔係約咗人落嚟談心咩?」

S 回得有少少激動:「我真係頂唔順依家香港啲女仔!亅

經理 Alan:「喂!咁你唔入去同你老友馬沙飲,條友仔同幾個靚女喺埋邊嗰枱玩緊喎!亅

S:「你唔早响?亅

經理 Alan :「見你訂兩位,以為你等緊女嘛!亅

S:「x@yzxx 」


星期日, 6月 14, 2020

黃金年代

 

女:「為甚麼好多有老婆嘅男人都喜歡攪婚外情?」

男:「因為男人多數都喜歡被崇拜被仰慕嘅感覺,而這種感覺在他們年少時都缺乏!亅

女:「為甚麼呢?亅

男:「其實好簡單!大部分男人,年青時追女仔,為女仔做好多嘢,付出的多但收穫很少,而且好多時都被置之不理。可是隨著年日,男人開始成熟穩重,發覺乜都唔駛做,竟然有年青貌美女人向其投懷送抱........ 亅

女:「咁就要背叛身邊人?」

男:「因為男人多數錯誤地認為,他們人生的黃金年代才剛剛開始 .... 」


星期一, 1月 13, 2020

人情味

 

這並不是一隻名錶,其價值在於一份人情味。

一隻由客戶於10年前親手示範裝嵌後送給我的禮物,見證住客户間錶廠呢十幾年嘅成長!

感謝客户由公司成立至今呢十幾年,對我嘅信任。


星期五, 10月 18, 2019

吃苦

 

女人哭著說:「求求你跟我結婚吧!」

窮酸男人無言以對:「......................」

女人哭著説:「也許我願意跟你一起吃苦呢?」

窮酸男人痛苦地回答:「但是我不願意!」


星期二, 6月 25, 2019

我要我們在一起

唉呦~~~唉呦~~~唉呦~~~唉呦~~~唉呦~~~
你說~~~你說~~~我們~~~要不要在一起~~~


星期一, 6月 24, 2019

膽

 


我發覺每一次鼓勵香港單身男士,放膽去追自己喜歡嘅靚女時,好多港男都喜歡留以下留言:-
1) 先決條件要靚仔;
2) 先決條件要有錢。

我經常鼓勵人主動去識女仔,唔好永遠覺得要乜鬼靚仔、有錢先可以成事,試咗未必會贏,但唔試就一定會輸。

附圖為真實個案,對女方嚟講男嘅唔止無錢,直頭比人叫窮酸。靚仔來講,我真係唔識欣賞,如果有女仔真心覺得佢靚仔/型仔,麻煩請話聲我知,等我調整下心理,再考慮一下是否要轉呢個style 🙏🏻


馬沙 facebook :  https://www.facebook.com/charblogger02

星期日, 6月 23, 2019

回眸

 當大家係 Starfuxks 排緊隊買咖啡無所事事時,假若排你前面嘅靚女件衫個牌子牌突哂出來,你會否向佢作出愛心提示,甚至主動提出協助幫手整理一下呢?


記住整完之後一定要好似最後一格咁,扮到若無其事繼續排隊先叫型,千萬不要乘勢追擊去抄牌。

如果神女有心,應該會好似最後一格咁,事後不停偷偷回望你,若果真係咁就代表 ........ 飛雲嚟喇 .........


星期三, 12月 05, 2018

等


男:「妳知道嘛,緣份是需要等,但是我一向不喜歡等!」

女:「那麼你喜歡什麼呢?」

男:「我喜歡妳!」



星期四, 11月 29, 2018

夢伴


我真論盡,我頭先去吃雲吞麵時,見隔離枱碟豬手咁香,問人好不好吃,想叫多碟小食,點知個男士話請我吃,我不小心搞到人地件衫全部都係豬手汁 ......

情急之下,只想到幫他除下被豬手汁弄污的白色裇衫。當鈕扣被打開,目測近42吋的胸肌即時展現我眼前,那一刻我即時紅都面哂 .........

Hm.... Hm.... 我腦裏面出現咗好多畫面,幻想自己跌入對方嘅懷裡,強大嘅胸肌正好貼在我臉上,2 人上演臉紅心跳的「胸咚」畫面.... 思潮漂遠~~ 突然間聽到佢嘅聲音。。

我心入面, 就好似觸電一樣, 有十萬伏電流經過。 面紅紅像火燙,似煮熟嘅蝦子。我只希望現在天黑,佢睇唔清我紅酒般嘅臉~~~

呢一刻,我更希望月光被遮住了,周圍突然變暗。我可以用手電筒一邊照著腳下,一邊小心地移動腳步 .........

呢幾秒鐘我同42吋胸肌嘅佢, 對望咗幾秒鐘。 身邊嘅景物漸漸淡出, 就好似王家衛電影一樣, 呈現一種遊離狀態, 身邊嘅喧鬧聲, 餐廳裏嘅客人,全部喺我身邊淡出,我眼裏面只有前面呢個男人... 我只想同佢月光下, 拎住手電筒,去探索花園... 深入探索......

一切都進行得非常順利,幾乎可以説是完美的。或許有點過分完美。他的胸肌結實而富有彈性,或許稍微流著溫泉湯水,和初秋月光的皎潔,也更添加了喜歡和複數的對象同時擁有的破裂關係........

佔有? 不! 放棄? 不! 我不想,也不捨得。 但是我忽然間想起, 我倆還未開始, 也很難談得上開始的邊端。我什麼也想不到, 腦內一片空白, 我只想這一刻好好和你在一起, 好好看著你, 每一分每一秒。 是前進,或是後退甚麼, 我已經不想去管, 因腦袋突然 cannot function ...... 我腦內想起王菲的歌:「實在是愛你,雨天沒有你,並不是雨天。 」

如果這刻是永恆便好了~~ 我......你.....

他終於開口問:「喂!你會不會是很久沒做這事?」

「好可憐。」他說完這三個字,再溫柔地撫摸我的頭:「好可憐」...... 就走了 .......

我腦子𥚃反覆著他的話,好可憐....... 被他如此這麼一説,感覺自己真的.....很...可...憐。

完

註: 此文為接龍式集體創作!
特別嗚謝網友 Ho Siu Chi (內文中「我」) 起題, Michelle Wong 績極接龍!

星期日, 5月 20, 2018

信者失救


我個客2008年用二千萬買嘅樓,今日銀行估值近四千萬。而事實上,個物業下星期五會以四千萬成交。

未有樓、未安居樂業嘅各位年青儍西,你地繼續聽班政棍、環保撚老點,唔好比政府填海、用效野公園地起樓。繼續係咁叫政府收返粉領高爾夫球場、叫政府收返每日150人入境啦。

只有自己有樓住嘅離地環保撚,才會提議保留郊野公園土地比乜柒「六班月飄蟲」住都唔L肯比人住!

你地即管繼續無止境咁拖、爭吵落去啦,過多十年必定仍原地踏步,到時你班年靑儍西三、四十歲連劏房都住唔起。

到嗰陣時教你班儍西乜都反對嘅有樓人士會點呢,層樓到嗰陣時當然因為越多人越唔夠地之下水脹船高。到嗰陣時一個今日連港女都睇唔起嘅兩房單位分分鐘都過千萬,佢地賣樓套現夠哂搬去外國享受退休生活。

你班人到中年嘅儍西,睇怕到時仍然係到日日儍叫做十九幾廿年嘢都未儲到首期上車囉!


星期二, 5月 08, 2018

星期四, 6月 29, 2017

三角關係

愛情呢家嘢,好多時就係咁,好講 「Timing」。要適當時間遇上適當嘅人,即所謂Mr. Right, 談何容易?

對於三角關係,我嘅人生導師 Michael 及 Gabriel 由細到大咁樣教我:-
Gabriel 一向主張我應該趁人家戀情仲未成熟時,從人家手中將所愛嘅人搶返嚟,仲日日不停係我耳邊講埋好多橫刀奪愛嘅方法。

Michael 則成日同我講,「愛」係要講道德!一段關係之間,永遠只可以容納兩個人。既不能讓第三者加入破壞一段關係,更絕不能做第三者去拆散一段關係。你今日奪人所愛,他日必被人奪去你嘅最愛。

講到感情呢方面,我就比較 buy Michael 嘅理論。正所謂「剃人頭者、人亦剃其頭」也,所以做人真係要學識珍惜眼前人。

星期四, 3月 16, 2017

千丈之堤,以螻蟻之穴潰。 《韓非子》

幾宏偉嘅堤圍,都可以被螻蟻巢穴引致倒塌。

在職場上,不要輕視任何小事,要防患未然。若小事疏忽,隨時可招至不能彌補的局面,也無法完成大事業。

好嘅專業會計師,就是可以在賬目出現問題初期時發現問題之所在,根據各項準則並作出適當更正。而唔係等埋數之後先發現種種入賬錯誤,再進行修補工作。

星期六, 11月 19, 2016

以備待時,以時興事。《管子》

無論打工、做生意,如果沒有充足準備,好少會得到成功。不過,除咗要準備充足外,更重要嘅係找得住時機,否則,即使有好嘅準備,最後還是免不了面對失敗。

人生,至少總會有一兩次機會出現吧,問題在於機會出現時你能否察覺得到。時常帶著負能量嘅人,係好難嗅到機會嘅氣味。

現在好多人話「機會係留給有凖備嘅人」,我個人認為,「機會只會展現給充滿正能量嘅人」。

星期五, 3月 18, 2016

韜晦無露圭角

韜晦無露圭角
《宋名臣言行錄》

在一間會計師行做小薯,能否上位,可能由一位帶住你嘅 Senior 說了算。在此時千萬別在Senior 面前扮勁,咁做不僅會被Senior 討厭,分分鐘仲要永遠接爛job。

至於幾時才能顯露閣下的「圭角」?
至少等你擔上 AIC 先炫耀吧!

星期二, 3月 15, 2016

下午茶趣聞一則

今日中午去公會上CPD,完咗一個人係灣仔一間茶記食下午茶,而呢個時間搭枱係理所當然⋯⋯

食到一半,同枱有兩個互相認識嘅食客有以下對談⋯⋯

食客甲:「喂!平壤係咪係泰國?」
食客乙:「你都低能!平壤係越南呀!」
食客甲:「哦!原來係越南......」

我望一望同枱食客丙,佢欲言又止,我比咗個堅定嘅眼神示意食客丙咪多事。而食客丙似乎已經心神領會我嘅意思,無開口講過一個字,繼續食佢碗腩麵。

隔咗一陣子,我同食客丙再次四目交投,相方都差啲忍唔住笑咗出聲!

有時人與人之間,錯對其實唔係咁重要。至少今日,一枱四個茶客都食得開開心心,四贏!

星期五, 7月 24, 2015

人渣

正常一個有血性嘅人,即使從未受過任何教育,只要智力唔係低於猿猴,見到有人墮樓,一定會第一時間call 白車將墮樓嘅人送院救治。只有人渣先會講得出女學生當時只係似瞓咗覺、可以自行坐輪椅入院呢啲鬼話。


乜嘢叫人渣? 人中之渣滓也!

相比起垃圾,渣滓絕對比垃圾更不堪入目。人中垃圾,至少有其回收價值,最多只能判定為廢柴一條!人渣通常冷血,無視生命之寶貴!

在基真小學女學生墮樓事件中,就充分突顯咗一班教育界嘅人渣高管。根據呢班人渣係死因庭上比嘅口供,在在證明咗基真小學呢班人渣校長、副校長、訓導 主任及一干有關人等,死不悔改,大話連篇,絕對係人渣中嘅人渣。為咗一校之譽,呢班人渣竟然可以置墮樓女生生死於不顧。雖然以表證嚟睇,即使班人渣當日有 即時叫喚白車,墮樓女生都未必一定救得到,但班教育界人渣當日所思所想,其冷血程度,就令人心寒!

事件過後,班人渣不但沒有對自己做過嘅事感到羞恥,向女學生父母作出道歉,仲竟然夠膽死振振有詞咁講已經跟足程序去做,真係人無恥則無敵。即使到今時今日,呢班教育界人渣,仲係到將責任歸咎於教育局欠缺程序指引,真係唔鬧爆你呢班人渣都對唔住自護家族!

作為教師,仲要係基督徒,啲愛心究竟去咗邊到?如果你班人渣自己嘅仔女墮樓,你班人渣仲會唔會嘥時間去硏究程序指引?

正常一個有血性嘅人,即使從未受過任何教育,只要智力唔係低於猿猴,見到有人墮樓,一定會第一時間call 白車將墮樓嘅人送院救治。只有人渣先會講得出女學生當時只係似瞓咗覺、可以自行坐輪椅入院呢啲鬼話。而法醫事後亦證明,女學生當時頭骨粉碎、身體多處嚴重 骨折,雙腳亦扭曲。

基真小學嗰位學務總監更加離普,明知班人渣喺呢件事上,處理嚴重失當,竟然不向呢班人渣斬立決。反之,在死因庭結案後,仲要向公眾表示要睇下判詞先決定炒唔炒班人渣,同幫凶有乜分別,試問學校如何面對女學生父母,還小妹妹一個公道?

另一令馬沙感到十分奇怪嘅係,事件發生之後,基真小學在校班家長做過乜?其家教會又做過乜?學校由一班人渣主事,家長仲可以放心將自己子女交托比呢班人渣,當呢件不幸嘅事從未發生過?比著係我,學校唔炒哂呢班人渣,我第一時間幫自己子女轉校!

正如我在文首所講,教育局局長「唔得掂」,無樣嘢做得好,但極其量只能叫佢「垃圾」局長。但教育界到處充斥好似基真小學呢班人渣咁嘅人,先至係香港教育嘅大問題!

馬沙現正公開要求,有把口、有支筆嘅人,應盡一分力,同心合力將基真小學校長黃静雯、副校長石玲及高婉華、訓導主任顧美玲與及一干涉事教職員,趕出教育界!

我重申一次,唔止要求基真小學即時解僱,直情要將呢班教育界人渣趕出教育界!

(2015年7月24日刊於 全民媒體) 


馬沙 facebook :  https://www.facebook.com/charblogger02


星期一, 7月 20, 2015

升降機驚魂

馬沙閱人無數,其實單從妙齡少女嘅眼神同說話嘅語氣,已經肯定該妙齡少女係 Crazy Wong 嘅姊妹 Daisy Wong!


今日中午去灣仔胡忠大廈開會,我入到升降機,當時入面已經有一男一女,男嘅成個張智霖咁款,我懷疑佢就係自稱 IFC 張智霖嘅葉朗程,固且就叫佢灣仔葉朗程。女嘅年若40歳,有少許似田蕊妮,咁叫佢灣仔大塊田啦。

我按下關門制,升降機門正在關上,突然遠處傳來一陣女聲:「唔該等埋!」

我在這電光火石之間,按住開門制,門即時隨隨打開。就係咁,一位妙齡少女就步入升降機。我再次按下關門制,升降機門再一次關上。

升降機一開行,妙齡少女向灣仔葉朗程說:「你今日食咗 lunch 未?」

大概灣仔葉朗程習慣咗係街上比女搭訕,固扮哂 cool 魔唔出聲只報以一個張智霖式型棍笑容。

妙齡少女突然癲咗咁好大聲再問灣仔葉朗程:「我問你食L咗 lunch 未呀?」

灣仔葉朗程隨即口震震,霸氣盡失咁回答:「食…咗…食…咗…啦!」

妙齡少女轉過頭再問灣仔大塊田:「妳食咗 lunch ?」

灣仔大塊田反應好快,第一時間回答:「食咗,唔該!」

妙齡少女轉身再問企在一旁嘅馬沙:「咁你呢?食咗 lunch 未?」

我答:「緊係食咗啦!咁妳呢?妳又食咗 lunch 未?」

妙齡少女笑住咁答:「食咗!」

正當我想再問:「係邊到食 lunch?」,升降機門突然打開,妙齡少女即衝出升降機,我好記得當時升降機係停喺27樓。

升降機門再一次關上,我偷望咗灣仔葉朗程一眼,佢又再一次成個 cool 魔咁款。升降機到達我要去嘅樓層,我步出升降機前,轉身向灣仔葉朗程問咗本來想問妙齡少女嗰一句:「你係邊到食 lunch?」

灣仔葉朗程比我突如其來一問,反應唔切,淨係吐出一個字:「吓!」

灣仔大塊田即刻忍唔住係咁笑,我就當然笑住咁走!

馬沙閱人無數,其實單從妙齡少女嘅眼神同說話嘅語氣,已經肯定該妙齡少女係 Crazy Wong 嘅姊妹 Daisy Wong!

(2015年7月20日刊於 全民媒體)