星期一, 10月 19, 2015

宵夜出哲學 (二)

其實Becky 都幾慘,佢話佢跟過唔少男人,個個都鍾意中出,但又唔付責任,已經落過4次仔。對上一個話會付責任,但個女出世未夠2年就走咗佬。之後佢唔知講真定講笑,話我咁好人,如果我比到地方佢好好瞓一晚,免費比我中出都無所謂。




某夜,收工已經接近零晨兩點,照舊係砵蘭街串燒店食宵夜。跟以往一樣,先點下七、八串串燒,再自行去隔離7仔買兩罐啤酒。買完啤酒,就搵張靚枱坐。甫坐下,一碟熱辣辣、香味四溢嘅串燒隨即奉上。正當我拎起一串雞軟骨,準備放入口之際,面前突然出現一位年約三十,美貌可人,身穿超短迷你裙,一件超薄低胸背心,仲要真空突哂點嘅中女,手執一支啤酒走埋嚟,問我可唔可坐低,如此美女加上張枱得我一個人,真係搵唔到理由say no!
美女一坐低,就問:「老細,有無工介紹?」。頂!乜依家砵蘭街啲企街生意咁差,要去兜搭消夜客?
馬沙我話哂係流氓會計師,要嘅大把女主動行埋嚟,唔駛cheap 到比錢去嫖呀?即時回應一句:「我有工介紹比妳,我自己就唔駛半夜先收工啦!」
滿以為咁就可以打發呢位美女走,㸃知佢不但無走,仲點起一支煙,一路抽一路自言自語話依家搵食真難,想搵份工交租,搵極都搵唔到。我無理佢,因為晚飯都未食,好Q肚餓,拿拿臨食枱上熱辣辣嘅串燒。過咗大約兩分鐘,呢位美女又再次開口問:「我好肚餓,你可唔可以請我食嘢?」。係酒吧比女士問:「Can you buy me a drink?」就試得多,係街邊比美女問可唔可以buy her 串燒真係第一次!
講真,一串串燒值得幾錢?況且一個女仔可以食得落幾多串?於是我就豪氣咁答:「枱面上啱食就拎!唔啱食就自己出去揀!」。美女聽完就好興奮咁講:「呢隻好似好好味喎!」,跟手就拎咗我枱上一串雞腎放入口。就係咁,我地就打開話閘,一邊食一邊吹水!
原來呢位美女叫Becky,今年28歳,有一個4歲女兒,女兒生父已走佬。Becky 同我講,已經無哂錢交租,無地方住先周街坐。我問佢點解唔返父母屋企,Becky 話,年輕時經常比父親虐打,鬧哂大交後離家出走,父親係唔會比佢返屋企住。
Becky 仲話佢周圍搵工,侍應、酒樓知客、售貨員乜都問,都無人請。我好奇問:「妳咁靚女,售貨員依家咁缺人,點會無人請?」。Becky 答我因為佢得著住嗰對拖鞋,連鞋都無一對,所以無人肯請!佢隨即申出一雙美腳比我睇,証明佢無講大話。Becky 再講,好想搵到一份正職,有錢交租之餘,可以俾錢養自己個女。如果再搵唔到工,唯有去附近夜總會做陪酒。我忍唔住回應,妳有個咁細嘅女,為咗個女唔好做陪酒呢啲工啦。
老實講,以Becky 嘅姿色,尤其佢笑嘅時候真係好索,加上身材又好,好果佢著起套suit遊走中環,真係唔憂無仔追,真係唔係好明點解會淪落至此。再傾落去,Becky 話自己依家老咗已經唔靚,佢話自己22、3歲時自己都覺得自己好靚,好多人追。
其實Becky 都幾慘,佢話佢跟過唔少男人,個個都鍾意中出,但又唔付責任,已經落過4次仔。對上一個話會付責任,但個女出世未夠2年就走咗佬。之後佢唔知講真定講笑,話我咁好人,如果我比到地方佢好好瞓一晚,免費比我中出都無所謂。
時光飛逝,眨下眼已經傾到零晨四點,我開始攰,都係時候返屋企瞓覺。臨走前我放低咗二千蚊在枱上,我同Becky 講:「今晚租間時租酒店沖個涼好好瞓一覺,明天一早去買對鞋同買件新衫,為咗妳個女,正正經經搵份售貨員工做,希望在明天!」
離開之後,我一個人行去先達搭小巴途中,我反覆問咗自己幾次,今晚係咪比人呃咗二千蚊。我知道我最終唔會有答案,只能同自己講,如果我嗰二千蚊能夠為Becky 帶來一個希望,我覺得值!
(2015年10月12日刊於 全民媒體

星期五, 7月 24, 2015

人渣

正常一個有血性嘅人,即使從未受過任何教育,只要智力唔係低於猿猴,見到有人墮樓,一定會第一時間call 白車將墮樓嘅人送院救治。只有人渣先會講得出女學生當時只係似瞓咗覺、可以自行坐輪椅入院呢啲鬼話。


乜嘢叫人渣? 人中之渣滓也!

相比起垃圾,渣滓絕對比垃圾更不堪入目。人中垃圾,至少有其回收價值,最多只能判定為廢柴一條!人渣通常冷血,無視生命之寶貴!

在基真小學女學生墮樓事件中,就充分突顯咗一班教育界嘅人渣高管。根據呢班人渣係死因庭上比嘅口供,在在證明咗基真小學呢班人渣校長、副校長、訓導 主任及一干有關人等,死不悔改,大話連篇,絕對係人渣中嘅人渣。為咗一校之譽,呢班人渣竟然可以置墮樓女生生死於不顧。雖然以表證嚟睇,即使班人渣當日有 即時叫喚白車,墮樓女生都未必一定救得到,但班教育界人渣當日所思所想,其冷血程度,就令人心寒!

事件過後,班人渣不但沒有對自己做過嘅事感到羞恥,向女學生父母作出道歉,仲竟然夠膽死振振有詞咁講已經跟足程序去做,真係人無恥則無敵。即使到今時今日,呢班教育界人渣,仲係到將責任歸咎於教育局欠缺程序指引,真係唔鬧爆你呢班人渣都對唔住自護家族!

作為教師,仲要係基督徒,啲愛心究竟去咗邊到?如果你班人渣自己嘅仔女墮樓,你班人渣仲會唔會嘥時間去硏究程序指引?

正常一個有血性嘅人,即使從未受過任何教育,只要智力唔係低於猿猴,見到有人墮樓,一定會第一時間call 白車將墮樓嘅人送院救治。只有人渣先會講得出女學生當時只係似瞓咗覺、可以自行坐輪椅入院呢啲鬼話。而法醫事後亦證明,女學生當時頭骨粉碎、身體多處嚴重 骨折,雙腳亦扭曲。

基真小學嗰位學務總監更加離普,明知班人渣喺呢件事上,處理嚴重失當,竟然不向呢班人渣斬立決。反之,在死因庭結案後,仲要向公眾表示要睇下判詞先決定炒唔炒班人渣,同幫凶有乜分別,試問學校如何面對女學生父母,還小妹妹一個公道?

另一令馬沙感到十分奇怪嘅係,事件發生之後,基真小學在校班家長做過乜?其家教會又做過乜?學校由一班人渣主事,家長仲可以放心將自己子女交托比呢班人渣,當呢件不幸嘅事從未發生過?比著係我,學校唔炒哂呢班人渣,我第一時間幫自己子女轉校!

正如我在文首所講,教育局局長「唔得掂」,無樣嘢做得好,但極其量只能叫佢「垃圾」局長。但教育界到處充斥好似基真小學呢班人渣咁嘅人,先至係香港教育嘅大問題!

馬沙現正公開要求,有把口、有支筆嘅人,應盡一分力,同心合力將基真小學校長黃静雯、副校長石玲及高婉華、訓導主任顧美玲與及一干涉事教職員,趕出教育界!

我重申一次,唔止要求基真小學即時解僱,直情要將呢班教育界人渣趕出教育界!

(2015年7月24日刊於 全民媒體


馬沙 facebook :  https://www.facebook.com/charblogger02


星期一, 7月 20, 2015

升降機驚魂

馬沙閱人無數,其實單從妙齡少女嘅眼神同說話嘅語氣,已經肯定該妙齡少女係 Crazy Wong 嘅姊妹 Daisy Wong!


今日中午去灣仔胡忠大廈開會,我入到升降機,當時入面已經有一男一女,男嘅成個張智霖咁款,我懷疑佢就係自稱 IFC 張智霖嘅葉朗程,固且就叫佢灣仔葉朗程。女嘅年若40歳,有少許似田蕊妮,咁叫佢灣仔大塊田啦。

我按下關門制,升降機門正在關上,突然遠處傳來一陣女聲:「唔該等埋!」

我在這電光火石之間,按住開門制,門即時隨隨打開。就係咁,一位妙齡少女就步入升降機。我再次按下關門制,升降機門再一次關上。

升降機一開行,妙齡少女向灣仔葉朗程說:「你今日食咗 lunch 未?」

大概灣仔葉朗程習慣咗係街上比女搭訕,固扮哂 cool 魔唔出聲只報以一個張智霖式型棍笑容。

妙齡少女突然癲咗咁好大聲再問灣仔葉朗程:「我問你食L咗 lunch 未呀?」

灣仔葉朗程隨即口震震,霸氣盡失咁回答:「食…咗…食…咗…啦!」

妙齡少女轉過頭再問灣仔大塊田:「妳食咗 lunch ?」

灣仔大塊田反應好快,第一時間回答:「食咗,唔該!」

妙齡少女轉身再問企在一旁嘅馬沙:「咁你呢?食咗 lunch 未?」

我答:「緊係食咗啦!咁妳呢?妳又食咗 lunch 未?」

妙齡少女笑住咁答:「食咗!」

正當我想再問:「係邊到食 lunch?」,升降機門突然打開,妙齡少女即衝出升降機,我好記得當時升降機係停喺27樓。

升降機門再一次關上,我偷望咗灣仔葉朗程一眼,佢又再一次成個 cool 魔咁款。升降機到達我要去嘅樓層,我步出升降機前,轉身向灣仔葉朗程問咗本來想問妙齡少女嗰一句:「你係邊到食 lunch?」

灣仔葉朗程比我突如其來一問,反應唔切,淨係吐出一個字:「吓!」

灣仔大塊田即刻忍唔住係咁笑,我就當然笑住咁走!

馬沙閱人無數,其實單從妙齡少女嘅眼神同說話嘅語氣,已經肯定該妙齡少女係 Crazy Wong 嘅姊妹 Daisy Wong!

(2015年7月20日刊於 全民媒體)    

星期五, 7月 17, 2015

不夠幸福

Jasmine 永遠喜歡將每一個男人嘅優點放大再 consolidate,再攞嚟同 Victor 比較,仿佛希望Victor 能夠戰勝所有佢所識得嘅男人,咁樣先配得上叫「幸福」!


上星期同 Jasmine 食飯, Jasmine 同我講佢發覺嫁咗比 Victor 之後,一啲都唔幸福,我當然即刻問下佢原因!

原來 Jasmine 感到不幸福嘅原因,係因為 Jasmine 愛比較。當好友老公搵錢比 Victor 多,Jasmine 就嫌 Victor 搵得少。當同事揸嘅車靚過自己嗰架,Jasmine 就嫌 Victor 無能力換架比好友靚嘅車。見到年輕女同事嘅男友經常送花又送小禮物,Jasmine 就嫌Victor 唔夠細心。同Victor 結婚時明明就話住二手樓無問題,依家見身邊個個朋友結婚都住新樓,就日日怪 Victor 無能力換新樓。

Jasmine 永遠喜歡將每一個男人嘅優點放大再 consolidate,再攞嚟同 Victor 比較,仿佛希望Victor 能夠戰勝所有佢所識得嘅男人,咁樣先配得上叫「幸福」!

至於 Victor 係一個點樣嘅男人?

依馬沙嘅觀察,Victor 絕對係一等一好男人!Victor 雖不算俊朗不凡,但以 Victor 40之齡,點睇都仲係型棍一條。雖不是富二代,但話哂都係靠自己能力,年薪過二百萬中小企老闆。雖未有法拉利、大牛呢類超跑,但都有一架 Benz E Class 及一架豪華7人 van。雖不懂花言巧語,但每逢生日、情人節、各紀念日都會同 Jasmine 一起慶祝。

馬沙以一個局外人身份去睇,Jasmine 生活比上可能不足,但比下肯定卓卓有餘。而事實上 Victor 喺生活上已經對Jasmine 百般遷就,家中所有大小事務,幾乎都由 Victor 負責處理。
講到呢到,馬沙唔知各位看官認為,依表面證供睇,Jasmine 能否稱得上算幸福?
當我聽完 Jasmine 力數 Victor 之後,我就咁樣同 Jasmine 講:「妳與其滿口埋怨,咁鬼辛苦,點解唔同 Victor 離婚?」

Jasmine:「我又無咁諗過喎!都係講下遮!」

馬沙:「#%~¥#….」



今日馬沙想同各位拍緊拖嘅女仔及人妻講,人其實係由好多唔同嘅優點及缺點集合而成嘅怪物,男人係咁,女人都一樣。如果要比較,就整體去比較好了,妳 絕對不能喺幾十個男人身上抽取其優點,然後拎呢幾十個不同嘅優點去同自己男人去比較,如此這般,妳呢世都好難感到有丁點兒幸福。當然,如果可以的話,不去 作呢類無謂比較就更好,免得日後失去了才懂得珍惜!

(2015年7月17日刊於 全民媒體)  

各位讀者朋友,因為之前個FB 戶口被鎖,舊專頁已隨舊FB 戶口一同報癈,變咗太空垃圾! 以下呢個以「飛機」做封面的才是最新『馬沙 – 流氓會計師』專頁!

馬沙facebook :  https://www.facebook.com/charblogger02


星期四, 7月 16, 2015

Facebook 愛戀


初出茅廬的Alice,一直暗戀公司其中一位經理 Karl,自她在Facebook add 咗 Karl 之後,經常留意 Karl Facebook 內的感情狀況。

她看著 Karl 由戀愛中轉返去單身,經過一段時間再由單身轉為戀愛中,Alice 始終未敢向Karl 表白。

Alice 心想,Karl 單身嗰一段時間中,很少在我 Facebook 回應,大概 Karl 對我一點感覺都沒有吧!

Alice 在 Facebook 見到 Karl 再次戀愛中,她感覺自己失戀了,今天向老闆辭職!

星期四, 7月 09, 2015

ACCA member 喜訊

《ACCA member 喜訊》


HKICPA 已同ACCA簽署新一份互認協議,並由之前ARA 升格為MRA,新MRA 由2015年7月1日生效!

根據新協議,ACCA member 只要持有公會承認之大學學位,只需完成任何一QP Workshop 及取得Final Examniation (FE) 合格,加上足夠經驗就可以成為HKICPA 會員!

今次份MRA 同之前份ARA 最大嘅分別就係由7月1日起,ACCA member 唔需要再考公會兩科 Aptitude Test!

星期二, 6月 09, 2015

病態老母

好多人成日鬧政府教育政策唔好,計我話不如立例管制一下時下班病態老母好過啦!

呢幾日網上人人都瘋傳嗰個抽中喇叭小學嘅母子,老母陳女士開心到係咁同各大傳媒分享心得,本來好靚仔嘅6歲小朋友就比老母攪到大大對熊貓眼,成個道友咁!

最攪笑係考入喇叭小學明明係靠計分抽獎,既唔駛面試亦唔考慮學過乜嘢興趣班,一切全靠分數及運氣!

呢段新聞出街之後,人人鬧爆老母陳女士,今日就有人寫咗篇叫「非洲鼓小朋友16年後的自白」嘅[潮文],篇文大致係講陳女士個仔「非洲鼓小朋友」 16年後同大家講佢老母做得無錯,教育嘅嘢你班花生友識條鐵咩!作者阿潮最後結語仲咁寫:「如果你有一個這樣的老母,恭喜你、你的人生已經成功一半!」。

馬沙就係Facebook 留咗個言:「其實個小朋友未完小學可能已經轉咗入青山醫院!」

對於有個近乎病態嘅老母,個小朋友16年後變成點馬沙就唔知,不過馬沙今日就好想同大家分享一個真實個案,一個讀某小學名校又有個好似陳女士呢類病態老母嘅小朋友,內心深處究竟諗緊乜!

呢封信係由一位名校小學生,親筆寫比其校長吐心事,封信講乜?先去片:


呢位小朋友話自從一次英文測驗不及格,佢個病態老母就開始攪到佢累到想同「周公」捉棋都唔得!大家認真睇下佢每天的生活程序,真係大人都頂唔順。

試諗一下,我叫你每日由朝早7點起身,不准離開你張工作椅,不准瞓覺,不准食嘢,不准上FB、不准WhatsApp,一天做哂一個星期工作,一直做到上床為止,每天如是,你會否感到很充實?

好多人成日鬧政府教育政策唔好,計我話不如立例管制一下時下班病態老母好過啦!例如強制唔比小學生出去上課外補習班,興趣班都不能超過兩樣之類,返 去以前一切靠學校咪好囉!大家無得課外補習,唔駛出去鬥學琴、棋、書、畫,無得玩嬴在起跑線遊戲,小朋友咪多啲時間玩下,有返個似啲樣(都唔好講快樂)嘅 童年囉!

你可能又會話馬沙唔公平,點解成篇文有病態老母,無病態老豆?好老實,病態老豆唔係無,但一定少之又少!反觀,睇住自己仔女比自己老婆(病態老母)係咁精神虐待,唔敢出聲救自己仔女出火海,仲要出錢助紂為弱嘅幫凶老豆就比目皆是!

(2015年6月9日刊於 全民媒體)  

星期四, 4月 30, 2015

陰陽路

辭職走咗成年先收到佢嘅正式辭職信,公司班管理層究竟同呢位CEO係咪活在不同時空?



呢間上市公司主業做廣告媒體及開發電影業務,可能因為咁,公司班管理層都相當有創意!

根據其2014年6月27日發出的最新一份公司年報,高級管理層一欄清楚寫明「黃偉剛」先生於2014年3月獲委任為公司之行政總裁。即係話公司之核數師在2014年6月27號簽發核數報告前理應見過呢位新上任CEO!

咁靈異之處係乜呢?

根據公司於2015年4月1日所發出之公告,呢位公司新貴原來在上任未夠三個月即2014年5月21日已經跳船!即係話出年報之時,呢位CEO已經跳咗船,點解年報出之前無人知道CEO 已經離職,公司年報高級管理層一欄仲清楚寫明「黃偉剛」先生係公司之CEO呢?

最靈異之處係公司竟然夠膽死係2015年4月1日所發出之公告大大隻字話:「公司係其CEO跳咗船成年嘅2015年3月31日先收到佢嘅正式辭職信」,仲話未有在2014年5月公布佢跳船係「不經意所致」…..

上市公司CEO跳船咁大件事都可以「不經意」,你估請咗個信差返咗兩日工見辛苦粒聲唔出閃咗人咩?

辭職走咗成年先收到佢嘅正式辭職信,公司班管理層究竟同呢位CEO係咪活在不同時空?

呢個簡直係香港上市公司企業管治嘅經典!

(2015年4月29日刊於 全民媒體

星期五, 2月 13, 2015

癲倒是非

我理得會計師公會23個理事係親中定反共,三萬八千名會員都係專業人士,又唔係白痴,民調只需簡單叫會員在「支持袋住先」/「反對袋住先」中二擇其一,結果就必定相當清析。


嘩嘩嘩! 大家知唔知乜嘢叫癲倒事非呀? 尊貴嘅會計業界代表梁繼昌竟然用「會計師公會24個理事中,3個是官員、3個是政府委任,而四大會計師行代表亦較親政府」做理由,話政府逼他轉軚袋住先

係討論之先,馬沙必須指出會計師公會理事會嘅組成。

根據《專業會計師條例》,公會理事會最多由23名成員組成,包括14名當選理事、上屆會長、2名增選理事、2名當然理事(即財政司司長或其代表,以 及庫務署署長或其代表),以及4名由香港特區行政長官委任的業外成員。 即係話,會計師公會理事會係絕對唔會出現梁繼昌所講有24個理事,因為23個已經係理事會成員組成嘅上限! 更加唔係尊貴嘅會計業界代表梁繼昌所講,理事中有3個是官員、3個是政府委任!正確應該係2名當然理事(即財政司司長或其代表,以及庫務署署長或其代 表),以及4名由香港特區行政長官委任的業外成員。

先唔講四大會計師行代表,尊貴嘅業界代表梁繼昌無理由唔知,會計師公會23個理事中常設2個當然理事及4個政府委任的業外成員之目的何在!在會計師 公會理事會中加入2個當然理事(財金官員)及4個政府委任的業外成員嘅目的,係提高會計專業的規管制度,使之公開、有效、具透明度及讓投資者有信心,而唔 係為咗幫政府在會計業界內進行拉票!

再講 ,馬沙個人認為,會計師公會如果不在業界代表投票之前,就政改進行最新一輪民調,聽取三萬八千名會員意向先係極之不負責任。而家會計師公會想聽取三萬八千名會員意見,反被業界代表指不是 ,真係唔知尊貴嘅業界代表梁繼昌乜嘢邏輯!

另外,我理得會計師公會23個理事係親中定反共,三萬八千名會員都係專業人士,又唔係白痴,民調只需簡單叫會員在「支持袋住先」/「反對袋住先」中 二擇其一,結果就必定相當清晰。如果真係有逾半甚至六、七成支持袋住先,尊貴嘅業界代表梁繼昌無理由唔投支持票,此乃順應民意,唔係叫轉軚!

相反,若果有逾半會員「反對袋住先」,我相信會計師公會三萬八千名會員 (包括我) 都相當樂意支持尊貴嘅業界代表梁繼昌就政改投下反對票,因為專業會計師都應該會尊重同業主流意見!

(2015年2月13日刊於 全民媒體)

星期四, 1月 22, 2015

為咗吹大個問題,可以去到幾盡?

成日話儲唔到首期嘅人, 就以上述家庭月入得$24,000為例, 買樓之前嘅一年,能否持續每月儲 $11,000? 如果得, 即係唔駛日日係到小狗「青年事務委員會主席陳振彬」話儲5、6年都儲唔到首期買樓, 因為月儲$11,000, 唔駛3年就夠首期9成按揭上車 (用$300萬計)!


今日睇咗一篇題為「港人不吃17年 方能置業」嘅文章,幾值得大家討論一下。

首先,文章內用家庭年入息中位數同樓價中位數去計算,家庭年入息中位數月入得嗰 $24,000,乜最盡可以買到樓價中位數$489萬嘅樓咩?

我先用會計同業瓜瓜今日am730「誰放棄了靑年」篇文入面個計法︰

『現在樓價高企,在新界買個二手上車盤,怎麼樣也要300萬元左右(但朋友說已經很難找了),假設向銀行借足九成按揭並加借按揭保險,而且購買的樓 宇樓齡不 太舊,還款期可以拖至最長30年期,以目前最優惠利率5.25厘減3.1厘計算(即是2.15厘),每月供款額大約要10,545元。可是,要成功取得按 揭,還需要通過金管局要求的壓力測試,即以現行利率加3厘計算,而每月供款額必須低於其每月入息的60%。按此計算,最低每月入息至少要25,443 元。』

依上述計法,家庭月入得$24,000 ,點買300萬樓,更枉論「港人不吃17年 方能置業」篇文章內用樓價中位數 $489萬嘅樓去計17年呢個低B答案!

如果有人家庭月入得 $24,000又夠膽死諗住去買 $489萬嘅樓,第日跌市燒炭都真係唔駛可憐!其實以一家2大1小家庭,如果月入得 $24,000,供 $300萬嘅上車盤都好辛苦!
馬沙今日再講以下一些絕少人提出o既現實問題︰

首期︰成日話儲唔到首期嘅人,就以上述家庭月入得$24,000為例,買樓之前嘅一年,能否持續每月儲 $11,000?如果得,即係唔駛日日係到小狗「青年事務委員會主席陳振彬」話儲5、6年都儲唔到首期買樓,因為月儲$11,000, 唔駛3年就夠首期9成按揭上車 (用$300萬計)! 如果唔得,咁比你上咗車又如何?你點應付每月供樓$10,545條數?都未同你計每月差响、管理費、水電煤呢啲每月$1,500坐底,即係每月供樓負擔至少要$12,000!

供款︰再諗落去,上咗車之後要供30年! 家庭月入$24,000一個人揾定兩個人揾? 若果一個人揾,,突然失業又點?好彩兩個人揾,突然其中一個失業,剩返嗰個份糧又頂唔頂得順?

利率︰ 瓜瓜條數係用2.15厘計,若果短期內加息5厘去到7.15厘,大家知唔知每月變咗要供幾多錢?答案係 $18,236!供完樓 ($24,000-$18,236) 得返$5,764, 再交埋差响、管理費、水電煤 ($5,764-$1,500) 得返$4,264, 日子應該點過自己問下自己!

樓價︰現在$300萬可以買到乜樓?私樓大約15-30年內舊樓,10年內半新樓唔駛諗。 呎數一般300-400建築呎 (實呎210-280), 呢類單位買咗要你住一世,你接唔接受? 生小朋友又夠唔夠住? 唔好同我講之後upgrade 換樓,即使你買完樓價無再升,upgrade 換樓樓價每多一百萬你人工要加$9,430 先合乎按揭標準。 若果你買完樓一個唔好彩,再次發生樓劫樓價跌3成即係你即時負資產$60萬,如果樓價再次跌5成即係你即時負資產$120萬!唔供樓要破產,跌5成死供等 樓價升返上$300萬即係樓價要升一倍,咁你應該要住一世無得upgrade!

有網友問︰「馬沙,你未計買樓前要租樓呢。」, 老實講,我睇唔到點解想儲首期嘅人,會嘥錢走去租樓而唔係同屋企人住。我識得又靠自己買到樓嘅人,差不多全部買樓前都係同企人住。 唔好同我講乜鬼屋企唔夠地方住呀,同屋企人唔啱呀,呢啲係abnormal case!

又有網友問︰「之前有個印度佬同我講…..任何時候都係買樓時候…」。 無錯,誠哥之前幾年都係咁講 (值得注意係誠哥今次已經無再講),我都好認同,只不過呢個講法只適用於有足夠實力嘅人! 咁點為之有足夠實力嘅人?

馬沙個人認為,俾足至少三成 (最好四成) 首期,按揭只做15年,每月供款佔家庭入息3成!點解?即使二人當中有一人失業家庭入息少一半,剩返嗰半供完樓仲有原本家庭入息2成頂住。二人當中有一人 長期失業或轉做家庭主婦,剩返嗰半頂唔順,可以加長按揭年期至20年。 再唔好彩遇上加息周期,仲可以加長按揭年期最長至30年或増加按揭成數最高至9成!如此,即使第日樓價大跌5成,呢類人好難同負資產拉上關係,更枉論破 產、燒炭!

(2015年1月22日刊於 全民媒體)

星期五, 1月 09, 2015

佔中被捕真係可以「慳稅」四成?

尋日明報有一篇題為「佔中被捕「慳稅」四成」嘅報導,馬沙作為資深流氓會計師,當然要認真了解一下點解佔中被捕,即係走去犯法被捕,竟然可以「慳稅」四成咁正!


尋日喺明報網站,見到一篇題為「佔中被捕「慳稅」四成」嘅報導,馬沙作為資深流氓會計師,當然要認真了解一下點解佔中被捕,即係走去犯法被捕,竟然可以「慳稅」四成咁正!

睇完篇文,真係「唔識嘅就開心死、識嘅就笑Q死」! 首先,有乜嘢證明報導中嗰位得到稅務局批准暫緩繳付薪俸稅嘅申請理由 (其實正確應該係叫緩繳 2014/15 暫繳薪俸稅 Provisional Salaries Tax held over 先啱) , 真係用 「曾參與佔領而被警方拘捕,可能會遭到刑事檢控而被僱主開除,喺收入有可能受影響下,要求稅務局重新評稅。」?

明報有無查證過嗰位申請人嘅申請信稅局吸收副本? 人講明報就信?

稅務局回覆話基於《稅務條例》嘅規定,唔方便評論個別個案。既然稅局唔方便講,就由我呢位流氓會計師講下。根據《稅務條例》,在一般情況下,要申請 「緩繳暫繳薪俸稅」,申請人係需要在申請書內清楚填寫整個課稅年度估計入息的數額,而該估計入息的數額要少於或可能會少於前一年度的應課稅入息實額的90 %,又或少於或可能會少於暫繳稅課稅年度估計入息的90%! 單係用「曾參與佔領而被警方拘捕,可能會遭到刑事檢控而被僱主開除,喺收入有可能受影響下,要求稅務局重新評稅」呢個理由,似乎唔係事實之全部!

下次唔該明報記者Emily専業一啲,即使「緩繳暫繳薪俸稅」申請獲得稅局接納,該納稅人只係申請「緩繳暫繳薪俸稅」,即係只針對預繳稅呢部份,而課稅年度2013/14嘅已評定稅款係絕不會減,因此稅局「重估」呢個行為根本不存在。

而成篇文最誤導無知市民嘅,係大字標題用「慳稅」二字,仲要「慳稅」四成咁Q多! 你依家只不過係向稅局申請唔交預繳稅獲得稅局接納而已,唔係向稅局申請免稅或扣減成功,你今年 (課稅年度2013/14) 嘅稅款一毫子都無減過, 下年(課稅年度2014/15) 嘅稅款亦一樣一毫子都無得減, 何來「慳稅」四成? 一個唔好彩,如果下年 (課稅年度2014/15) 即1/4/2014 – 31/3/2015間, 最後應課稅入息實額高過今年呢, 仲分分鐘比稅局罸錢!

今次寫呢篇文嘅目的,純粹係希望點化下對稅務毫無認識嘅無知市民,尤其係嗰班誤信佔中被捕竟然可以「慳稅四成」嘅佔中被捕者。千期咪咁輕易信人,以為曾經被警方拘捕,今年真係可以「慳稅四成」咁爽!

 (2015年1月8日刊於 全民媒體