中國第一次搞奧運，當然要大力支持。若不是工作極之繁忙，巴不得放下公事包，飛去北京欣賞賽事。香港今次協辦馬術比賽，但馬沙對呢個項目就完全沒有興趣。早幾日睇電視報道，話好多市民一早入場，準備睇馬術比賽。但比賽未到一半，部分市民已經因不同理由提早離場。呢個結果，其實由政府公布協辦馬術時已經可以估計得到。
首先，香港市民基本上對各項馬術比賽毫無認識。
其次，由二世祖率領的港奧辦幾年來從未向市民推廣馬術呢種比賽。比賽項目、比賽規則介紹或展覽幾乎通通欠奉。
最後，位於雙魚河的比賽場，地方偏遠。馬沙敢講，若不是有馬術賽，知道雙魚河喺邊的市民，肯定萬中無一。因為以往雙魚河除該處的原居民出入外，恐怕就只有高貴的馬會會員。
講番奧運比賽，就好似睇世界盃咁，要睇直播才刺激。但馬沙最想睇的賽事，如體操，游泳及跳水等等項目，幾乎全部安排在辦公時間進行，點算？
幸好有線電視今次提供4條免費網上直播頻道，幾乎覆蓋所有賽事。馬沙為支持中國國家隊，於是把心一橫，索性將手提電腦接駁到公司會客室部42吋LCD電視，實行與眾同樂，同班手足一齊睇奧運直播。昨天一齊見證國家女子體操隊，首次奪得女子體操金牌，真係不亦樂乎。
最後，馬沙要特別鳴謝香港稅務局，為體恤納稅人及會計師行因奧運舉行期間的影響，特別將原定在明天的報稅死線順延至下周五。
(2008年8月14日刊於《am730》)
沒有留言:
發佈留言