星期二, 10月 07, 2014

傲慢與偏見


唔知點解,香港人回歸以來,學問本來應該顯著提高咗,但係思想就好似退化咗好多咁,有些人直情智力低於猿猴。點解咁講?例如當一件錯綜復雜嘅事發生,為何往往只係一方錯哂,責任點解得一方要負責?雙方都有錯、雙方都要負啲責唔得咩?

點解永遠唔係「黑」、就係「白」?呢類人係咪讀書時參加辯論比賽太多,攪到個腦只能單向活動。在議論社會每件事時,一開始就要選定企埋一邊,㨂咗「正方」之後就點都要同「反方」的人對著幹?

其實呢個世界好Q複雜,好多事點會只得「對」同「錯」咁簡單?「對」與「錯」之間可以係「對中有錯」、「錯中有對」同「唔Q知」。係呀,當一個人肯認自己無知時,批判一件事嘅時候就會唔怕人笑咁話比人知你「唔Q知」誰對誰錯!

就好似呢個星期佔中單嘢,傳媒、facebook 主流意見緊係狂鬧警察係暴力對待人民!你問我點睇?我其實支持警察執法,因為佔中確實犯法,警察執法有乜錯?再加上我又唔buy佔中三子所講乜鬼「和平與愛」嘅理念!佔中點可能和平?

有人就會即刻閙,咁你即係支持出動防暴隊啦!老實講,要有效驅散幾萬人,唔用防暴隊其實可以點攪? 不過話時話,其實我又未做過警察,是否應該出動防暴隊,我識條鐡咩!所以出防暴隊係咪錯呢?我嘅答案係「唔Q知」!

好多人話啲示威者手無寸鐵,駛唔駛放成87個催淚彈咁暴力呀?但客觀事實又話我知,當日放咗87個催淚彈都無辨法軀散嗰幾萬個示威人士。又見唔到有示威人士有較嚴重受傷,咁其實放催淚彈有幾暴力呢?

今時今日,係任何地方大叫689下台,或大讚佔中人士辛苦啦,都唔錯得去邊!正所為要成為人民英雄,識講緊係講呢啲!如果你唔怕死,可以試下出文讚 下香港警察盡忠職守、well done 之類。如果連落地獄都不怕,不妨試試話689政府處理適當或指責佔中人士不對,睇下有乜收場!

689有無錯?唔駛講當然有錯啦!佢根本背負著原罪,無論佢做乜,必定係錯。喺所謂追求真普選嘅人士眼中,佢生存係呢個世界上就係錯!咁事實呢?當然唔係一個人錯哂咁簡單啦!

成件事由黃之鋒係台上叫原本諗住參與罷課嘅學生狗衝入廣場而起。當日黃之鋒明明集會前話無任何衝擊佈處,但係佔領咗廣場之後,先對外公布行動係事前 同學聯一早佈處好。如此,黃之鋒有無呃咗班本來淨係諗住參與和平罷課嘅學生,同埋放心比自己小朋友去參與和平罷課嘅家長?唔好又長篇大論,有就有、無就 無!

佔中三子呢?明明實牙實齒話用「和平與愛」佔中,一有唔對路就可以叫大家解散,點知依家叫解散無人理。夠膽死話啲人自己集結,以後佔中人士發展成點唔關佢地事,咁都得?平時把口叫官員問責,依家一出事,作為佔中發起人,求 L 其一句話控制唔到就唔洗負責?

最後又講下班普通市民,受佔旺、佔銅所害,返工要轉幾百次車。有小朋友嘅更加慘,返唔到學之餘,家長要放成個星期大假看管小朋友,唔鬧到拆天就奇。

另外,好鬼多人話係呢個星期見盡身邊係人係鬼,又unfriend又鬧交。呢啲低能舉動發生在熱血小朋友身上唔奇,但發生在一班6、70後身上,就 顯得相當幼稚!大佬,做咗4、50年人,竟然話接受唔到其他唔同聲音?乜唔係話自由民主社會,應該接受100種唔同聲音,求同存異咩?做乜又同三幾個同聲 同氣嘅人,喺到不停小狗一啲持相反意見嘅人,數算人地冷血、無恥之類? 其實一件自己以為好啱嘅事,即使主流意見企係你嗰面,都唔代表你真係啱哂。其實做人做到咁,點同人好好相處?

其實政治嘅嘢,一向各有睇法。評論一件政治事件,必須針對件事,唔係乜鬼個人品格、修養,除非閣下全職投身政治職位,咁就預咗時時刻刻要比人攻擊人格。各位香港人,為咗追求所謂真普選,一日到黑喺到鬼打鬼,攪到四分五裂,好友變仇人,何苦呢?

 (2014年10月7日刊於 全民媒體)

6 則留言:

匿名 說...

今次係好好既契機,俾大家睇下呢班高舉民主既佔中搞手既手法同面目。

至於普羅大眾會認同定摒棄佢地? 無謂拗,選舉見真章。

Ebenezer 說...

記得戴耀庭曾經到過我教會推銷佔中,我問了他一條問題:對於佔中,可否分享一下背後的神學或者政治哲學的 conceptual framework? 但竟然,他不懂得回答。

Professional means subjective, 夠膽 form 得 opinion 就預了主觀的了,問題只在於能否自圓其說而已。

我們寫慣 blog 的可能比較習慣跟別人討論,因為出得帖就預了有被人圍插的可能,亦多少會想過如何拆。但平時只上 Facebook 的見圖多過自字,且最近的佔中議題,連帶領者都交不出思想準備的功課,因此遇上討論時大家雞同鴨講,彼此不習慣分解實在也是在所難免的。

70後與80後 兩個小小生意人 說...

同佢地講多SIDE 氣, 有佢地講無我地講0既!!
(你成日LIKE 我STATUS 的人上)

馬沙 說...

呢排教會一眾年靑弟兄姊妹全力支持佔中,係FB指出佔中之不是,即比人鬧到上天花板....

嚴嶺鋒 說...

CY有無錯?梗系有啦,呢單系事先張揚成年的命案,他既無辦法噤住,又一開波就搞大个頭。到目前為止,都系靠油尖旺古惑仔同佢驅散集會。
CY 肯定要下台,遲D啦,等阿公收拾好个爛攤子,佢就会要「多D時間陪家人」而辭職。
小弟身在海外,細節消息唔多,敢問各大佬有無收到風,那些英勇的佔中死士呢个礼拜死咗去邊呢?

Ebenezer 說...

嚴嶺鋒:

幾日前,我公司旗下酒店有員工放工後到旺角踏佔中場,結果給約十人圍歐。據保安部(黑白兩道都有情報渠道)報料,現時旺角佔中及反佔中陣營都有黑道介入,且有盤口開出,(例如十四價:可以搞到出位的$7,000, 一般的$300-$800)。並且,不同社團間不會互相傷害對方的人,因此,一般最有可能被搞的,是無背景人仕。奉勸大家出入旺角佔領區時,要格外小心。