講多錯多

金融海嘯衝擊全球，身為國際金融中心的香港，絕無可能置身事外。上星期恒指下跌，每每以千點計算。作為香港市民，不管有否投身股票市場，不多不少，亦早應感受到金融海嘯已捲至香港。無可避免，各市民都要面對大少不同的資產減值，與歐美國民一起同唱哀歌。

不知是否受到早前東亞銀行擠提事件影響，政府各財金官員好像生怕市民再度出現恐慌，每天早上一個接一個企出來，拍心口話香港金融體制好健全，叫市民不用怕。

馬沙近日每天清早打開電視，都想睇睇金管局任總開工前發表的意見。儘管有好多人話任總廢及人工貴，但馬沙個人就認為任總向公眾發表的言論，對後市或未來經濟前景，幾有指標性。如果無記錯，當政府各官員年初在次按風暴爆發初期，大大聲公開話風暴對香港不會造成影響時，任總已經公開叫市民小心。馬沙平日並唔想見到任總，因為每次任總發表公開言論，幾乎都唔係好事。

反觀曾俊華司長，每天向市民發表的言論千篇一律，聽完都唔知佢想講乜。上個星期曾司長更化身成為天氣報道員，仲要學天文台長無時準，搞到市民更加驚慌。上星期曾司長在恒指大跌至近萬四點時，大大聲話海嘯還未到。樓股皆瀉海嘯都未到，怎叫市民安心。

另一邊廂，同為財金官員的梁鳳儀副局長，又公開話現時係黎明前的黑暗。以馬沙理解，即風暴已近尾聲，曙光將現。咁實情眾財金官員，究竟認為風暴到了沒有？

(2008年10月14日刊於《am730》)