只報喜不報憂

早前恒指一口氣升破15,000點時，好多財經演員紛紛走出來大叫熊市已成過去，牛一已經來臨，仲話咿一浪勢必突破16,000。更有人話美國黑帝就職前，恒指可能受惠美股帶動，上試18,000點。結果係點？

呢班財經演員，當然對自己兩周前的預測隻字不提。信佢哋走咗去入貨嘅散戶，過年前仲要蝕多一鋪，都咪話唔慘。

曾幾何時，我以為只有演員有戲上畫或歌星有新CD上市，才需要走出來宣傳，叫友好報章或雜誌，為佢哋寫番兩篇鱔稿，好使電影票房或CD銷量，有意想不到的增加。勢估唔到，現在連出書都要用呢招。

財經界猛人最近出書，今個星期各大小報章都有報道，有雜誌更以專題報道。內容大部分指猛人近年測市奇準，係我等散戶在股海的明燈。當中當然不乏猛人近年多次公開對大市後市作出的預測。但以我個人觀察所得，大部分傳媒只作出報喜不報憂的報道。鮮有將猛人測中及測錯的言論作出比對，以至評論有欠中肯。

中嘅大家已經聽得太多，唔中嘅就由我同大家講吓。

08年4月，猛人指恒指2萬點有強大支持，強調牛市未結束，結果不出四個月，恒指就跌破2萬點。

08年9月初，當恒指跌破2萬點後，指出恒指合理值為27,500點，再強調港股未步入「熊市」，仲話對樓市前景樂觀，目前已是樓市最差時期。

勢估唔到，事隔只有4個月，上星期竟然警告大家，港股離「熊市」完結尚遠。

08年9月初強調港股未步入「熊市」，上星期又警告港股離「熊市」完結尚遠,中間嗰4個月,佢究竟有冇講過港股已經步入「熊市」呢? 讀者如果知道,請留言話我知!

猛人仲話覺得太古城兩年後可以升到一萬蚊一呎,我就大膽講句,太古城3年內(個別高層靚景特色戶除外)平均呎價無可能升到一萬蚊一呎,除非香港變咗南非津巴布韋。

猛人測市究竟準唔準，就由讀者自行定奪。

(2009年1月15日刊於《am730》)