星期四, 1月 15, 2009

只報喜不報憂

早前恒指一口氣升破15,000點時,好多財經演員紛紛走出來大叫熊市已成過去,牛一已經來臨,仲話咿一浪勢必突破16,000。更有人話美國黑帝就職前,恒指可能受惠美股帶動,上試18,000點。結果係點?

呢班財經演員,當然對自己兩周前的預測隻字不提。信佢哋走咗去入貨嘅散戶,過年前仲要蝕多一鋪,都咪話唔慘。

曾幾何時,我以為只有演員有戲上畫或歌星有新CD上市,才需要走出來宣傳,叫友好報章或雜誌,為佢哋寫番兩篇鱔稿,好使電影票房或CD銷量,有意想不到的增加。勢估唔到,現在連出書都要用呢招。

財經界猛人最近出書,今個星期各大小報章都有報道,有雜誌更以專題報道。內容大部分指猛人近年測市奇準,係我等散戶在股海的明燈。當中當然不乏猛人近年多次公開對大市後市作出的預測。但以我個人觀察所得,大部分傳媒只作出報喜不報憂的報道。鮮有將猛人測中及測錯的言論作出比對,以至評論有欠中肯。

中嘅大家已經聽得太多,唔中嘅就由我同大家講吓。

08年4月,猛人指恒指2萬點有強大支持,強調牛市未結束,結果不出四個月,恒指就跌破2萬點。

08年9月初,當恒指跌破2萬點後,指出恒指合理值為27,500點,再強調港股未步入「熊市」,仲話對樓市前景樂觀,目前已是樓市最差時期。

勢估唔到,事隔只有4個月,上星期竟然警告大家,港股離「熊市」完結尚遠。

08年9月初強調港股未步入「熊市」,上星期又警告港股離「熊市」完結尚遠,中間嗰4個月,佢究竟有冇講過港股已經步入「熊市」呢? 讀者如果知道,請留言話我知!

猛人仲話覺得太古城兩年後可以升到一萬蚊一呎,我就大膽講句,太古城3年內(個別高層靚景特色戶除外)平均呎價無可能升到一萬蚊一呎,除非香港變咗南非津巴布韋。

猛人測市究竟準唔準,就由讀者自行定奪。

(2009年1月15日刊於《am730》)

14 則留言:

若缺齋老人/陳潢 說...

另一個不相上下既係"大行報告"。

匿名 說...

大行報告都唔夠核數師報告呃人!

馬沙 說...

"大行報告都唔夠核數師報告呃人!"

何以見得呢?

李小龍 說...

明星分析員07年尾話樓市無得跌,現在又話去年9月賣樓,乜咁易賣得出,時間咁準?

要等連續兩季GDP負增長才叫熊市,等到都輸死基金及散戶。

最傷係强迫金,8年長渣死守得個吉。2%管理費,最肥依然係基金經理!

匿名 說...

明星分析員睇淡今年樓市,同時又睇太古城兩年後$10,000呎....一係思覺失調,一係上年高位入咗好多件太古城蟹貨...

金牌分析員上

456叔 說...

陸東6400萬購飛鵝山莊
2007-11-15

(綜合報道)(星島日報報道)股市急升、成交日日過千億造成的財富效應,證券界感受自然最深,不少人更身家大漲。早前準確預測恒指會於高位回落約四千點的財經界猛人陸東,不但睇股極準,買樓亦別具眼光,於月前斥資六千四百萬元,購入飛鵝山道七號屋。


07年尾買即係摸頂....

Audi 計數佬 說...

大行唔出報告,又點可以捱低個市執平貨,又唱高個市沽貨?

南杏 說...

聽他們說的人,會在投資路上上寶貴的一課。在這些時候,永遠只有自己可以相信。大行不足信,財演不足信,阿爸阿媽也不信。那信甚麼,只信自己的決定,輸了也不怨天尤人,死得也不算冤枉。

匿名 說...

大行報告好多人都知只是吹風,但核數師報告好多人以為是真!

馬沙 說...

核數師報告絕大部份係真的!!

匿名 說...

核數師報告絕大部份係真的!! <- 韋小寶教落,講大話唔好十句都假,九句真一句假就夠!

南杏 說...

一般人好難分核數報告係真係假。

立邦毅德.Alpha研究所 說...

臨尾二o個段最impressive,如果美金大幅貶值,香港跟足,咁唯買樓至可以保障。

匿名 說...

有好野無端端無需代價就會同你分享?果d上電視既評論員,朝早講過而唔準既評論,下午就當無事發生,不嬲都講,佢地既話都信得過,X都能夠食....