睇緊有線直播申亞會議,有點不吐不快!
先講我自己立場,我反對申辦2023年亞運會!
用咁多錢申辦2023年亞運會,倒不如先興建多啲體育設施,加大對年青運動員(入選港隊前)培訓,以及加大專業運動員(入選港隊後)直接資助。
衆所周知,世界級運動員一定要自細培養。目前香港小朋友要成為運動員,係入選港隊前,家長要自資請一級教練去教,即使其後入選港隊,出外作賽大部分費用及比賽佩備係由運動員自費。結果,窮家子弟即使有天份,都無乜機會接受有系統培訓。單係呢方面,政府資助明顯不足。
中產及富家子弟呢? 有資源請一級教練去培訓,但只限幼兒級至初中。一到高中,多數要子女專心學業! 理由好簡單,啲父母睇唔到子女做運動員,代表完香港出去比賽退役後有乜出路,點會比自己仔女行呢條路?
早排同香港著名球星山度士食飯,山Sir話佢間足球學校,有好多父母帶小朋友去佢間足球學校,主要目的都係叫佢幫手寫推廌信入名校。遇過幾位好有潛質嘅小球員,佢地父母不但沒有支持,有啲更即時以專心學業為由,要個仔即時退學,免得個仔踼得好發球星夢。
香港根本無人睇得起運動員,港隊運動員服役時政府資助不足,退役後更加死路一條!
以上問題未攪好,學乜嘢人攪亞運會!
9 則留言:
划艇員要去美心做知客，運動員根本冇出路！
你講嘅問題，全香港市民連同香港政府班官都應該好清楚。而官爺仍然要監粗夾硬上馬，好明顯，其目的根本上唔係為咗搞好體育....
特衰政府無罅罅要申辦亞運, 唔理民意, 一意孤行, 左派工聯會亦轉軚支持申亞, 奴才真係不知所謂! 將三百幾億元掉落鹹水海, 好折墮啊!
長期競爭力唔理, 起墳化爐議而不決, 日日塞車唔理, 不幸有病要新藥又唔比, 淨係識威搞埋d"剩事"
如果香港俾60億之後,多出黎果d由霍家包底,咁我冇意見。
不嬲小朋友學音樂運動都係為咗入名校,用完即棄,根本就無尊重過音樂運動等項目。
響香港做運動員,好似划艇女將,佢都算靚女,結果去咗美心酒樓做知客,其他又無樣又無學問嘅都唔知點算。
美心皇宮知客伏虎藏龍
聽講話申辦亞運係政治任務,
用黎趕絕台灣, 如果真既就冇偈啦, 睇死民X聯姣婆守唔到寡, 可憐香港納稅人幾百億凍過水
我好讚成你的見解, 我好同情陳學殷, 個死人x富翁, 比果少少錢直頭當人係雞, 每個月比得果萬幾蚊, 我係父母都唔想見到個運動員仔女咁嘅下場.
發佈留言