星期三, 7月 11, 2007

唔嫁又嫁

前言:

馬沙以前講過,一間上市公司經常轉換核數師的話,投資者就要特別注意。一般來說,上市公司轉換核數師,應該在年結日之前完成。理由很簡單,大部分公司管理層,理應在年結日前與公司的核數師為該年度之核數費用達成共識。如不幸未能達成共識的話,亦有充足時間於年結日前委任新任核數師。

點解馬沙經常強調年結日前完成呢?

原因是在正常核數程序中,有些事項必須在年結日前後幾天去確認,其中一項最常見的例子就是盤點去確認年結日的存貨。事問年結日後才轉換核數師,新任核數師怎樣追認該等數據。雖然在現實中有特別方法去追認,但當中所花的時間及精力,核數師都叫怕怕。

*********************************************************************************
*********************************************************************************


早前一間上市公司,轉換核數師方式都幾戲劇性。公司1月10日發出通告,指公司已於上年 11月13日終止聘任原核數師「羅兵咸永道」,理由是雙方未能就截至 06年12月31日止年度之核數費用達成共識。而公司於1月10日委任「德勤」為新任核數師。

本來轉變尚算正常,可是臨近業績公布限期,該公司於 4月27日晚竟發出另一則更換核數師公告。該公司宣布「德勤」 4月18日起已遭公司終止其核數師之職務。理由是「德勤」打死狗講價, 中途要求增加酬金,最終公司認為不能接受,故決定終止聘用「德勤」。一般來說,除非在核數過程遇上重大困難,核數師絕少在中途要求加價。而「德勤」就解釋其遇到之困難包括「完整存貨進出記錄的實效性」、「個別零售點之第三方銷售憑證的實效性」及「銷售跨期」。馬沙睇完都覺得幾嚴重。

由於公司因未能在限期前公布業績,即時在第二個交易日( 4月30日 )開始停牌。馬沙即有疑問,公司在18日終止聘用「德勤」當日,幾可肯定其業績不能準時公報,點解不在19日公布及即時停牌,而在6個交易日後才作出公布呢? 如果爆煲,6個交易日已足夠知情人士散水,而小投資者睇完通告相信為時已晚。好彩今次冇事,公司順利於 6月6日公布業績及復牌。邊個核數師咁醒,就是返頭嫁的「羅兵咸永道」。

(7月11日刊於《am730》)


*********************************************************************************
*********************************************************************************

後話:

馬沙仍有一點想不通,當初炒「羅兵咸永道」都係講唔掂數,轉去「德勤」,咁「德勤」為接新客,照理不會收多上年度之核數費很多。直到開工後發現報價出錯,打死狗講價,段估都唔敢收多一倍。

根據公司年報 (P.145) 附註8指出, 06年之核數師酬金為人民幣676萬元,比05年的人民幣264萬元大幅增加2.5倍。以馬沙理解,人民幣676萬元應該包括兩條數,「德勤」開工至尾聲被炒,錢當然照收。「羅兵咸永道」被委以重任,又急又趕,收費當然比正常貴。

睇到依到,心水清的讀者應該會問,點解唔比「德勤」屈少少,完事後再炒「德勤」,總好過駛多300幾萬叫「羅兵咸永道」從頭做過呀!

或許管理層意氣用事,不甘被屈,寧為玉碎,不作瓦存。

又或許管理層知道被「德勤」所發現始料不及的困難,包括「完整存貨進出記錄的實效性」、「個別零售點之第三方銷售憑證的實效性」及「銷售跨期」等等,只有前核數師「羅兵咸永道」才攪得掂,於是急急找回「羅兵咸永道」!

8 則留言:

匿名 說...

屈屈聲咁難聽呀?

匿名 說...

應是中航實業(161)

匿名 說...

屈唔難聽, compliance 既野, 收到貴一貴, 又煩到嘔, management覺得被屈一d都唔奇!

意氣係一件事, $先係business decision既重點, 想信都係後者, 比多d都係出唔到個clean report, 只好.....

匿名 說...

On dog 兄,

我就估DTT要收天價才肯出clean report,公司心有不甘唔俾居多。PwC 做開唔駛比特別收費,咪找返PwC...

匿名 說...

馬沙兄,

今日呢篇有前言、文章加後話,是否= Un-cut Version?

匿名 說...

匿名,
屈屈聲咁難聽呀?

連公司管理層都認為增加酬金不能接受,咁都唔叫屈? 你唔覺,至小公司管理層覺!

匿名 說...

馬沙兄也參予該股份買賣,也帶來豐厚利潤,是否覺得抹一把汗!

馬沙 說...

匿名,

原先根據公司中期業績估計,全年業績會升一倍以上,所以買入。誰不知27/4買,錢都未比(T+2),4月27日晚竟發出更換核數師公告,第二個交易日( 4月30日 )開始停牌。仲要係盤數可能有事,唔驚就唔正常!

坐咗個幾月停牌監,公司順利於 6月6日公布業績及6月7日復牌,即沽....雖然依家仲升緊,但呢D錢要攞命博,唔啱我.....

我只係想試途火中取栗,唔係想落地獄....