新生代

時下新生一代居住及生活環境無疑是比較我輩優厚。馬沙孩童年代，除了生活基本必需外，好少有其他物質享受，有時放學後更需要幫助母親，在家中做一些如穿塑膠花、珠仔或剪線頭等等的工作幫補家計。不過正因為咁，我們這一輩人大多自小就養成照顧自己日常生活的能力。

可能因為現今女性，普遍比上幾代女性擁有更高水平的學歷，本身在社會上有一定地位，有時甚至超越男性。所以大部分女性，在婚後及生小孩後仍選擇在社會工作，保持社會地位及免於跟社會脫節。環顧現今的新生代，正因父母都要出外工作，且早出晚歸，好多時小孩的生活，就交給傭人照顧。可能自小由傭人照顧，好多小孩家境雖不是非常富裕，但養成少爺仔或千金大小姐的脾氣。

馬沙就見過好多20多歲的年輕人，出來社會工作對上司不分尊卑，直情當正在自己屋企一樣。有年輕人因自小只有佢駡人，無人敢駡佢，做錯嘢被上司或老闆輕輕責備後，即場痛哭，回敬一句︰「你做乜咁大聲鬧我，由細到大無人敢咁樣鬧我！」。

7年前馬沙就遇過一件趣事。話說馬沙帶隊到某上市公司開Job，由於文件眾多，有人竟帶同家中傭人到客戶公司，理由是文件箱太重，所以叫傭人幫手拎。當時情景，就像時下傭人送小朋友返幼稚園一樣。

(3月20日刊於《am730》)