星期四, 10月 23, 2008

真假董事

中信泰富 (267) 炒濃外滙,一夜之間市值蒸發超過一半,都算香港金融界一件奇聞。

獨立股評人David Webb 即晚就在其網站發表文章,表示根據公司最新的年報資料,質疑太子女榮明方先至係公司「集團財務部之董事 Director, Group Finance」,應該知情及負責,財務董事張立憲及財務總監周志賢做咗所謂「替死鬼」。。

董事總經理范鴻齡公開作出回應,榮明方只係財務部主管,唔係董事局成員之一。馬沙午飯時從有線新聞聽完以上解釋,即時同身旁的合伙人講咗聲:「有無攪錯!」。根據公司法,董事得一種,只要你係董事,就一定係董事局成員,絕無一種誠如范鴻齡所講,係董事但唔係董事局成員的職能。

昨天馬沙空閒,上網睇睇中信泰富07年份年報,董事及高級經理(54-56頁)列表中分成3層,首先係執行董事,共有12人。其次係非執行董事,共有8人。最後係高級經理,共有7人,其中榮明方排在首位。最特別一點係每名高級經理名字之後,註明各人係相關部門之董事。而榮明方名字之後就一如David Webb 所指,乃集團財務部之董事。

馬沙後來翻查公司註冊處紀錄(正確資料以董事名冊為最終依據),根據公司07年及08年之「周年申報表 Annual Return」,發現范鴻齡的確無吹水, 榮小姐根本就唔係公司董事。比較年報,7名「高級經理」全部都唔係董事。

至於點解要係年報冠以「董事」之名,以及咁樣做有否誤導公眾之嫌,就要待剛暫停港交所董事及證監會收購合併委員會委員既范鴻齡解釋。

(2008年10月24日刊於《am730》)

13 則留言:

匿名 說...

證監從來都係只打老鼠,老虎係吾敢打,好多所謂大公司有問題,只要有人事背景,就可輕輕過骨,香港稱為金融中心,但證監既董事有否恰如其份做好份工?!

匿名 說...

信用破產,一間公司咁就比一班人KO咗,個女咁樣做,讀得幾多書都係假,無咁大個頭就唔好帶咁大頂帽,為咗摶一摶,攪到公司咁,值得嗎?貪婪真的會令人沖昏頭腦,才會做出如此行為.
難為股東,難為一班真心幫公司公作的人.

匿名 說...

應該唔係貪婪
反而係蠢同無知, 所謂二世祖就係依類太子女

渣估 說...

題外話: 近年讀有關范鴻齡先生的訪問,細佬對呢類「公職王」的存在既佩服又疑惑。

有人話上巿公司的企業管治和內部監控是個笑話,但趨吉避凶是人的本性,監管機構施以調查及「適當」懲罰應能帶來良好阻嚇作用。

匿名 說...

I am a CPA working for a PRC enterprise for its intended IPO last year. I recognise that it is norm in PRC that "Director" means "主管" or "主任".

In my case, I am the vice CFO, above me is the CFO, below me is the "Finance Department-Director".

匿名 說...

真的好蠢, 任何一位稍為買過外幣的人都不會在高位買只升的合約, 還要到2010年, 天呀, 相信跟他們簽這份約的人, 一邊簽一邊已笑出來。真的其蠢無比!

匿名 說...

簽單果位銀行經理, 應該都幾有「成就感」。

如果有佣金收, 袋0.1% 都可以安享晚年啦?

seikomatic 說...

諸君,

美資好多叫 director = head pf a department ≠ 董事喎。

渣哥,可以有公職王即系話佢睇果犯就死果犯,除左呢d機構間既利益資源可能有矛盾之外,如果唔系掛命,你 expect 會做到野咩?歸根結底,咩政府會容許呢種情況出現,用人為親囉。

個市咁狂插,俺雖然都受害,不過刪埋房門又覺得好興奮,林番幾廿年前玩 FX margin 咁....below $10 既330,$45既5仔,1蚊一隻雞,越林越興奮....


申報利益,俺d 330系超$66既靚價。

若缺齋老人 說...

中信都敢查,找死? XD

匿名 說...

美資公司帶頭將公司員工嘅title 不斷作大,家陣個個Sales 都係 VP,啲 Director 仲多過乜。 Director 係乜? 睇吓証監本年報,唔係叫『董仕』,而係叫『總監』。點止Director,証監仲有啲叫Senior Director嘅物體,中文叫『高級總監』,斷估公司法都冇啲個咁嘅title。

市場維京人 說...

遲公布有關消息係不理小股東利益嘅做法,中信嘅理由話係保住間公司。小弟諗如果身在其位,如果法律許可,可能都會咁做。

Gideon 說...

馬沙.. 今日睇返曾司長嗰番海嘯仲未黎既說話,先知佢冇講錯說話(雖然唔知佢係咪專登)

馬沙 說...

鎚,

曾司長每天都係癈話一則!