星期三, 6月 10, 2009

屎眼追兇

早兩晚馬沙準備經西洋菜南街,轉入奶路臣街地庫買DVD,當到達奶路臣街街口,見到好多儍人圍觀空空如也的奶路臣街。直覺話比我聽,高空擲物狂又再出現,馬沙唔理三七廿一,即急步直出亞皆老街,離開該危險地帶。 馬沙一路走時一路想,點解香港咁多傻人,甘願冒生命危險去睇熱鬧?

我好肯定當時事件應該剛剛發生,因為當時除咗圍觀的傻人外,警車及救護車都未到。如果狂人相隔幾分鐘再擲第二次,呢班傻人因八卦和愛看熱鬧,自己走過去而中招,又可以怪誰?

返到屋企睇新聞,確認狂徒又掟鏹水,導致20多人受傷,真係覺得呢班傷者好慘。放工去旺角行吓街都中招,真係發夢都未必諗過!

呢單新聞,有好多嘢值得討論,首先想講嘅係立法會議員何秀蘭批評警方的其中一番言論。根據報導,何議員認為警方刻意隱瞞天眼的啟用,即使成功捉到兇徒,但侵犯市民私隱,傷害多咁多個途人,並唔值得。如此說明,在何議員心中,市民在公眾街道上的所謂私隱權,比市民的生命安全更加重要。投咗票比何議員嘅市民,唔知有乜感想!

另一樣要講吓嘅當然係嗰套講就天下無敵,影就有心無力嘅「屎眼」....噢...sorry....係「天眼」至真。就咁聽個名,馬沙仲以為「天眼」係超高科技系統,在控制中心按幾個制,就能透過人造衛星或全球定位系統,清晰觀看案發現場,追蹤兇徒下落。點知....所謂「天眼」,說穿了不過係幾部高清攝影機。頂......究竟邊條白痴幫呢套低科技產物起呢個「天眼」咁劃時代嘅名?

仲有就係呢套嘢聽聞用咗成170萬元,馬沙就諗極都唔明點解咁貴。其實負責呢單案嘅警官,只要走去鴨寮街請教吓啲電子器材公司班大哥,點樣係西洋菜南街每坐大廈天台入口同地下各出入口裝個普通紅外線針孔式鏡頭偷拍,兇手一犯案,就包保影到啦,做價分分鐘平過「天眼」。

今日睇新聞,有個書店職員話事發後見到個疑似兇徒,但就比佢走咗。如果我當時見到呢個疑兇,不論真假,即刻叫人一齊捉住佢。查過唔係佢,咪佢唔好彩囉。但若果真係佢,90萬元花紅即手到拿來。

又,如果我住係西洋菜南街一帶,依家最緊要嘅係set返部攝影機,長期zoom近同錄影住對面大廈天台。一個唔覺竟影到兇徒近鏡,分分鐘領咗份花紅成為大英雄。如果記者問你用乜嘢系統影到兇徒,「屎眼」真係一個不錯的選擇。

11 則留言:

Ebenezer 說...

哈哈,d官爺唔係用粒屎眼泥捉賊,而係用粒屎眼泥諗野架。

裝屎眼梗係侵犯人嘅私懚啦,何秀蘭冇錯播。

匿名 說...

呢個何秀蘭,你試吓被淋果個係你屋企人,睇吓你仲講唔講乜嘢私隱,影住你係條街到行有乜嘢私隱,白痴

柴九 說...

其實我真係唔明
一個市民係條街度, 公眾地方, 做咩都會比人見到
如果天眼係有私隱問題, 咁係唔係個個出街既市民都犯左法???
咁捉快車個d 又有冇問題?
係控制交通個d cctv 又得唔得?
lift 入面個d 又得唔得?

渣估 說...

呢條人渣敗類垃圾賤種, 肯定仲會犯案, 事關警察勞師動眾都捉佢唔到已經成為佢快感既泉源。

出乎意料, 條友今次竟選了在奶露臣街落手, 而且係一個落住毛毛細雨既晚上, 仲要係「天眼」啟動之日出擊, 顯然係向警方的智力挑戰。

不如大家估下佢幾時會再犯案, 同埋響邊度?

據小弟未滿師的犯罪心理學分析, 如果佢仲未落網, 我估佢下一次都仍然會係旺角, 因為離開旺角就等如將難度降級, 自降身份。

豉油街、花園街、甚至柏裕商業中心對出那條登打士街都係熱點。

如果佢對政府有不滿, 好大機會揀七一前夕再次出手!

匿名 說...

許多公眾地方早已佈滿閉路電視(CCTV), 所謂天眼無非是一種閉路電視監視系統, 如果天眼只對著公眾地方, 問題不大, 但現時情況無可避免會對著一些私人住宅, 這就涉及侵犯私隱的問題.

本人認為, 擲通渠水的狂徒未必只有一個, 特衰政府倒行逆施, 惹來不少牙齒印, 當中有三兩個出現嚴重精神問題, 並做出反社會行為, 毫不奇怪, 而一個作惡得逞後, 就會起示範作用, 引來其他狂徒有樣學樣. 今次這個只擲下一支通渠水而非兩支, 並選擇在入夜時間行動, 顯示這可能是另一個狂徒.

匿名 說...

醫管局千幾蚊買一條USB...
聽過朋友話如果你同政府D人關係好,佢哋可以出spec出到得你間公司做到佢哋生意。

李小龍 說...

前兩天我又寫了這套"C 眼通",內容出奇的相似。"C 眼通"又貴又無用,早已預了。西洋菜街佈滿警車警員,竟然會冇人第一時間封閉大廈捉人,真係......

在通往天台的消防門,加警鐘及普通錄影系統,開門即響,幾千元夠一座大廈。裝"C 眼通",似係老曾要求,做戲多D。

B.Y. 說...

"首先想講嘅係立法會議員何秀蘭批評警方的其中一番言論。根據報導,何議員認為警方刻意隱瞞天眼的啟用,即使成功捉到兇徒,但侵犯市民私隱,傷害多咁多個途人,並唔值得。如此說明,在何議員心中,市民在公眾街道上的所謂私隱權,比市民的生命安全更加重要。投咗票比何議員嘅市民,唔知有乜感想!"

就係囉,而家泛民的人完全係為反對而反對.這種關乎公眾安全的情況下,仲講私隱?枉佢地仲懶係讀過番書乜乜物物,單是倫敦市就有超過三百萬個CCTV,平均每人每日比人影低四百次!

匿名 說...

隱瞞天眼嘅啟用就係赤裸裸侵犯私隱, 警方無法自圓其說. 而家啲土共完全係為反對泛民而反對, 完全不顧事實. 人哋倫敦市幾百萬個CCTV嘅位置, 一定要公佈俾大眾知, 唔係隨你鍾意到處安裝, 如果安裝咗唔話俾人知, 倫敦市長隨時俾大眾趕落台.

Bittermelon 說...

天眼不是新鮮時物,國內大小城市一早以滿布了天眼裝置,香港現在才跟隨吧了,但有些小common sense都知道,就算天眼的像數有幾高,要好清楚影到狂徒的容貌談何容易?因為實在太多外在因素(即是noise)影響,正如馬沙兄所說,裝天眼係天台出入口有效得多,又一證明政府官員無common sense...哎

匿名 說...

只要戴上口罩及黑超, 天眼就變得無用武之地了.