星期四, 7月 29, 2010

樓價痴線系列 (三)

馬沙老友最近就先後做出以下動作:

老友A本來跟家人同住,其實暫時無乜實際住屋需要。早3、4年樓市起步之初,馬沙及其他老友都曾經勸老友A先買入一個市區小型單位,租出等租客幫佢供住先,到有需要結婚時收回自住或賣出另購新婚居所。老友A一直不為所動,直到今年初,眼見樓價日日係咁升,而本來可買入一個市區小型單位的價錢,現時只能買入一個市區500呎居屋單位。老友A生怕遲啲連市區500呎居屋單位都買唔到,即時買入一個市區17年樓齡500呎居屋單位自住。

老友B於2003年結婚,婚後一直於青衣區租樓住。當年馬沙問佢既然有能力,青衣區樓價尚算合理,點解唔買? 老友B當時答曰:「見過97樓價係咁跌,都唔知跌完未,真係怕伯!」。老友B於06年生咗第一個小朋友,馬沙再問佢老哥會唔會買樓,佢話要再睇定啲先,如是者一租就7年。早兩個月,老友B終於出手,係青衣區買入一個11年樓齡近千呎單位自住。

老友C同女友拍拖多年,都係時候結婚。雖然資金不多,不過考慮到在低息環境下,計掂條數,供樓同租樓差不多,加上怕依家唔買,以後都買唔到。早幾個月在深水埗區以150萬以下買入一個近20年樓齡的小型單位自住。

老友D眼見將軍澳某大私人屋苑自住物業升咗成100萬,上月走去銀行加按,吐現80萬。上周以近250萬買入一個800幾呎將軍澳居屋單位作自住。而本來自住的私人屋苑物業將以約1萬元租出。經過悉心安排,往後扣除租金收入後,每月供樓淨支出降至3千多元。

老友E手持百萬元現金,近日聯同兄弟姊妹合資買入一個市區物業,準備放租3幾年後賣出,期望到時能財租兼收。

老友F一家四口連工人現住一個已供完的物業。由於現居根本不夠地方用,想換一個過千呎單位改善生活質數。睇樓數月,計算過風險後,已放棄睇那些過千萬假豪宅。取而代之,努力於何文田及窩打老道山一帶尋找實用率極高的過千呎近40年樓齡舊樓。上星期本已睇中一個盤,惟於落定時遭賣家反價而交易告吹。現仍努力睇樓中。

老友G夫婦最為進取,上月本準備以300萬作半自用及半投資方式買入何文田上車盤俊文苑細單位。佢地準備先租出物業,直到遲啲有小朋友後收回自住或在同區換樓,享受該區名校校網。不過早兩日聽朋友講開,老友G夫婦近日越睇越豪,早兩日已經睇緊廣播道近千呎單位。如果真係成事,風險都咪話唔高。

以上老友們在交易前,除非直接開口問馬沙個人意見,否則馬沙都唔會主動開口比意見,費事阻人發達。再講,買樓唔同買股票,買股票比錯意見輸極都有限。買樓睇錯市分分鐘輸身家,萬劫不復,97年真係見唔少。況且大多數嘅人,你比啱意見絕對唔會感謝你,因為係佢地自己好眼光。相反,比錯意見呢,分分鐘講足你一世及怨足你一世,仿彿自己完全無責任。

12 則留言:

Neo 說...

你全部老友都疊水!呵呵.

bittermelon 說...

"你比啱意見絕對唔會感謝你,因為係佢地自己好眼光。相反,比錯意見呢,分分鐘講足你一世及怨足你一世,仿彿自己完全無責任"

Agree x 2

Kila 說...

市場消息表示,李麗珊與相關人士,昨晚購入南灣第10座一個中層1338方呎的一房單位,望深灣遊艇海景,約1686.8萬元、折合呎價1.26萬餘元,估計會作投資用途。

黃德森昨晚接受查詢時承認,太太與其9名兄弟姊妹,昨再到南灣睇樓,並會決定是否合資購買,但他昨晚表示太太尚未歸家,故不清楚是否已購入。不過,黃德森表示,即使購入單位,也只作其他用途,並非一家四口新居,並笑言「無咁本事,未搞得掂兩個女」。

*****************************

李麗珊係咪馬沙兄老友E?

軒軒媽 說...

唔係呀,千三呎得一房?
買果個都SHORT!

匿名 說...

水塘儲備足夠
靜待下次樓災
何文田區睇中
非常懷念董華

匿名 說...

閣下的老友A至老友F, 短則一年半載, 長則兩三年, 很大可能會後悔, 會很痛苦, 並且埋怨閣下睇住佢哋去死都唔出句聲勸阻.

Gary 說...

"你比啱意見絕對唔會感謝你,因為係佢地自己好眼光。相反,比錯意見呢,分分鐘講足你一世及怨足你一世,仿彿自己完全無責任"

Agree x 3

匿名 7/29/2010 3:12 下午
"並且埋怨閣下睇住佢哋去死都唔出句聲勸阻"

正如馬沙兄講,出聲勸阻,叫你唔好買,升咗咩,一樣怨足你一世!跌咗咩,絕對唔會感謝你!

資深炒家 說...

我咁睇:

老友A:有經濟能力,500呎居屋應該唔過200萬,跌市跌極有普,自住冇大問題。

老友B: 2003年至今咁多年低位唔買,依家高位接貨,一接就近千呎,仲要青衣區,真係短則一年半載, 長則兩三年,很大可能會後悔, 會很痛苦。呢個亦可能就係爆破指標!

老友C: 深水埗區150萬以下小型單位,跌極有限,唔買都要比租。

老友D: 一加重息就大大鑊! 吐咗現,點解唔等多一兩年跌完先執骨?

老友E: 睇怕兩三年後收咗D租可能唔夠蝕樓價。

老友F: 放出已供完的物業,無400萬都有300萬,貴賣貴買,何文田及窩打老道山都算傳統豪宅區,自住換得過!

老友G夫婦: 睇得上車盤俊文苑細單位先,應該冇乜實力! 買廣播道近千呎舊樓,一旦加息到4、5厘,必死無疑!

小小柯跌打 說...

馬沙前輩好耐無出文,一出就成個系列,等緊4、5、6.....支持 ^_^

seikomatic 說...

非常懷念董華 x 2

匿名 說...

供樓諗住以兩人人工去供,如果其中一個冇咗份工,得番一個分分鐘頂唔順. 
供樓唔係咁簡單,仲有律師費一大堆費用要俾,入伙唔多唔少都有啲嘢要整整或添置,若然加息仲PK.

locksmith 說...

Thanks for sharing
多謝大大無私分享

開鎖
24小時開鎖
開鎖佬
開車鎖