星期二, 8月 03, 2010

樓價痴線系列 (四)

先唔講馬沙班老友嘅決定是否有錯,因為樓市好似股市一樣,高處未算高,呎價破完可以再破。加上香港人羊群心態極重,往往喜歡你買我又買,見人人炒樓又想加入炒樓,總之就唔好執輸。呢一點從2002年至2006年,樓價非常平穩,好多地方都有平樓,但唔係太多人肯入市就可見一班。

對於香港政府的房屋策略,由政府宣佈停建居屋,取消定期賣地一刻,已經知道香港政府在刻意限制土地供應,試途行回以前的高地價政策。其實政府當日咁做,都係想穩定樓價,因為當時好多發展商為求推盤散貨 ,不惜大幅劈價,樓花呎價常以低於同區2手樓推售。

今次樓市泡沫之所以形成,其中一個主要原因係各大發展商大約在05年起,開始捉摸到一班70後貪靚要面嘅心理。當時呢班70後正值結婚置業高峰期,亦係物業市場嘅最大一批新力軍,而呢班人買樓大致有一些基本要求。

首先,佢地好抗拒舊樓。即使一些傳統大型屋苑,上至太古城、杏花村,下至美孚、匯景花園及麗港城等等,佢地都會認為好舊,更枉論單幢樓。要佢地睇得上眼,先決條件係新樓。

其次,佢地一般要求屋苑有一個美輪美奐嘅住客會所。只要能在朋輩面前威威,就覺得付出貴一點兒都係值得。至於室內可用空間,反而奇怪地變得次要。

而以上呢兩種要求,多年來經朋輩互相感染,傳媒放大,發展商誇大式的廣告攻勢下,現在已經變為大部分香港人嘅置業需要。正所謂有求自必有供,發展商當然樂於配合。於是乎,各大發展商05年後紛紛落力興建所謂「假豪宅」去配合市場需要。而馬沙經常講嘅「假豪宅」亦開始在港九各區相繼出現。

「假豪宅」點假法? 另文再談。

12 則留言:

藍血人 說...

有新樓唔住住殘舊40年的太古美孚,你貪佢夠舊呀?

無嚟貴格!

Calvin 仔 說...

點解要住美孚呢?

不如住新元朗中心或yoho town啦,地鐵上蓋,又有大型屋場,5千蚊呎,又新淨!

匿名 說...

太古,美孚,第一城雖然係舊,不過實用過而家新樓好多好多,起碼都有個優點!

而家新樓實用又低,管理費又貴,遲十幾年後都變舊樓!

我愛舊樓 說...

馬沙兄,
1) 價錢:新樓300呎=舊樓600呎
2)實用:舊樓300呎=新樓600呎
3)不過,大部份70後及80後,寧願買300呎新樓也不想買600呎舊樓!

匿名 說...

我自問也是"70後",亦是2005年至2007年成婚/置業/換樓. 但當年第1次及第2次買樓,跑勻九龍各區,對所謂"豪宅"的示範單位,真的只有"得啖笑".

當年同期推售的有 "西九4隻龍仔",在九龍城碼頭側的 "環球小姐豪宅", 西九"奧林匹克都會"等. 當年已發現以相若價格,在九龍區傳統豪宅地段已經可以購入呎數更大,實用率更高,交通更方便,環境綠化相若的單位 (只是會所設施稍為沒有那些浮誇),結果小弟換入的"傳統豪宅單位"比那些已成明日黃花的"新豪宅",升值回報更好.

至少自己住上幾年是滿意, 便足夠有餘.

哈密瓜 說...

美孚實用率高到嚇親,有成9成。我寧願買D實用率高既樓住,花幾廿萬真係裝修到皇宮咁囉。

你住靚樓,自自然然代表你收入有番咁上下,咁平時都唔會係5點正放工果班人啦,會所果D係好靚但又有幾可有時間去丫...

Kenka 說...

是否捉錯用神? 豪裝是為了陸客不是本地, 至少你的朋友A-G(?)有一半都選200萬樓下的

匿名 說...

"香港人羊群心態極重,往往喜歡你買我又買,見人人炒樓又想加入炒樓,總之就唔好執輸。呢一點從2002年至2006年,樓價非常平穩,好多地方都有平樓,但唔係太多人肯入市就可見一班。"

香港人其實係好精明的投資者, 從2002年至2006年, 冇乜人入市買樓炒樓, 這幾年樓價平穩, 入市冇乜肉食, 證明香港人做得對.

從2006年尾至今, 越來越多香港人入市買樓炒樓, 樓價亦不斷上升, 置業者個個有錢賺. 精明的香港人都明白: Trend is your friend; 有智慧, 不如趁勢.

近月以來, 咁多人入市買樓, 原因好簡單, 就係: 好多人都睇到樓價在政府嘅高地價政策下有繼續上升的趨勢; 越早買樓似乎越好, 越遲就越閉翳. 當然, 他們今次看得是否準確, 是否又再一次被政府政策陷害, 有待時間驗證.

阿豆腐 說...

係囉...我都覺得好奇怪, 呢家去朋友屋企 house warming, 多數都係上去佢間屋睇一睇就算, 跟手就拉成班人就去左 club house 參觀, 玩, 食 etc...

咁其實...呢d算係 house warming 定係 club house warming ??

我真係覺得好本末倒置!!!我係club house 既時間仲多過係佢間屋喎!!!

阿豆腐 說...

其實都好擔心個 d 死都要買倪豪宅既新一代....又要威, 又要充!!但呢家講緊層層樓都要供30年....絕對係長途賽, 為左滿足一時既優越感而勉強上車買倪豪宅...後果可能係一生樓奴!!

呢家話哂息口係 History Low, 可以咁講, 個息已經低無可低!!佢地有無計, 如果以後加番息仲頂唔頂得順先??頂唔順又要屋企出錢幫你供?我屋企已經有個咁既類似廢柴, 我唔想再見到有第二個呢d咁既白痴!!

TheGoldenMean 說...

其實舊樓真係幾好, 但係憺心強拍同維修成本上升

番石榴 說...

阿豆腐,

現今的偽豪宅咁「大」,成班人留在入面 house warming,你幻想一下個場面!?轉個身都有困難啊~真係!