星期一, 8月 09, 2010

樓價痴線系列 (五)

講到假豪宅,馬沙相信普天之下,真係香港獨有。發展商由最初市區的屋苑式物業,求其冠以乜乜「豪園」、「豪庭」、「灣」、「半島」,到市區單幢式所謂精品豪宅,繼而深入不毛,依家遠至上水鄉郊,新開售嘅物業都會叫做豪宅。

個人認為,叫得豪宅,地點好一定係首要條件。例如港島半山、南區,九龍加多利山 、何文田山、窩山,新界九肚山之類。而呢啲所謂傳統豪宅區都有一個共通點,就係唔會有港鐵直達,出入主要依賴私家車、專線小巴或的士。亦由於呢個原因,呢啲地方正常來講,除咗住客之外好少外人出入。相對地,呢啲地方私穩度就比較高,環境亦異常清靜。特別係零辰時份,專線小巴停駛後,馬路連車都唔多架,條街呢? 真係鬼影都唔多隻。

除咗地點要好之外,真正豪宅其中一個特色就係地方要夠大。傳統嘅豪宅,面積至小1,000至1,500呎,即室內可用空間850至1,300呎。以現今超級縮水嘅新樓計算,即建築面積至小1,300至2,000呎。真係有啲錢嘅人,即使1個人住,絕對唔會屈居於一個建築面績600呎,實用用面積400呎,扣除環保露台、超大窗台後可用面積可能唔夠300呎嘅假豪宅。

再講,一個真正豪宅,必須配備嘅唔係一個超豪會所,而係足夠比例嘅車位數目。住屋仔嘅固然之有自己車房,住屋苑式呢? 個人認為單位對車位數目比例最好達到1:1,即每戶至少能配備一個車位,就算無1:1, 至低限度都要1:0.8。試諗下買完間所謂豪宅,搬入去先發覺有錢都無車位泊車,真係人都癲。

就以早前馬沙睇過嘅大角咀皇宮為例,該皇宮一共有964單位,但車位只有136個,即單位對車位數目比例1:0.14。換句話說,平均每7戶才分配到一個車位。如果同時有幾架靚車嘅車主,住係嗰到都咪話唔煩。

或者你會話,我個豪宅位於乜乜港鐵站上蓋或甚麼黃金圈,交通四通八達,出入方便,駛乜揸車? 如果係咁就真係夏蟲不可語冰。

11 則留言:

匿名 說...

大角咀皇宮有964單位, 但車位只有136個,好明顯唔預各位業主個個擁有車輛. 其實, 真正嘅有錢人通常唔使自己揸車, 佢哋有司機代勞, 一個電話就即時call到個司機接送. 故此, 皇宮裡頭不必有太多車位, 皇宮最需要嘅係有足夠空間俾司機們停車等候及上落, 接送業主及其家人.

古天樂 說...

大角咀皇宮D車位賣唔賣?
咁攪法咪車位最好炒,月租1皮又得!

屋村仔 說...

匿名 (8/09/2010 4:37 下午)

"好明顯唔預各位業主個個擁有車輛"

各位業主唔買車"擁有車輛",何來"有司機代勞"?
日日租車連司機乎?
都好,大角咀皇宮好近金都商場,日日坐花車!

定係有錢人叫班司機大佬將佢地部大BENZ、勞斯萊斯、大覇、大馬通通泊去班司機大佬屋企停車場?
怪唔之得咁多人話公屋停車場好多靚車啦,原來因為有錢人屋企停車場無位...嘩卡卡...

匿名 說...

試諗下買完間所謂豪宅,搬入去先發覺有錢都無車位泊車,真係人都癲。 x 2

帝瘋 - 唔掂 說...

帝瘋平均每7戶才分配到一個車位? 唔係呀?
我好多朋友一家人有2部車或以上喎,如果買咗又租唔到車位,泊去其它屋苑或街場?

若缺齋老人 說...

如果唔係近來放榜,早排都度緊一篇野講香港 vs 紐約EDPK員工買樓比較,就算美帝次按前對於EDPK員工既供樓負擔都可以比香港輕(更唔好講而家帝國樓價跌到乜);

當然...仲有個因素係美帝auditor冇咁夜放工、多左時間駛錢而冇香港同業儲錢快!

林忌 說...

964單位, 但車位只有136個...

唔係化.. 三分一的單位都唔 130 個車位啦要..

tac 說...

We don't need to be fear, because today, only banks will suffer, as HK people are now very clear to get benefit from the Gov't, just call bancrypty like US wlll be ok.

The highest risk is the bank which gives Hibor + 0.65% w/o any punishment.

匿名 說...

tac:

The bank is rather safe since they lent out only 70% of the property's value and legally the bank is the owner of the premises.

Adams 說...

唔好講咩超級豪宅, 住得起依d精品假豪宅郁d都一千萬,假假地都算係中產, 訓窗台不突止, 想養架車都要煩埋個車位,就算甘心比發展商老屈一個$4000一個月既車位, 都未必輪到你!!

就以火炭御龍山為例, 1300伙只有少於300車位, 信和月租$3900,鄰近較舊既駿景園, 2500伙有2100車位, 私人放租車位$1800起!!

只可以講現今地產商,只會賺盡你一分一毛!!

匿名 說...

北角單幢樓The Java 388呎(實用計,carpet area更低)賣 $789萬,得柒個車位,管理費$2.25一呎