星期三, 11月 21, 2007

人情

踏入年尾,又是婚宴旺季。對於馬沙來說,這幾年亦是身邊朋輩成家立室的高峰期,這幾年收請帖真係收到手軟。記得去年尾,短短兩個月內,馬沙及夫人竟收到共11張喜帖。有幾個仲要撞期,馬沙及夫人要分開出席。

上星期有報道指近日一項調查發現,本港準新人平均預算以20萬元營造一個難忘婚禮。調查最有趣的是受訪新人指婚禮支出龐大,要達到收支平衡,當中66%期望每位親友可付$501至$800的「人情」。另25%新人更期望收到$800或以上「人情」。

以馬沙所知,現時出席婚宴一般最低消費為$500。期望收到每位賓客$800或以上的新人未免有點兒那個。曾經有老友同馬沙講,如果新人在酒樓設宴,最低消費$500就得。但假若新人在酒店設宴,最低消費就至少要提升到$800。理由是一般來說,酒店比酒樓的成本要高。

對馬沙來講,以上理論完全不能接受。馬沙覺得,出席婚宴的目的是恭賀一對新人及分享他們的喜悅,而不是分擔他們喜宴的費用。難道一對新人要在「四季酒店」辦一個永世難忘的婚宴,但祈望來賓們一起分擔他們的開支?

馬沙每次準備「人情」時,婚宴地點從來不是考慮因素。與一對新人的交情反而是最重要的因素。曾有好朋友因經濟不太好,只在屋邨酒樓擺幾圍,當我好兄弟請我去,$1,888好意頭「人情」俾得好開心。試過有個17年無見的中學同學請我飲,我百忙中抽時間出席加$500,算俾足面啦。

(11月21日刊於《am730》)

11 則留言:

匿名 說...

非常同意!在那裡擺酒完全係佢地自己意願,佢地當然負擔得起先選酒店,根本無需要補貼他們!!!(註:本人已於一特色酒樓結婚擺酒。)

北夫人 說...

我又接受去酒店飲俾多D人情喎

上年有好同學在華麗的迪士尼酒店請飲,我都俾左九舊,喻意長長久久好意頭,大家開心冇所謂啦!^o^

匿名 說...

同意啦, 我D十幾年無聯絡既同學請我去飲, 我索性唔去算了.

Clay 說...

講得好呀,你老哥係邊擺酒係你既事,做人情做幾多就我既事。你有錢擺半島四季唔代表我要比多啲,都係睇交情。

C.M. 說...

>>一對新人的交情反而是最重要的因素

直頭係喇,中呀!

匿名 說...

管理費疑問:
為什麼香港法例第344例,物業管理條例內註明管理公司可以按照管理支出收取10%之管理人酬金。點解不可以由業主立案法團自行訂定。

馬沙 說...

對不起,小弟對"物業管理條例"沒有很深認識!

kenkachemhazard 說...

十年唔搵你, 一搵你就派帖, 這類朋友, 我都見過一兩個, 去還去, 唯有佢出錢我出命, 飲番佢多幾杯XO唔好蝕底畀佢

說...

嘿嘿
己所不欲,勿施於人
所以我唔打算擺酒
亦唔會去d平時冇聯絡開既人既婚禮
親戚都係咁話架!
係friend既就一班朋友book間房食一餐
至少咁先傾到計架嘛!
否則食個一餐飯
美其名為慶祝新人
結果成晚頂隆都係同佢地講到一句恭喜咁大把
仲要同d三唔識七既人一台
真係唔知做乜!

匿名 說...

馬沙兄,多謝回覆

匿名 說...

朋友做某項婚禮相關業務,因為office地處中環,兜到好多中環客。個個搵個名婚顧,著靚婚紗晚裝,地點例牌country club/ 半島/ 四季/ 君悅/ 香格里拉。背景不離investment bank/ 名牌子公關/ 律師等等等。

我幫過朋友幾次手,見盡呢D「夢幻」婚禮,最後諗,唉,都係唔好搞咁大。