自上星期陪咗我4年隻老馬牌費、保險到期無續之後,正式開始咗無車用的日子。
呢兩星期最唔習慣嘅係朝早送大仔返學,平時慣咗由出門口到學校預15分鐘,依家至少要預30分鐘,撞啱無的士,仲分分鐘遲到!
細仔就叫做有啲得著,每朝送完阿哥返學,多咗好多機會行路,尤其係上一條幾長嘅樓梯, 第一次上完呢條幾長嘅樓梯仲腳仔軟,真係笑死我!
今日隻老馬終於比人揸走咗,目送佢駛離屋苑,有少少唔舍得!
大仔早兩星期知道隻老馬即將要離開我地時,好認真咁同我講佢好唔舍得隻老馬! 呢點我明,畢竟隻老馬幾乎係佢專車, 自佢1歲開始坐到依家。當中由未懂事坐喺BB car seat 呱呱叫, 到自己坐車頭跟住我接媽媽收工。又由K1 開始朝朝早坐返學到就嚟幼稚園畢業。今次應該係佢人生第一次學習乜嘢叫做「放低」!
其實人一生中確實會有好多人、事或物令人唔舍得, 但人一定要學習放手,今次就當幫佢上人生寶貴嘅一課!
沒有留言:
發佈留言