股市大幅回落，市況交投淡薄，雖造就長線投資的買入良機，但如何揀選優質股，確考起好多股海新兵。正所謂「先求知，再投資」，若身邊有資深股友，向其求教及聽取他們多年在股場進出的實戰經驗，當然會獲益良多。但假若閣下一路以來，都在股海孤軍作戰。在大市暫時未有明確方向時，看多幾本投資書籍或上番個短期投資課程，為下一個升浪做好準備，亦屬未嘗不可。
時下學生好喜歡去補習，所以社會製造出好多所謂補習天王。但當各補習天王越來越出名，慕名而來的學生越來越多，最後學生被安排在斗室內，一同觀看所謂名師的預錄影片，馬沙個人就覺得有失補習的原意。不過不講大家或許不知，補習界的處事作風，最近似乎席捲投資界。講到投資課程，講師當然少不了所謂財經演員。投資者喜歡報讀由著名財經演員授課的課程，原因不難理解，事關只要財經演員金口一開，下課前俾個號碼，學費隨時可賺回。
上星期有老友同馬沙講，以幾百元報讀某著名財經演員的投資講座。老友話講座出席人數近百，而講座的前半部分，有人不斷推介出席者報讀他們開辦，學費由2萬至3萬元不等的課程。好不容易才去到講座下半部分。點知財經明星就見不到，因該講座下半部分全程以播片方式進行。最後有出席者大叫騙財，仲即時報警求助。結果係點？舉辦者又出乎預料地竟肯向所有出席者回水，真係奇怪！
(2月25日刊於《am730》)
沒有留言:
發佈留言