前因後果

前晚在等領外賣時，接到一位8年無見的舊同事K仔來電，K仔話其好友正急需尋找會計師幫手。K仔本身都係會計師，但佢話自己近排好忙，加上好友單case又好複雜，有時間都未必做得好，所以希望馬沙幫一幫佢老友。嘩！放緊假都有生意，馬沙即刻拍心口應承K仔。

K仔雖與馬沙只做過短短3個月同事，8年前分道揚鑣後從未見面。但不知何解，K仔對馬沙非常信任。早幾年轉工曾致電馬沙尋求意見，這幾年亦轉介不少客戶俾馬沙。其實類似K仔的舊同事，馬沙認識好幾位。馬沙有時想，大家平日無事不相往來，點解佢哋每次有需要時，會想起找馬沙幫手，而不找其他交情更深的舊同事呢？

不講外行人未必知道，會計師行的客源，主要靠現有客戶推介及由朋友介紹，鮮有自己主動出擊。所以對於小型會計師行的經營者來說，初開業時若沒有幾位像K仔的舊同事或好友幫手，任你有幾大本事及幾專業，都會非常艱苦。但如何得到像K仔這類能在生意上幫你一把的人，我諗就真係好睇閣下平日點樣對人。

好似K仔咁，馬沙同佢做同事時，佢只係一個剛入行的新人。但馬沙就將佢當正自己學生，在出job過程中，親自將個人心得及秘技傳授俾佢，亦經常請佢食飯。真未想過當日的付出，帶來今天的回報。

(3月10日刊於《am730》)