有早知

上星期同朋友飯局，一講到投資，幾乎所有朋友不約而同地表示「早知」上月中大手買貨，不需一個月就可大賺至少兩成。

的而且確，恒指自3月中見底，10多個交易日就反彈近4千點。如果能在接近低位買貨，確實能有可觀回報。但問題是小股民往往比較喜歡回望過去，總是喜愛在事後孔明，「早知」這樣，「早知」那樣，絕少展望將來。

恒指今次大幅度反彈，有人話係終極見底，亦有人話係熊市2期反彈。馬沙個人對後市睇法，就比較樂觀。如果有睇開本專欄，都應該記得馬沙從3月開始講睇好後市，亦講過幾次各類中資金融股已跌至非常吸引的水平。這句說話至今仍然有效，但大前題是持貨目標至少5年。

目前恒指究竟處於熊市2期反彈，還是已經雨過天晴，大家都無可能知道。要成功估頂或估底，談何容易。就算他日俾馬沙言中，後市反覆向好，亦只是僥倖估中而已。情形有如各大行發表對後市看法一樣，總有其理由去支持，實際靠估居多。

作為長線投資者,根本不用理會市場及大行對後市的睇法。因為通常睇法越一致，錯的機會就越高。在雞犬皆升的大牛市過後，好多藍籌及中資龍頭股已回歸其基本投資價值。現在揀選一些市盈率合理、有盈利紀錄、處於增長期，最重要是有良好派息紀錄的實力股，就算買入後跌，都不會跌得太多。持貨5年後應只有人向你講「早知」一早跟你「買」！

(2008年4月10日刊於《am730》)