星期四, 4月 17, 2008

交通意外

近日接二連三發生幾宗交通意外,導致多名無辜市民受傷或死亡。不知何解,近年這類涉及途人傷亡的交通意外好像特別多。就以早幾天貨車因倒車百多米撞倒途人的意外為例,司機為何會在無人協助睇位的情況下,將大貨車倒行百多米? 簡而言之,貪方便也。

馬沙居住的屋苑,上落平台的升降機前,有一個汽車上落客專區。由於馬沙經常使用該專區,所以就留意到一種怪現象。不論的士或私家車司機,大部分喜愛於上落客後,即在原地窄路掉頭離開。你或許會話,若目的地需要經反方向的行車線,當然要掉頭。但問題是該專區前方不出 40米,已是該私家路的盡頭,而盡頭就是一個迴旋處。馬沙真的難以明白點解有迴旋處不用,選擇原地窄路掉頭。

另一怪現象是在轉換行車線時,好多司機一見到隔籬線的車輛打燈且準備轉線時,必定立即加速,故意不讓人家插在自己車前。故此越早打燈示意的車輛,反而更難轉換行車線。最後造成好多車輛一打燈甚至完全不打燈就轉線,製造更多交通意外的機會。

最後,馬沙亦發覺近年好多交通意外發生後,肇事司機都異口同聲地說意外原因,是要閃避突然跑出馬路的狗。查實狗本身是一種好聰明的動物,突然跑出馬路被撞的機會率分分鐘比人類還少。更遑論在機場幹線、屯門公路或吐露港公路等高速公路,能遇上肇事司機所講的走狗。馬沙就未見過,您見過未?

(2008年4月17日刊於《am730》)

9 則留言:

Calvin Ng 說...

昨晚又來一單...唉....

「小巴撞小巴 18人浴血」

匿名 說...

太子道好多小巴超速, 架架都超到咇咇聲

Webman 說...

再係咁遲早俾人取締-_-b

dog o 說...

"On Dog" 是有的...

星期一晚係屯門公路就有單意外, 朋友為免撞到馬路上的一隻DOG急BREAK, 結果車尾成為風琴...

最終隻DOG避得一架車, 避不了第二架, 橫死當場...

O 仔 說...

好多時cut線時,d車主明知你已準備cut佢都唔會讓你,的確好冇品!

Derek 說...

車死狗易cam保險掛

eriko 說...

"一打燈甚至完全不打燈就轉線"

不過我會用盡方法等佢CUT唔到~

Liza 說...

扮畀佢cut,當佢想cut埋黎就長horn比油,不過睇下係邊個啦.....

匿名 說...

因為太多pk(尤其係搵食車)見人地打燈,特登踩多腳油封你位,所以又令到某部份人唔打燈

雞 & 雞蛋