星期二, 6月 24, 2008

監查法人

馬沙是一個標準電視及電影迷,幾乎所有類型的電視及電影,有時間都會觀看。近年好多日劇愛好者轉投韓劇懷抱,又有好多人好似馬沙一樣,喜歡追看無論聲、畫及內容都非常有水準的美國電視劇。早前美國因為編劇們大罷工,引致好多正在播映中的劇集停播,就令全球萬千電視迷大喊救命。

馬沙近年亦好少睇日劇,不過有老友早兩日就介紹了一套叫《監查法人》的短劇俾馬沙。馬沙睇完第一集,就好想介紹俾讀者,特別是一眾當核數師的朋友。此套由日本NHK製作的短劇,於本月14日首播,一共6集。而劇名《監查法人》係乜,之唔係會計師事務所囉。此劇以擁有4,200名註冊會計師及佔上市企業30%市場的大型會計師事務所為基礎,講述年輕會計師們,在龐大的報表以及沉重責任的夾縫中,煩惱而奮鬥著的故事。

第一集名為「公司該垮嗎?」,分別講述兩間意圖做假賬的公司,因年輕會計師堅持嚴格審計並要開具「否定意見 (Adverse opinion)」的核對決算書 (Auditors' Report),隨時令兩公司因「否定意見」的核對決算書倒閉。當中有不顧專業操守的會計師行高層,以種種理由,協助客戶隱瞞核數結果,意圖出 Clean Report 放生客戶。企業話事人最後無計可施,竟率領一眾高層,向年輕會計師下跪,結果年輕會計師點做,馬沙就在此賣賣關子。不過要數最有共鳴,莫過於當年輕會計師發現可以致客戶於死地的問題時,反問自己一句「是否應該放放飛機?」

(2008年6月24日刊於《am730》)

劇 情:
【第1回】「会社、つぶせますか?」
【第2回】「800億円の裏帳簿」
【第3回】「粉飾の連鎖」
【第4回】「崩壊の序曲」
【第5回】「夢の代償」
【第6回】「会社、救えますか」

2 則留言:

咖啡妹 說...

好想睇...
但係有無中文字幕的..(唔識日文...)
係邊度可以睇到中文字幕版呢

K 說...

馬沙兄, 唔好逼我BT啦!

本地電視台有興趣買呢套片播呢?

特別係「公司該垮嗎?」:又諗起03年美國某大能源公司因會計賑目問題而令公司倒閉事件。