星期四, 2月 19, 2009

反智 (二)

除咗鼓勵畢業生將校園當作避難所外,政府班低能兒因為想力保大學畢業生就業,想出一套既分化社會,又令資源嚴重錯配的大法。

根據報道,政府準備設立一項所謂實習生計劃,資助每名大學畢業生每月二至三千元。有人可能會話,政府咁做都係想鼓勵多啲僱主吸納呢班應屆大學畢業生,係一個雙贏方案。但問題係政府點解淨係津貼大學畢業生,而不去津貼其他大學以下課程的應屆畢業生呢?

難道政府班低能兒認為大學畢業生比其他畢業生更難找到工作嗎?

首先,香港大學生其實在修讀大學課程時,已經接受咗政府在學費上的資助。加上大學畢業生在本質上,已經比其他非大學畢業生在就業上有優勢。反觀,眾多非大學畢業生本來已經沒有多少本錢,僱主在計算得到政府津貼後,付出相同工資就可以聘請大學畢業生的條件下,非大學畢業生怎能獲僱主青睞。

好多中小企本來為非大學畢業生提供職位,例如某中小企一向以7,000元招聘文員,但因為聘請大學畢業生有津貼,只需用9,000元的薪金(實際同樣付7,000元),就能聘用大學生。最後,本來該由非大學畢業生擔當的職位,在呢個低能津貼計劃下,就被一眾大學畢業生霸佔。

資源不但嚴重錯配,更令非大學畢業生無法就業。更甚者,政府變相鼓勵無良僱主,裁減原有的低學歷僱員,再參與低能津貼計劃。

馬沙雖然作為僱主,可以在此計劃下受惠,但我全力反對呢種有欠公平的低能津貼計劃!

(2009年2月19日刊於《am730》)

10 則留言:

Bittermelon 說...

其實這計劃貫切了特區政府「不論年齡,唯才是用」的口號。在政府眼中,只有大學生才是「人才」。

P.S.受前輩的影響,我最近也建立了自己的blog,望前輩指點賜教.

http://bittermelon2009.blogspot.com/2009/02/blog-post_19.html

若缺齋老人 說...

(如果要請人)我唔會因津貼而改請大學生,不過會將原來請大學生的空缺調低二千;

唔好話冷血,首先做得會計既人向來都冇乜人性,而且E個係張五常經常提的經濟分析下的人性,要怪只有怪想出政策既人冇用腦!

匿名 說...

現在的大學生不及higher diploma 學生. 不要因為二千去用大學生! 你想像不到那麼劣!

匿名 說...

"現在的大學生不及higher diploma 學生. 不要因為二千去用大學生! 你想像不到那麼劣!"十分同意,工作態度更加"好"到不能想像@_@b等經濟好D你估佢仲會唔會係你度做?!

Ebenezer 說...

似乎令人心寒的,不單只是香港教育官員的反智,還有是他們一手泡製出來的溫室教育,禍害深遠的溫室效應。

匿名 說...

the policy will make the disprivileged even more disprivileged. i found it very irrational when i first learned this on TV. and the u graduates won't thank the government that much. one student told TVB that the subsidy is not sufficient.

半熟女 說...

初到貴境, 多多指教~~

其實我宜家有d新同事都是所謂的大學生, 但個個都抱住騎牛搵馬的人做o野... 做事一點都不上心, 出o黎的效果強差人意~~

其實一個clerk就是一個clerk, 佢的職位就是做日常雜事, 真的以大學生的人才是比較屈就左佢架...

湯記 說...

大學生本來係精英一族,應該係貢獻社會建設社會,而唔係等政府幫佢地搵工做,政府咁樣做,根本係俾左個錯誤的信息班大學生。
唉!

匿名 說...

政府幫大學生..大學生話要求八千元.
政府不幫低學歷青年....低學歷青年點算呢?
不如我要求政府拒絕大學生津貼.....
叫大學生靠自己.....不好求政府當媽媽....
大學生係小朋友呀!

匿名 說...

我有個下屬先得中五程度 (職位係文員, 入職時7k, 做咗三年, 而家13k), 但佢好醒目, 又肯捱, 又唔怕蝕底, 做人又有交待, 雖則英文唔係幾得, 佢都好努力做, 所以即使而家請個大學生份人工可以俾得少啲, 但我公司從來冇打算換人, 因為佢上手係一個大學生, 但成日遲到, 做多少少嘢又話辛苦, 叫佢幫手攞份文件落樓下佢就話自己唔係出街, 唔肯做, 一夠鐘即使有啲嘢未做晒都準時走人, 大家話會揀邊個呀?
PK