出入平安

不知各位有否發覺，近年香港農曆新年的氣氛日漸減少。記得小時候，農曆新年，大部分商店都會關門，直到年初四或初五才啟市。大年初一走到街上，真係想揾餐食都難。就算有，都要雙計甚至三計。今時今日，無論大街小巷，大小餐廳幾乎年中無休，一眾餐飲業從業員連農曆年都不能放假，真不知是喜還是悲。

雖然係咁，但每年農曆新年，還是有好多人舉家出外，四處去親朋戚友家中拜年。而馬沙亦不例外，由大年初一清早開始，到不同長輩家中拜年，直到大年初三，真係忙得不可開交。因為方便緣故，馬沙喜愛自己駕車四處去。亦因為咁，留意到每次過年，道路交通總會比日常危險。

首先，每逢節日，路面都會出現好多假日司機(Sunday Driver)，所謂假日司機，即平日好少駕車出入，通常只在假日才駕駛的人士。而呢類人士，在過年又顯得特別多。正正因為他們平日甚少駕駛，本身對路面情況不太熟悉，再加上要去一些可能從未去過的親戚朋友家中拜年，往往出現好多突如其來的左cut 右插危險駕駛奇技，對其他道路駕駛者造成好多不必要的危險。其實香港有幾大？ 即使行錯路，轉個圈就可走回正軌，何需緊急轉向？

另外，好多人認為過年唔會抄牌，所以每次過年，好多駕車人士，都將愛車停泊在街邊。但問題係有些駕駛者將車泊到離晒大譜，對其他道路使用者造成不便，最後引來投訴，令整條街出現新年牛肉乾車隊奇景。

(2009年2月3日刊於《am730》)