星期二, 2月 24, 2009

溫室效應

昨天有一則新聞,報道一名14歲小童軍,在戶外學習煎蛋時,因手忙腳亂險遭滾油毀容。有資深童軍領袖指出,現今一代的兒童,從小嬌生慣養,欠缺獨立性及自主性。更坦言曾經見過10歲童軍因不懂洗澡,在露營時不肯洗澡以免出醜。

好多時睇到呢啲報道,大家都可能會慨嘆新一代的兒童過度依賴。就好似以上例子,14歲點會煎隻蛋都搞唔掂。回想14歲的馬沙,莫講話煎隻蛋,就算煮餐飯都不成問題。

但個人就認為所有責任,應該由一眾精神近似分裂的新一代父母承擔。理由好簡單,因為時下好多年青父母,特別係一班中產及經濟比較富裕的父母,在教導其子女時,大部分時間將子女當作天才,但轉眼間又會將其子女當作需要特別照顧的弱能兒童般看待。

一班中產及經濟比較富裕的父母,為要將子女教育成才,從小到大都不惜工本,幫小朋友報讀大大小小不同課程。好些時候,若以局外人身份去看,一個小朋友同一時間除學校本身課程外,還能兼顧咁多興趣班,不是天才係乜?

但問題係呢班父母,在學術以外的事上,就將子女當作弱智兒童般看待。容讓一些生活最基本的自我照顧小事,交由外傭或自己親手去做。馬沙就親眼見過為數不少年近10歲的小朋友,唔識自己落街、綁鞋帶以及食物沒有起骨或剪碎就唔識食的情況。

最後,搞到好多小朋友變成小小年紀能歌善舞,集十八般武藝於一身,卻不懂照顧自己日常生活的社會怪物。

(2009年2月24日刊於《am730》)

13 則留言:

Bittermelon 說...

現在的小孩像花瓶,外表漂亮但容易打碎,我曾當過童軍領袖,從前的小孩既獨立又自主,現在的小孩則像貼身羔藥,叫他們煮飯,啊Sir點煮,叫他們買菜,啊Sir要去邊到買...一個個像低能一樣,沒有工人活不了!

Ebenezer 說...

溫室效應在各『貴族教會』最容易察覺到!

Pakkin 說...

馬沙兄,講得好,好一句「溫室效應」,尤其用到「精神近似分裂」這個說法,做父母的真的要反省一下。
Pakkin

匿名 說...

而家d家長唔會重視小朋友生活最基本的自我照顧小事....唯一目標就係考試.....

cooper 說...

遲啲可能連行路都唔識 ...

搭地鐵時不時見到啲人推住架 BB 車,載住嗰個就牛高馬大,生生猛猛,又唔似咩智障,又唔似一兩歲囉

Kenka 說...

果個唔係精神分裂,係家長睇輕呢d生活知識工作技能,覺得「呢d野常識黎架,佢地自己要學的話好快識,使乜教」以為好似佢地當年咁樣,殊不知common sense is not common,就醬子。

匿名 說...

其實我哋應該同情一吓班小朋友,因為佢哋個schedule 密麻麻仲辛苦過好多大人。同埋少左好多樂趣....@_@
我仲見好多家長成日都用英語同小朋友對話,唔知點解我好反感。唔通中文就唔需要學習?!

匿名 說...

一 名 8 歲 男 童 , 昨 疑 遭 母 親 扭 耳 仔 , 今 早 返 回 深 水 埗 區 一 間 學 校 時 , 教 師 見 男 童 耳 朵 紅 腫 , 查 問 之 後 帶 男 童 到 警 署 報 警 , 今 午 12 時 左 右 , 警 方 召 救 護 車 將 男 童 送 院 檢 驗 。

~~~~~~~~~~~~~~~~~~~~~
O 哂咀, 做父母可以點教?

匿名 說...

白痴教師+白痴教育制度+白痴保護兒童政策=下一代越來越目中無人、自以為事。細路仔同佢講道理唔會明,適量體罰可收阻嚇作用,有需要。

the8 說...

很認同!

過份保護 (其實是溺過) 會令兒童某程度跟生活脫節~

不過其實唔止呢一代既兒童...其實同我差不多年紀 (即中女) 既同輩都有呢個情況出現~

曾經...這個同輩問我 "薑汁...係咪係街巿買咖?"

dead air 0左十秒...我先回神過來答佢~

匿名 說...

我好慶幸我父母唔係咁樣,當然對時下父母來講,我父母細時又無叫我補習,學呢樣個樣,甚至經常獨留在家,自己煮自己飯食,佢地會覺得我父母唔關心子女,但我咪一樣活得好好地,搵到工養到自己,偶然自己去下旅行,總好過成個廢人咁樣,生存都無意思

lonewolf 說...

身處的社區中心,常講家長教育的重要,
冷眼看那些家長為小朋友來報名的短短時間,已看出忚們的很多不濟,慨嘆他們的小朋友也會有樣學樣。

匿名 說...

因為時下好多年青父母,特別係一班中產及經濟比較富裕的父母,在教導其子女時,大部分時間將子女當作天才,但轉眼間又會將其子女當作需要特別照顧的弱能兒童般看待



呢段真係非常認同

我公司個太子爺, 個仔仲未出世(大約6個月), 已經搵定老師的資料諗住谷佢學音樂, 游水同埋外語......其實真係駛唔駛咁緊張呀?

其實呢D父母真係擔心俾唔到最好的野佢地D仔女, 定或是係滿足自已的虛榮咋?


蕉蕉