分手

今晚去茶仔食飯，同個靚靚中女前後腳坐入一張卡位，咁啱一齊落order，之後個侍應以為我地一齊，就將我地叫嘅嘢寫埋落一張單😆

我叫個侍應埋嚟同佢有以下對話：

馬沙：「麻煩你幫我分單！」
侍應：「分單？」
馬沙：「係呀！我哋一人一碟！」
待應：「一人食一碟唔駛分單喎⋯⋯」
馬沙：「我地已經分咗手好耐 .........」
侍應：「明！收到！」

侍應分完兩張單之後，我望下對面嗰位靚靚中女，佢居然係咁笑，仲笑到流眼淚 😭

於是我同佢講：「其實我請妳食無乜所謂，不過條友未問過妳就自把自為，咁就唔係咁好啦⋯⋯」

佢聽我咁講完，又忍唔住係咁笑 😂😂😂

等佢笑完，我就同佢講：「您好！我叫馬沙，未請教？」

靚靚中女笑笑口細細聲答：「Jasmine」

話閘就咁打開咗 ........

食完飯埋單，區區$50緊係我請客啦⋯⋯之後仲一齊過對面太平道嘅酒吧飲嘢！

行出茶仔門口時，我聽到個侍應自言自語：「挑！又話分咗手好耐！」

我心諗，唔講分手邊有得開始呀兄弟.......

馬沙 facebook :  https://www.facebook.com/charblogger02