星期三, 4月 18, 2007

金像影帝

馬沙一向甚欣賞的劉青雲,終在八度獲提名金像獎最佳男主角之下,成功在星期天憑《我要成名》一片榮登影帝寶座。馬沙在整晚沉悶的頒獎禮當中,就只有那一刻專注電視機,見到郭藹明為到丈夫得獎而流下眼淚,馬沙亦為之動容。劉青雲企在頒獎台上喜悅之情,更加唔使講,始終影帝一獎,對於演員來說是事業上的一個肯定及認同。

劉青雲攞獎,馬沙當然開心。但其得獎作品《我要成名》卻未曾觀看,看來一向熱愛看電影的馬沙今次走寶。香港電影界向來古怪,在很多時候,得獎者在得獎作品中的演出,未必是公認演出最好的作品,很多人說劉青雲在《暗花》中表現更要好,由於馬沙未看過《我要成名》,暫不作定論。不過在馬沙心目中,劉青雲演得最好仍是《大時代》中的「方展博」。

劉青雲在電影界的經歷,其實都幾似一些在商界上懷才不遇的朋友。馬沙好多時都聽到朋友分享,說其在公司裡努力工作,為公司賣命,表現超卓,並得到各同事認同。可是每當遇到升職時,卻偏偏不被老闆選中,並說老闆未有因才善用,繼而萌生去意。

馬沙每次遇到這些朋友,都勸告朋友心存忍耐,誠因員工有多少能力,老闆大都心中有數。況且升職這事,除工作能力外,亦要加上所謂天時、地利及人和。只要默默耕耘,等待一個機會,終會得到回報及認同。成功往往需要時間去考驗的。

(4月18日刊於《am730》)

6 則留言:

Gideon 說...

我覺得劉青雲都唔算做懷才不遇喇。佢未攞影帝啫,但係佢套套都係主角啦,片量又多,我都覺得佢啲戲好得。

ana 說...

整晚最開心就是看到劉青雲拿影帝, 眾望所歸. 看到郭靄明哭那一幕的確感動, 就想起很多大時代的片段.

匿名 說...

劉青雲係一個好勤力認真的演員.

每年最佳男主角的競爭最激烈. 今年都唔例外.

另一方面, 我唔知點解父子會有咁多獎. 我個人喜歡墨攻及傷城.

若缺齋老人 說...

但馬老,遇上寶玉當石頭的腦細又如何?

ak 說...

馬沙兄,

「我要成名」絕對係推介作品,AK覺得唔止青雲有出色既演出,新人霍思燕亦相當之正,金像獎AK見佢失落新人獎,之後張家輝又做唔到最佳男配角...加深左AK對父子依套戲既不滿...

至於升職,AK覺得係要爭取既...唔係一件會天跌落黎俾你既野...

馬沙 說...

若老,
扮儍老細見得多,真儍老細冇幾個!


ak兄,
「我要成名」我一定會睇.
父子依套戲呢.....除了小孩有少許驚喜(同情分居多),其它好失望......尤其扮馬拉人講華語...

至於升職,當然要爭取,但努力爭取之餘,亦要耐心等待一個機會.