量力而為

馬沙早兩日同老友食飯，老友P宣布，明年中會正式結束王老五生涯，一眾老友即時大喜。席間老友P話，近日為咗婚後嘅居住問題，感到非常苦惱，原因不外乎又係買樓定租樓。老友P問馬沙個人意見，馬沙想不如就將意見同大家分享一下。

租與買之間，永遠各自有其支持者。就馬沙個人而言，除非閣下非常喜愛居無定所，每幾年就要搬一搬，轉換一下環境。否則，在有長遠供款能力的條件下，一定要買樓。

有人話買樓要睇時機，這一點馬沙不會反對。但買樓自住同買樓投資的入市取向，就可以好唔同。馬沙個人認為，息口高低及量力而為才是買入自住物業的先決條件。因為真正想安居樂業的用家，絕不會單純因樓市升跌去決定賣出所住單位。

就以馬沙兩個供款能力相若的老友B仔同C仔為例，他們同是04年結婚。

B仔受97樓市大跌的心理影響，婚後一直租樓至今。5年來所付出的淨租金估計已超過70萬。B仔由04年至今，一直認為樓價好貴，要等樓價大跌先買。04年都唔敢買，看來未來日子，還要繼續租樓。

反觀，C仔在04年認為有實質住屋需要，用300多萬在何文田區買入一個沒有豪華會所的實用形住宅居住，5年下來，其物業於上年尾最高曾見近900萬，即使樓價近半年出現下滑，目前仍遠遠超越其買入價。

問C仔買樓嘅心得，C仔話自住樓，在能力範圍內，幾時買都得，只要緊記唔好買入一手假豪宅。

理由得一個，嗰啲樓係起嚟炒，唔係起嚟住！

(2008年9月11日刊於《am730》)