星期二, 11月 11, 2008

學前教育 (中)

上星期談論過好多父母,要年幼小朋友長途跋涉到所謂名校上學,間接降低小朋友的休息時間及學習能力。今天再討論現今家長為小朋友報考幼稚園的怪現象。

現今父母們除一窩蜂走去報讀所謂名校外,更加喜歡以魚翁撒網方式為小朋友報名。這陣子在網上討論區其中一個熱門話題,就係互相詢問大家,準備為子女向多少間幼稚園報名。

根據馬沙非正式統計,大部分家長選擇報名的幼稚園數目,就算無10間,都必定有8間。當中馬沙見過有家長竟然打算為其小朋友,報考15間學校之多。

唔好以為報讀幾多間學校,只係一眾家長嘅事。其實一班平均年齡只有兩歲多少少的小朋友先至係真正苦主。雖然佢哋唔使好似雷曼苦主一樣,要天天走去示威遊行。但小小年紀,在這兩三個月,卻要每個周六及日,去到不同的學校接受「面試」。若不幸遇上撞期,分分鐘仲要一日走幾場。

作為家長,對自己子女面試的表現有所期望,本來沒有問題。可是有部分家長,對自己小朋友的表現似乎有點過份嚴苛。馬沙早前帶犬兒去面試時,就親身見到為數不少的家長,一走出面試的課室,已經急不及待地責備自己的小朋友。而責備的內容不外乎「老師問你乜嘢名,你做乜唔答?」及「個問題明明教過你,點解剛才面試不答老師?」等等。試問一個只有兩歲的人仔,突被一位素未謀面的陌生人(老師)正經提問,因心生害怕而不敢出聲,又何罪之有呢?

(2008年11月11日刊於《am730》)

4 則留言:

C.M. 說...

馬沙兄:

哈哈,係呀!

上兩個星期我帶犬女(剛好犬年出世,依家兩歲半多d)去面試。平時活躍好動、乜都講,但見到老師淨係識得笑,成日坐唔定想玩玩具。自己個名就肯定唔識答人喇(雖然佢已經連爺嫲爸媽弟個花名同全名都識曬)。

唔通真係要個女面對所有陌生人都唔驚時,到時先識驚?

匿名 說...

馬沙兄,

我都見到有個媽媽係咁鬧個仔, 又叫個仔即刻收聲. 好無奈囉, 其實要我去面試, 我個心都驚驚地啦. 可況個仔仲咁細. 想佢點喎.

匿名 說...

我起初都驚囡囡無學校收所以報o左7,8間,點知依家in o左4間有3間收佢,仲有間等消息,反而依家唔知讀邊間好?另外考慮其他交o左報名費o個啲去唔去in好??

Wheel 說...

其實只有父母緊張, 2歲的小豆丁其實都唔知發生緊什麼事, 因此而罵小朋友更是要不得, 不是好父母的行為.