星期二, 11月 04, 2008

信貸收縮

早在10月初期,馬沙已聽聞市場一間能直接審批7成以上物業按揭的大銀行,內部發出通知,即時終止承辦七成以上按揭。對於準備做七成以上按揭的準業主,唯有依賴香港按揭證券有限公司(HKMC)作出審批。

本來未有三成首期的準業主,只要有足夠的入息證明,仍可一嘗業主滋味,但八至九成物業按揭近日開始變得明存實亡。事緣近日各大小銀行因港元拆息大幅抽高相繼調高按息外,上星期開始更大幅調低各區物業估價及可提供的按揭成數。美其名係審慎批出貸款及降低銀行風險,實質係唔想承做物業貸款。

銀行在金融海嘯衝擊之下,對審批貸款時比以往嚴謹一點本來無錯。嗰班準備年尾收樓又未上會嘅假豪宅業主,大蝕至少三成幾乎可以肯定。只可怪自己有眼無珠,用超高溢價,誤將石九公當作石斑。目前最大問題係有銀行刻意將估價調至低於市場最新成交價一至兩成,以及只批出其估價的五至六成貸款,就玩死好多正正經經想圓置業夢想,並已付大訂的準業主。

舉一實例,A君早前以228萬買入東九龍一單位,準備以七成按揭上會。而該屋苑同類單位,近日在220至250萬有多項成交。點知銀行上星期估價只有190萬,按揭亦只能批出估價之六成。換句話,首期由原先預計70萬大增近115萬。 幸好A 君最後有能力籌多45萬差額,否則要撻訂收場。所以,若你正準備買平貨,至少要預留樓價四成才穩當。至於八至九成按揭,想也別想。

(2008年11月4日刊於《am730》)

4 則留言:

匿名 說...

對於準備做七成以上按揭的準業主,唯有依賴香港按揭證券有限公司(HKMC)作出審批。

審批過後銀行就會做倒?

Po 說...

小弟見到的貼身例子,年頭大埔村屋一個地下連花園叫價330萬.不足一年已回落至240萬.而實際用家而然,200萬左右才算是可考慮的價錢. 只因年頭樓價租金都被抬太高. 現在成交價面對20%進一步下跌,不足為其.

買家面對銀行收縮信貸,應該積極考慮撻訂.樓幾時都有得賣.但一個不小心變負資產,到時絕非金錢損失那麼簡單.

小瓶子 說...

撻訂通常系楼价的几多%?

馬沙 說...

細訂樓價5%加雙方經紀Commission!
大訂樓價10%加雙方經紀Commission,再加賣方日後可追差價!