星期四, 8月 02, 2012

逃稅

魔果報連續3日A1頭條大字標提報導新上任局長陳茂波涉嫌逃稅,今日終於有時間望下呢單新聞!
先唔講出租板間房,單睇田生09年以280多萬收購該單位,但將金額拆成樓價120萬及150多萬的搬遷費,涉嫌逃稅呢個指控,我敢講百份百唔成立!

比意見毒果嗰幾個所謂前區議員、前立法會議員和律師,一係就智力低於猿猴,一係就自己催眠自己,講一啲出賣自己良心嘅說話!
先講下將收購金額拆成樓價120萬及150多萬的搬遷費呢個問題,其實呢個做法唔係陳局長單位係咁做,你見比意見毒果嗰個所謂前區議員,佢自己都話佢母親嗰個單位都係咁樣成交。如果陳局長呢單交易嘅做法有問題,咁差不多所有大角嘴海安樓接受田生收購嘅原業主單交易都有問題 (包括阿前區議員母親)。
其實平日只要有留意下新聞 (馬沙當然唔係講毒果嘅洗腦新聞),將收購金額拆成樓價及搬遷費呢種做法,唔係大角嘴海安樓收購計劃首創,大部份田生嘅收購計劃都係咁做。不過呢種做法亦唔係由田生首創, 因為好多地產發展商或其收購代表都係咁做,就連市建局 / 前土發收樓都有用過類似招數,呢樣嘢整個地產行業嘅業內人都知,就連負責監管地產代理監管局都知,何解毒果講到好似係北極發現咗企鵝咁?

嗰個律師又指以上做法涉嫌等同串謀逃稅(印花稅
),唔知嗰個律師仲記唔記得自己上年中已經接受過明報大角嘴海安樓收購金額拆成樓價及搬遷費呢種做法表達意見,佢當日嘅意見係乜呢? 之唔係好似係北極發現咗企鵝咁,話上述手法佢首次聽聞囉!
印花稅
就陳局長大角嘴海安樓收購呢單嘢,究竟有無逃稅(印花稅
),根據明報當日查詢稅務局後發現,個案統統按真實樓價全數繳付印花稅。嘅然明報講明查證咗田生在田土廳只註冊買賣契約(樓價120萬),交印花稅時則按真實樓價(280多萬)交足全數,我都費事再考究!
利得稅
陳局長大角嘴海安樓被收購呢單嘢,究竟有無逃稅(利得稅
),以馬沙個人見解就無啦! 點解?

就以大角嘴海安樓由田生收購呢個單一個案而言,據報導指出,該單位94年以公司名義買入,一直持有至09年被收購才售出,持有足足15年之久,且當中期間該單位出租板間房!

從會計準則而言,呢個物業絕對會以投資物業入賬,而持有15年呢段時間,所有租金收入必定要損益表計算課稅。租金收入是否交足稅呢個問題,基本上唔可能存在!

至於
09年賣樓又點呢? 毒果就話假若以市值樓價計算,估計此物業交易賬面賺216萬。根據公司利得稅規定,公司須為賣樓利潤繳付16.5%利得稅。

問題嚟喇,乜嘢叫根據公司利得稅規定? 就私人公司而言,香港得公司條例》(第32 章)
《稅務條例》(第112 章)規管,利得稅應該在稅務條例內,所以應該係根據「《稅務條例》(第112 章)規定」而唔係根據「公司利得稅規定」至啱,呢樣我都當你毒果手民之誤。

再嚟
公司須為賣樓利潤繳付16.5%利得稅」邊條稅例講? 我可以好負責任咁同你毒果講,「稅務條例」內絕對無任何一條條例清楚寫住公司須為賣樓利潤繳付16.5%利得稅」!

至於賣樓利潤是否需要繳付利得稅,以一般情況及最簡單嘅方式講,分別如下:-

1) 地産發展商如「長實」從事樓宇買賣、公司從事物業炒賣活動 (即係所謂炒家), 由於佢地賣樓嘅利潤係產生自一般商業活動,所以有關利潤係需要繳付利得稅;

2) 資本增值 (Capital Gain), 由於香港幾十年來未有「資本增值稅 Capital Gain Tax)」(又叫資產增值稅), 所以賣樓利潤係來自長期投資物業的話,不論「個人」或「公司」持有相關物業,有關利潤係唔需要繳付利得稅!
照睇陳局長個case,持有相關出租物業足足15年, 算唔算「長期投資物業」,我諗只要讀者智力唔係低於猿猴,自己心中一定諗到答案!

如果有人對住一個根本唔需要繳付利得稅嘅人,講佢逃稅,你話好笑不好笑?
如果有人硬係要話呢個case唔係資本增值,咁都好,全港市民只要曾經賣/換持有少過15年嘅樓,快啲交返利得稅,我代香港巿民多謝您! 仲有,昨日電台嗰條「大班」大大聲話陳局長好快因逃稅坐監,如果真係咁,以上講嗰班市民交返稅之後記得洗定pat pat。

20 則留言:

匿名 說...

Bravo!
A timely critique.

匿名 說...

講得好!班友都係智障的!

匿名 說...

會計師 指出報章或大班所不知而又以為知道的,也是小義擧。

Edditoria Han 說...

馬沙兄,我很喜歡你寫的文章,長期讀者和訂閱了RSS,不過,可以不要改小字體嗎?我在屏幕上看得很辛苦,尤其是在32" mon以上...
(也試想像在New iPad看9 pt的字體...)

先感謝了

tip: 網頁設計字體一般最好有16px,但用1 em更好,交給讀者通過瀏覽器設定。

匿名 說...

馬沙兄,我轉貼左你呢篇野,如果不方便,請向我單聲,我會del...

馬沙 說...

咁樣會否好啲呢?

Edditoria Han 說...

@馬沙兄 好很多!!! 哈哈
我將一張screenshot寄去你e-mail
正在用26" mon讀文章

小弟祇來重新寫blog,遲些才調整設計
也會分享過程和code
多多交流喔 ^^

匿名 說...

讚好,拍手!

馬沙 說...

睇得舒服就好了!

匿名 說...

魔果報跟本就係玩批鬥!

匿名 說...

Good post.

阿湯 說...

一直拜讀馬沙兄的博客,獲益良多。讀完這篇長知識!

匿名 說...

其實.......有能力既人有幾多係"聖人"?

而且以香港傳媒既風氣,新官上任就會被傳媒不斷批鬥。

有幾多有能力、有操守既人肯出黎俾班狗不斷咁吠?

匿名 說...

請你聽下蕭若元的分析:

http://www.youtube.com/watch?feature=player_embedded&v=7MxIKbhnPbg#!


13:40 開始

步麥齊 說...

魔果報Check 清楚波波的過往工作及經驗未?

波波係稅局做過,出黎開檔既廉正會計師,會逃稅 ??

匿名 說...

或者部份反波叔、反CY之士, 心底裡都佩服二人白手興家,期望自己仔女有日也能像波Y兄弟的仔女一樣於英美名牌學府畢業, 然後憑才智、膽色、圓滑交際手段, 和一點運氣, 創立事業, 攀登至比父輩高的社會階級。波叔和CY的子女都在LSE、Oxbridge 畢業, 反映父親不止有米, 更是鞭策有加。

若再有抱負, 欲商而優則仕者, 卻要想清楚如何隱瞞或自我引爆登龍道上曾有過的一點歧路足跡。

匿名 說...
網誌管理員已經移除這則留言。
馬沙 說...

匿名 @ 8/09/2012 12:27 下午,
請注意,本blog留言乜都可以講,唯獨嚴禁粗口留言! 謝謝!

匿名 說...

希望今年9月9號會有曙光

匿名 說...

咁即係話印花稅唔係按田土廳註冊的價錢來定,而是按當時市價?