永康階（中）

記得有次送Krystal 返到佢屋企附近，忽然落起大雨，Krystal 一手將我拉入一個公眾電話亭。我心諗：「CLS….拍戲咩！」。

回想當年我同Krystal 嘅關係，既不是愛情，更不是友情，極其量只能用曖昧去形容。我長期mark 佢幫我出job，收工經常約佢去飲嘢。我地嘅關係就係由咁樣開始，一步一步咁踏上曖昧嘅深淵。

每次飲完嘢我都會送埋Krystal 返屋企，記得有次送Krystal 返到佢屋企附近，忽然落起大雨，Krystal 一手將我拉入一個公眾電話亭。我心諗：「CLS….拍戲咩！」。我一直以為「分手總要在雨天」，那一刻我卻面對「雨夜的浪漫」！

可能當晚大家都有點醉意，在擠逼嘅公眾電話亭內，我腦中奏起「浪漫呼吸中、漆黑中，就只有妳共我，從沒有這刻的衝動」。Krystal 突然向我施以一個突襲，深深地吻向我，我就係咁被Krystal 殺個措手不及。如果大家認為喺 IFC 殘廁「gathering」is so dirty，咁大雨中的公眾電話亭著實係「gathering」一個不錯的選擇。

面對Krystal 「有無愛過」呢個突如其來嘅問題，我一時之間都唔知應該點答。Krystal 明天都結婚了，怎說好呢？難道說我當年拒絕咗佢之後曾經好後悔，有想過追返佢，同佢講其實我都好愛佢？

我最終都抵不住沈默，同Krystal 講：「妳明知我當時已經有凱琳，而我對凱琳係認真，我係絕對唔會俾自己同一時間愛兩個女人！」

Krystal 語帶委屈地說：「那我地嗰種，是否可以叫做三角戀？」

馬沙：「不！我地從來無戀過，點可以叫三角戀。嚴格啲講，我地只能叫霧水情緣……」
Krystal:「但係我當時我好認真咁等你……」

馬沙：「可惜我當時無空間去接受妳嗰份愛……」

Krystal:「我明白，我只係唔甘心……. 沙…. 你仲未答我……..究竟你有無一刻愛過我？」

 (2014年9月2日刊於 全民媒體)