星期五, 6月 22, 2007

方向難測

馬沙離港外遊不到一周,其間完全沒有留意各地股市。昨天回港,恒指竟在短短幾個交易日,由上周五收市之21,017點大升至昨天收市21,954點,上升接近937點(4%)。如此升勢,真是出乎馬沙離港前的預計。

恒指昨天一口氣再升270點,再創新高,成交額雖由1,200多億下降至959億,但升勢似乎意猶未盡。如此走勢,港股大牛市尚在運行,還未見頂。由於最近幾個星期的成交量不斷上升,分分鐘完全不需要回氣,再破22,000點。

現在距離 7月1日回歸10周年大日子,保守估計,此紀念日前大跌的機會不大,沒理由以股市大跌賀回歸吧。本周很多2、3線股大幅回落,很多股份下跌近20%之多,所謂升得快時回得快。但正常來講,調整後應該會再炒另外一轉。

下星期為本月期指結算,好友幾乎肯定大勝,但淡友們為免損失慘重,或許絕地反擊。不過踏入7月,大家就要小心,事關有基金界老友報料,說這次牛市將在7月起計,3個月內玩完。恒指由3月低位幾乎一口氣連破多個頂位,升幅已接近3,000點。如今向上萬里長空,浪頂沒法估計。

國內A股市場炒到熱火朝天,雖然中央政府一而再,再而三地出招,試圖冷卻股市,可是每次跌不了多少,又重新踏上升軌,情況好像跌不下去似的。如果政府再次落重藥,A股出現顯著回落,就算港股有多強,也恐怕會受到拖累。

(6月22日刊於《am730》)

2 則留言:

Steven 說...

老老實實,馬沙的測市技巧,真係好差. 分析流於財經演員LEVEL.

1.估唔到大市會升到咁急,好正常. 正常人估到先難. 但係, 既然知自己估唔到, 你又知2,3線股大幅回落後, 正常又會炒多轉呢?如果唔正常呢, 你點算?

2."如果中央落重藥, A股顯著回落, 港股恐怕會受拖累." 呢句絕對係有如廢話. 首先, 大家都唔知中央落唔落藥,幾時落藥, 亦估唔到A股會唔會跌. 即使係跌, 又點影響到H股? 其實A,H股背馳左一大段時間啦. 唔該俾多少少心機睇好唔好?

"如果美股,歐股,日股一齊跌,港股超強, 都會股到拖累" 呢句會好少少.

匿名 說...

一早已經話呢個馬沙係財經演員。而家口風轉哂。成日話自己係長線投資,但係18000點沽清。22000點就說甚麼火中取粟。話跌5-10%就止蝕,但係隻8117跌到阿媽都唔認得就提都唔提。講短抄,C奶都叻過佢。與其獻醜,不如藏拙。專業人士應該俾啲專業出嚟,唸清楚自己想寫D咩俾人睇。