球迷

早前有報道指誠哥有意收購國際米蘭，雖然和黃(013)發言人以「絕無此事」來回應，但會否轉過頭來由長實(001)或誠哥私人投資呢，又係另一疑問。

昨天又有報道指，一位不願透露姓名的國米負責人回應，有關磋商正進行中。報道指誠哥買入國米，對意大利 3G業務有很大的協同效應。若傳聞成真，下屆大家可能在國米球員心口見到大大隻和黃意大利 3G標誌。

不過，馬沙相當費解，市場早兩周才傳出，和黃正準備出售意大利 3G業務，咁買入國米就不能達到上述所謂協同效應。如此，是否早前的報道捉錯用神呢？

富豪買嘢玩，好多時真係估佢唔倒。有富豪買幾架私人飛機玩，有富豪買起「車仔」，又有本港富豪買隊「伯明翰」。李公子早前就買起晒英超、歐聯、英國足總盃、意甲及日本JL所有播放權。

話唔定誠哥心血來潮，買返隊國米，同其他富豪大玩現實版Winning Eleven。

講開足球，都算香港人最熱愛的運動之一，馬沙真係由細踢到大。每次球季開鑼，好多球迷都會買番件自己心儀的球隊新一季球衣以表支持。

早前馬沙就準備買番套「巴塞」新球衣俾未夠一歲的兒子，但尋遍港九新界，都未有店舖為三歲以下小童入貨。

好彩現今係網絡年代，馬沙可以自行在「巴塞」網站郵購。不過，套球衣雖然只賣約27英鎊(約424.4港元)，但郵費就要成12英鎊(約188.6港元)，有點好似妹仔大過主人婆的感覺。

(9月24日刊於《am730》)