Cash未必係King

早幾日同個一班老友飯局，講開投資，老友A猛話依家Cash is King! 對於股票市場，老友A就睇得好淡，指大部分專家都話恒指有機會下試17,000點水平，到時一定大手掃貨。

由於目前港元存款接近零息，加上外幣近日繼續上升，於是老友A就把心一橫，將大部分現金轉成加幣、澳元及人民幣定期存款，實行財息兼收。

其實以目前環境，投資在各個市場，都有一定風險。刻下是否Cash is King，馬沙個人就好唔認同。點解咁講？

因為目前港元兌各國貨幣不斷下跌，主要原因唔係外幣相對港元強，而係受制於港元跟美元掛鈎。目前美元積弱，香港人唯有陪老美一齊活受罪，共同面對購買力下降。

那麼將港元換成外幣又是否上策呢？

個人認為風險比揸港元還高。正所謂成也美元，敗也美元。

如今美國正面對金融危機，油價及金價被炒至天高，有人更揚言油價會升至200美元。家油價明顯是大泡沫，最終會否真的升至200美元就唔知，但就十分似上年恒指上破3萬點時，人人明知有泡沫，但好多專家話恒指可以升至4萬點。結果係點，大家有目共睹。

如果油價泡沫爆破，美元隨時可以升到你唔信，揸住外幣的投資者後果會點，請自己諗。

所以在沒有絕對信心的情況下，無必要將手頭資產作無謂轉移，因為分分鐘偷雞唔到蝕渣米。揸現金就繼續揸現金，揸股票就繼續揸股票。

至於馬沙自己點做呢？

就係努力在下半年收集某兩隻中資金融股同滙豐(005)！

(2008年7月17日刊於《am730》)