難過登天

早兩日政府公布，與內地政府簽署更緊密經貿關係安排 (CEPA) 的補充協議五。由於新協議涵蓋的服務領域包括會計業，馬沙當然第一時間睇睇。

根據新協議安排，香港專業會計師 (即指香港會計師公會會員) 獲得中國註冊會計師協會 (The Chinese Institute of Certified Public Accountants, CICPA) 豁免全國統一考試的其中3科考試，即財管、審計及會計等3科。換句話說，香港專業會計師日後要申請成為中國註冊會計師，只須通過暫時未獲豁免的經濟及稅法兩個科目，並符合相關實務經驗要求即可。

香港會計師公會會長區嘯翔對外表示，新安排將可令香港的會計師資格更具吸引力。而公會CEO張總就話有關豁免可讓香港會計師更快更易取得內地的專業執業資格。事實又係唔係咁易呢?

馬沙可以好負責任咁同大家講，實情難比登天。根據公會統計資料顯示，自1994年以來，單是稅法一科，香港考生出考人數為4,355人，合格人數為185人，合格率為4%。而合格率更是每況愈下，2007年出考人數為87人，當中無人能取得合格。而經濟科2007年出考人數為48人，合格人數則只有3人。

咁是否表示香港的會計師唔掂呢？

大家可以放心，絕對唔係。合格率嚴重偏低的主因，馬沙相信係出於「中文」兩個字。事關香港人自中學以來，考試都係慣用英文作答，鮮有機會書寫中文。由於疏於練習，我輩要寫得一手好文已經難尋，更遑論用中文出考專業考試。更甚的是全國統一考試要用香港人天敵「簡體字」。問您死未？

註: 試題文字使用中文簡體字。答題應使用中文（簡、繁體不限）

(2008年7月31日刊於《am730》)