星期四, 12月 18, 2008

來侮辱我吧!

市建局前天就觀塘市中心舊區重建項目,正式公布收購價。住宅每實用平方呎,定價為5,937元。如果閣下熟悉呢區,相信無不為受影響的自住業主感到高興,因為在現今樓市水平,受影響的自住業主在收到收購款項後,絕對足夠在同區選購比原來面積更大及更優質的物業。

儘管以上收購價比較同區以及鄰近二手樓盤的平均呎價2,400元,已經高出一倍有多,但受影響自住業主似乎好唔滿意。重建業主大聯盟批評收購價不合理,因根據居民委聘的獨立測量師過去估價每呎9,000元以上,而本月最新一次估值為8,200元。因此,市建局是次提出的收購價對居民來說,係一種「侮辱」!

究竟誰是誰非,馬沙嘗試用中肯角度同大家探討。由於整個觀塘市中心屬舊區,幾乎所有物業樓齡超過30年,大部分二手樓盤呎價跟市建局公布的平均呎價2,400元相近。若不計為人熟悉的麗港城 (近期平均呎價3,635元) 及匯景花園 (近期平均呎價4,067元) 兩個大型屋苑,整個觀塘區二手呎價能夠長期高於3,500元,相信只有人稱東九龍半山的功樂道及康利道一帶。而其中坐落於功樂道42號,樓齡只有10年的海天園,個人相信係觀塘區目前成交呎價最高的屋苑,10月尾一個頂層海景單位,呎價高達5,759元。睇到呢度,看官認為收購價5,937元,是否一種「侮辱」呢?

在一般情況下,相信冇人願意被人公開侮辱。但如果有得揀,相信好多香港市民都同馬沙一樣,想俾市建局公開侮辱一下。

(2008年12月18日刊於《am730》)

12 則留言:

若缺齋老人 說...

爭取取消計劃,令業主可以用"市價"出售、以免被市建局"剝削"!

閒人 說...

同意取消計劃算了。

匿名 說...

其實觀塘班人收得個價錢仲好過我地波鞋街... 點解我咁講? 我地波鞋街收時根本買唔返同區七年既樓(就算樓市跌到宜家, 唔好說七年, 十年樓都買唔返..)

你睇下市建局收波鞋街時有冇好次宜家收觀塘咁公佈話可以買到同區邊度邊度, 仲話有$淨.... 佢地都話唔夠...................

匿名 說...

由得佢地住舊樓囉.....罷明係吊高黎賣.....又係納稅人錢...由得佢唔好發展囉

匿名 說...

4~50年既樓換到同呎數既麗港城, 星河明居. LUR飯應啦. 佢地間樓升值比率已經同港島的大藍籌屋苑一樣. 九千幾蚊呎, 咪可以換晒去具沙灣, 西半山.

kenkachemhazard 說...

关于自身:你觉得霍震霆会否接受收购?还是等四年后叫第二口价,收埋呢四年租?

馬沙 說...

如果冇記錯,霍老先生健在時,因為念舊,租金一直遠遠低於市價!

匿名 說...

馬沙兄,

功樂道及康利道,靜中帶旺,唔怕舊嘅話,的確係官塘甚至東九龍最靚地點之一。

官塘市中心重建後肯定係東九龍區地標。它日如果功樂道及康利道重建或被個別發展商收購,就真係值$8,000蚊一呎。功樂道及康利道位處高山,新建物業輕易戶戶向海,諗起都覺得正!

我由細到大都想搬上去,尤其馬沙兄講嘅海天園!

匿名 說...

小弟係功樂道住咗18年,馬沙兄所講呢兩條街(功樂道及康利道),點解叫東九龍半山,因為當年好多在官塘設廠嘅老闆都鍾意聚居於此。今時今日,喺呢兩條街嘅屋苑停車場,仍泊滿大量M.Benz 、BMW 同 積架, 少量波子、林寶、法拉利,香港首批GTR落地,我屋苑個停車場已經佔咗兩部。所以呢兩條街可以話係東九龍區其中一個富豪聚居地。

話時話,外區人一般唔會知道呢兩條街嘅存在,馬沙咁熟呢頭,唔通馬沙係我鄰居?

Carlson

C.M. 說...

Vow,若果只係裕民坊一帶,呢個獨立測量師都真係幾獨立播。(若果我有一層... 一口價6000蚊尺,即賣!)

匿名 說...

Wah....我又要比市建局公開侮辱一下!我5,000呎即賣....

大口仔 說...

我沙田區的私樓,樓齡15年都係賣緊$3,600一呎,重建局用$6,000收都話侮辱?條友係咪傻傻地?強烈建議重新估值!