西門靖 (下）

當送Queenie返到家門前，佢突然同我講：「我家裡今晚無人耶！」，而佢帶點醉嘅眼神仲好似對住我說：「今晚可否陪我，難道我不夠吸引力嗎？」

三位台妹坐低之後，高妹先自我介自己叫Helen, 兩位係佢好姊妹分別叫Queenie 同 Debbie！

Helen:「你不是台灣人，你從哪裡奶耶？」
馬沙：「奶？噢！我是腥港奶！」
Debbie:「腥港嗎？很多師哥耶！」
Queenie：「你叫甚麼名字？」
馬沙：「Tony (係香港落吧識女仔我一定係用呢個外號，因為我喜歡Tony Leung 梁朝偉）」
Debbie :「你很像腥港張家輝激戰哪個賤輝耶！」
馬沙：「除了個髪型一樣，哪裡似？我又不懂打拳！」
Debbie:「你跟他一樣咁大隻耶！（我當時著住緊身衫）」
Helen:「對呀！你很大隻噢！我可以摸你一下嗎？」哈哈哈……..

如是者嘻嘻哈哈，啤酒係咁隊。風花雪月，成晚吹咗啲乜，我已經唔係好記得，只係記得三位台妹不停「耶」、「噢」！就係呢兩個時常掛在口邊嘅常用字，顯得台妹特別溫柔。相比港女下下命令式嘅說話語氣，台妹嘅說話方式必定令港男更加受落。相信港男「有得揀，一定揀台妹」。

我地一吹就吹到成點鐘，Helen 仲相約我第二日一齊到附近食燒肉，即係類似韓式燒烤。埋單凖備走人之際，成晚好少出聲嘅Queenie 就帶半醉話住係我酒店附近，問我可唔可以送佢回家，我作為一位腥港嘅gentlemen，當然義不容辭。

當送Queenie返到家門前，佢突然同我講：「我家裡今晚無人耶！」，而佢帶點醉嘅眼神仲好似對住我說：「今晚可否陪我，難道我不夠吸引力嗎？」

馬沙當時唔識接落去，Gabriel 叫我去馬，但Michael 就提醒我要小心。腦海經歷咗10秒空白之後，最後我理志跑出半個馬鼻，拒絕咗Queenie 嘅邀請，呢次我理志贏哂，但唔知Queenie 會唔會好嬲。

返到酒店，我突然醒起唔記咗買結婚禮物比Krystal ，呢獲真係PK啦，聽日送乜比Krystal?

(2014年8月22日刊於 全民媒體)

西門靖 (中）

其實呢個雙方估估下嘅時刻永遠係最正，而今晚呢個串燒餐可能就係佢地撻著雙方情侶關係嘅一個臨界點，食完呢餐宵夜，佢地將會正式成為情侶都未定。

 

食到咁上下，店內嘅人越來越多，顧客平均年齡低於三十，且大部分型男型女，當中有六、七個女仔仲十足乜鬼雞扒妹咁嘅樣。不過，吸引馬沙注目的，其實 是坐正我個位直望就見到嘅一位靚女，佢同一個貌似盧廣仲嘅男仔一齊。我從佢地嘅行為舉止及互望嘅眼神，估計佢地應該仲係一段關係嘅起步點。

其實呢個雙方估估下嘅時刻永遠係最正，而今晚呢個串燒餐可能就係佢地撻著雙方情侶關係嘅一個臨界點，食完呢餐宵夜，佢地將會正式成為情侶都未定。

靚女配盧廣仲，我估大家諗起心裏應該都會暗笑起來。世事就係咁，好多男士以為靚女特別難追，事實係靚女先特別易追！何解？因為靚女（尤其好靚嗰 啲），根本無乜人敢追！所以你是否追到靚女，只取決於你是否夠膽追！呢一點馬沙已經親自証實過好多次。如果閣下好似馬沙咁有少少才華，靚女分分鐘掉轉頭追 你都唔奇。

一講到比靚女追，自不然又想起曾經暗戀咗我足足4、5年又比我拒絕咗嘅 Krystal。一諗起 Krystal, 縱使當時無人同我互隊，我都即時自隊咗一大杯生啤！「小二！再來多杯！」

正當老闆Jimmy放低第三杯生啤嘅同時，我身後唔知幾時出現咗三位台妹。如果要馬沙形容呢三位台妹嘅容貌，我唔需要用幾百字去寫，兩個字就夠，就係「好得！」。

當中比較高嘅（仲高過馬沙半個頭）一位先開聲：「先生您好啊！可不可以請我三姊妹飲杯酒耶？」
「Of course!（我再用好鬼難聽嘅國語）要喝甚麼？」
高妹說了「謝謝噢！」就order咗三杯啤酒，之後就坐低開始吹水。

(2014年8月21日刊於 全民媒體)

西門靖 (上）

收線後我腦海仍不斷被 Krystal 那句「我好掛住你」纏繞住，唔知係咪我自己多心，硬係形住 Krystal 那句說話有特別意思。

秘書Maggie 幫我訂咗第二日早上10點機票，即晚執拾細軟。第二朝8點就打的到機場，準時上機。原定下午3點前可到達台灣酒店，點知該死的中華航空delay咗成個半小時先起飛，攪到成5點先到達酒店check in。

放低行李，決定先去西門町走走，諗住買份有特色嘅結婚禮物比Krystal。去到西門町已經成7點幾鐘，見有啲肚餓，腦裡即時想起「西門靖」三個字。

「西門靖」係日式居酒屋，即係飲啤酒食串燒嘅地方。因為老板好撚型，所以宵夜時段好鬼死多潮加索嘅台妹。如果你一個男人或成班狗公去台灣，必定要去 呢間居酒屋食宵夜。當然，呢間居酒屋嘅食物本身係非常之掂。所以一眾單身港女去台灣，都不妨落去坐下，話唔定都可以識返個台灣型男！

落到去由於時間尚早，即時有位，坐低就order 十串八串串燒醫肚，啤酒當然唔少得。Order 完等待食物時，就打個電話比Krystal 諗住通知佢一聲我到咗台灣及會出席佢後天嘅婚宴。

「Hello! Krystal? 我係馬沙！我剛到台灣！」
「馬沙？依家喺台灣？又話要趕tax deadline 嚟唔到？」
「妳結婚！我點忙都要嚟……」
「我都知你一定會嚟！我好掛住你！明天中午可以出來飲杯咖啡嗎？」
「Sure! 邊到？」
「3點鐘永康街 • 永康階！」
「What?」
「係近東門站永康街，咖啡館叫永康階！」
「收到！明天見！」

收線後我腦海仍不斷被 Krystal 那句「我好掛住你」纏繞住，唔知係咪我自己多心，硬係形住 Krystal 那句說話有特別意思。突然一陣香氣撲鼻，原來一大碟串燒送到眼前。唔理咁多，食飽先算！

 (2014年8月20日刊於 全民媒體)

一走了之

坐沒多久，我一個人拎住杯紅酒行到窗前一角，欣賞對岸中環的夜景。當晚大概是十五，月亮又大又圓！明月夜有一絲絲淒美的意景，而這意景又讓我想起Krystal。

一個月前，一大班舊同事在Sheraton 4樓間Morton’s of Chicago包了房為Dicky慶祝生日。當晩雖然已經開咗近十支紅、白酒，但班友話仲未夠喉，唯有移師上18樓Sky Lounge繼續。

坐沒多久，我一個人拎住杯紅酒行到窗前一角，欣賞對岸中環的夜景。當晚大概是十五，月亮又大又圓！明月夜有一絲絲淒美的意景，而這意景又讓我想起Krystal。

很久沒見的Stacey拿著一杯Moët Rose Imperial走過來：「馬沙，好耐無見。做乜一個人企係到自隊紅酒？

「Stacey, 冇見妳成5年，妳最近好嗎？依家喺邊到做嘢？」

「唉，仲喺EY呀！馬沙你呢？」

「我仍然做緊流氓會計師，餓唔死咁啦！唉….呢啲衰嘢唔好提啦，成班舊同事中我最無出色…….」

「馬沙哥你咪玩，我都係你一手train出嚟，無你就無我。你乜料我地成班舊同事點會唔知！」

「頂！妳講呢啲，飲啦！」

「係呢！Krystal 下月中喺台灣結婚，你知唔知？」

「我有收到帖！」

「咁馬沙你去唔去？話哂Krystal以前暗戀咗你足足4、5年先比你拒絕！ 我同Danielle約埋12號一齊去，順便玩幾日！」

「唔去啦！下月中D Code deadline, 仲要去台灣咁遠，啲job 邊個做？」

這時候Rocky 走過來：「喂！Dicky叫你兩個快啲返埋去同佢飲呀！」……

昨夜零晨一個人在機場跑道公園跑步。跑完步休息時見天上月亮比平日更大更圓，想起一個月婚禮之期將到。我問咗自己好多次，究竟我係咪應該親自為 Krystal送上一份祝福。Michael忽然同我講，「你都4x歲人啦，唔知自己幾時熄燈，唔好比自己人生有遺憾！」Michael 講得無錯，做人想做就要做！

今天一返到公司，即叫秘書Maggie 入房：「Maggie，我要明天去台灣，麻煩妳幫我訂明天機票，任何航空公司，總之要快！」

 (2014年8月12日刊於 全民媒體)

宵夜出哲學 (一）

真係Delay No More！Johnny仔話佢一行出廁格，見到有個老伯踎咗係角落食緊成扎香……

夜半兩點鐘，雖然隻job離deadline得返兩日，但都係決定喳喳林走人。點解？因為盂蘭節就到，聽老媽話臨天光時份好易撞嘢，農曆7月最好4 點前返到屋企。雖然我係基督徒，但正所謂「寧可信其有，不可信其無」。以前喺某「迫」firm工作時，有一年正值農曆七月十四，成team人喺公司清Q埋 尾，時近清晨4點，阿Jonny 仔話頂唔順要出去廁所食飛煙先，點知條友仔好鬼快返咗嚟，仲話屋企有事要走先；咁馬沙出名好人，你開得口話有事要走，我必定放人。

到咗第二日，Johnny 仔老母打電話比馬沙，話Johnny仔發高燒要請假。心諗：「Johnny仔明知仲有幾日要出draft，竟然夠膽玩嘢？」誰知Johnny仔呢個病假一 請就兩個星期，最離奇係條友仔兩個星期後一返到公司就直去HR，辭職不突止，仲玩到賠錢即日走人。Johnny 仔執拾細軟時，馬沙就問Johnny仔玩到咁招積，去邊到返新工？Johnny 仔支唔以對，欲言又止，咁馬沙呢種做慣流氓跑慣山嘅人，當然唔再追問！

如是者過咗兩個月，有一晚接近2點鐘，收到阿Johnny仔電話，佢話啱啱喺老蘭同朋友飲完嘢，問我可唔可以過去宵夜，飲返兩杯？

Michael即時走岀嚟提醒我小心中伏！的而且確，你明明已經同朋友飲完嘢，成2點鐘call我落老蘭再飲咁趣怪？九成九無錢找數，絕望中諗起馬 沙呢位前上司可以江湖救急！我同Michael講，雖然呢次九成九會中伏，但如果用一千幾百就可以令Johnny仔欠我一個人情，我覺得「值」！於是我答 Johnny仔：「10分鐘內到！」

我用咗7分鐘就去到門口有幾條黑柴嗰間酒吧，見到阿Johnny仔一個人坐咗喺吧枱，喺我未開口問Johnny仔係咪要我幫佢找數前，Johnny 仔搶先開口向靚女Bartender叫咗杯馬沙至愛嘅Southern Comfort on Rock，都算條友仔有我心。我還未坐定，Johnny 仔就話馬沙一向待佢不薄，有件事應該話聲過我知。

是咁的，佢話兩個月前，即請病假前一晚，佢一條友去廁所煲煙，當佢入到廁所，最埋邊一格已經有人用緊，仲見廁格有啲煙升緊上嚟。因為好多同事都係喺 廁所煲煙，Johnny仔就不以為然咁自己搵另一格吞雲吐霧。支煙食到一半，Johnny 仔開始感覺到不對勁，因為隔離傳來嘅煙味好古怪，有一陣濃郁嘅擅香味。Johnny 仔大聲問邊組師兄係隔離，如是者問咗3次都無人回答，Johnny 就行出廁格諗住問個究竟。真係Delay No More！Johnny仔話佢一行出廁格，見到有個老伯踎咗係角落食緊成扎香，嚇到佢幾乎瀨尿，叫都唔敢叫就衝咗出廁所。馬沙即場忍唔住喺吧枱大叫： 「WTF！」攪到在場人士以為我貓咗。Johnny 仔話之後嘅事，馬沙應該清楚，唔再多講！

呢單嘢我當年無向任何一位同事透露過一句，因為馬沙相信件事一講出嚟，肯定再無同事會OT至零晨。而我由當晚開始，一過咗12點，係唔會再去公司廁所……今次呢餐宵夜由我請，大約5舊水，我俾完錢之後即刻同Michael 講咗一句:「都話咗「值」啦！」

提提各位會計師（尤其某「迫」firm），今晚過咗12點就係七月十四……唔想變會計屍……4點前好返到屋企。

(2014年8月8日刊於 全民媒體) 

思念是一種病

                      在每個分手道別的地方，總留下一些紛亂的腳印。誰不曾徘徊、不曾留戀？

零晨3點，一如往日，仍在公司埋首為客戶寫緊那份「丟D」報告。身心疲累之際，手機忽然響起「叮叮」兩聲，在文件及合約堆中好不容易先搵返部手機。

打開WhatsApp，有如下留言：

「沙，
明天一早和老公及兩個仔一起去澳洲10日，今年不能同你慶祝生日，預祝你生日快樂！
素珊」

我望住呢段短短嘅WhatsApp短訊，感覺苦中帶幾分甜。

在每個分手道別的地方，總留下一些紛亂的腳印。誰不曾徘徊、不曾留戀？

那次愛情重創之後，時間不斷為我療傷，我知道現在留下來的是一道美麗嘅傷口，還有的就是思念！

我選擇性失憶，只會記著和妳一起時的快樂片段。唯一嘅例外，係妳離我而去前拋下的一句說話：「你只係中五畢業，同你一齊我睇唔到我地嘅將來！」。

我無想過20幾年後，我地會在工作上再次遇上。我慢慢地斟一杯Southern Comfort ，望著電腦內一張舊照，大喝一啖，默默地讓那酒精衝上我的腦袋。

今天的我，仍然係一個只有中五學歷的中年人，跟20幾年前嘅分別，只係我日常簽名嘅文件中，我的名字後面通常多咗「CPA」3個英文字！

無錯，我每日嘅工作就係跟一大堆數字談談情、說說愛！我係流氓會計師－馬沙。

(2014年8月6日刊於 全民媒體) 

葉朗程巧遇王迪詩

上星期葉朗程係 LGB 巧遇王迪詩單嘢, 全城鬧得火熱,一路睇時馬沙已經覺得呢個玩法有點似曾相識.......

今日我終於記起,原來馬沙 8年前已經以相同方式,在中環國金巧遇過方卓如一次 .......... 

最得意之處係我呢篇8年前嘅文應該早已沉底,但今日check下文章流量,原來呢篇8年前嘅文嘅檢視次數,6月尾開始上升,7月份仲竟然升返上熱門文章排行榜第12位,最近7日仲排行第3位,失驚無神做乜鬼突然咁多人睇同一篇寫咗8年嘅文章呢?

喂!「IFC 張智霖」葉朗程,你係咪抄我橋?

星期六, 12月 16, 2006

迷失中環 - 馬沙篇

上個月馬沙一個人迷失於中環國金,
巧遇方卓如....

馬沙:「卓,恭喜你新書出版」

卓: 「多謝!好睇嗎?」


馬沙: 「非常好睇,只是字体好似太大,書亦非常之薄! 我放工到書店打了3天書釘就看完。」

卓: 「馬沙你有所不知,此書最佳閱讀地點不是書店,而是公幹時於飛機、公車或大船上。交通工具會搖擺,字体大一點方便閱讀。公幹一般兩三天,剛剛好!」


馬沙: 「今次這書最好看是大量加插博客留言。尤其是不敗的魔術師的"國金同人誌"。但好像有點妹仔大過主人婆!」

卓: 「我都有這感覺,可惜後悔已遲。」


馬沙: 「你出書前得到不敗的魔術師同意嗎? 有冇付他稿費?」

卓: 「........」


馬沙: 「至少應請他為你寫書序吧! 你的系列不是還有3冊嗎? 亡羊補牢,未為晚也。」

卓: 「考慮考慮!」


馬沙: 「下一冊定價可以平一點嗎? 如果是$50,在書店又有八折,即$40我就唔駛打書釘啦!」

卓: 「......」


馬沙: 「啊,忘記恭喜你終於追到雲妮。」

卓: 「有甚麼恭喜不恭喜,早知她對我有意思。」


馬沙: 「有時間記得上我Blog看看我寫的"馬沙筆記"比下意見好嗎?」

卓: 「一定一定!」......心想:「點同我比!」

唔止離地,直頭上咗太空

今時今日,如果同一地點有Pizza Express、Pizza Hut,甚至Spaghetti House, 識食一定揀Pizza Express吧!

Pizza Express早已進註各大型商場,左生如果話唔知,咁佢唔止離地,直頭上咗太空!佢仲話覺得Pizza Express 平平無奇,以Pizza Express 嘅價錢定位及級數,左生唔會將Pizza Express 嘅Pizza 同Aqua 或 Giando Italian Restaurant & Bar 嘅Pizza比較掛!

即係你無理由食慣Main St. Deli 嘅漢堡包,之後話老麥嘅漢堡包平平無奇囉..... 都唔同級數!
 

 Giando Italian Restaurant & Bar (黑松露 Pizza)

Main St. Deli (12oz Monster Burger) HK$188

買Pizza公司

中環擺花街街尾有一間意大利薄餅店，叫做Pizza Express，佔地下舖位及一樓，加埋面積都唔夠一千平方呎（以肉眼所見），左丁山平時經過都冇乜留意，畢竟已過咗食Pizza嘅青春年代，你估係 Pizza Hut由怡和引入香港初期咁巴閉咩。當年「必勝客」中環店設於置地廣場地庫，每日中午門口就排晒長龍，生意多到做唔切。而今，薄餅已完全失去新鮮感，點吸 引到尖嘴食客呀。
不過睇到有報導話內地一家私募資金以120億港元收購咗Pizza Express全盤生意，先至知道呢間薄餅連鎖店是英國公司，在英國發跡，有百零間分店，亞洲香港亦有分支，內地中資公司一啖吞咗佢，肯定係想將個品牌帶 入大陸，在內地與必勝客火併啦。大陸嘅必勝客現在不知情況如何，以前就係華南特許經營權歸怡和，北方特許經營權另歸他人嘅。
既然公司品牌加業務值 120億港元咁多，左丁山睇完報導之後，趁當日無預約去飯局，於是走去幫襯吓，試吓凱撒沙律與海鮮薄餅，只覺平平無奇，與一般中環西餐店比較，一般啫，無 競爭必勝把握噃，何解品牌值咁多錢？想唔通。可能自己已與市場脫節，唔識揀蟀咯，新一派投資專家有的是錢，買新生意夠膽落注，口噏噏有中國13億人市場概 念，就一於冇有怕，祝佢地好運啦。
以120億元買一家公司，應該唔會全部用投資基金嘅資本支付嘅，欲要增加IRR（內部回報率），標準方法係收購 價部份以本身資金支付，部份向銀行借錢，又有部份係延期付款，盡量利用Pizza Express嘅現金流嚟償還貸款及利息。呢日碰見一位年青後輩，係銀行trainee，正在貸款部學習，於是考吓佢：「假如基金問貴行借錢買一間薄餅公 司，銀行叫你負責，你敢唔敢膽借？」後輩騎騎笑：「世叔，唔好考我啦，我冇資格。」資格就係暫時未有，不過如要學習複雜信貸案件，世姪不妨做一個虛擬作 業，磨練吓自己。不過世姪都識得問：「私募基金買高科技公司博有創意發明，一鋪爆紅，我明白嘅，但買Pizza公司，究竟係乜概念？世界上好多人識做 pizza嘅啫！」唔，呢啲叫做「收入需求彈性大於一」（income elasticity of demand）概念，就係博新興國家地區GDP增長快，民眾對非傳統食物、消費品嘅需求增加得更加快，過往三十年呢個概念未錯過，但pizza在亞洲發展 有40年歷史，已成為成熟產品，其收入需求彈性可能已經下降咗咯。 左丁山