星期三, 6月 06, 2007

高清廣播

等了好幾年,一直只聞樓梯響的高清電視廣播,終於在今年底前正式推出。其實高清電視廣播已經不是甚麼新事物,美國2000年推出,日本及韓國已播放多年,就連中國亦比香港行得快。香港幾乎是世界上最快接受各科技產品的地方之一。不論手提電話、電腦產品或是影音產品,香港人都樂於試用。

何解高清電視廣播會比其他國家落後呢?

答案只有一個,就是我們有一個永遠議而不決的無能政府。或許電訊管理局一眾官員對現時的電視廣播制式及質素相當滿意,又或許他們已沒有接受新科技的決心。以致當局在選擇廣播制式一事上一講就好幾年。其實放在他們面前,只有歐美採用的DVB-T制式及中國採用的DVB-TH制式可供選擇。而業內人士早已指出,要與中國電視廣播接軌,香港必須跟隨中國採用的制式方可。

若要享受高清廣播,市民就要購買由數百元至千元不等的接收器。如你這兩年已轉用LCD或等離子電視,相信是最不幸一群,因這兩年推出市場的多數不是全高清面板,到時又要加解碼器,又不能接收最佳畫面。

如果你還是用舊式的單槍(CRT)電視,你就是好彩的一群,因你的電視基本上不適合播放任何高清影像,馬沙認為大家到時唔好浪費金錢。 等到年底高清電視廣播後,市場相信已有大量不同尺寸、全高清面板 (1,920 x 1,080) 及已內置解碼器的新款電視可供選擇。

(6月6日刊於《am730》)

8 則留言:

Wheel 說...

"或許他們已沒有接受新科技的決心"

或許佢哋唔睇電視...

匿名 說...

始終都係市場需要問題, 而且這些科技不能為電視台帶來突破性收益. 政府沒有理由強行推動高清廣播, 電視台也沒必要冒險投資. 正如當年3g發牌, 投資未回本之下可能己經被wifi之類取代.

匿名 說...

馬沙兄,

正好俾你講中哂AK依兩年,即使公司有discount俾Staff買LCD TV,但係死都唔出手既原因...

AK寧願等臨近年底果陣,依家市場果d LCD TV因為無內置解碼器而身價暴跌既時候先擇肥而噬(依家市場上有1920 x 1080既Full HD LCD TV,畫質問題係解決到既),平價入貨,加多個「老鴨」買既解碼器(二百蚊有找)可能仲除笨有精...

匿名 說...

sorry , 沙兄, 我唔係好同意你既講法

中國高清電視制式今年年初先確定, 作為一個有責任既政府, 更係要等埋中國決定用咩制式先決定用乜制式!

若果一早跟歐美制式, 恐怕我地08年睇既奧運係全中國唯一睇唔到高清既地方, 到時真係笑死人....

我都唔係好識野,

有咩還望沙兄及其他卜友指點.

青b俠

馬沙 說...

Wheel 兄,
"或許佢哋唔睇電視... "
但佢哋老婆可能想睇高清"溏心風暴"

匿名,
"電視台也沒必要冒險投資"
免費台唔投資,一樣有其它人投資"

ak兄,
同你一樣,等咗幾年都係等已內置解碼器的Full HD LCD TV.
加多個「老鴨」買既解碼器呢...我估未必,到時是旦買部錄影機都有啦!

青b俠,
就算用唔同制式,仍可收看,只是電視台要做多些功夫吧!
難道下年用歐美制式的國家,冇得睇08年既高清奧運嗎?

匿名 說...

Does anybdy can tell me what brand has 32" Full HD.

My house is too small to put 42"

:(

波蘿游 說...

各位:

小弟雖然已經離開政府十幾年,因為從事烏TMT行業,對呢行有D認識,恐怕今次都要幫官府解釋一下:http://www.ofta.gov.hk/en/tas/others/ta20070604.pdf

決定DTV制式唔係政府,而係兩間電視台的商業決定,然後佢地propose俾政府確認。實情係兩間電視台年幾前已經成立一些試驗DTV電視發射站,主要用歐洲制式,冇試大陸制式(因為冇發射機種),拖拖拉拉,最近先到大陸考察,最近兩三個月先反過來確認大陸制式。

咁遲主要是電視台拖拉好多時間,原因有二:

1. 希望拖到大陸制式都確認 (大陸內部制式都有幾種選擇,典型內部鬥爭),才作選擇,因為影響將來節目到大陸落地D技術兼容問題

2. 拖得就拖,因為睇唔到賺錢business model,但投資好大,發射機,大廈網絡,機頂盒 (plasma / LCD 觀眾自備),連D道具都要更新,因為在高清電視下,會顯得現在D道具太假,好似D發泡膠道具,就可能要用木或甚至金屬替代,可想而知要用幾多錢。但節目吸引性就未必增加好多,好似溏心風景,有冇高清又有鬼分別,即係高清唔能夠產生額外收入。

匿名 說...

電視只是媒体,更重要的是內容,試問香港本地的電視節目質素又有幾高?高清廣播不等同高質節目,只是近年香港人有錢了,才心思思換部電視,如果是早幾年......