星期三, 10月 10, 2007

事假

早幾星期的一天午飯前,員工R突然走入馬沙房間,說有緊要事,下午需要請事假。馬沙見員工R神情哀傷,心知不妙,二話不說就批准,仲同員工R講可以立即離開,辦理要事。

第二天大清早,員工R致電馬沙,說他婆婆剛過身。他說當天有重要會議要開,問馬沙可否為他作出特別安排,另派同事去開會。如馬沙容許的話,還想多放兩天假期,好使他能協助家人為其婆婆辦理身後事。馬沙聽完後,就叫員工R放心,會議馬沙會親自去開,辦白事要緊,記住搞掂先好返來。

對於有員工突發性要求放假辦理白事,已經係馬沙人生第二次。記得對上一次是發生在兩年前,而馬沙清楚記得當年的回答幾乎同今次一樣:「辦白事要緊,記住搞掂先好返來。」

作為企管人,馬沙覺得不管員工手頭上工作有幾趕,有些事假係諗都唔使諗,就要立即批准。

第一樣係喜事,即員工收到太太臨盆在即的通知,應該即走。因為每個孕婦生產時,丈夫都應該在旁。再講,馬沙相信所有準父親都想第一時間見到自己初出世嬰兒,因為一生人真係無幾多次。

第二樣就是所謂白事。這個世界,沒有人想放這類事假。而假設每個打工仔一生只會放三幾次呢類事假,一個企管人要批這類事假的機會唔會多。

曾聽說友人老闆因要趕業績報告,差點令友人出席不到其至親喪禮。俾着係我,一定反面。

(10月10日刊於《am730》)

5 則留言:

dog o 說...

小弟少時有日向老闆提出當天如果沒有什麼特別事情, 想當日準時收工; 老闆立刻自然道:嘿! 收工約左人呀!?

...都係既! 收工趕去紅磡大酒店...

老闆立刻尷尷尬尬, 補返左D適當說話...小弟都聽唔入耳...只知應引以為鑑!

Winnie 說...

好同意!

我試過老板唔批假比我辦媽媽白事,同老板反面,即刻走人.

hermanwest 說...

同CK互相呼應wor

Severus 說...

相信沒有人會拿家人的白事來當請假或射波的籍口吧..如果是, 那人要不要都算吧..我深信咁樣會折福架

檸檸啡 說...

白事都唔俾人放既老闆,係人都反面,支持馬沙兄 ~